कालीसहस्रनामस्तोत्रम् Kalisahasranamastotra from Brihannilatantra

बृहन्नीलतन्त्रान्तर्गतम्श्रीदेव्युवाच ।पूर्वं हि सूचितं देव कालीनामसहस्रकम् ।तद्वदस्व महादेव यदि स्नेहोऽस्ति मां प्रति ॥ १॥

bṛhannīlatantrāntargatamśrīdevyuvāca |pūrvaṃ hi sūcitaṃ deva kālīnāmasahasrakam |tadvadasva mahādeva yadi sneho'sti māṃ prati || 1||

श्रीभैरव उवाच ।तन्त्रेऽस्मिन् परमेशानि कालीनामसहस्रकम् ।शृणुष्वैकमना देवि भक्तानां प्रीतिवर्द्धनम् ॥ २॥

śrībhairava uvāca |tantre'smin parameśāni kālīnāmasahasrakam |śṛṇuṣvaikamanā devi bhaktānāṃ prītivarddhanam || 2||

ॐ अस्याः श्रीकालीदेव्याः मन्त्रसहस्रनामस्तोत्रस्यमहाकालभैरव ऋषिः । अनुष्टुप् छन्दः । श्रीकाली देवता ।क्रीं बीजम् । हूं शक्तिः । ह्रीं कीलकम् । धर्मार्थकाममोक्षार्थे विनियोगः ॥कालिका कामदा कुल्ला भद्रकाली गणेश्वरी ।भैरवी भैरवप्रीता भवानी भवमोचिनी ॥ ३॥

oṃ asyāḥ śrīkālīdevyāḥ mantrasahasranāmastotrasyamahākālabhairava ṛṣiḥ | anuṣṭup chandaḥ | śrīkālī devatā |krīṃ bījam | hūṃ śaktiḥ | hrīṃ kīlakam | dharmārthakāmamokṣārthe viniyogaḥ ||kālikā kāmadā kullā bhadrakālī gaṇeśvarī |bhairavī bhairavaprītā bhavānī bhavamocinī || 3||

कालरात्रिर्महारात्रिर्मोहरात्रिश्च मोहिनी ।महाकालरता सूक्ष्मा कौलव्रतपरायणा ॥ ४॥

kālarātrirmahārātrirmoharātriśca mohinī |mahākālaratā sūkṣmā kaulavrataparāyaṇā || 4||

कोमलाङ्गी करालाङ्गी कमनीया वराङ्गना ।गन्धचन्दनदिग्धाङ्गी सती साध्वी पतिव्रता ॥ ५॥

komalāṅgī karālāṅgī kamanīyā varāṅganā |gandhacandanadigdhāṅgī satī sādhvī pativratā || 5||

काकिनी वर्णरूपा च महाकालकुटुम्बिनी ।कामहन्त्री कामकला कामविज्ञा महोदया ॥ ६॥

kākinī varṇarūpā ca mahākālakuṭumbinī |kāmahantrī kāmakalā kāmavijñā mahodayā || 6||

कान्तरूपा महालक्ष्मीर्महाकालस्वरूपिणी ।कुलीना कुलसर्वस्वा कुलवर्त्मप्रदर्शिका ॥ ७॥

kāntarūpā mahālakṣmīrmahākālasvarūpiṇī |kulīnā kulasarvasvā kulavartmapradarśikā || 7||

कुलरूपा चकोराक्षी श्रीदुर्गा दुर्गनाशिनी ।कन्या कुमारी गौरी तु कृष्णदेहा महामनाः ॥ ८॥

kularūpā cakorākṣī śrīdurgā durganāśinī |kanyā kumārī gaurī tu kṛṣṇadehā mahāmanāḥ || 8||

कृष्णाङ्गी नीलदेहा च पिङ्गकेशी कृशोदरी ।पिङ्गाक्षी कमलप्रीता काली कालपराक्रमा ॥ ९॥

kṛṣṇāṅgī nīladehā ca piṅgakeśī kṛśodarī |piṅgākṣī kamalaprītā kālī kālaparākramā || 9||

कलानाथप्रिया देवी कुलकान्ताऽपराजिता ।उग्रतारा महोग्रा च तथा चैकजटा शिवा ॥ १०॥

kalānāthapriyā devī kulakāntā'parājitā |ugratārā mahogrā ca tathā caikajaṭā śivā || 10||

