रङ्गनाथमङ्गलम् Shri Ranganathamangalam

मङ्गलं रङ्गनाथाय मम नाथाय मङ्गलम् ।मङ्गलं लोकनाथाय लक्ष्मीनाथाय मङ्गलम् ॥ १॥

maṅgalaṃ raṅganāthāya mama nāthāya maṅgalam |maṅgalaṃ lokanāthāya lakṣmīnāthāya maṅgalam || 1||

लक्ष्मीचरणलाक्षाङ्ग साक्षि श्रीवत्सवक्षसे ।क्षेमङ्कराय सर्वेषां श्रीरङ्गेशाय मङ्गलम् ॥ २॥

lakṣmīcaraṇalākṣāṅga sākṣi śrīvatsavakṣase |kṣemaṅkarāya sarveṣāṃ śrīraṅgeśāya maṅgalam || 2||

सैकते सह्यकन्यायास्तरङ्गानिव शीतले ।अतिरङ्गं भुजङ्गेन्द्रे सुखसुप्ताय मङ्गलम् ॥ ३॥

saikate sahyakanyāyāstaraṅgāniva śītale |atiraṅgaṃ bhujaṅgendre sukhasuptāya maṅgalam || 3||

रजताद्रिनिषण्णेन्द्रनीलशैलानुकारिणे ।शेषे शयाय श्यामाय श्रीरङ्गेशाय मङ्गलम् ॥ ४॥

rajatādriniṣaṇṇendranīlaśailānukāriṇe |śeṣe śayāya śyāmāya śrīraṅgeśāya maṅgalam || 4||

बाहुमेकं प्रसार्यान्यं उपदायाति पन्नगम् ।निद्राणाय जगद्रक्षाजागरूकाय मङ्गलम् ॥ ५॥

bāhumekaṃ prasāryānyaṃ upadāyāti pannagam |nidrāṇāya jagadrakṣājāgarūkāya maṅgalam || 5||

परिष्कृतासनाम्भोजपरस्परतलाङ्घ्रये ।स्फुरत्पीताम्बरायास्तु श्रीरङ्गेशाय मङ्गलम् ॥ ६॥

pariṣkṛtāsanāmbhojaparasparatalāṅghraye |sphuratpītāmbarāyāstu śrīraṅgeśāya maṅgalam || 6||

दर्शिताभयमुद्राय भक्तानां तद्विरोधिनाम् ।दीप्तदिव्यायुधायास्तु श्रीरङ्गेशाय मङ्गलम् ॥ ७॥

darśitābhayamudrāya bhaktānāṃ tadvirodhinām |dīptadivyāyudhāyāstu śrīraṅgeśāya maṅgalam || 7||

सुस्मिताय सुनासाय सुदृशे सुन्दरभ्रुवे ।सुललाटकिरीटाय श्रीरङ्गेशाय मङ्गलम् ॥ ८॥

susmitāya sunāsāya sudṛśe sundarabhruve |sulalāṭakirīṭāya śrīraṅgeśāya maṅgalam || 8||

तरङ्गितदयैर्विश्वं अपाङ्गैरभिषिञ्चते ।संराजे सर्वलोकानां श्रीरङ्गेशाय मङ्गलम् ॥ ९॥

taraṅgitadayairviśvaṃ apāṅgairabhiṣiñcate |saṃrāje sarvalokānāṃ śrīraṅgeśāya maṅgalam || 9||

इक्ष्वाकोर्विधिलब्धाय विभीषणकृते पुनः ।विस्राणिताय रामेण श्रीरङ्गेशाय मङ्गलम् ॥ १०॥

ikṣvākorvidhilabdhāya vibhīṣaṇakṛte punaḥ |visrāṇitāya rāmeṇa śrīraṅgeśāya maṅgalam || 10||

ज्ञानसिद्धाञ्जनेनास्मद्देशिकैर्दर्शिताय मे ।नित्ये नित्यपूर्णाय श्रीरङ्गेशाय मङ्गलम् ॥ ११॥

jñānasiddhāñjanenāsmaddeśikairdarśitāya me |nitye nityapūrṇāya śrīraṅgeśāya maṅgalam || 11||

मङ्गलाशासनपरैर्मदाचार्यपुरोगमैः ।सर्वैश्च पूर्वैरराचार्यैः सत्कृतायास्तु मङ्गलम् ॥ १२॥

maṅgalāśāsanaparairmadācāryapurogamaiḥ |sarvaiśca pūrvairarācāryaiḥ satkṛtāyāstu maṅgalam || 12||

इति श्रीरङ्गनाथमङ्गलं सम्पूर्णम् ॥

iti śrīraṅganāthamaṅgalaṃ sampūrṇam ||