बटुकभैरवहृदयस्तोत्रम् अथवा बटुकहृदयं Shri Batukabhairava Hridayastotram

बटुकहृदयं॥ श्रीगणेशाय नमः ॥॥ श्रीउमामहेश्वराभ्यां नमः ॥॥ श्रीगुरवे नमः ॥॥ श्रीभैरवाय नमः ॥पूर्वपीठिकाकैलाशशिखरासीनं देवदेवं जगद्गुरुम् ।देवी पप्रच्छ सर्वज्ञं (सर्वेशं) शङ्करं वरदं शिवम् ॥ १॥

baṭukahṛdayaṃ|| śrīgaṇeśāya namaḥ |||| śrīumāmaheśvarābhyāṃ namaḥ |||| śrīgurave namaḥ |||| śrībhairavāya namaḥ ||pūrvapīṭhikākailāśaśikharāsīnaṃ devadevaṃ jagadgurum |devī papraccha sarvajñaṃ (sarveśaṃ) śaṅkaraṃ varadaṃ śivam || 1||

॥ श्रीदेव्युवाच ॥देवदेव परेशान भक्ताभीष्टप्रदायक ।प्रब्रूहि मे महाभाग गोप्यं यद्यपि न प्रभो ॥ २॥

|| śrīdevyuvāca ||devadeva pareśāna bhaktābhīṣṭapradāyaka |prabrūhi me mahābhāga gopyaṃ yadyapi na prabho || 2||

बटुकस्यैव हृदयं साधकानां हिताय च ।॥ श्रीशिव उवाच ॥शृणु देवि प्रवक्ष्यामि हृदयं बटुकस्य च ॥ ३॥

baṭukasyaiva hṛdayaṃ sādhakānāṃ hitāya ca ||| śrīśiva uvāca ||śṛṇu devi pravakṣyāmi hṛdayaṃ baṭukasya ca || 3||

गुह्याद्गुह्यतरं गुह्यं तच्छृणुष्व तु मध्यमे ।हृदयास्यास्य देवेशि बृहदारण्यको ऋषिः ॥ ४॥

guhyādguhyataraṃ guhyaṃ tacchṛṇuṣva tu madhyame |hṛdayāsyāsya deveśi bṛhadāraṇyako ṛṣiḥ || 4||

छन्दोऽनुष्टुप् समाख्यातो देवता बटुकः स्मृतः ।प्रयोगाभीष्टसिद्धयर्थं विनियोगः प्रकीर्तितः ॥ ५॥

chando'nuṣṭup samākhyāto devatā baṭukaḥ smṛtaḥ |prayogābhīṣṭasiddhayarthaṃ viniyogaḥ prakīrtitaḥ || 5||

॥ सविधि हृदयस्तोत्रस्य विनियोगः ॥ॐ अस्य श्रीबटुकभैरवहृदयस्तोत्रस्य श्रीबृहदारण्यक ऋषिः ।अनुष्टुप् छन्दः । श्रीबटुकभैरवः देवता ।अभीष्टसिद्ध्यर्थं पाठे विनियोगः ॥॥ अथ ऋष्यादिन्यासः ॥श्री बृहदारण्यकऋषये नमः शिरसि ।अनुष्टुप्छन्दसे नमः मुखे ।श्रीबटुकभैरवदेवतायै नमः हृदये ।अभीष्टसिद्ध्यर्थं पाठे विनियोगाय नमः सर्वाङ्गे ॥॥ इति ऋष्यादिन्यासः ॥ॐ प्रणवेशः शिरः पातु ललाटे प्रमथाधिपः ।कपोलौ कामवपुषो भ्रूभागे भैरवेश्वरः ॥ १॥

|| savidhi hṛdayastotrasya viniyogaḥ ||oṃ asya śrībaṭukabhairavahṛdayastotrasya śrībṛhadāraṇyaka ṛṣiḥ |anuṣṭup chandaḥ | śrībaṭukabhairavaḥ devatā |abhīṣṭasiddhyarthaṃ pāṭhe viniyogaḥ |||| atha ṛṣyādinyāsaḥ ||śrī bṛhadāraṇyakaṛṣaye namaḥ śirasi |anuṣṭupchandase namaḥ mukhe |śrībaṭukabhairavadevatāyai namaḥ hṛdaye |abhīṣṭasiddhyarthaṃ pāṭhe viniyogāya namaḥ sarvāṅge |||| iti ṛṣyādinyāsaḥ ||oṃ praṇaveśaḥ śiraḥ pātu lalāṭe pramathādhipaḥ |kapolau kāmavapuṣo bhrūbhāge bhairaveśvaraḥ || 1||

नेत्रयोर्वह्निनयनो नासिकायामघापहः ।ऊर्ध्वोष्ठे दीर्घनयनो ह्यधरोष्ठे भयाशनः ॥ २॥

netrayorvahninayano nāsikāyāmaghāpahaḥ |ūrdhvoṣṭhe dīrghanayano hyadharoṣṭhe bhayāśanaḥ || 2||

