महाकालककाराद्यष्टोत्तरशतनामस्तोत्रम् Shri Mahakala Kakaradi Ashtottarashatanama Stotram

कैलासशिखरे रम्ये सुखासीनं जगद्गुरुम् ।प्रणम्य परया भक्त्या पार्वती परिपृच्छति ॥ १ ॥

kailāsaśikhare ramye sukhāsīnaṃ jagadgurum |praṇamya parayā bhaktyā pārvatī paripṛcchati || 1 ||

श्रीपार्वत्युवाचत्वत्तः श्रुतं पुरा देव भैरवस्य महात्मनः ।नाम्नामष्टोत्तरशतं ककारादिमभीष्टदम् ॥ २ ॥

śrīpārvatyuvācatvattaḥ śrutaṃ purā deva bhairavasya mahātmanaḥ |nāmnāmaṣṭottaraśataṃ kakārādimabhīṣṭadam || 2 ||

गुह्याद्गुह्यतरं गुह्यं सर्वाभीष्टार्थसाधकम् ।तन्मे वदस्व देवेश! यद्यहं तव वल्लभा ॥ ३ ॥

guhyādguhyataraṃ guhyaṃ sarvābhīṣṭārthasādhakam |tanme vadasva deveśa! yadyahaṃ tava vallabhā || 3 ||

श्रीशिवोवाचलक्षवारसहस्राणि वारिताऽसि पुनः पुनः ।स्त्रीस्वभावान्महादेवि! पुनस्तत्त्वं तु पृच्छसि ॥ ४ ॥

śrīśivovācalakṣavārasahasrāṇi vāritā'si punaḥ punaḥ |strīsvabhāvānmahādevi! punastattvaṃ tu pṛcchasi || 4 ||

रहस्यातिरहस्यं च गोप्याद्गोप्यं महत्तरम् ।तत्ते वक्ष्यामि देवेशि! स्नेहात्तव शुचिस्मिते ॥ ५ ॥

rahasyātirahasyaṃ ca gopyādgopyaṃ mahattaram |tatte vakṣyāmi deveśi! snehāttava śucismite || 5 ||

कूर्चयुग्मं महाकाल प्रसीदेति पदद्वयम् ।लज्जायुग्मं वह्निजाया राजराजेश्वरो महान् ॥ ६ ॥

kūrcayugmaṃ mahākāla prasīdeti padadvayam |lajjāyugmaṃ vahnijāyā rājarājeśvaro mahān || 6 ||

मन्त्रःह्रूं ह्रूं महाकाल ! प्रसीद प्रसीद ह्रीं ह्रीं स्वाहा ।मन्त्रग्रहणमात्रेण भवेत्सत्यं महाकविः ।गद्यपद्यमयी वाणी गङ्गा निर्झरणी यथा ॥विनियोगःॐ अस्य श्रीराजराजेश्वर श्रीमहाकालककाराद्यष्टोत्तरशतनाममालामन्त्रस्य श्रीदक्षिणाकालिका ऋषिः,विराट् छन्दः, श्रीमहाकालः देवता, ह्रूं बीजं, ह्रीं शक्तिः,स्वाहा कीलकं, सर्वार्थसाधने पाठे विनियोगः ॥ऋष्यादिन्यासःश्रीदक्षिणाकालिका ऋषये नमः शिरसि । विराट् छन्दसे नमः मुखे ।श्रीमहाकाल देवतायै नमः हृदि । ह्रूं बीजाय नमः गुह्ये ।ह्रीं शक्तये नमः पादयोः । स्वाहा कीलकाय नमः नाभौ ।विनियोगाय नमः सर्वाङ्गे ॥करन्यासः एवं हृदयादिन्यासःॐ ह्रां अङ्गुष्ठाभ्यां नमः, हृदयाय नमः ।ॐ ह्रीं तर्जनीभ्यां नमः, शिरसे स्वाहा ।ॐ ह्रूं मध्यमाभ्यां नमः, शिखायै वषट् ।ॐ ह्रैं अनामिकाभ्यां नमः, कवचाय हुम् ।ॐ ह्रौं कनिष्ठिकाभ्यां नमः, नेत्रत्रयाय वौषट् ।ॐ ह्रः करतलकरपृष्ठाभ्यां नमः, अस्त्राय फट् ॥ध्यानम्कोटि कालानलाभासं चतुर्भुजं त्रिलोचनम् ।श्मशानाष्टकमध्यस्थं मुण्डाष्टकविभूषितम् ॥पञ्चप्रेतस्थितं देवं त्रिशूलं डमरुं तथा ।खड्गं च खर्परं चैव वामदक्षिणयोगतः ॥विश्चतं सुन्दरं देहं श्मशानभस्मभूषितम् ।नानाशवैः क्रीडमानं कालिकाहृदयस्थितम् ॥लालयन्तं रतासक्तं घोरचुम्बनतत्परम् ।गृध्रगोमायुसंयुक्तं फेरवीगणसंयुतम् ॥जटापटल शोभाढ्यं सर्वशून्यालयस्थितम् ।सर्वशून्यमुण्डभूषं प्रसन्नवदनं शिवम् ॥अथ स्तोत्रम् ।ॐ कूं कूं कूं कूं शब्दरतः क्रूं क्रूं क्रूं क्रूं परायणः ।कविकण्ठस्थितः कै ह्रीं ह्रूं कं कं कवि पूर्णदः ॥ १ ॥

