शिवस्तुतिः स्कन्दकृता १ Skandakrita Shiva Stuti

योऽयं देवः सच्चिदानन्दरूपी रूपातीतो वेदवेदान्तवार्ताः ।यस्मादस्मान्निर्गता एवं सत्यं तत्त्वं देवं तत्त्वतः कोऽपि वेद ॥ १॥

yo'yaṃ devaḥ saccidānandarūpī rūpātīto vedavedāntavārtāḥ |yasmādasmānnirgatā evaṃ satyaṃ tattvaṃ devaṃ tattvataḥ ko'pi veda || 1||

यस्मादेतज्जायते विश्वमादौ येनैवेदं लक्षितं रक्षणार्हम् ।अन्ते तावन्नाशमेति प्रभूतं तत्त्वं वन्दे देवतासार्वभौमम् ॥ २॥

yasmādetajjāyate viśvamādau yenaivedaṃ lakṣitaṃ rakṣaṇārham |ante tāvannāśameti prabhūtaṃ tattvaṃ vande devatāsārvabhaumam || 2||

यत्पादाब्जं मृग्यमासीन्मुनीनां तत्त्वज्ञानापारसाराकराणाम् ।तत्पादाब्जं दुर्लभं दुर्लभं मे देवाशास्यं सर्वथा दुर्लभं च ॥ ३॥

yatpādābjaṃ mṛgyamāsīnmunīnāṃ tattvajñānāpārasārākarāṇām |tatpādābjaṃ durlabhaṃ durlabhaṃ me devāśāsyaṃ sarvathā durlabhaṃ ca || 3||

यत्पादाब्जं कामकामाः सुराद्याः सर्वे तावत् द्रष्टुमिच्छन्ति भक्त्या ।तत्पादाब्जं दुर्लभं वेदगीतं तन्मच्चित्तं सन्ततं सावधानम् ॥ ४॥

yatpādābjaṃ kāmakāmāḥ surādyāḥ sarve tāvat draṣṭumicchanti bhaktyā |tatpādābjaṃ durlabhaṃ vedagītaṃ tanmaccittaṃ santataṃ sāvadhānam || 4||

यागैर्योगैः साधनैर्यन्न दृष्टं पादाम्भोजं विश्वनाथस्य तन्मे ।नित्यं तावद् दुर्लभं दुर्लभानां मध्ये तावत् दुर्लभं तत्पदाब्जम् ॥ ५॥

yāgairyogaiḥ sādhanairyanna dṛṣṭaṃ pādāmbhojaṃ viśvanāthasya tanme |nityaṃ tāvad durlabhaṃ durlabhānāṃ madhye tāvat durlabhaṃ tatpadābjam || 5||

त्वत्पादाब्जं द्रष्टुमद्यापि धन्याः योगाभ्यासं कर्तुमप्युद्यतास्ते ।कृत्वा कृत्वा तं पुनः श्रान्तचित्ताः तत्पादाब्जं द्रष्टुमर्धेन्दुमौले ॥ ६॥

tvatpādābjaṃ draṣṭumadyāpi dhanyāḥ yogābhyāsaṃ kartumapyudyatāste |kṛtvā kṛtvā taṃ punaḥ śrāntacittāḥ tatpādābjaṃ draṣṭumardhendumaule || 6||

घोराकारापारसंसारसिन्धुः यत्पादाब्जालोकनेन प्रवृद्धः ।तं त्वां सोमं देवतासार्वभौम वन्दे देवं सुन्दरानन्दकन्दम् ॥ ७॥ (वन्दे वन्दे)

ghorākārāpārasaṃsārasindhuḥ yatpādābjālokanena pravṛddhaḥ |taṃ tvāṃ somaṃ devatāsārvabhauma vande devaṃ sundarānandakandam || 7|| (vande vande)