चिबुके भालनयनो गण्डयोश्चन्द्रशेखरः ।मुखान्तरे महाकालो भीमाक्षो मुखमण्डले ॥ ३॥

cibuke bhālanayano gaṇḍayoścandraśekharaḥ |mukhāntare mahākālo bhīmākṣo mukhamaṇḍale || 3||

ग्रीवायां वीरभद्रोऽव्याद् घण्टिकायां महोदरः ।नीलकण्ठो गण्डदेशे जिह्वायां फणिभूषणः ॥ ४॥

grīvāyāṃ vīrabhadro'vyād ghaṇṭikāyāṃ mahodaraḥ |nīlakaṇṭho gaṇḍadeśe jihvāyāṃ phaṇibhūṣaṇaḥ || 4||

दशने वज्रदशनो तालुके ह्यमृतेश्वरः ।दोर्दण्डे वज्रदण्डो मे स्कन्धयोः स्कन्दवल्लभः ॥ ५॥

daśane vajradaśano tāluke hyamṛteśvaraḥ |dordaṇḍe vajradaṇḍo me skandhayoḥ skandavallabhaḥ || 5||

कूर्परे कञ्जनयनो फणौ फेत्कारिणीपतिः ।अङ्गुलीषु महाभीमो नखेषु अघहावतु ॥ ६॥

kūrpare kañjanayano phaṇau phetkāriṇīpatiḥ |aṅgulīṣu mahābhīmo nakheṣu aghahāvatu || 6||

कक्षे व्याघ्रासनो पातु कट्यां मातङ्गचर्मणी ।कुक्षौ कामेश्वरः पातु वस्तिदेशे स्मरान्तकः ॥ ७॥

kakṣe vyāghrāsano pātu kaṭyāṃ mātaṅgacarmaṇī |kukṣau kāmeśvaraḥ pātu vastideśe smarāntakaḥ || 7||

शूलपाणिर्लिङ्गदेशे गुह्ये गुह्येश्वरोऽवतु ।जङ्घायां वज्रदमनो जघने जृम्भकेश्वरः ॥ ८॥

śūlapāṇirliṅgadeśe guhye guhyeśvaro'vatu |jaṅghāyāṃ vajradamano jaghane jṛmbhakeśvaraḥ || 8||

पादौ ज्ञानप्रदः पातु धनदश्चाङ्गुलीषु च ।दिग्वासो रोमकूपेषु सन्धिदेशे सदाशिवः ॥ ९॥

pādau jñānapradaḥ pātu dhanadaścāṅgulīṣu ca |digvāso romakūpeṣu sandhideśe sadāśivaḥ || 9||

पूर्वाशां कामपीठस्थः उड्डीशस्थोऽग्निकोणके ।याम्यां जालन्धरस्थो मे नैरृत्यां कोटिपीठगः ॥ १०॥

pūrvāśāṃ kāmapīṭhasthaḥ uḍḍīśastho'gnikoṇake |yāmyāṃ jālandharastho me nairṛtyāṃ koṭipīṭhagaḥ || 10||

वारुण्यां वज्रपीठस्थो वायव्यां कुलपीठगः ।उदीच्यां बाणपीठस्थः ऐशान्यामिन्दुपीठगः ॥ ११॥

vāruṇyāṃ vajrapīṭhastho vāyavyāṃ kulapīṭhagaḥ |udīcyāṃ bāṇapīṭhasthaḥ aiśānyāmindupīṭhagaḥ || 11||

ऊर्ध्वं बीजेन्द्रपीठस्थः खेटस्थो भूतलोऽवतु ।रुरुः शयानेऽवतु मां चण्डो वादे सदावतु ॥ १२॥

ūrdhvaṃ bījendrapīṭhasthaḥ kheṭastho bhūtalo'vatu |ruruḥ śayāne'vatu māṃ caṇḍo vāde sadāvatu || 12||

गमने तीव्रनयनः आसीने भूतवल्लभः ।युद्धकाले महाभीमो भयकाले भवान्तकः ॥ १३॥

gamane tīvranayanaḥ āsīne bhūtavallabhaḥ |yuddhakāle mahābhīmo bhayakāle bhavāntakaḥ || 13||

रक्ष रक्ष परेशान भीमदंष्ट्र भयापह ।महाकाल महाकाल रक्ष मां कालसङ्कटात् ॥ १४॥

rakṣa rakṣa pareśāna bhīmadaṃṣṭra bhayāpaha |mahākāla mahākāla rakṣa māṃ kālasaṅkaṭāt || 14||

॥ फलश्रुतिः ॥इतीदं हृदयं दिव्यं सर्वपापप्रणाशनम् ।सर्वसम्पत्प्रदं भद्रे सर्वसिद्धिफलप्रदम् ॥॥ इति श्रीबटुकभैरवहृदयस्तोत्रं सम्पूर्णम् ॥

|| phalaśrutiḥ ||itīdaṃ hṛdayaṃ divyaṃ sarvapāpapraṇāśanam |sarvasampatpradaṃ bhadre sarvasiddhiphalapradam |||| iti śrībaṭukabhairavahṛdayastotraṃ sampūrṇam ||