पुष्करेश्वरलिङ्गशिवक्षेत्रमाहात्म्यम् Pushkareshvaralinga Shivakshetra Mahatmyam

(शिवगौरीसंवादे)ईश्वरःशृणु देवि कथामेकां ब्रह्मणः परमाद्भुताम् ।यां श्रुत्वा मयि विन्दन्ते भक्तिं सर्वार्थदायिनीम् ॥ १॥

(śivagaurīsaṃvāde)īśvaraḥśṛṇu devi kathāmekāṃ brahmaṇaḥ paramādbhutām |yāṃ śrutvā mayi vindante bhaktiṃ sarvārthadāyinīm || 1||

सत्यलोके स्थितो ब्रह्मा यियक्षुरभवच्छिवे ।स्वहस्तपद्मं धाता च पातयामास भूतले ॥ २॥

satyaloke sthito brahmā yiyakṣurabhavacchive |svahastapadmaṃ dhātā ca pātayāmāsa bhūtale || 2||

क्षेत्राणामुत्तमे तन्मे पुष्करे पुष्करं तदा ।तत्र मे संस्थितं पूर्वं पुष्करेश्वरसञ्ज्ञितम् ॥ ३॥

kṣetrāṇāmuttame tanme puṣkare puṣkaraṃ tadā |tatra me saṃsthitaṃ pūrvaṃ puṣkareśvarasañjñitam || 3||

लिङ्गं मङ्गलदं पुण्यं तन्मौलौ नलिनं पतत् ।वेणुगुल्मावृतं भद्रं नानावृक्षसमन्वितम् ॥ ४॥

liṅgaṃ maṅgaladaṃ puṇyaṃ tanmaulau nalinaṃ patat |veṇugulmāvṛtaṃ bhadraṃ nānāvṛkṣasamanvitam || 4||

तत्रान्तरेऽभवद्वाणी श्रुत्वा(?) वाणीपतिस्तदा ॥(वाणी ब्रह्माणमवदत् इति वक्तव्यम् ।)वाणीएतद्विधातः क्षेत्रणामुत्तमं पुष्करं शिवम् ।यजतो देवयजनं तव भृयात् सुपावनम् ॥ ५॥

tatrāntare'bhavadvāṇī śrutvā(?) vāṇīpatistadā ||(vāṇī brahmāṇamavadat iti vaktavyam |)vāṇīetadvidhātaḥ kṣetraṇāmuttamaṃ puṣkaraṃ śivam |yajato devayajanaṃ tava bhṛyāt supāvanam || 5||

पुष्करं ते यतः पुण्यं पतितं पुष्करं हि तत् ।अत्र लिङ्गमिदं श्रेष्ठं देवदेवस्य शूलिनः ॥ ६॥

puṣkaraṃ te yataḥ puṇyaṃ patitaṃ puṣkaraṃ hi tat |atra liṅgamidaṃ śreṣṭhaṃ devadevasya śūlinaḥ || 6||

पश्य सम्पूजयात्रैव कार्तिकोऽयं सुपावनः ।मासो हि पुण्यनिलये गङ्गेयं पावनी सरित् ॥ ७॥

paśya sampūjayātraiva kārtiko'yaṃ supāvanaḥ |māso hi puṇyanilaye gaṅgeyaṃ pāvanī sarit || 7||

कार्तिके सोमवारेषु पुष्करे पुष्करेश्वरम् ।यः समर्चयिता रात्रौ बिल्वैर्द्रोणैश्च धुत्तुरैः ॥ ८॥

kārtike somavāreṣu puṣkare puṣkareśvaram |yaḥ samarcayitā rātrau bilvairdroṇaiśca dhutturaiḥ || 8||

तस्य पुण्यस्य नान्तोऽस्ति स च शङ्करवल्लभः ।तदा वाणीवचः श्रुत्वा विश्वकर्माणमाह्वयत् ॥ ९॥

tasya puṇyasya nānto'sti sa ca śaṅkaravallabhaḥ |tadā vāṇīvacaḥ śrutvā viśvakarmāṇamāhvayat || 9||