नित्यानन्दानन्दसन्दोहबीजं यत्पादाब्जं सर्वविज्ञानबीजम् ।पादाम्भोजं तं नमामि प्रणामः त्वत्पादाब्जे दुर्लभः सर्वदा मे ॥ ८॥ (प्रपन्नः त्वत्पादाब्जे दुर्लभं मे)

nityānandānandasandohabījaṃ yatpādābjaṃ sarvavijñānabījam |pādāmbhojaṃ taṃ namāmi praṇāmaḥ tvatpādābje durlabhaḥ sarvadā me || 8|| (prapannaḥ tvatpādābje durlabhaṃ me)

सुरापारकोटीरकोटिप्रभाभिः भवत्पादुकाकान्तिकान्ताभिरीश ।प्रशान्तो विधुर्भानुमानिन्दुमौले कला षोडशी वा न तस्यास्तु तासाम् ॥ ९॥

surāpārakoṭīrakoṭiprabhābhiḥ bhavatpādukākāntikāntābhirīśa |praśānto vidhurbhānumānindumaule kalā ṣoḍaśī vā na tasyāstu tāsām || 9||

भवत्पादपद्मप्रभामण्डलेन प्रभूतोऽपि माण्ड इत्येव मन्ये ।जगन्मण्डलं भासयत्यम्बिकेश प्रकाशस्तवायं प्रकाशाय कस्य ॥ १०॥

bhavatpādapadmaprabhāmaṇḍalena prabhūto'pi māṇḍa ityeva manye |jaganmaṇḍalaṃ bhāsayatyambikeśa prakāśastavāyaṃ prakāśāya kasya || 10||

तवायं प्रभावः प्रभूतः प्रभाति प्रभामण्डलस्यास्य कार्यं न विद्मः ।स्फुलिङ्गेन नष्टेऽपि गाढान्धकारे क्व सूर्याद्यपेक्षाऽपि लोकेषु दृष्टा ॥ ११॥

tavāyaṃ prabhāvaḥ prabhūtaḥ prabhāti prabhāmaṇḍalasyāsya kāryaṃ na vidmaḥ |sphuliṅgena naṣṭe'pi gāḍhāndhakāre kva sūryādyapekṣā'pi lokeṣu dṛṣṭā || 11||

तडित्कोटिसङ्घातजातप्रकाशं तिरस्कृत्य तेजस्तवेदं प्रवृत्तम् ।स्फुरत्पादपद्मस्य तस्य स्फुलिङ्गा रविर्वह्निरिन्दुः ग्रहास्तारकाश्च ॥ १२॥

taḍitkoṭisaṅghātajātaprakāśaṃ tiraskṛtya tejastavedaṃ pravṛttam |sphuratpādapadmasya tasya sphuliṅgā ravirvahnirinduḥ grahāstārakāśca || 12||

अचिन्त्यप्रभावो मनोगोचरो वा न वेदान्तवाग्गोचरो वा निवृत्ताः ।यतो वाच एवेति मन्ये निवृत्ताः प्रवृत्तिः कथं तत्र मानान्तरस्य ॥ १३॥ (स्वतो वाच एवेति मन्ये सचित्ताः) (सचित्ताः)

acintyaprabhāvo manogocaro vā na vedāntavāggocaro vā nivṛttāḥ |yato vāca eveti manye nivṛttāḥ pravṛttiḥ kathaṃ tatra mānāntarasya || 13|| (svato vāca eveti manye sacittāḥ) (sacittāḥ)

अनन्तानि पापानि नाशं प्रयान्ति स्वतस्तत्पदाम्भोरुहानुग्रहेण ।किमुग्रास्त्यशक्यं तवानुग्रहस्याप्ययं ते ममानुग्रहोयं महेश ॥ १४॥

anantāni pāpāni nāśaṃ prayānti svatastatpadāmbhoruhānugraheṇa |kimugrāstyaśakyaṃ tavānugrahasyāpyayaṃ te mamānugrahoyaṃ maheśa || 14||

