ॐकारेश्वरमाहात्म्यम् Onkareshvara Mahatmyam

पार्वतीमहादेवमहानन्दकरुणामृतसागर ।श्रुतमुत्तममाख्यानं महाकालगणस्य च ॥ २॥

pārvatīmahādevamahānandakaruṇāmṛtasāgara |śrutamuttamamākhyānaṃ mahākālagaṇasya ca || 2||

किं वान्यत् प्रीतिजनकं क्षेत्रमस्ति महेश्वर ।क्षेत्राणां त्वं पतिः शम्भो विशिष्टं वक्तुमर्हसि ॥ ३॥

kiṃ vānyat prītijanakaṃ kṣetramasti maheśvara |kṣetrāṇāṃ tvaṃ patiḥ śambho viśiṣṭaṃ vaktumarhasi || 3||

ईश्वरःक्षेत्रमस्त्येकमुत्कृष्टमुत्फुल्लकमलानने ।ओङ्कारं नाम विमलं कलिकल्मषनाशनम् ॥ ४॥

īśvaraḥkṣetramastyekamutkṛṣṭamutphullakamalānane |oṅkāraṃ nāma vimalaṃ kalikalmaṣanāśanam || 4||

तत्र शैववरा नित्यं निवसन्ति सहस्रशः ।ते सर्वे मम लिङ्गार्चां कुर्वन्त्येव प्रतिक्षणम् ॥ ५॥

tatra śaivavarā nityaṃ nivasanti sahasraśaḥ |te sarve mama liṅgārcāṃ kurvantyeva pratikṣaṇam || 5||

भासिताभासितैर्नित्यं शान्ता दान्ता जितेन्द्रियाः ।रुद्राक्षवरभूषाढ्या भालाक्षान्यस्तमानसाः ॥ ६॥

bhāsitābhāsitairnityaṃ śāntā dāntā jitendriyāḥ |rudrākṣavarabhūṣāḍhyā bhālākṣānyastamānasāḥ || 6||

तत्रास्ति सरितां श्रेष्ठा लिङ्गसङ्गतरङ्गिता ।नर्मदा शर्मदा नित्यं स्नानात्पानावगाहनात् ॥ ७॥

tatrāsti saritāṃ śreṣṭhā liṅgasaṅgataraṅgitā |narmadā śarmadā nityaṃ snānātpānāvagāhanāt || 7||

पापौघसङ्घभङ्गाढ्या वातपोतसुशीतला ।तत्रास्ति कुण्डमुत्कृष्टमोङ्काराख्यं शुचिस्मिते ॥ ८॥

pāpaughasaṅghabhaṅgāḍhyā vātapotasuśītalā |tatrāsti kuṇḍamutkṛṣṭamoṅkārākhyaṃ śucismite || 8||

तत्कुण्डदर्शनादेव मल्लोके निवसेच्चिरम् ।तत्कुण्डोदकपानेन हृदि लिङ्गं प्रजायते ॥ ९॥

tatkuṇḍadarśanādeva malloke nivasecciram |tatkuṇḍodakapānena hṛdi liṅgaṃ prajāyate || 9||

भावाः पिबन्ति तत्कुण्डजलं शीतं विमुक्तये ।तृप्तिं प्रयान्ति पितरः तत्कुण्डजलतर्पिताः ॥ १०॥

bhāvāḥ pibanti tatkuṇḍajalaṃ śītaṃ vimuktaye |tṛptiṃ prayānti pitaraḥ tatkuṇḍajalatarpitāḥ || 10||

सदा तत्कुण्डरक्षार्थं गणाः संस्थापिता मया ।कुण्डधारप्रभृतयः शूलमुद्गरपाणयः ॥ ११॥

sadā tatkuṇḍarakṣārthaṃ gaṇāḥ saṃsthāpitā mayā |kuṇḍadhāraprabhṛtayaḥ śūlamudgarapāṇayaḥ || 11||

गजेन्द्रचर्मवसना मृगेन्द्रसमविक्रमाः ।हरीन्द्रानपि ते हन्युर्गिरीन्द्रसमविग्रहाह ॥ १२॥

gajendracarmavasanā mṛgendrasamavikramāḥ |harīndrānapi te hanyurgirīndrasamavigrahāha || 12||