नीला घना बलाका च कालदात्री कलात्मिका ।नारायणप्रिया सूक्ष्मा वरदा भक्तवत्सला ॥ ११॥

nīlā ghanā balākā ca kāladātrī kalātmikā |nārāyaṇapriyā sūkṣmā varadā bhaktavatsalā || 11||

वरारोहा महाबाणा किशोरी युवती सती ।दीर्घाङ्गी दीर्घकेशा च नृमुण्डधारिणी तथा ॥ १२॥

varārohā mahābāṇā kiśorī yuvatī satī |dīrghāṅgī dīrghakeśā ca nṛmuṇḍadhāriṇī tathā || 12||

मालिनी नरमुण्डाली शवमुण्डास्थिधारिणी ।रक्तनेत्रा विशालाक्षी सिन्दूरभूषणा मही ॥ १३॥

mālinī naramuṇḍālī śavamuṇḍāsthidhāriṇī |raktanetrā viśālākṣī sindūrabhūṣaṇā mahī || 13||

घोररात्रिर्महारात्रिर्घोरान्तकविनाशिनी ।नारसिंही महारौद्री नीलरूपा वृषासना ॥ १४॥

ghorarātrirmahārātrirghorāntakavināśinī |nārasiṃhī mahāraudrī nīlarūpā vṛṣāsanā || 14||

विलोचना विरूपाक्षी रक्तोत्पलविलोचना ।पूर्णेन्दुवदना भीमा प्रसन्नवदना तथा ॥ १५॥

vilocanā virūpākṣī raktotpalavilocanā |pūrṇenduvadanā bhīmā prasannavadanā tathā || 15||

पद्मनेत्रा विशालाक्षी शरज्ज्योत्स्नासमाकुला ।प्रफुल्लपुण्डरीकाभलोचना भयनाशिनी ॥ १६॥

padmanetrā viśālākṣī śarajjyotsnāsamākulā |praphullapuṇḍarīkābhalocanā bhayanāśinī || 16||

अट्टहासा महोच्छ्वासा महाविघ्नविनाशिनी ।कोटराक्षी कृशग्रीवा कुलतीर्थप्रसाधिनी ॥ १७॥

aṭṭahāsā mahocchvāsā mahāvighnavināśinī |koṭarākṣī kṛśagrīvā kulatīrthaprasādhinī || 17||

कुलगर्तप्रसन्नास्या महती कुलभूषिका ।बहुवाक्यामृतरसा चण्डरूपातिवेगिनी ॥ १८॥

kulagartaprasannāsyā mahatī kulabhūṣikā |bahuvākyāmṛtarasā caṇḍarūpātiveginī || 18||

वेगदर्पा विशालैन्द्री प्रचण्डचण्डिका तथा ।चण्डिका कालवदना सुतीक्ष्णनासिका तथा ॥ १९॥

vegadarpā viśālaindrī pracaṇḍacaṇḍikā tathā |caṇḍikā kālavadanā sutīkṣṇanāsikā tathā || 19||

दीर्घकेशी सुकेशी च कपिलाङ्गी महारुणा ।प्रेतभूषणसम्प्रीता प्रेतदोर्दण्डघण्टिका ॥ २०॥

dīrghakeśī sukeśī ca kapilāṅgī mahāruṇā |pretabhūṣaṇasamprītā pretadordaṇḍaghaṇṭikā || 20||

शङ्खिनी शङ्खमुद्रा च शङ्खध्वनिनिनादिनी ।श्मशानवासिनी पूर्णा पूर्णेन्दुवदना शिवा ॥ २१॥

śaṅkhinī śaṅkhamudrā ca śaṅkhadhvanininādinī |śmaśānavāsinī pūrṇā pūrṇenduvadanā śivā || 21||

शिवप्रीता शिवरता शिवासनसमाश्रया ।पुण्यालया महापुण्या पुण्यदा पुण्यवल्लभा ॥ २२॥

śivaprītā śivaratā śivāsanasamāśrayā |puṇyālayā mahāpuṇyā puṇyadā puṇyavallabhā || 22||

नरमुण्डधरा भीमा भीमासुरविनाशिनी ।दक्षिणा दक्षिणाप्रीता नागयज्ञोपवीतिनी ॥ २३॥

naramuṇḍadharā bhīmā bhīmāsuravināśinī |dakṣiṇā dakṣiṇāprītā nāgayajñopavītinī || 23||

