शिवताण्डवस्तोत्रम् Shivatandavastotra by Ravana

॥ अथ रावणकृतशिवताण्डवस्तोत्रम् ॥॥ श्रीगणेशाय नमः ॥जटाटवीगलज्जलप्रवाहपावितस्थलेगलेऽवलम्ब्य लम्बितां भुजङ्गतुङ्गमालिकाम् ।डमड्डमड्डमड्डमन्निनादवड्डमर्वयंचकार चण्डताण्डवं तनोतु नः शिवः शिवम् ॥ १॥

|| atha rāvaṇakṛtaśivatāṇḍavastotram |||| śrīgaṇeśāya namaḥ ||jaṭāṭavīgalajjalapravāhapāvitasthalegale'valambya lambitāṃ bhujaṅgatuṅgamālikām |ḍamaḍḍamaḍḍamaḍḍamanninādavaḍḍamarvayaṃcakāra caṇḍatāṇḍavaṃ tanotu naḥ śivaḥ śivam || 1||

जटाकटाहसम्भ्रमभ्रमन्निलिम्पनिर्झरीविलोलवीचिवल्लरीविराजमानमूर्द्धनि ।धगद्धगद्धगज्ज्वलल्ललाटपट्टपावकेकिशोरचन्द्रशेखरे रतिः प्रतिक्षणं मम ॥ २॥

jaṭākaṭāhasambhramabhramannilimpanirjharīvilolavīcivallarīvirājamānamūrddhani |dhagaddhagaddhagajjvalallalāṭapaṭṭapāvakekiśoracandraśekhare ratiḥ pratikṣaṇaṃ mama || 2||

धराधरेन्द्रनन्दिनीविलासबन्धुबन्धुरस्फुरद्दिगन्तसन्ततिप्रमोदमानमानसे ।कृपाकटाक्षधोरणीनिरुद्धदुर्धरापदिक्वचिद्दिगम्बरे(क्वचिच्चिदम्बरे) मनो विनोदमेतु वस्तुनि ॥ ३॥

dharādharendranandinīvilāsabandhubandhurasphuraddigantasantatipramodamānamānase |kṛpākaṭākṣadhoraṇīniruddhadurdharāpadikvaciddigambare(kvaciccidambare) mano vinodametu vastuni || 3||

जटाभुजङ्गपिङ्गलस्फुरत्फणामणिप्रभाकदम्बकुङ्कुमद्रवप्रलिप्तदिग्वधूमुखे ।मदान्धसिन्धुरस्फुरत्त्वगुत्तरीयमेदुरे (सिन्धुरासुरत्व)मनो विनोदमद्भुतं बिभर्तु भूतभर्तरि ॥ ४॥

jaṭābhujaṅgapiṅgalasphuratphaṇāmaṇiprabhākadambakuṅkumadravapraliptadigvadhūmukhe |madāndhasindhurasphurattvaguttarīyamedure (sindhurāsuratva)mano vinodamadbhutaṃ bibhartu bhūtabhartari || 4||

सहस्रलोचनप्रभृत्यशेषलेखशेखरप्रसूनधूलिधोरणीविधूसराङ्घ्रिपीठभूः ।भुजङ्गराजमालया निबद्धजाटजूटकःश्रियै चिराय जायतां चकोरबन्धुशेखरः ॥ ५॥ (श्रिये)

sahasralocanaprabhṛtyaśeṣalekhaśekharaprasūnadhūlidhoraṇīvidhūsarāṅghripīṭhabhūḥ |bhujaṅgarājamālayā nibaddhajāṭajūṭakaḥśriyai cirāya jāyatāṃ cakorabandhuśekharaḥ || 5|| (śriye)

ललाटचत्वरज्वलद्धनञ्जयस्फुलिङ्गभानिपीतपञ्चसायकं नमन्निलिम्पनायकम् । (स्फुलिङ्गया निपीत)सुधामयूखलेखया विराजमानशेखरंमहाकपालि सम्पदे शिरो जटालमस्तु नः ॥ ६॥

lalāṭacatvarajvaladdhanañjayasphuliṅgabhānipītapañcasāyakaṃ namannilimpanāyakam | (sphuliṅgayā nipīta)sudhāmayūkhalekhayā virājamānaśekharaṃmahākapāli sampade śiro jaṭālamastu naḥ || 6||

(महः कपालि सम्पदे सरिज्जटालमस्तु नः ॥)करालभालपट्टिकाधगद्धगद्धगज्ज्वलद्धनञ्जयाहुतीकृतप्रचण्डपञ्चसायके ।धराधरेन्द्रनन्दिनीकुचाग्रचित्रपत्रकप्रकल्पनैकशिल्पिनि त्रिलोचने रतिर्मम ॥ ७॥

