शारदास्तुतिः ४ Sharadastutih

श्रीशारदाम्बायै नमः ।कल्याणमूर्तिः करुणालवाला कलाधरोत्तंसकिरीटकोटिः ।कलावती काङ्क्षितकल्पवल्ली करोतु कल्याणपरम्परां नः ॥ १॥

śrīśāradāmbāyai namaḥ |kalyāṇamūrtiḥ karuṇālavālā kalādharottaṃsakirīṭakoṭiḥ |kalāvatī kāṅkṣitakalpavallī karotu kalyāṇaparamparāṃ naḥ || 1||

चक्रीकृतोल्लोचशिरःफणीन्द्रफणामणीभासुरतूलिकाढ्ये ।श्रीमंटपान्तर्मृगराजपीठे विद्योतते नः कुलभागधेयम् ॥ २॥

cakrīkṛtollocaśiraḥphaṇīndraphaṇāmaṇībhāsuratūlikāḍhye |śrīmaṃṭapāntarmṛgarājapīṭhe vidyotate naḥ kulabhāgadheyam || 2||

ज्ञेयं मुनीन्द्रैश्चिरयोगसिद्धैस्सविन्मयं तत्परदेवतायाः ।लीलागृहितं यदुपासकानां ध्ययोपलब्ध्यै विवृणोमि रूपम् ॥ ३॥

jñeyaṃ munīndraiścirayogasiddhaissavinmayaṃ tatparadevatāyāḥ |līlāgṛhitaṃ yadupāsakānāṃ dhyayopalabdhyai vivṛṇomi rūpam || 3||

शृणोमि वाचं यदि लोचनेन पश्यामि चेत्पादतलेन रूपम् ।पास्यामि चेदञ्जलिना महाब्धिं कल्पेय देव्या गुणवर्णनाय ॥ ४॥

śṛṇomi vācaṃ yadi locanena paśyāmi cetpādatalena rūpam |pāsyāmi cedañjalinā mahābdhiṃ kalpeya devyā guṇavarṇanāya || 4||

तथापि वाचंयमसार्वभौमकृपालवालाप्तवचोभिरम्बाम् ।स्तोष्यामि किञ्चित्प्रतिभातदृष्टश्रुतानुभूतोरुगुणप्रवाहैः ॥ ५॥

tathāpi vācaṃyamasārvabhaumakṛpālavālāptavacobhirambām |stoṣyāmi kiñcitpratibhātadṛṣṭaśrutānubhūtoruguṇapravāhaiḥ || 5||

रत्नावजीकर्बुरितेन्दुरेखापरिष्कृतानर्घ्यकिरीटकोटिम् ।लावण्यवापीपुलिनायमा न ललाटखेलच्चिकुरालिचक्राम् ॥ ६॥

ratnāvajīkarburitendurekhāpariṣkṛtānarghyakirīṭakoṭim |lāvaṇyavāpīpulināyamā na lalāṭakhelaccikurālicakrām || 6||

उन्निद्रचाम्पेयपरागगन्धि मधुव्रतश्रीमदरालकेशीम् ।भोगीन्द्रभोगोपमनीलवेणी विषक्तचूडामणिनागपालीम् ॥ ७॥

unnidracāmpeyaparāgagandhi madhuvrataśrīmadarālakeśīm |bhogīndrabhogopamanīlaveṇī viṣaktacūḍāmaṇināgapālīm || 7||

लावण्यकुल्यायितशोणकान्ति सीमन्तरेखाग्रचलल्ललन्तीम् ।भ्रूचापसंयोजितमारबाणनिभाक्षिलक्षीकृतधातृवक्त्राम् ॥ ८॥

lāvaṇyakulyāyitaśoṇakānti sīmantarekhāgracalallalantīm |bhrūcāpasaṃyojitamārabāṇanibhākṣilakṣīkṛtadhātṛvaktrām || 8||

प्रवर्ष्षकाम्भोधरकीर्यमाणवर्षोपलस्पर्धिकटाक्षवीक्षाम् ।हीरप्रभाभासुरचम्पकाभनासाग्रविस्फारिमणिप्रवेकाम् ॥ ९॥

pravarṣṣakāmbhodharakīryamāṇavarṣopalaspardhikaṭākṣavīkṣām |hīraprabhābhāsuracampakābhanāsāgravisphārimaṇipravekām || 9||