महेशाद्य याचे भवत्पादपद्मे दृढां भक्तिमेकां त्वदन्यं न याचे ।त्वमेवासि माता पिताऽसि त्वमेव त्वमेव प्रभुर्मे त्वमेवासि बन्धुः ॥ १५॥

maheśādya yāce bhavatpādapadme dṛḍhāṃ bhaktimekāṃ tvadanyaṃ na yāce |tvamevāsi mātā pitā'si tvameva tvameva prabhurme tvamevāsi bandhuḥ || 15||

अनाथैकनाथ प्रभो विश्वनाथ प्रभो मामनाथं सनाथं कुरु त्वम् ।अनन्यावनं ते कथं वा न धर्मः त्वमेवासि धर्मस्वरूपः स्मरारे ॥ १६॥

anāthaikanātha prabho viśvanātha prabho māmanāthaṃ sanāthaṃ kuru tvam |ananyāvanaṃ te kathaṃ vā na dharmaḥ tvamevāsi dharmasvarūpaḥ smarāre || 16||

स्मरामि स्मरामि स्मरारे भवन्तं विपद्ध्वान्तसंहारहेतु प्रशान्तम् ।जगद्धेतुमेकं भवन्तं स्मरामि स्मरारे शरण्यो न कोऽप्यस्ति लोके ॥ १७॥

smarāmi smarāmi smarāre bhavantaṃ vipaddhvāntasaṃhārahetu praśāntam |jagaddhetumekaṃ bhavantaṃ smarāmi smarāre śaraṇyo na ko'pyasti loke || 17||

क्व वा ते पदाब्जं क्व वा वा मनो मे मनोवृत्तिरस्मिन्कथं त्वत्पदाब्जे ।स्थिरा जायतामिन्दुमौले दयालो दयापात्रमस्मि त्रिनेत्राहमेकः ॥ १८॥

kva vā te padābjaṃ kva vā vā mano me manovṛttirasminkathaṃ tvatpadābje |sthirā jāyatāmindumaule dayālo dayāpātramasmi trinetrāhamekaḥ || 18||

अहं सर्वदा त्वत्पदाम्भोजभृङ्गः भवाम्येव शम्भो भवत्पादपद्मम् ।मनःसद्म तन्मे मनः पद्मयाऽपि प्रभो मोहकालेऽपि न क्रीडतीति ॥ १९॥

ahaṃ sarvadā tvatpadāmbhojabhṛṅgaḥ bhavāmyeva śambho bhavatpādapadmam |manaḥsadma tanme manaḥ padmayā'pi prabho mohakāle'pi na krīḍatīti || 19||

भवत्पादपद्मश्रिया साकमेतत्मनः क्रीडतीति प्रमोदो ममासौ ।ततस्तावता हानिरीशान का ते तवाहं तवाहं तवाहं तवाहम् ॥ २०॥

bhavatpādapadmaśriyā sākametatmanaḥ krīḍatīti pramodo mamāsau |tatastāvatā hānirīśāna kā te tavāhaṃ tavāhaṃ tavāhaṃ tavāham || 20||

न लोके ममान्यत्किमाशास्यमस्तीत्यवश्यं त्वया शङ्कनीयं महेश ।इतो नाधिकं क्वापि लोकेषु शम्भो न चात्यल्पमाशास्यमस्तीति विमः ॥ २१॥

na loke mamānyatkimāśāsyamastītyavaśyaṃ tvayā śaṅkanīyaṃ maheśa |ito nādhikaṃ kvāpi lokeṣu śambho na cātyalpamāśāsyamastīti vimaḥ || 21||

॥ इति शिवरहस्यान्तर्गते स्कन्दकृताशिवस्तुतिः सम्पूर्णा ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः १४। ८२८ ॥

|| iti śivarahasyāntargate skandakṛtāśivastutiḥ sampūrṇā |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 14| 828 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः १४। ८-२८ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 14| 8-28 ||