धनुःशरकराः सर्वे जटाशोभितमस्तकाः ।अग्निरित्यादिभिर्मन्त्रैर्भस्मोद्धूलितविग्रहा ॥ १३॥

dhanuḥśarakarāḥ sarve jaṭāśobhitamastakāḥ |agnirityādibhirmantrairbhasmoddhūlitavigrahā || 13||

सङ्ग्राममुखराः सर्वे गणा मेदुरविग्रहाः ।कदाचिदननुज्ञाप्त तान् गणान् मददर्पितः ॥ १४॥

saṅgrāmamukharāḥ sarve gaṇā meduravigrahāḥ |kadācidananujñāpta tān gaṇān madadarpitaḥ || 14||

अप्सरोभिः परिवृतो मरुतां पतिरुद्धतः ।आरुह्याभ्रमुनाथं तं क्रीडितुं नर्मदाजले ॥ १५॥

apsarobhiḥ parivṛto marutāṃ patiruddhataḥ |āruhyābhramunāthaṃ taṃ krīḍituṃ narmadājale || 15||

समाजगाम त्वरितः शच्या साकं शिवे तदा ।तदा तं गणपाः क्रुद्धाः सर्वे ते ह्यतिमन्यवः ॥ १६॥

samājagāma tvaritaḥ śacyā sākaṃ śive tadā |tadā taṃ gaṇapāḥ kruddhāḥ sarve te hyatimanyavaḥ || 16||

सगजं पातयन्नब्धौ शच्या साकं सुरेश्वरम् ।सुरांस्तदा सवरुणान् बिभिदुः पवनानलान् ॥ १७॥

sagajaṃ pātayannabdhau śacyā sākaṃ sureśvaram |surāṃstadā savaruṇān bibhiduḥ pavanānalān || 17||

निस्त्रिंशवरधाराभिः सुतीक्ष्णाग्रैः शिलीमुखैः ।मुद्गरैर्बिभिदुश्चान्ये सवाहायुधभूषणान् ॥ १८॥

nistriṃśavaradhārābhiḥ sutīkṣṇāgraiḥ śilīmukhaiḥ |mudgarairbibhiduścānye savāhāyudhabhūṣaṇān || 18||

विवाहनांस्तदा देवान् स्रवद्रक्तान् स्खलत्पदान् ।कान्दिशीकान् मुक्तकेशान् क्षणाच्चक्रुर्गणेश्वराः ॥ १९॥

vivāhanāṃstadā devān sravadraktān skhalatpadān |kāndiśīkān muktakeśān kṣaṇāccakrurgaṇeśvarāḥ || 19||

अप्सरास्ता विकन्नराः रुदन्त्यो मुक्तमूर्धजाः ।हाहा बतेति क्रन्दन्त्यः स्रवद्रक्तार्द्रवाससः ॥ २०॥

apsarāstā vikannarāḥ rudantyo muktamūrdhajāḥ |hāhā bateti krandantyaḥ sravadraktārdravāsasaḥ || 20||

तथा देवगणाः सर्वे शक्राद्या भयकम्पिताः ।ओङ्कारं तत्र तल्लिङ्गं शरणं जग्मुरीश्वरम् ॥ २१॥

tathā devagaṇāḥ sarve śakrādyā bhayakampitāḥ |oṅkāraṃ tatra talliṅgaṃ śaraṇaṃ jagmurīśvaram || 21||

॥ इति शिवरहस्यान्तर्गते शिवपार्वतीसंवादे ओङ्कारेश्वरमहात्म्यम् ॥॥ श्रीशिवरहस्यम् । भर्गाख्यः पञ्चमांशः । अध्यायः ७। २२१॥

|| iti śivarahasyāntargate śivapārvatīsaṃvāde oṅkāreśvaramahātmyam |||| śrīśivarahasyam | bhargākhyaḥ pañcamāṃśaḥ | adhyāyaḥ 7| 221||

– ॥ श्रीशिवरहस्यम् ।भर्गाख्यः पन्चमांशः ।अध्यायः ७। २-२१॥

– || śrīśivarahasyam |bhargākhyaḥ pancamāṃśaḥ |adhyāyaḥ 7| 2-21||