वृन्दावनाष्टकम् २ Shri Vrindavanashtakam

मुकुन्दमुरलीरवश्रवणफुल्लहृद्वल्लरीकदम्बककरम्बितप्रतिकदम्बकुञ्जान्तरा ।कलिन्दगिरिनन्दिनीकमलकन्दलान्दोलिनासुगन्धिरनिलेन मे शरणमस्तु वृन्दाटवी ॥ १॥

mukundamuralīravaśravaṇaphullahṛdvallarīkadambakakarambitapratikadambakuñjāntarā |kalindagirinandinīkamalakandalāndolināsugandhiranilena me śaraṇamastu vṛndāṭavī || 1||

विकुण्ठपुरसंश्रयाद् विपिनतोऽपि निःश्रेयसात्सहस्रगुणितां श्रियं प्रदुहती रसश्रेयसीम् ।चतुर्मुखमुखैरपि स्पृहिततार्णदेहोद्भवाजगद्गुरुभिरग्रिमैः शरणमस्तु वृन्दाटवी ॥ २॥

vikuṇṭhapurasaṃśrayād vipinato'pi niḥśreyasātsahasraguṇitāṃ śriyaṃ praduhatī rasaśreyasīm |caturmukhamukhairapi spṛhitatārṇadehodbhavājagadgurubhiragrimaiḥ śaraṇamastu vṛndāṭavī || 2||

अनारतविकस्वरव्रततिपुञ्जपुष्पावलीविसारिवरसौरभोद्गमरमाचमत्कारिणी ।अमन्दमकरन्दभृद्विटपिवृन्दवृन्दीकृतद्विरेफकुलवन्दिता शरणमस्तु वृन्दाटवी ॥ ३॥

anāratavikasvaravratatipuñjapuṣpāvalīvisārivarasaurabhodgamaramācamatkāriṇī |amandamakarandabhṛdviṭapivṛndavṛndīkṛtadvirephakulavanditā śaraṇamastu vṛndāṭavī || 3||

क्षणद्युतिघनश्रियोव्रजनवीनयूनोः पदैःसुवग्लुभिरलङ्कृता ललितलक्ष्मलक्ष्मीभरैः ।तयोर्नखरमण्डलीशिखरकेलिचर्योचितैर्वृता किशलयाङ्कुरैः शरणमस्तु वृन्दाटवी ॥ ४॥

kṣaṇadyutighanaśriyovrajanavīnayūnoḥ padaiḥsuvaglubhiralaṅkṛtā lalitalakṣmalakṣmībharaiḥ |tayornakharamaṇḍalīśikharakelicaryocitairvṛtā kiśalayāṅkuraiḥ śaraṇamastu vṛndāṭavī || 4||

व्रजेन्द्रसखनन्दिनीशुभतराधिकारक्रियाप्रभावजसुखोत्सवस्फुरितजङ्गमस्थावरा ।प्रलम्बदमनानुजध्वनितवंशिकाकाकलीरसज्ञमृगमण्डला शरणमस्तु वृन्दाटवी ॥ ५॥

vrajendrasakhanandinīśubhatarādhikārakriyāprabhāvajasukhotsavasphuritajaṅgamasthāvarā |pralambadamanānujadhvanitavaṃśikākākalīrasajñamṛgamaṇḍalā śaraṇamastu vṛndāṭavī || 5||

अमन्दमुदिरार्बुदाभ्यधिकमाधुरीमेदुरव्रजेन्द्रसुतवीक्षणोन्नट्ण्तनीलकण्ठोत्करा ।दिनेशसुहृदात्मजाकृतनिजाभिमानोल्लसल्लताखगमृगाङ्गना शरणमस्तु वृन्दाटवी ॥ ६॥

amandamudirārbudābhyadhikamādhurīmeduravrajendrasutavīkṣaṇonnaṭṇtanīlakaṇṭhotkarā |dineśasuhṛdātmajākṛtanijābhimānollasallatākhagamṛgāṅganā śaraṇamastu vṛndāṭavī || 6||

अगण्यगुणनागरीगणगरिष्ठगान्धर्विकामनोजरणचातुरीपिशुनकुञ्जपुञ्जोज्ज्वला ।जगत्त्रयकलागुरोर्ललितलास्यवल्गत्पदप्रयोगविधिसाक्षिणी शरणमस्तु वृन्दाटवी ॥ ७॥

agaṇyaguṇanāgarīgaṇagariṣṭhagāndharvikāmanojaraṇacāturīpiśunakuñjapuñjojjvalā |jagattrayakalāgurorlalitalāsyavalgatpadaprayogavidhisākṣiṇī śaraṇamastu vṛndāṭavī || 7||

वरिष्ठहरिदासतापदसमृद्धगोवर्धनामधूद्वहवधूचमत्कृतिनिवासरासस्थला ।अगूढगहनश्रियो मधुरिमव्रजेनोज्ज्वलाव्रजस्य सहजेन मे शरणमस्तु वृन्दाटवी ॥ ८॥

variṣṭhaharidāsatāpadasamṛddhagovardhanāmadhūdvahavadhūcamatkṛtinivāsarāsasthalā |agūḍhagahanaśriyo madhurimavrajenojjvalāvrajasya sahajena me śaraṇamastu vṛndāṭavī || 8||

इदं निखिलनिष्कुटावलिवरिष्ठवृन्दाटवीगुणस्मरणकारि यः पठति सुष्ठु पद्याष्टकम् ।वसन् व्यसनमुक्तधीरनिशमत्र सद्वासनःस पीतवसने वशी रतिमवाप्य विक्रीडति ॥ ९॥

idaṃ nikhilaniṣkuṭāvalivariṣṭhavṛndāṭavīguṇasmaraṇakāri yaḥ paṭhati suṣṭhu padyāṣṭakam |vasan vyasanamuktadhīraniśamatra sadvāsanaḥsa pītavasane vaśī ratimavāpya vikrīḍati || 9||

इति श्रीरूपगोस्वामिविरचितस्तवमालायां श्रीवृन्दावनाष्टकं सम्पूर्णम् ।

iti śrīrūpagosvāmiviracitastavamālāyāṃ śrīvṛndāvanāṣṭakaṃ sampūrṇam |