स्कन्ददण्डकम् Skanda Dandakam

ॐश्रीगणेशाय नमः ।

oṃśrīgaṇeśāya namaḥ |

(हरिगीतपुरेशश्रीसुब्रह्मण्यस्तुतिः हरिप्पाड् क्षेत्रं केरळेषु)

(harigītapureśaśrīsubrahmaṇyastutiḥ harippāḍ kṣetraṃ keraḷeṣu)

अयि! जय जयाम्भोजिनीजानिडिम्भोदयोद्यत्कुसुम्भोल्लसत्फुल्लदम्भोपमर्दप्रवीणप्रभाधोरणीपूरिताशावकाश! वरानन्दसान्द्रप्रकाश! ॥

ayi! jaya jayāmbhojinījāniḍimbhodayodyatkusumbhollasatphulladambhopamardapravīṇaprabhādhoraṇīpūritāśāvakāśa! varānandasāndraprakāśa! ||

सहैवोत्तरङ्गीभवत्सौहृदावेशमीशानपञ्चाननीपार्वतीवक्त्रसञ्चुम्ब्यमानाननाम्भोजषट्क! द्विषत्कायरक्तौघरज्यत्पृषत्क ! ॥

sahaivottaraṅgībhavatsauhṛdāveśamīśānapañcānanīpārvatīvaktrasañcumbyamānānanāmbhojaṣaṭka! dviṣatkāyaraktaugharajyatpṛṣatka ! ||

स्वकीयप्रभुद्वादशात्मद्रढीयस्तमप्रेमधामायितद्वादशाम्भोजवृन्दिष्ठबंहिष्ठसौन्दर्यधुर्येक्षण ! साधुसंरक्षण ! ॥

svakīyaprabhudvādaśātmadraḍhīyastamapremadhāmāyitadvādaśāmbhojavṛndiṣṭhabaṃhiṣṭhasaundaryadhuryekṣaṇa ! sādhusaṃrakṣaṇa ! ||

निजचरणवन्दनासक्तसद्वृन्दभूयस्तरानन्ददायिस्फुरन्मन्दहासद्युतिस्यन्ददूरीकृतामन्दकुन्दप्रसूनप्रभाकन्दळीसुन्दरत्वाभिमान ! समस्तामरस्तोमसंस्तूयमान ! ॥

nijacaraṇavandanāsaktasadvṛndabhūyastarānandadāyisphuranmandahāsadyutisyandadūrīkṛtāmandakundaprasūnaprabhākandaḷīsundaratvābhimāna ! samastāmarastomasaṃstūyamāna ! ||

जगत्याहितात्याहितादित्यपत्याहितप्रौढवक्षःस्थलोद्गच्छदास्रच्छटाधूमळच्छायशक्तिस्फुरत्पाणिपाथोरुह !भक्तमन्दारपृथ्वीरुह ॥

jagatyāhitātyāhitādityapatyāhitaprauḍhavakṣaḥsthalodgacchadāsracchaṭādhūmaḷacchāyaśaktisphuratpāṇipāthoruha !bhaktamandārapṛthvīruha ||

विहितपरिरम्भवल्लीवपुर्वल्लरीमेळनोल्लासितोरस्तटश्रीनिरस्ताचिरज्योतिराश्लिष्टसन्ध्याम्बुदानोपमाडम्बर !तप्तजाम्बूनदभ्राजमानाम्बर ! ॥

vihitaparirambhavallīvapurvallarīmeḷanollāsitorastaṭaśrīnirastācirajyotirāśliṣṭasandhyāmbudānopamāḍambara !taptajāmbūnadabhrājamānāmbara ! ||

पिञ्छभारप्रभामण्डलीपिण्डिताखण्डलेष्वासनाखण्डरोचिश्शिखण्डिप्रकाण्डोपरेद्योतमान !पदश्रीहृतश्रीगृहव्रातमान ! ॥

piñchabhāraprabhāmaṇḍalīpiṇḍitākhaṇḍaleṣvāsanākhaṇḍarociśśikhaṇḍiprakāṇḍoparedyotamāna !padaśrīhṛtaśrīgṛhavrātamāna ! ||

प्रथितहरिगीतालयालङ्कृते ! कार्तिकेय ! आर्तबन्धो !दयापूरसिन्धो ! नमस्ते समस्तेश ! मां पाहि पाहि प्रसीद प्रसीद ॥

prathitaharigītālayālaṅkṛte ! kārtikeya ! ārtabandho !dayāpūrasindho ! namaste samasteśa ! māṃ pāhi pāhi prasīda prasīda ||

कारुण्याम्बुनिधे! समस्तसुमनस्सन्तापदानोद्यतस्फायद्दर्पभरासुरप्रभुसमूलोन्मूलनैकायन !बिभ्राणः क्षितिभृद्विभेदनचणां शक्तिं त्वमाग्नेय ! मांपाहि श्रीहरिगीतपत्तनपते ! देहि श्रियं मे जवात् ॥

kāruṇyāmbunidhe! samastasumanassantāpadānodyatasphāyaddarpabharāsuraprabhusamūlonmūlanaikāyana !bibhrāṇaḥ kṣitibhṛdvibhedanacaṇāṃ śaktiṃ tvamāgneya ! māṃpāhi śrīharigītapattanapate ! dehi śriyaṃ me javāt ||

इति स्कन्ददण्डकं सम्पूर्णम् ।

iti skandadaṇḍakaṃ sampūrṇam |