(mahaḥ kapāli sampade sarijjaṭālamastu naḥ ||)karālabhālapaṭṭikādhagaddhagaddhagajjvaladdhanañjayāhutīkṛtapracaṇḍapañcasāyake |dharādharendranandinīkucāgracitrapatrakaprakalpanaikaśilpini trilocane ratirmama || 7||

नवीनमेघमण्डलीनिरुद्धदुर्धरस्फुरत्कुहूनिशीथिनीतमःप्रबन्धबद्धकन्धरः । (प्रबद्धबद्ध)निलिम्पनिर्झरीधरस्तनोतु कृत्तिसिन्धुरःकलानिधानबन्धुरः श्रियं जगद्धुरन्धरः ॥ ८॥

navīnameghamaṇḍalīniruddhadurdharasphuratkuhūniśīthinītamaḥprabandhabaddhakandharaḥ | (prabaddhabaddha)nilimpanirjharīdharastanotu kṛttisindhuraḥkalānidhānabandhuraḥ śriyaṃ jagaddhurandharaḥ || 8||

प्रफुल्लनीलपङ्कजप्रपञ्चकालिमप्रभाऽवलम्बिकण्ठकन्दलीरुचिप्रबद्धकन्धरम् ।स्मरच्छिदं पुरच्छिदं भवच्छिदं मखच्छिदंगजच्छिदान्धकच्छिदं तमन्तकच्छिदं भजे ॥ ९॥

praphullanīlapaṅkajaprapañcakālimaprabhā'valambikaṇṭhakandalīruciprabaddhakandharam |smaracchidaṃ puracchidaṃ bhavacchidaṃ makhacchidaṃgajacchidāndhakacchidaṃ tamantakacchidaṃ bhaje || 9||

अखर्व(अगर्व)सर्वमङ्गलाकलाकदम्बमञ्जरीरसप्रवाहमाधुरीविजृम्भणामधुव्रतम् ।स्मरान्तकं पुरान्तकं भवान्तकं मखान्तकंगजान्तकान्धकान्तकं तमन्तकान्तकं भजे ॥ १०॥

akharva(agarva)sarvamaṅgalākalākadambamañjarīrasapravāhamādhurīvijṛmbhaṇāmadhuvratam |smarāntakaṃ purāntakaṃ bhavāntakaṃ makhāntakaṃgajāntakāndhakāntakaṃ tamantakāntakaṃ bhaje || 10||

जयत्वदभ्रविभ्रमभ्रमद्भुजङ्गमश्वस (जयत्यद)द्विनिर्गमत्क्रमस्फुरत्करालभालहव्यवाट् ।धिमिद्धिमिद्धिमिद्ध्वनन्मृदङ्गतुङ्गमङ्गल (धिमिं धिमिं धिमिं ध्वनन्)ध्वनिक्रमप्रवर्तितप्रचण्डताण्डवः शिवः ॥ ११॥

jayatvadabhravibhramabhramadbhujaṅgamaśvasa (jayatyada)dvinirgamatkramasphuratkarālabhālahavyavāṭ |dhimiddhimiddhimiddhvananmṛdaṅgatuṅgamaṅgala (dhimiṃ dhimiṃ dhimiṃ dhvanan)dhvanikramapravartitapracaṇḍatāṇḍavaḥ śivaḥ || 11||

दृषद्विचित्रतल्पयोर्भुजङ्गमौक्तिकस्रजोर्गरिष्ठरत्नलोष्ठयोः सुहृद्विपक्षपक्षयोः ।तृणारविन्दचक्षुषोः प्रजामहीमहेन्द्रयोःसमप्रवृत्तिकः कदा सदाशिवं भजाम्यहम् ॥ १२॥

dṛṣadvicitratalpayorbhujaṅgamauktikasrajorgariṣṭharatnaloṣṭhayoḥ suhṛdvipakṣapakṣayoḥ |tṛṇāravindacakṣuṣoḥ prajāmahīmahendrayoḥsamapravṛttikaḥ kadā sadāśivaṃ bhajāmyaham || 12||

(समं प्रवर्तयन्मनः कदा सदाशिवं भजे ॥)कदा निलिम्पनिर्झरीनिकुञ्जकोटरे वसन्विमुक्तदुर्मतिः सदा शिरःस्थमञ्जलिं वहन् ।विलोललोललोचनो ललामभाललग्नकः(विमुक्तलोललोचनाललामभाललग्नकं)शिवेति मन्त्रमुच्चरन् कदा सुखी भवाम्यहम् ॥ १३॥

