शिवस्तोत्रम् (ब्रह्मदेवप्रोक्तं लिङ्गपुराणान्तर्गतम् एष देवो महादेवो विज्ञेयस्तु महेश्वरः) Brahmadevaproktam Shiva Stotram

सनत्कुमार उवाच ।कथं भवप्रसादेन देवदारुवनौकसः ।प्रपन्नाः शरणं देवं वक्तुमर्हसि मे प्रभो ॥ १॥

sanatkumāra uvāca |kathaṃ bhavaprasādena devadāruvanaukasaḥ |prapannāḥ śaraṇaṃ devaṃ vaktumarhasi me prabho || 1||

शैलादिरुवाच ।तानुवाच महाभागान्भगवानात्मभूः स्वयम् ।देवदारुवनस्थांस्तु तपसान् पावकप्रभान् ॥ २॥

śailādiruvāca |tānuvāca mahābhāgānbhagavānātmabhūḥ svayam |devadāruvanasthāṃstu tapasān pāvakaprabhān || 2||

पितामह उवाच ।एष देवो महादेवो विज्ञेयस्तु महेश्वरः ।न तस्मात्परमं किञ्चित्पदं समधिगम्यते ॥ ३॥

pitāmaha uvāca |eṣa devo mahādevo vijñeyastu maheśvaraḥ |na tasmātparamaṃ kiñcitpadaṃ samadhigamyate || 3||

देवानां च ऋषीणां च पितॄणां चैव स प्रभुः ।सहस्रयुगपर्यन्ते प्रलये सर्वदेहिनः ॥ ४॥

devānāṃ ca ṛṣīṇāṃ ca pitṝṇāṃ caiva sa prabhuḥ |sahasrayugaparyante pralaye sarvadehinaḥ || 4||

संहरत्येष भगवान् कालो भूत्वा महेश्वरः ।एष चैव प्रजाः सर्वाः सृजत्येकः स्वतेजसा ॥ ५॥

saṃharatyeṣa bhagavān kālo bhūtvā maheśvaraḥ |eṣa caiva prajāḥ sarvāḥ sṛjatyekaḥ svatejasā || 5||

एष चक्री च वज्री च श्रीवत्सकृतलक्षणः ।योगी कृतयुगे चैव त्रेतायां क्रतुरुच्यते ॥ ६॥

eṣa cakrī ca vajrī ca śrīvatsakṛtalakṣaṇaḥ |yogī kṛtayuge caiva tretāyāṃ kraturucyate || 6||

द्वापरे चैव कालाग्निर्धमकेतुः कलौ स्मृतः ।रुद्रस्य मूर्तयस्त्वेता येऽभिध्यायन्ति पण्डिताः ॥ ७॥

dvāpare caiva kālāgnirdhamaketuḥ kalau smṛtaḥ |rudrasya mūrtayastvetā ye'bhidhyāyanti paṇḍitāḥ || 7||

चतुरस्रं बहिश्चान्तरष्टास्रं पिण्डिकाश्रये ।वृत्तं सुदर्शनं योग्यमेवं लिङ्गं प्रपूजयेत् ॥ ८॥

caturasraṃ bahiścāntaraṣṭāsraṃ piṇḍikāśraye |vṛttaṃ sudarśanaṃ yogyamevaṃ liṅgaṃ prapūjayet || 8||

तमो ह्यग्नी रजो ब्रह्मा सत्त्वं विष्णुः प्रकाशकम् ।मूर्तिरेका स्थिता चास्य मूर्तयः परिकीर्तिताः ॥ ९॥

tamo hyagnī rajo brahmā sattvaṃ viṣṇuḥ prakāśakam |mūrtirekā sthitā cāsya mūrtayaḥ parikīrtitāḥ || 9||

यत्र तिष्ठति तद्ब्रह्म योगेन तु समन्वितम् ।तस्माद्धि देवदेवेशमीशानं प्रभुमव्ययम् ॥ १०॥

yatra tiṣṭhati tadbrahma yogena tu samanvitam |tasmāddhi devadeveśamīśānaṃ prabhumavyayam || 10||

आराधयन्ति विप्रेन्द्रा जितक्रोधा जितोन्द्रियाः ।लिङ्गं कृत्वा यथान्यायं सर्वलक्षणसंयुतम् ॥ ११॥

ārādhayanti viprendrā jitakrodhā jitondriyāḥ |liṅgaṃ kṛtvā yathānyāyaṃ sarvalakṣaṇasaṃyutam || 11||

अङ्गुष्ठमात्रं सुशुभं सुवृत्तं सर्वसम्मतम् ।समनाभं तथाष्टास्रं षोडशास्रमथापि वा ॥ १२॥

aṅguṣṭhamātraṃ suśubhaṃ suvṛttaṃ sarvasammatam |samanābhaṃ tathāṣṭāsraṃ ṣoḍaśāsramathāpi vā || 12||

सुवृत्तं मण्डलं दिव्यं सर्वकामफलप्रदम् ।वेदिका द्विगुणा तस्य समा वा सर्वसम्मता ॥ १३॥

suvṛttaṃ maṇḍalaṃ divyaṃ sarvakāmaphalapradam |vedikā dviguṇā tasya samā vā sarvasammatā || 13||

गोमुखी च त्रिभागैका वेद्या लक्षणसयुता ।पट्टिका च समन्ताद्वै यवमात्रा द्विजोत्तमाः ॥ १४॥

gomukhī ca tribhāgaikā vedyā lakṣaṇasayutā |paṭṭikā ca samantādvai yavamātrā dvijottamāḥ || 14||

सौवर्णं राजतं शैलं कृत्वा ताम्रमयं तथा ।वेदिकायाश्च विस्तारं त्रिगुणं वै समन्ततः ॥ १५॥

sauvarṇaṃ rājataṃ śailaṃ kṛtvā tāmramayaṃ tathā |vedikāyāśca vistāraṃ triguṇaṃ vai samantataḥ || 15||

वर्तुलं चतुरस्रं वा षडस्रं वा त्रिरस्रकम् ।समन्तान्निर्व्रणं शुभ्रं लक्षणैस्तत्सुलक्षितम् ॥ १६॥

vartulaṃ caturasraṃ vā ṣaḍasraṃ vā trirasrakam |samantānnirvraṇaṃ śubhraṃ lakṣaṇaistatsulakṣitam || 16||

इति श्रीलिङ्गमहापुराणे पूर्वभागे एकत्रिंशाध्यायान्तर्गतंब्रह्मदेवप्रोक्तं शिवस्तोत्रं समाप्तम् ।लिङ्गपुराण । पूर्वभाग । अध्याय ३२/११६॥लिन्गपुराण । पूर्वभाग । अध्याय ३२/१-१६॥

iti śrīliṅgamahāpurāṇe pūrvabhāge ekatriṃśādhyāyāntargataṃbrahmadevaproktaṃ śivastotraṃ samāptam |liṅgapurāṇa | pūrvabhāga | adhyāya 32/116||lingapurāṇa | pūrvabhāga | adhyāya 32/1-16||