विष्णुकवचं वा ब्रह्माण्डपावनकवचम् Shri Vishnu Kavacha (Brahmavaivarta Purana)

शौनक उवाच ।किं स्तोत्रं कवचं विष्णोर्मन्त्रपूजाविधिः पुरा ।दत्तो वसिष्ठैस्ताभ्यां च तं भवान् वक्तुमर्हति ॥ ८॥

śaunaka uvāca |kiṃ stotraṃ kavacaṃ viṣṇormantrapūjāvidhiḥ purā |datto vasiṣṭhaistābhyāṃ ca taṃ bhavān vaktumarhati || 8||

द्वादशाक्षरमन्त्रं च शूलिनः कवचादिकम् ।दत्तं गन्धर्वराजाय वसिष्ठेन च किं पुरा ॥ ९॥

dvādaśākṣaramantraṃ ca śūlinaḥ kavacādikam |dattaṃ gandharvarājāya vasiṣṭhena ca kiṃ purā || 9||

तदपि ब्रूहि हे सौते श्रोतुं कौतूहलं मम ।शङ्करस्तोत्रकवचं मन्त्रं दुर्गविनाशनम् ॥ १०॥

tadapi brūhi he saute śrotuṃ kautūhalaṃ mama |śaṅkarastotrakavacaṃ mantraṃ durgavināśanam || 10||

सौतिरुवाच ।तुष्टाव येन स्तोत्रेण मालती परमेश्वरम् ।तदेव स्तोत्रं दत्तं च मन्त्रं च कवचं शृणु ॥ ११॥

sautiruvāca |tuṣṭāva yena stotreṇa mālatī parameśvaram |tadeva stotraṃ dattaṃ ca mantraṃ ca kavacaṃ śṛṇu || 11||

ओं नमो भगवते रासमण्डलेशाय स्वाहा ।इमं मन्त्रं कल्पतरुं प्रदद्यौ षोडशाक्षरम् ॥ १२॥

oṃ namo bhagavate rāsamaṇḍaleśāya svāhā |imaṃ mantraṃ kalpataruṃ pradadyau ṣoḍaśākṣaram || 12||

पुरा दत्तं कुमाराय ब्रह्मणा पुष्करे हरेः ।पुरा दत्तं च कृष्णेन गोलोके शङ्कराय च ॥ १३॥

purā dattaṃ kumārāya brahmaṇā puṣkare hareḥ |purā dattaṃ ca kṛṣṇena goloke śaṅkarāya ca || 13||

ध्यानं च विष्णोर्वेदोक्तं शाश्वतं सर्वदुर्लभम् ।मूलेन सर्वं देयं च नैवेद्यादिकमुत्तमम् ॥ १४॥

dhyānaṃ ca viṣṇorvedoktaṃ śāśvataṃ sarvadurlabham |mūlena sarvaṃ deyaṃ ca naivedyādikamuttamam || 14||

अतीवगुप्तकवचं पितुर्वक्त्रान्मया श्रुतम् ।पित्रे दत्तं पुरा विप्र गङ्गायां शूलिना ध्रुवम् ॥ १५॥

atīvaguptakavacaṃ piturvaktrānmayā śrutam |pitre dattaṃ purā vipra gaṅgāyāṃ śūlinā dhruvam || 15||

शूलिने ब्रह्मणे दत्तं गोलोके रासमण्डले ।धर्माय गोपीकान्तेन कृपया परमाद्भुतम् ॥ १६॥

śūline brahmaṇe dattaṃ goloke rāsamaṇḍale |dharmāya gopīkāntena kṛpayā paramādbhutam || 16||

ब्रह्मोवाच ।राधाकान्त महाभाग कवचं यं प्रकाशितम् ।ब्रह्माण्डपावनं नाम कृपया कथय प्रभो ॥ १७॥

brahmovāca |rādhākānta mahābhāga kavacaṃ yaṃ prakāśitam |brahmāṇḍapāvanaṃ nāma kṛpayā kathaya prabho || 17||

मां महेशं च धर्मं च भक्तं च भक्तवत्सल ।त्वं प्रसादेन पुत्रेभ्यो दास्यामि भक्तिसंयुतः ॥ १८॥

māṃ maheśaṃ ca dharmaṃ ca bhaktaṃ ca bhaktavatsala |tvaṃ prasādena putrebhyo dāsyāmi bhaktisaṃyutaḥ || 18||