दिगम्बरी महाकाली शान्ता पीनोन्नतस्तनी ।घोरासना घोररूपा सृक्प्रान्ते रक्तधारिका ॥ २४॥

digambarī mahākālī śāntā pīnonnatastanī |ghorāsanā ghorarūpā sṛkprānte raktadhārikā || 24||

महाध्वनिः शिवासक्ता महाशब्दा महोदरी ।कामातुरा कामसक्ता प्रमत्ता शक्तभावना ॥ २५॥

mahādhvaniḥ śivāsaktā mahāśabdā mahodarī |kāmāturā kāmasaktā pramattā śaktabhāvanā || 25||

समुद्रनिलया देवी महामत्तजनप्रिया ।कर्षिता कर्षणप्रीता सर्वाकर्षणकारिणी ॥ २६॥

samudranilayā devī mahāmattajanapriyā |karṣitā karṣaṇaprītā sarvākarṣaṇakāriṇī || 26||

वाद्यप्रीता महागीतरक्ता प्रेतनिवासिनी ।नरमुण्डसृजा गीता मालिनी माल्यभूषिता ॥ २७॥

vādyaprītā mahāgītaraktā pretanivāsinī |naramuṇḍasṛjā gītā mālinī mālyabhūṣitā || 27||

चतुर्भुजा महारौद्री दशहस्ता प्रियातुरा ।जगन्माता जगद्धात्री जगती मुक्तिदा परा ॥ २८॥

caturbhujā mahāraudrī daśahastā priyāturā |jaganmātā jagaddhātrī jagatī muktidā parā || 28||

जगद्धात्री जगत्त्रात्री जगदानन्दकारिणी ।जगज्जीवमयी हैमवती माया महाकचा ॥ २९॥

jagaddhātrī jagattrātrī jagadānandakāriṇī |jagajjīvamayī haimavatī māyā mahākacā || 29||

नागाङ्गी संहृताङ्गी च नागशय्यासमागता ।कालरात्रिर्दारुणा च चन्द्रसूर्यप्रतापिनी ॥ ३०॥

nāgāṅgī saṃhṛtāṅgī ca nāgaśayyāsamāgatā |kālarātrirdāruṇā ca candrasūryapratāpinī || 30||

नागेन्द्रनन्दिनी देवकन्या च श्रीमनोरमा ।विद्याधरी वेदविद्या यक्षिणी शिवमोहिनी ॥ ३१॥

nāgendranandinī devakanyā ca śrīmanoramā |vidyādharī vedavidyā yakṣiṇī śivamohinī || 31||

राक्षसी डाकिनी देवमयी सर्वजगज्जया ।श्रुतिरूपा तथाग्नेयी महामुक्तिर्जनेश्वरी ॥ ३२॥

rākṣasī ḍākinī devamayī sarvajagajjayā |śrutirūpā tathāgneyī mahāmuktirjaneśvarī || 32||

पतिव्रता पतिरता पतिभक्तिपरायणा ।सिद्धिदा सिद्धिसंदात्री तथा सिद्धजनप्रिया ॥ ३३॥

pativratā patiratā patibhaktiparāyaṇā |siddhidā siddhisaṃdātrī tathā siddhajanapriyā || 33||

कर्त्रिहस्ता शिवारूढा शिवरूपा शवासना ।तमिस्रा तामसी विज्ञा महामेघस्वरूपिणी ॥ ३४॥

kartrihastā śivārūḍhā śivarūpā śavāsanā |tamisrā tāmasī vijñā mahāmeghasvarūpiṇī || 34||

चारुचित्रा चारुवर्णा चारुकेशसमाकुला ।चार्वङ्गी चञ्चला लोला चीनाचारपरायणा ॥ ३५॥

cārucitrā cāruvarṇā cārukeśasamākulā |cārvaṅgī cañcalā lolā cīnācāraparāyaṇā || 35||

चीनाचारपरा लज्जावती जीवप्रदाऽनघा ।सरस्वती तथा लक्ष्मीर्महानीलसरस्वती ॥ ३६॥

cīnācāraparā lajjāvatī jīvapradā'naghā |sarasvatī tathā lakṣmīrmahānīlasarasvatī || 36||

गरिष्ठा धर्मनिरता धर्माधर्मविनाशिनी ।विशिष्टा महती मान्या तथा सौम्यजनप्रिया ॥ ३७॥

gariṣṭhā dharmaniratā dharmādharmavināśinī |viśiṣṭā mahatī mānyā tathā saumyajanapriyā || 37||