mantraḥhrūṃ hrūṃ mahākāla ! prasīda prasīda hrīṃ hrīṃ svāhā |mantragrahaṇamātreṇa bhavetsatyaṃ mahākaviḥ |gadyapadyamayī vāṇī gaṅgā nirjharaṇī yathā ||viniyogaḥoṃ asya śrīrājarājeśvara śrīmahākālakakārādyaṣṭottaraśatanāmamālāmantrasya śrīdakṣiṇākālikā ṛṣiḥ,virāṭ chandaḥ, śrīmahākālaḥ devatā, hrūṃ bījaṃ, hrīṃ śaktiḥ,svāhā kīlakaṃ, sarvārthasādhane pāṭhe viniyogaḥ ||ṛṣyādinyāsaḥśrīdakṣiṇākālikā ṛṣaye namaḥ śirasi | virāṭ chandase namaḥ mukhe |śrīmahākāla devatāyai namaḥ hṛdi | hrūṃ bījāya namaḥ guhye |hrīṃ śaktaye namaḥ pādayoḥ | svāhā kīlakāya namaḥ nābhau |viniyogāya namaḥ sarvāṅge ||karanyāsaḥ evaṃ hṛdayādinyāsaḥoṃ hrāṃ aṅguṣṭhābhyāṃ namaḥ, hṛdayāya namaḥ |oṃ hrīṃ tarjanībhyāṃ namaḥ, śirase svāhā |oṃ hrūṃ madhyamābhyāṃ namaḥ, śikhāyai vaṣaṭ |oṃ hraiṃ anāmikābhyāṃ namaḥ, kavacāya hum |oṃ hrauṃ kaniṣṭhikābhyāṃ namaḥ, netratrayāya vauṣaṭ |oṃ hraḥ karatalakarapṛṣṭhābhyāṃ namaḥ, astrāya phaṭ ||dhyānamkoṭi kālānalābhāsaṃ caturbhujaṃ trilocanam |śmaśānāṣṭakamadhyasthaṃ muṇḍāṣṭakavibhūṣitam ||pañcapretasthitaṃ devaṃ triśūlaṃ ḍamaruṃ tathā |khaḍgaṃ ca kharparaṃ caiva vāmadakṣiṇayogataḥ ||viścataṃ sundaraṃ dehaṃ śmaśānabhasmabhūṣitam |nānāśavaiḥ krīḍamānaṃ kālikāhṛdayasthitam ||lālayantaṃ ratāsaktaṃ ghoracumbanatatparam |gṛdhragomāyusaṃyuktaṃ pheravīgaṇasaṃyutam ||jaṭāpaṭala śobhāḍhyaṃ sarvaśūnyālayasthitam |sarvaśūnyamuṇḍabhūṣaṃ prasannavadanaṃ śivam ||atha stotram |oṃ kūṃ kūṃ kūṃ kūṃ śabdarataḥ krūṃ krūṃ krūṃ krūṃ parāyaṇaḥ |kavikaṇṭhasthitaḥ kai hrīṃ hrūṃ kaṃ kaṃ kavi pūrṇadaḥ || 1 ||