श्रीकृष्ण उवाच ।शृणु वक्ष्यामि ब्रह्मेश धर्मदं कवचं परम् ।अहं दास्यामि युष्मभ्यः गोपनीयं सुदुर्लभम् ॥ १९॥

śrīkṛṣṇa uvāca |śṛṇu vakṣyāmi brahmeśa dharmadaṃ kavacaṃ param |ahaṃ dāsyāmi yuṣmabhyaḥ gopanīyaṃ sudurlabham || 19||

यस्मै कस्मै न दातव्यं प्राणतुल्यं ममैव हि ।यत्तेजो मम देहेऽस्ति तत्तेजः कवचेऽपि च ॥ २०॥

yasmai kasmai na dātavyaṃ prāṇatulyaṃ mamaiva hi |yattejo mama dehe'sti tattejaḥ kavace'pi ca || 20||

कुरु सृष्टिमिदं धृत्वा धाता त्रिजगतां भव ।संहर्ता भव हे शम्भो मम तुल्यो भवे भव ॥ २१॥

kuru sṛṣṭimidaṃ dhṛtvā dhātā trijagatāṃ bhava |saṃhartā bhava he śambho mama tulyo bhave bhava || 21||

हे धर्म त्वमिमं धृत्वा भव साक्षी च कर्मणाम् ।तपसां फलदाता च यूयं भवत मद्वरात् ॥ २२॥

he dharma tvamimaṃ dhṛtvā bhava sākṣī ca karmaṇām |tapasāṃ phaladātā ca yūyaṃ bhavata madvarāt || 22||

ब्रह्माण्डपावनस्यास्य कवचस्य हरिः स्वयम् ।ऋषिश्च्छन्दश्च गायत्री देवोऽहं जगदीश्वरः ॥ २३॥

brahmāṇḍapāvanasyāsya kavacasya hariḥ svayam |ṛṣiścchandaśca gāyatrī devo'haṃ jagadīśvaraḥ || 23||

धर्मार्थकाममोक्षेषु विनियोगः प्रकीर्तितः ।त्रिलक्षवारपठनात् सिद्धिदं कवचं विधे ॥ २४॥

dharmārthakāmamokṣeṣu viniyogaḥ prakīrtitaḥ |trilakṣavārapaṭhanāt siddhidaṃ kavacaṃ vidhe || 24||

यो भवेत् सिद्धकवचो मम तुल्यो भवेत्तु सः ।तेजसा सिद्धियोगेन ज्ञानेन विक्रमेण च ॥ २५॥

yo bhavet siddhakavaco mama tulyo bhavettu saḥ |tejasā siddhiyogena jñānena vikrameṇa ca || 25||

प्रणवो मे शिरः पातु नमो रासेश्वराय च ।भालं पायान्नेत्रयुग्मं नमो राधेश्वराय च ॥ २६॥

praṇavo me śiraḥ pātu namo rāseśvarāya ca |bhālaṃ pāyānnetrayugmaṃ namo rādheśvarāya ca || 26||

कृष्णः पायात् श्रोत्रयुग्मं हे हरे घ्राणमेव च ।जिह्विकां वह्निजाया तु कृष्णायेति च सर्वतः ॥ २७॥

kṛṣṇaḥ pāyāt śrotrayugmaṃ he hare ghrāṇameva ca |jihvikāṃ vahnijāyā tu kṛṣṇāyeti ca sarvataḥ || 27||

श्रीकृष्णाय स्वाहेति च कण्ठं पातु षडक्षरः ।ह्रीं कृष्णाय नमो वक्त्रं क्लीं पूर्वश्च भुजद्वयम् ॥ २८॥

śrīkṛṣṇāya svāheti ca kaṇṭhaṃ pātu ṣaḍakṣaraḥ |hrīṃ kṛṣṇāya namo vaktraṃ klīṃ pūrvaśca bhujadvayam || 28||

