हराष्टकम् Harashtakam

जयत्यखिलखेचरप्रवरमौलिरत्नप्रभाप्ररोहपरिपीवरीकृतनखांशुपादाम्बुजः ।विशालनयनत्रयीरचितधामधामत्रयीतिरस्कृतजगत्रयीपरिणतान्धकारो हरः ॥ १॥

jayatyakhilakhecarapravaramauliratnaprabhāprarohaparipīvarīkṛtanakhāṃśupādāmbujaḥ |viśālanayanatrayīracitadhāmadhāmatrayītiraskṛtajagatrayīpariṇatāndhakāro haraḥ || 1||

जयत्यमरदीर्घिकासलिलसेकसंवर्धितप्रचण्डनयनानलग्लपिततीव्रतापव्यथः ।अचिन्त्यचरितोज्ज्वलज्वलदनन्यसाधारणप्रभावमहिमाहितत्रिभुवनापकारो हरः ॥ २॥

jayatyamaradīrghikāsalilasekasaṃvardhitapracaṇḍanayanānalaglapitatīvratāpavyathaḥ |acintyacaritojjvalajvaladananyasādhāraṇaprabhāvamahimāhitatribhuvanāpakāro haraḥ || 2||

जयत्यचलकन्यकाललितदोर्लतालिङ्गितस्फुरद्गरलकालिमाकलितकान्तकणठस्थलः ।तडिद्वलयलङ्घितोल्लसदमोघमेघभ्रमप्रमत्तगुहबर्हिणोपहृतनृत्तहर्षो हरः ॥ ३॥

jayatyacalakanyakālalitadorlatāliṅgitasphuradgaralakālimākalitakāntakaṇaṭhasthalaḥ |taḍidvalayalaṅghitollasadamoghameghabhramapramattaguhabarhiṇopahṛtanṛttaharṣo haraḥ || 3||

जयत्यविरलोच्छलद्गरलवह्निहेतिच्छटासटालफणभीषणक्षपणपाशमोक्षक्षमः ।उदारकरुणारसप्रसरसारसिक्ताशयःप्रपन्नविपदर्णवोत्तरणकणधारो हरः ॥ ४॥

jayatyaviralocchaladgaralavahniheticchaṭāsaṭālaphaṇabhīṣaṇakṣapaṇapāśamokṣakṣamaḥ |udārakaruṇārasaprasarasārasiktāśayaḥprapannavipadarṇavottaraṇakaṇadhāro haraḥ || 4||

जयत्युदधिनिःसरद्गरनिगारलब्धाऽभयप्रमोदभरनिभरत्रिदशदैत्यवृन्दस्तुतः ।रसातलतलोद्गतज्वलदलङ्घ्यलिङ्गाल्लसन्महामहिममोहितद्रुहिणवासुदेवो हरः ॥ ५॥

jayatyudadhiniḥsaradgaranigāralabdhā'bhayapramodabharanibharatridaśadaityavṛndastutaḥ |rasātalatalodgatajvaladalaṅghyaliṅgāllasanmahāmahimamohitadruhiṇavāsudevo haraḥ || 5||

जयत्यतुलविक्रमोन्मिषदखर्वगर्वज्ज्वरज्वलच्चपलमन्मथोन्मथनभग्नभोगस्पृहः ।दशास्यभुजमणडलीतरलितैकपिङ्गाचलत्रसद्गिरिसुताहठग्रथितकणठपीठो हरः ॥ ६॥

jayatyatulavikramonmiṣadakharvagarvajjvarajvalaccapalamanmathonmathanabhagnabhogaspṛhaḥ |daśāsyabhujamaṇaḍalītaralitaikapiṅgācalatrasadgirisutāhaṭhagrathitakaṇaṭhapīṭho haraḥ || 6||

जयत्यकलितोल्लसन्मदभरोद्धरान्धासुरप्रतिष्करणसान्त्वनप्रथितनिग्रहाऽनुग्रहः ।जगत्त्रयभयङ्करत्रिपुरघोरदावावलीसलीलकवलीकृतिप्रलयवारिवाहो हरः ॥ ७॥

jayatyakalitollasanmadabharoddharāndhāsurapratiṣkaraṇasāntvanaprathitanigrahā'nugrahaḥ |jagattrayabhayaṅkaratripuraghoradāvāvalīsalīlakavalīkṛtipralayavārivāho haraḥ || 7||

जयत्यघवनाशनिः सुमतिमाधवीमाधवःकृपामृतपयोनिधिर्भवमहार्णवैकप्लवः ।विपत्तृणसमीरणः प्रणयिचित्तचिन्तामणिःसमस्तभुवनोदयप्रलयकेलिकारो हरः ॥ ८॥

jayatyaghavanāśaniḥ sumatimādhavīmādhavaḥkṛpāmṛtapayonidhirbhavamahārṇavaikaplavaḥ |vipattṛṇasamīraṇaḥ praṇayicittacintāmaṇiḥsamastabhuvanodayapralayakelikāro haraḥ || 8||

॥ इति काश्मीरकमहाकवि श्रीमज्जगद्धरभट्टविरचितेभगवतो महेश्वरस्य स्तुतिकुसुमाञ्जलौहराष्टकं नाम षष्ठं स्तोत्रं सम्पूर्णम् ।

|| iti kāśmīrakamahākavi śrīmajjagaddharabhaṭṭaviracitebhagavato maheśvarasya stutikusumāñjalauharāṣṭakaṃ nāma ṣaṣṭhaṃ stotraṃ sampūrṇam |