(samaṃ pravartayanmanaḥ kadā sadāśivaṃ bhaje ||)kadā nilimpanirjharīnikuñjakoṭare vasanvimuktadurmatiḥ sadā śiraḥsthamañjaliṃ vahan |vilolalolalocano lalāmabhālalagnakaḥ(vimuktalolalocanālalāmabhālalagnakaṃ)śiveti mantramuccaran kadā sukhī bhavāmyaham || 13||

निलिम्पनाथनागरीकदम्बमौलमल्लिकानिगुम्फनिर्भरक्षरन्मधूष्णिकामनोहरः ।तनोतु नो मनोमुदं विनोदिनीमहर्निशंपरश्रियः परं पदं तदङ्गजत्विषां चयः ॥ १४॥

nilimpanāthanāgarīkadambamaulamallikānigumphanirbharakṣaranmadhūṣṇikāmanoharaḥ |tanotu no manomudaṃ vinodinīmaharniśaṃparaśriyaḥ paraṃ padaṃ tadaṅgajatviṣāṃ cayaḥ || 14||

प्रचण्डवाडवानलप्रभाशुभप्रचारणीमहाष्टसिद्धिकामिनीजनाऽवहूतजल्पना ।विमुक्तवामलोचनाविवाहकालिकध्वनिःशिवेति मन्त्रभूषणा जगज्जयाय जायताम् ॥ १५॥

pracaṇḍavāḍavānalaprabhāśubhapracāraṇīmahāṣṭasiddhikāminījanā'vahūtajalpanā |vimuktavāmalocanāvivāhakālikadhvaniḥśiveti mantrabhūṣaṇā jagajjayāya jāyatām || 15||

इमं हि नित्यमेवमुक्तमुत्तमोत्तमं स्तवंपठन्स्मरन्ब्रुवन्नरो विशुद्धिमेतिसन्ततम् ।हरे गुरौ सुभक्तिमाशु याति नाऽन्यथा गतिंविमोहनं हि देहिनां सुशङ्करस्य चिन्तनम् ॥ १६॥

imaṃ hi nityamevamuktamuttamottamaṃ stavaṃpaṭhansmaranbruvannaro viśuddhimetisantatam |hare gurau subhaktimāśu yāti nā'nyathā gatiṃvimohanaṃ hi dehināṃ suśaṅkarasya cintanam || 16||

पूजावसानसमये दशवक्त्रगीतंयः शम्भुपूजनपरं पठति प्रदोषे ।तस्य स्थिरां रथगजेन्द्रतुरङ्गयुक्तांलक्ष्मीं सदैव सुमुखीं प्रददाति शम्भुः ॥ १७॥

pūjāvasānasamaye daśavaktragītaṃyaḥ śambhupūjanaparaṃ paṭhati pradoṣe |tasya sthirāṃ rathagajendraturaṅgayuktāṃlakṣmīṃ sadaiva sumukhīṃ pradadāti śambhuḥ || 17||

(लक्ष्मीं प्रसादसमये प्रददाति शम्भुः)॥ इति श्रीरावणकृतं शिवताण्डवस्तोत्रं सम्पूर्णम् ॥नमामि पार्वतीपतिं नमामि जाह्नवीपतिंनमामि भक्तवत्सलं नमामि भाललोचनम् ।नमामि चन्द्रशेखरं नमामि दुःखमोचनंतदीयपादपङ्कजं स्मराम्यहं नटेश्वरम् ॥ १६॥

(lakṣmīṃ prasādasamaye pradadāti śambhuḥ)|| iti śrīrāvaṇakṛtaṃ śivatāṇḍavastotraṃ sampūrṇam ||namāmi pārvatīpatiṃ namāmi jāhnavīpatiṃnamāmi bhaktavatsalaṃ namāmi bhālalocanam |namāmi candraśekharaṃ namāmi duḥkhamocanaṃtadīyapādapaṅkajaṃ smarāmyahaṃ naṭeśvaram || 16||

रावणेन कृतं स्तोत्रं यः पठेच्छिवसन्निधौ ।पुत्रपौत्रादिकं सौख्यं लभते मोक्षमेव च ॥ १९॥

rāvaṇena kṛtaṃ stotraṃ yaḥ paṭhecchivasannidhau |putrapautrādikaṃ saukhyaṃ labhate mokṣameva ca || 19||

इति दशकन्धरविरचितं शिवताण्डवस्तोत्रं समाप्तम् ।

iti daśakandharaviracitaṃ śivatāṇḍavastotraṃ samāptam |