ईश्वरःब्रह्मणा स्मृतमात्रः स विश्वकर्मा ततो विधिम् ।प्राह किं करवाणीति क्षेत्रं विस्तारयेति तम् ॥ १०॥

īśvaraḥbrahmaṇā smṛtamātraḥ sa viśvakarmā tato vidhim |prāha kiṃ karavāṇīti kṣetraṃ vistārayeti tam || 10||

व्यधाद्वेधास्तदा शालामाश्रमं सरितस्तटे ।मण्टपं गोपुरं दिव्यं पुष्करेशस्य शूलिनः ॥ ११॥

vyadhādvedhāstadā śālāmāśramaṃ saritastaṭe |maṇṭapaṃ gopuraṃ divyaṃ puṣkareśasya śūlinaḥ || 11||

तद्ब्रह्मणोवचः श्रुत्वा नानाशिल्पसमन्वितः ।शालां निर्मापयामास नानामण्टपशोभिताम् ॥ १२॥

tadbrahmaṇovacaḥ śrutvā nānāśilpasamanvitaḥ |śālāṃ nirmāpayāmāsa nānāmaṇṭapaśobhitām || 12||

भक्ष्यैर्भोज्यैस्तथैवान्नैः सूपापूपैर्मनोरमैः ।वाससां राशयस्तत्र ब्राह्मणावसथादयः ॥ १३॥

bhakṣyairbhojyaistathaivānnaiḥ sūpāpūpairmanoramaiḥ |vāsasāṃ rāśayastatra brāhmaṇāvasathādayaḥ || 13||

पुष्करेश्वरलिङ्गस्य चक्रे सोऽपि शिवालयम् ।प्राकारगोपुरोपेतमाश्रमैः सुमनोहरम् ॥ १४॥

puṣkareśvaraliṅgasya cakre so'pi śivālayam |prākāragopuropetamāśramaiḥ sumanoharam || 14||

तत्पितामहवाक्येन विश्वकर्माऽथ शिल्पिराट् ।विज्ञप्तुमथ ब्रह्माणं सत्यलोकं गतस्तदा ॥ १५॥

tatpitāmahavākyena viśvakarmā'tha śilpirāṭ |vijñaptumatha brahmāṇaṃ satyalokaṃ gatastadā || 15||

तत्र सन्ति महाशैवाः पुष्करैशसमर्चकाः ।बिल्वपत्रादिभिः सम्यक् ते सर्वे भस्मभूषणाः ॥ १६॥

tatra santi mahāśaivāḥ puṣkaraiśasamarcakāḥ |bilvapatrādibhiḥ samyak te sarve bhasmabhūṣaṇāḥ || 16||

रुद्राक्षहारवलयत्रिपुण्ड्रपरिशोभिताः ।निवसन्ति महाशैवाः पुष्करैः पुष्करेश्वरम् ॥ १७॥

rudrākṣahāravalayatripuṇḍrapariśobhitāḥ |nivasanti mahāśaivāḥ puṣkaraiḥ puṣkareśvaram || 17||

समर्चयन्ति नियतं भक्त्या बिल्वैश्च कोमलैः ।तत्तत्कालेन देवेशि पुष्करं मे सुरासुरैः ॥ १८॥

samarcayanti niyataṃ bhaktyā bilvaiśca komalaiḥ |tattatkālena deveśi puṣkaraṃ me surāsuraiḥ || 18||

॥ इति शिवरहस्यान्तर्गते शिवगौरीसंवादे पुष्करेश्वरलिङ्ग शिवक्षेत्र महात्म्यम् ॥॥ श्रीशिवरहस्यम् । भर्गाख्यः पञ्चमांशः । अध्यायः ३५॥– ॥ श्रीशिवरहस्यम् । भर्गाख्यः पन्चमांशः । अध्यायः ३५॥ –

|| iti śivarahasyāntargate śivagaurīsaṃvāde puṣkareśvaraliṅga śivakṣetra mahātmyam |||| śrīśivarahasyam | bhargākhyaḥ pañcamāṃśaḥ | adhyāyaḥ 35||– || śrīśivarahasyam | bhargākhyaḥ pancamāṃśaḥ | adhyāyaḥ 35|| –