भवसोदर्यष्टकम् Shri Bhavasodaryashtakam

भजतां कल्पलतिका भवभीतिविभञ्जनी ।भ्रमराभकचा भूयाद्भव्याय भवसोदरी ॥ १॥

bhajatāṃ kalpalatikā bhavabhītivibhañjanī |bhramarābhakacā bhūyādbhavyāya bhavasodarī || 1||

करनिर्जितपाथोजा शरदभ्रनिभाम्बरा ।वरदानरता भूयाद्भव्याय भवसोदरी ॥ २॥

karanirjitapāthojā śaradabhranibhāmbarā |varadānaratā bhūyādbhavyāya bhavasodarī || 2||

काम्या पयोजजनुषा नम्या सुरवरैर्मुहुः ।रभ्याब्जवसतिर्भूयाद्भव्याय भवसोदरी ॥ ३॥

kāmyā payojajanuṣā namyā suravarairmuhuḥ |rabhyābjavasatirbhūyādbhavyāya bhavasodarī || 3||

कृष्णादिसुरसंसेव्या कृतान्तभयनाशिनी ।कृपार्द्रहृदया भूयाद्भव्याय भवसोदरी ॥ ४॥

kṛṣṇādisurasaṃsevyā kṛtāntabhayanāśinī |kṛpārdrahṛdayā bhūyādbhavyāya bhavasodarī || 4||

मेनकादिसमाराध्या शौनकादिमुनिस्तुता ।कनकाभतनुर्भूयाद्भव्याय भवसोदरी ॥ ५॥

menakādisamārādhyā śaunakādimunistutā |kanakābhatanurbhūyādbhavyāya bhavasodarī || 5||

वरदा पदनम्रेभ्यः पारदा भववारिधेः ।नीरदाभकचा भूयाद्भव्याय भवसोदरी ॥ ६॥

varadā padanamrebhyaḥ pāradā bhavavāridheḥ |nīradābhakacā bhūyādbhavyāya bhavasodarī || 6||

विनताघहारा शीघ्रं विनतातनयार्चिता ।पीनतायुक्कुचा भूयाद्भव्याय भवसोदरी ॥ ७॥

vinatāghahārā śīghraṃ vinatātanayārcitā |pīnatāyukkucā bhūyādbhavyāya bhavasodarī || 7||

वीणालसतपाणिपद्मा काणादमुखशास्त्रदा ।एणाङ्कशिशुभृद्भूयाद्भव्याय भवसोदरी ॥ ८॥

vīṇālasatapāṇipadmā kāṇādamukhaśāstradā |eṇāṅkaśiśubhṛdbhūyādbhavyāya bhavasodarī || 8||

अष्टकं भवसोदर्याः कष्टनाशकरं द्रुतम् ।इष्टदं सम्पठञ्छीघ्रमष्टसिद्धीरवाप्नुयात् ॥ ९॥

aṣṭakaṃ bhavasodaryāḥ kaṣṭanāśakaraṃ drutam |iṣṭadaṃ sampaṭhañchīghramaṣṭasiddhīravāpnuyāt || 9||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितं श्रीभवसोदर्यष्टकं सम्पूर्णम् ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaṃ śrībhavasodaryaṣṭakaṃ sampūrṇam |