भयदात्री भयरता भयानकजनप्रिया ।वाक्यरूपा छिन्नमस्ता छिन्नासुरप्रिया सदा ॥ ३८॥

bhayadātrī bhayaratā bhayānakajanapriyā |vākyarūpā chinnamastā chinnāsurapriyā sadā || 38||

ऋग्वेदरूपा सावित्री रागयुक्ता रजस्वला ।रजःप्रीता रजोरक्ता रजःसंसर्गवर्द्धिनी ॥ ३९॥

ṛgvedarūpā sāvitrī rāgayuktā rajasvalā |rajaḥprītā rajoraktā rajaḥsaṃsargavarddhinī || 39||

रजःप्लुता रजःस्फीता रजःकुन्तलशोभिता ।कुण्डली कुण्डलप्रीता तथा कुण्डलशोभिता ॥ ४०॥

rajaḥplutā rajaḥsphītā rajaḥkuntalaśobhitā |kuṇḍalī kuṇḍalaprītā tathā kuṇḍalaśobhitā || 40||

रेवती रेवतप्रीता रेवा चैरावती शुभा ।शक्तिनी चक्रिणी पद्मा महापद्मनिवासिनी ॥ ४१॥

revatī revataprītā revā cairāvatī śubhā |śaktinī cakriṇī padmā mahāpadmanivāsinī || 41||

पद्मालया महापद्मा पद्मिनी पद्मवल्लभा ।पद्मप्रिया पद्मरता महापद्मसुशोभिता ॥ ४२॥

padmālayā mahāpadmā padminī padmavallabhā |padmapriyā padmaratā mahāpadmasuśobhitā || 42||

शूलहस्ता शूलरता शूलिनी शूलसङ्गिका ।पिनाकधारिणी वीणा तथा वीणावती मघा ॥ ४३॥

śūlahastā śūlaratā śūlinī śūlasaṅgikā |pinākadhāriṇī vīṇā tathā vīṇāvatī maghā || 43||

रोहिणी बहुलप्रीता तथा वाहनवर्द्धिता ।रणप्रीता रणरता रणासुरविनाशिनी ॥ ४४॥

rohiṇī bahulaprītā tathā vāhanavarddhitā |raṇaprītā raṇaratā raṇāsuravināśinī || 44||

रणाग्रवर्तिनी राणा रणाग्रा रणपण्डिता ।जटायुक्ता जटापिङ्गा वज्रिणी शूलिनी तथा ॥ ४५॥

raṇāgravartinī rāṇā raṇāgrā raṇapaṇḍitā |jaṭāyuktā jaṭāpiṅgā vajriṇī śūlinī tathā || 45||

रतिप्रिया रतिरता रतिभक्ता रतातुरा ।रतिभीता रतिगता महिषासुरनाशिनी ॥ ४६॥

ratipriyā ratiratā ratibhaktā ratāturā |ratibhītā ratigatā mahiṣāsuranāśinī || 46||

रक्तपा रक्तसम्प्रीता रक्ताख्या रक्तशोभिता ।रक्तरूपा रक्तगता रक्तखर्परधारिणी ॥ ४७॥

raktapā raktasamprītā raktākhyā raktaśobhitā |raktarūpā raktagatā raktakharparadhāriṇī || 47||

गलच्छोणितमुण्डाली कण्ठमालाविभूषिता ।वृषासना वृषरता वृषासनकृताश्रया ॥ ४८॥

galacchoṇitamuṇḍālī kaṇṭhamālāvibhūṣitā |vṛṣāsanā vṛṣaratā vṛṣāsanakṛtāśrayā || 48||

व्याघ्रचर्मावृता रौद्री व्याघ्रचर्मावली तथा ।कामाङ्गी परमा प्रीता परासुरनिवासिनी ॥ ४९॥

vyāghracarmāvṛtā raudrī vyāghracarmāvalī tathā |kāmāṅgī paramā prītā parāsuranivāsinī || 49||

तरुणा तरुणप्राणा तथा तरुणमर्दिनी ।तरुणप्रेमदा वृद्धा तथा वृद्धप्रिया सती ॥ ५०॥

taruṇā taruṇaprāṇā tathā taruṇamardinī |taruṇapremadā vṛddhā tathā vṛddhapriyā satī || 50||