त्र्यम्बकेश्वरमहिमवर्णनं Tryambakeshvara Mahima Varnanam

ईश्वरःत्रियम्बको नाम गिरिरस्ति प्रियतमो मम ।मन्दराच्चापि कैलासात्तथैव कनकाचलात् ॥ १॥

īśvaraḥtriyambako nāma girirasti priyatamo mama |mandarāccāpi kailāsāttathaiva kanakācalāt || 1||

ते निवासा महेशस्य त्रियम्बकगिरिस्त्वहम् ।त्रियम्बकेश्वरं नाम्ना तल्लिङ्गं परमाद्भुतम् ॥ २॥

te nivāsā maheśasya triyambakagiristvaham |triyambakeśvaraṃ nāmnā talliṅgaṃ paramādbhutam || 2||

तल्लिङ्गं येन दृष्टं स्यात्तेन दृष्टा त्रिलोकिका ।त्रैलोक्ये यानि लिङ्गानि तानि सर्वाणि शङ्करि ॥ ३॥

talliṅgaṃ yena dṛṣṭaṃ syāttena dṛṣṭā trilokikā |trailokye yāni liṅgāni tāni sarvāṇi śaṅkari || 3||

त्रियम्बकेश्वरं लिङ्गं मम सर्वार्थसिद्धिदम् ।येन दृष्टं श्रुतं वापि प्रणतं वा समर्चितम् ॥ ४॥

triyambakeśvaraṃ liṅgaṃ mama sarvārthasiddhidam |yena dṛṣṭaṃ śrutaṃ vāpi praṇataṃ vā samarcitam || 4||

स एव धन्यधौरेयः पुरुषार्थैकभाजनम् ।तत्र सन्ति महाशैवास्त्र्यम्बकेशसमर्चकाः ॥ ५॥

sa eva dhanyadhaureyaḥ puruṣārthaikabhājanam |tatra santi mahāśaivāstryambakeśasamarcakāḥ || 5||

भस्मोद्धूलितसर्वाङ्गाः त्रिपुण्ड्राङ्कितमस्तकाः ।रुद्राक्षमालाभरणा रुद्रसूक्तजपादराः ॥ ६॥

bhasmoddhūlitasarvāṅgāḥ tripuṇḍrāṅkitamastakāḥ |rudrākṣamālābharaṇā rudrasūktajapādarāḥ || 6||

पञ्चाक्षरपरा नित्यं सदा मल्लिङ्गपूजकाः ।बहवस्तत्र देवेशि त्र्यम्बकेशं यजन्ति माम् ॥ ७॥

pañcākṣaraparā nityaṃ sadā malliṅgapūjakāḥ |bahavastatra deveśi tryambakeśaṃ yajanti mām || 7||

बिल्वपत्रैश्च कमलेस्तथा गोदावरीजलैः ।पूतैर्मां स्नापयन्तीशे रुद्रमन्त्रैरहर्निशम् ॥ ८॥

bilvapatraiśca kamalestathā godāvarījalaiḥ |pūtairmāṃ snāpayantīśe rudramantrairaharniśam || 8||

फलमूलैश्च विविधैर्नैवेद्यैश्च सदाम्बिके ।मत्पूजारहितास्ते तु जलमन्नं फलादिकम् ॥ ९॥

phalamūlaiśca vividhairnaivedyaiśca sadāmbike |matpūjārahitāste tu jalamannaṃ phalādikam || 9||

नाश्नन्ति नियतं देवि नैवेद्यैर्वर्तयन्ति ते ।गौतमार्थे समानीता स्वमौलिस्थजटाग्रतः ॥ १०॥

nāśnanti niyataṃ devi naivedyairvartayanti te |gautamārthe samānītā svamaulisthajaṭāgrataḥ || 10||

पुण्या गोदावरी देवि वृद्धगङ्गेति विश्रुता ।तस्यां स्नात्वा महानद्यां दृष्ट्वा श्रीत्र्यम्बकेश्वरम् ॥ ११॥

puṇyā godāvarī devi vṛddhagaṅgeti viśrutā |tasyāṃ snātvā mahānadyāṃ dṛṣṭvā śrītryambakeśvaram || 11||

अश्वमेधशतात्पुण्यं भविष्यति न संशयः ॥ १२॥

aśvamedhaśatātpuṇyaṃ bhaviṣyati na saṃśayaḥ || 12||

॥ इति शिवरहस्यान्तर्गते शिवगौरीसंवादे त्र्यम्बकेश्वरमहिमवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः २१। ११२॥

|| iti śivarahasyāntargate śivagaurīsaṃvāde tryambakeśvaramahimavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 21| 112||

– ॥ श्रीशिवरहस्यम् ।भर्गाख्यः पन्चमांशः ।अध्यायः २१। १-१२॥

– || śrīśivarahasyam |bhargākhyaḥ pancamāṃśaḥ |adhyāyaḥ 21| 1-12||