कपालकज्जलसमः कज्जलप्रियतोषणः ।कपालमालाऽऽभरणः कपालकरभूषणः ॥ २ ॥

kapālakajjalasamaḥ kajjalapriyatoṣaṇaḥ |kapālamālā''bharaṇaḥ kapālakarabhūṣaṇaḥ || 2 ||

कपालपात्रसन्तुष्टः कपालार्घ्यपरायणः ।कदम्बपुष्पसम्पूज्यः कदम्बपुष्पहोमदः ॥ ३ ॥

kapālapātrasantuṣṭaḥ kapālārghyaparāyaṇaḥ |kadambapuṣpasampūjyaḥ kadambapuṣpahomadaḥ || 3 ||

कुलप्रियः कुलधरः कुलाधारः कुलेश्वरः ।कौलव्रतधरः कर्म कामकेलिप्रियः क्रतुः ॥ ४ ॥

kulapriyaḥ kuladharaḥ kulādhāraḥ kuleśvaraḥ |kaulavratadharaḥ karma kāmakelipriyaḥ kratuḥ || 4 ||

कलह ह्रींमन्त्रवर्णः कलह ह्रींस्वरूपिणः ।कङ्कालभैरवो देवः कङ्कालभैरवेश्वरः ॥ ५ ॥

kalaha hrīṃmantravarṇaḥ kalaha hrīṃsvarūpiṇaḥ |kaṅkālabhairavo devaḥ kaṅkālabhairaveśvaraḥ || 5 ||

कादम्बरीपानरतः तथा कादम्बरीकलः ।करालभैरवानन्दः करालभैरवेश्वरः ॥ ६ ॥

kādambarīpānarataḥ tathā kādambarīkalaḥ |karālabhairavānandaḥ karālabhairaveśvaraḥ || 6 ||

करालः कलनाधारः कपर्दीशवरप्रदः ।करवीरप्रियप्राणः करवीरप्रपूजनः ॥ ७ ॥

karālaḥ kalanādhāraḥ kapardīśavarapradaḥ |karavīrapriyaprāṇaḥ karavīraprapūjanaḥ || 7 ||

कलाधारः कालकण्ठः कूटस्थः कोटराश्रयः ।करुणः करुणावासः कौतुकीकालिकापतिः ॥ ८ ॥

kalādhāraḥ kālakaṇṭhaḥ kūṭasthaḥ koṭarāśrayaḥ |karuṇaḥ karuṇāvāsaḥ kautukīkālikāpatiḥ || 8 ||

कठिनः कोमलः कर्णः कृत्तिवासकलेवरः ।कलानिधिः कीर्तिनाथः कामेन हृदयङ्गमः ॥ ९ ॥

kaṭhinaḥ komalaḥ karṇaḥ kṛttivāsakalevaraḥ |kalānidhiḥ kīrtināthaḥ kāmena hṛdayaṅgamaḥ || 9 ||

कृष्णः काशीपतिः कौलः कुलचूडामणिः कुलः ।कालाञ्जनसमाकारः कालाञ्जननिवासनः ॥ १० ॥

kṛṣṇaḥ kāśīpatiḥ kaulaḥ kulacūḍāmaṇiḥ kulaḥ |kālāñjanasamākāraḥ kālāñjananivāsanaḥ || 10 ||

कौपीनधारी कैवर्तः कृतवीर्यः कपिध्वजः ।कामरूपः कामगतिः कामयोगपरायणः ॥ ११ ॥

kaupīnadhārī kaivartaḥ kṛtavīryaḥ kapidhvajaḥ |kāmarūpaḥ kāmagatiḥ kāmayogaparāyaṇaḥ || 11 ||

कामसम्मर्दनरतः कामगृहनिवासनः ।कालिकारमणः कालिनायकः कालिकाप्रियः ॥ १२ ॥

kāmasammardanarataḥ kāmagṛhanivāsanaḥ |kālikāramaṇaḥ kālināyakaḥ kālikāpriyaḥ || 12 ||

कालीशः कालिकाकान्तः कल्पद्रुमलतामतः ।कुलटालापमध्यस्थः कुलटासङ्गतोषितः ॥ १३ ॥

kālīśaḥ kālikākāntaḥ kalpadrumalatāmataḥ |kulaṭālāpamadhyasthaḥ kulaṭāsaṅgatoṣitaḥ || 13 ||

