शिवस्तोत्रम् (मुनिभिःकृतं २ कूर्मपुराणान्तर्गतम्) Munibhih Kritam Shiva Stotram (2)

मुनय ऊचुः ।दृष्ट्वा समागतं देवं देव्या सह कपर्दिनम् ।प्रणेमुः शिरसा भूमौ तोषयामासुरीश्वरम् ॥ १॥

munaya ūcuḥ |dṛṣṭvā samāgataṃ devaṃ devyā saha kapardinam |praṇemuḥ śirasā bhūmau toṣayāmāsurīśvaram || 1||

वैदिकैर्विविधैर्मन्त्रैः सूक्तैर्माहेश्वरैः शुभैः ।अथर्वशिरसा चान्ये रुद्राद्यैरर्च्चयन्भवम् ॥ २॥

vaidikairvividhairmantraiḥ sūktairmāheśvaraiḥ śubhaiḥ |atharvaśirasā cānye rudrādyairarccayanbhavam || 2||

नमो देवादिदेवाय महादेवाय ते नमः ।त्र्यम्बकाय नमस्तुभ्यं त्रिशूलवरधारिणे ॥ ३॥

namo devādidevāya mahādevāya te namaḥ |tryambakāya namastubhyaṃ triśūlavaradhāriṇe || 3||

नमो दिग्वाससे तुभ्यं विकृताय पिनाकिने ।सर्वप्रणतदेवाय स्वयमप्रणतात्मने ॥ ४॥

namo digvāsase tubhyaṃ vikṛtāya pinākine |sarvapraṇatadevāya svayamapraṇatātmane || 4||

अन्तकान्तकृते तुभ्यं सर्वसंहरणाय च ।नमोऽस्तु नृत्यशीलाय नमो भैरवरूपिणे ॥ ५॥

antakāntakṛte tubhyaṃ sarvasaṃharaṇāya ca |namo'stu nṛtyaśīlāya namo bhairavarūpiṇe || 5||

नरनारीशरीराय योगिनां गुरवे नमः ।नमो दान्ताय शान्ताय तापसाय हराय च ॥ ६॥

naranārīśarīrāya yogināṃ gurave namaḥ |namo dāntāya śāntāya tāpasāya harāya ca || 6||

विभीषणाय रुद्राय नमस्ते कृत्तिवाससे ।नमस्ते लेलिहानाय शितिकण्ठाय ते नमः ॥ ७॥

vibhīṣaṇāya rudrāya namaste kṛttivāsase |namaste lelihānāya śitikaṇṭhāya te namaḥ || 7||

अघोरघोररूपाय वामदेवाय वै नमः ।नमः कनकमालाय देव्याः प्रियकराय च ॥ ८॥

aghoraghorarūpāya vāmadevāya vai namaḥ |namaḥ kanakamālāya devyāḥ priyakarāya ca || 8||

गङ्गासलिलधाराय शम्भवे परमेष्ठिने ।नमो योगाधिपतये ब्रह्माधिपतये नमः ॥ ९॥

gaṅgāsaliladhārāya śambhave parameṣṭhine |namo yogādhipataye brahmādhipataye namaḥ || 9||

प्राणाय च नमस्तुभ्यं नमो भस्माङ्गधारिणे ।नमस्ते हव्यवाहाय दंष्ट्रिणे हव्यरेतसे ॥ १०॥

prāṇāya ca namastubhyaṃ namo bhasmāṅgadhāriṇe |namaste havyavāhāya daṃṣṭriṇe havyaretase || 10||

ब्रह्मणश्च शिरोहर्त्रे नमस्ते कालरूपिणे ।आगतिं ते न जनीमो गतिं नैव च नैव च ॥ ११॥

brahmaṇaśca śirohartre namaste kālarūpiṇe |āgatiṃ te na janīmo gatiṃ naiva ca naiva ca || 11||

विश्वेश्वर महादेव योऽसि सोऽसि नमोऽस्तु ते ।नमः प्रमथनाथाय दात्रे च शुभसम्पदाम् ॥ १२॥

viśveśvara mahādeva yo'si so'si namo'stu te |namaḥ pramathanāthāya dātre ca śubhasampadām || 12||

कपालपाणये तुभ्यं नमो मीढुष्टमाय ते ।नमः कनकलिङ्गाय वारिलिङ्गाय ते नमः ॥ १३॥

kapālapāṇaye tubhyaṃ namo mīḍhuṣṭamāya te |namaḥ kanakaliṅgāya vāriliṅgāya te namaḥ || 13||

नमो वह्न्यर्कलिङ्गाय ज्ञानलिङ्गाय ते नमः ।नमो भुजङ्गहाराय कर्णिकारप्रियाय च ।किरीटिने कुण्डलिने कालकालाय ते नमः ॥ १४॥

namo vahnyarkaliṅgāya jñānaliṅgāya te namaḥ |namo bhujaṅgahārāya karṇikārapriyāya ca |kirīṭine kuṇḍaline kālakālāya te namaḥ || 14||

वामदेव महेशान देवदेव त्रिलोचन ।क्षम्यतां यत्कृतं मोहात् त्वमेव शरणं हि नः ॥ १५॥

vāmadeva maheśāna devadeva trilocana |kṣamyatāṃ yatkṛtaṃ mohāt tvameva śaraṇaṃ hi naḥ || 15||

चरितानि विचित्राणि गुह्यानि गहनानि च ।ब्रह्मादीनां च सर्वेषां दुर्विज्ञेयोऽसि शङ्कर ॥ १६॥

caritāni vicitrāṇi guhyāni gahanāni ca |brahmādīnāṃ ca sarveṣāṃ durvijñeyo'si śaṅkara || 16||

अज्ञानाद्यदि वा ज्ञानाद्यत्किञ्चित्कुरुते नरः ।तत्सर्वं भगवानेव कुरुते योगमायया ॥ १७॥

ajñānādyadi vā jñānādyatkiñcitkurute naraḥ |tatsarvaṃ bhagavāneva kurute yogamāyayā || 17||

एवं स्तुत्वा महादेवं प्रहृष्टेनान्तरात्मना ।ऊचुः प्रणम्य गिरिशं पश्यामस्त्वां यथा पुरा ॥ १८॥

evaṃ stutvā mahādevaṃ prahṛṣṭenāntarātmanā |ūcuḥ praṇamya giriśaṃ paśyāmastvāṃ yathā purā || 18||

इति कूर्मपुराणे उत्तरभागे एकोनचत्वारिंशाध्यायान्तगतंमुनिभिः कृतं शिवस्तोत्रं समाप्तम् ।कूर्मपुराणे उत्तरभागे ३९/१९३५

iti kūrmapurāṇe uttarabhāge ekonacatvāriṃśādhyāyāntagataṃmunibhiḥ kṛtaṃ śivastotraṃ samāptam |kūrmapurāṇe uttarabhāge 39/1935