नमो गोपाङ्गनेशाय स्कन्धावष्टाक्षरोऽवतु ।दन्तपंक्तिमोष्ठयुग्मं नमो गोपीश्वराय च ॥ २९॥

namo gopāṅganeśāya skandhāvaṣṭākṣaro'vatu |dantapaṃktimoṣṭhayugmaṃ namo gopīśvarāya ca || 29||

ओं नमो भगवते रासमण्डलेशाय स्वाहा ।स्वयं वक्षस्थलं पातु मन्त्रोऽयं षोडशाक्षरः ॥ ३०॥

oṃ namo bhagavate rāsamaṇḍaleśāya svāhā |svayaṃ vakṣasthalaṃ pātu mantro'yaṃ ṣoḍaśākṣaraḥ || 30||

ऐं कृष्णाय स्वाहेति च कर्णयुग्मं सदावतु ।ओं विष्णवे स्वाहेति च कङ्कालं सर्वतोऽवतु ॥ ३१॥

aiṃ kṛṣṇāya svāheti ca karṇayugmaṃ sadāvatu |oṃ viṣṇave svāheti ca kaṅkālaṃ sarvato'vatu || 31||

ओं हरये नम इति पृष्ठं पादं सदावतु ।ओं गोवर्धनधारिणे स्वाहा सर्वशरीरकम् ॥ ३२॥

oṃ haraye nama iti pṛṣṭhaṃ pādaṃ sadāvatu |oṃ govardhanadhāriṇe svāhā sarvaśarīrakam || 32||

प्राच्यां मां पातु श्रीकृष्णः आग्नेय्यां पातु माधवः ।दक्षिणे पातु गोपीशो नैरृत्यां नन्दनन्दनः ॥ ३३॥

prācyāṃ māṃ pātu śrīkṛṣṇaḥ āgneyyāṃ pātu mādhavaḥ |dakṣiṇe pātu gopīśo nairṛtyāṃ nandanandanaḥ || 33||

वारुण्यां पातु गोविन्दो वायव्यां राधिकेश्वरः ।उत्तरे पातु रासेश ऐशान्यामच्युतः स्वयम् ॥ ३४॥

vāruṇyāṃ pātu govindo vāyavyāṃ rādhikeśvaraḥ |uttare pātu rāseśa aiśānyāmacyutaḥ svayam || 34||

सन्ततं सर्वतः पातु परो नारायणः स्वयम् ।इति ते कथितं ब्रह्मन् कवचं परमाद्भुतम् ॥ ३५॥

santataṃ sarvataḥ pātu paro nārāyaṇaḥ svayam |iti te kathitaṃ brahman kavacaṃ paramādbhutam || 35||

मम जीवनतुल्यं च युष्मभ्यं दत्तमेव च ।अश्वमेधसहस्राणि वाजपेयशतानि च ।कलां नार्हन्ति तान्येव कवचस्यैव धारणात् ॥ ३६॥

mama jīvanatulyaṃ ca yuṣmabhyaṃ dattameva ca |aśvamedhasahasrāṇi vājapeyaśatāni ca |kalāṃ nārhanti tānyeva kavacasyaiva dhāraṇāt || 36||

गुरुमभ्यर्च्य विधिवद्वस्त्रालङ्कारचन्दनैः ।स्नात्वा तं च नमस्कृत्य कवचं धारयेत् सुधीः ॥ ३७॥

gurumabhyarcya vidhivadvastrālaṅkāracandanaiḥ |snātvā taṃ ca namaskṛtya kavacaṃ dhārayet sudhīḥ || 37||

कवचस्य प्रसादेन जीवन्मुक्तो भवेन्नरः ।यदि स्यात् सिद्धकवचो विष्णुरेव भवेत् द्विज ॥ ३८॥

kavacasya prasādena jīvanmukto bhavennaraḥ |yadi syāt siddhakavaco viṣṇureva bhavet dvija || 38||

इति श्रीब्रह्मवैवर्ते महापुरुषब्रह्माण्डपावनं कवचं समाप्तम् ॥ब्रह्मवैवर्तपुराण ब्रह्मखण्डं अध्याय १९ श्लोक ८-३८

iti śrībrahmavaivarte mahāpuruṣabrahmāṇḍapāvanaṃ kavacaṃ samāptam ||brahmavaivartapurāṇa brahmakhaṇḍaṃ adhyāya 19 śloka 8-38