कुलटाचुम्बनोद्युक्तः कुलटाकुचमर्दनः ।केरलाचारनिपुणः केरलेन्द्रगृहस्थितः ॥ १४ ॥

kulaṭācumbanodyuktaḥ kulaṭākucamardanaḥ |keralācāranipuṇaḥ keralendragṛhasthitaḥ || 14 ||

कस्तूरीतिलकानन्दः कस्तूरीतिलकप्रियः ।कस्तूरीहोमसन्तुष्टः कस्तूरीतर्पणोद्यतः ॥ १५ ॥

kastūrītilakānandaḥ kastūrītilakapriyaḥ |kastūrīhomasantuṣṭaḥ kastūrītarpaṇodyataḥ || 15 ||

कस्तूरीमार्जनोद्युक्तः कस्तूरीकुण्डमज्जनः ।कामिनीपुष्पनिलयः कामिनीपुष्पभूषणः ॥ १६ ॥

kastūrīmārjanodyuktaḥ kastūrīkuṇḍamajjanaḥ |kāminīpuṣpanilayaḥ kāminīpuṣpabhūṣaṇaḥ || 16 ||

कामिनीकुण्डसंलग्नः कामिनीकुण्डमध्यगः ।कामिनीमानसाराध्यः कामिनीमानतोषितः ॥ १७ ॥

kāminīkuṇḍasaṃlagnaḥ kāminīkuṇḍamadhyagaḥ |kāminīmānasārādhyaḥ kāminīmānatoṣitaḥ || 17 ||

काममञ्जीररणितः कामदेवप्रियातुरः ।कर्पूरामोदरुचिरः कर्पूरामोदधारणः ॥ १८ ॥

kāmamañjīraraṇitaḥ kāmadevapriyāturaḥ |karpūrāmodaruciraḥ karpūrāmodadhāraṇaḥ || 18 ||

कर्पूरमालाऽऽभरणः कूर्परार्णवमध्यगः ।क्रकसः क्रकसाराध्यः कलापपुष्परूपकः ॥ १९ ॥

karpūramālā''bharaṇaḥ kūrparārṇavamadhyagaḥ |krakasaḥ krakasārādhyaḥ kalāpapuṣparūpakaḥ || 19 ||

कुशलः कुशलाकर्णी कुक्कुरासङ्गतोषितः ।कुक्कुरालयमध्यस्थः काश्मीरकरवीरभृत् ॥ २० ॥

kuśalaḥ kuśalākarṇī kukkurāsaṅgatoṣitaḥ |kukkurālayamadhyasthaḥ kāśmīrakaravīrabhṛt || 20 ||

कूटस्थः क्रूरदृष्टिश्च केशवासक्तमानसः ।कुम्भीनसविभूषाढ्यः कुम्भीनसवधोद्यतः ॥ २१ ॥

kūṭasthaḥ krūradṛṣṭiśca keśavāsaktamānasaḥ |kumbhīnasavibhūṣāḍhyaḥ kumbhīnasavadhodyataḥ || 21 ||

फलश्रुतिःनाम्नामष्टोत्तरशतं स्तुत्वा महाकालदेवम् ।ककारादि जगद्वन्द्यं गोपनीयं प्रयत्नतः ॥ १ ॥

phalaśrutiḥnāmnāmaṣṭottaraśataṃ stutvā mahākāladevam |kakārādi jagadvandyaṃ gopanīyaṃ prayatnataḥ || 1 ||

य इदं पठते प्राप्तः त्रिसन्ध्यं वा पठेन्नरः ।वाञ्छितं समवाप्नोति नात्र कार्या विचारणा ॥ २ ॥

ya idaṃ paṭhate prāptaḥ trisandhyaṃ vā paṭhennaraḥ |vāñchitaṃ samavāpnoti nātra kāryā vicāraṇā || 2 ||

लभते ह्यचलां लक्ष्मीं देवानामपि दुर्लभाम् ।पूजाकाले जपान्ते च पठनीयं विशेषतः ॥ ३ ॥

labhate hyacalāṃ lakṣmīṃ devānāmapi durlabhām |pūjākāle japānte ca paṭhanīyaṃ viśeṣataḥ || 3 ||

यः पठेत्साधकाधीशः कालीरूपो हि वर्षतः ।पठेद्वा पाठयेद्वापि शृणोति श्रावयेदपि ॥ ४ ॥

yaḥ paṭhetsādhakādhīśaḥ kālīrūpo hi varṣataḥ |paṭhedvā pāṭhayedvāpi śṛṇoti śrāvayedapi || 4 ||

वाचकं तोषयेद्वापि स भवेद् भैरवी तनुः ।पश्चिमाभिमुखं लिङ्गं वृषशून्यं शिवालयम् ॥ ५ ॥

vācakaṃ toṣayedvāpi sa bhaved bhairavī tanuḥ |paścimābhimukhaṃ liṅgaṃ vṛṣaśūnyaṃ śivālayam || 5 ||

तत्र स्थित्वा पठेन्नाम्नां सर्वकामाप्तये शिवे ।भौमवारे निशीथे च अष्टम्यां वा निशामुखे ॥ ६ ॥

tatra sthitvā paṭhennāmnāṃ sarvakāmāptaye śive |bhaumavāre niśīthe ca aṣṭamyāṃ vā niśāmukhe || 6 ||

माषभक्तबलिं छागं कृसरान्नं च पायसम् ।मद्यं मीनं शोणितं च दुग्धं मुद्रागुडार्द्रकम् ॥ ७ ॥

māṣabhaktabaliṃ chāgaṃ kṛsarānnaṃ ca pāyasam |madyaṃ mīnaṃ śoṇitaṃ ca dugdhaṃ mudrāguḍārdrakam || 7 ||

बलिं दत्वा पठेत्तत्र कुबेरादधिको भवेत् ।पुरश्चरणमेतस्य सहस्रावृत्तिरुच्यते ॥ ८ ॥

baliṃ datvā paṭhettatra kuberādadhiko bhavet |puraścaraṇametasya sahasrāvṛttirucyate || 8 ||

महाकालसमो भूत्वा यः पठेन्निशि निर्भयः ।सर्वं हस्तगतं भूयान्नात्र कार्या विचारणा ॥ ९ ॥

mahākālasamo bhūtvā yaḥ paṭhenniśi nirbhayaḥ |sarvaṃ hastagataṃ bhūyānnātra kāryā vicāraṇā || 9 ||

मुक्तकेशो दिशावासः ताम्बूलपूरिताननः ।कुजवारे मध्यरात्रौ होमं कृत्वा श्मशानके ॥ १० ॥

muktakeśo diśāvāsaḥ tāmbūlapūritānanaḥ |kujavāre madhyarātrau homaṃ kṛtvā śmaśānake || 10 ||

पृथ्वीशाकर्षणं कृत्वा मात्र कार्या विचारणा ।ब्रह्माण्डगोले देवेशि! या काचिज्जगतीतले ॥ ११ ॥

pṛthvīśākarṣaṇaṃ kṛtvā mātra kāryā vicāraṇā |brahmāṇḍagole deveśi! yā kācijjagatītale || 11 ||

समस्ता सिद्धयो देवि! वाचकस्य करे स्थिता ।भस्माभिमन्त्रितं कृत्वाग्रहस्ते च विलेपयेत् ॥ १२ ॥

samastā siddhayo devi! vācakasya kare sthitā |bhasmābhimantritaṃ kṛtvāgrahaste ca vilepayet || 12 ||

भस्म संलेपनाद्देवि! सर्वग्रहविनाशनम् ।वन्ध्या पुत्रप्रदं देवि! नात्र कार्या विचारणा ॥ १३ ॥

bhasma saṃlepanāddevi! sarvagrahavināśanam |vandhyā putrapradaṃ devi! nātra kāryā vicāraṇā || 13 ||

गोपनीयं गोपनीयं गोपनीयं प्रयत्नतः ।स्वयोनिरिव गोप्तव्यं न देयं यस्य कस्यचित् ॥ १४ ॥

gopanīyaṃ gopanīyaṃ gopanīyaṃ prayatnataḥ |svayoniriva goptavyaṃ na deyaṃ yasya kasyacit || 14 ||

इति श्रीमहाकालककाराद्यष्टोत्तरशतनामस्तोत्रं सम्पूर्णम् ।

iti śrīmahākālakakārādyaṣṭottaraśatanāmastotraṃ sampūrṇam |