विकस्वराम्भोरुहकेसराभरदांशुसन्मिश्रितमुग्धहासाम् ।रदच्छदापाटलकुन्दकोशमाला प्रतिस्पर्धिशिताग्रदन्ताम् ॥ १०॥

vikasvarāmbhoruhakesarābharadāṃśusanmiśritamugdhahāsām |radacchadāpāṭalakundakośamālā pratispardhiśitāgradantām || 10||

वर्णावलीवादनशोणरत्न कोणायमानाग्रविलोलजिह्वाम् ।कपोलपालीमणिदर्पणान्तः स्फुरत्प्रभाविम्बितकर्णपूराम् ॥ ११॥

varṇāvalīvādanaśoṇaratna koṇāyamānāgravilolajihvām |kapolapālīmaṇidarpaṇāntaḥ sphuratprabhāvimbitakarṇapūrām || 11||

विसृत्वरस्मेरमुखेन्दुबिम्ब ज्योत्स्नासुधापीनजगच्चकोराम् ।विपञ्चिकाञ्चत्कलनादभङ्गी विभावनामोदविलोलवक्त्राम् ॥ १२॥

visṛtvarasmeramukhendubimba jyotsnāsudhāpīnajagaccakorām |vipañcikāñcatkalanādabhaṅgī vibhāvanāmodavilolavaktrām || 12||

वक्राब्जनालप्रतिमान कण्ठमृणाल काण्डायित हरिहाराम् ।रेखात्रयीसूचित भर्तृभाग्यमाङ्गल्य सूत्राञ्चित कम्बुकञ्ठीम् ॥ १३॥

vakrābjanālapratimāna kaṇṭhamṛṇāla kāṇḍāyita harihārām |rekhātrayīsūcita bhartṛbhāgyamāṅgalya sūtrāñcita kambukañṭhīm || 13||

ओष्ठप्रभालक्तकरूषित श्रीकौशेयकूर्पासपिनद्धवक्षाम् ।सुवृत्तमुक्तावलि काङ्क्ष्यमाणस्तन्यामृतापीन कुचाब्जकोशाम् ॥ १४॥

oṣṭhaprabhālaktakarūṣita śrīkauśeyakūrpāsapinaddhavakṣām |suvṛttamuktāvali kāṅkṣyamāṇastanyāmṛtāpīna kucābjakośām || 14||

चिरागतानेक सुतावलोक स्रुतस्तन क्षीरकणार्द्रहाराम् ।अभष्टिदान प्रथितामरद्रु शाखायमानां सलबाहुपाशाम् ॥ १५॥

cirāgatāneka sutāvaloka srutastana kṣīrakaṇārdrahārām |abhaṣṭidāna prathitāmaradru śākhāyamānāṃ salabāhupāśām || 15||

शाणोपलोल्लीढ मणिप्रवेक केयूरवल्लीवलयाङ्गुलीयाम् ।प्रपन्नलोकाभयदान मुद्रापुस्ताक्षमालां कुशपाशहस्ताम् ॥ १६॥

śāṇopalollīḍha maṇipraveka keyūravallīvalayāṅgulīyām |prapannalokābhayadāna mudrāpustākṣamālāṃ kuśapāśahastām || 16||

वैडूर्यशोणोपलहीर नीलप्रत्युप्त हेमाङ्गदकङ्कणाढ्याम् ।ताटङ्क शोणोपल बीजपूर बीजभ्रमोत्कण्ठकराग्रकीराम् ॥ १७॥

vaiḍūryaśoṇopalahīra nīlapratyupta hemāṅgadakaṅkaṇāḍhyām |tāṭaṅka śoṇopala bījapūra bījabhramotkaṇṭhakarāgrakīrām || 17||

आपीनवक्षोरुहभार भुग्नवलित्रयीपात पिनद्धमध्याम् ।सुवर्ण काञ्चीमणिसूत्रनद्धस्पर्शानुमेयाम्बरगूढगछ्छाम् ॥ १८॥

āpīnavakṣoruhabhāra bhugnavalitrayīpāta pinaddhamadhyām |suvarṇa kāñcīmaṇisūtranaddhasparśānumeyāmbaragūḍhagachchām || 18||

रत्न प्रवेकाञ्चितनूपुराग्र मणिप्रभापिञ्जर पादपद्माम् ।शरत्प्रसन्नेन्दु कलाभिराम नखांशुविद्रावितहार्दतापाम् ॥ १९॥

ratna pravekāñcitanūpurāgra maṇiprabhāpiñjara pādapadmām |śaratprasannendu kalābhirāma nakhāṃśuvidrāvitahārdatāpām || 19||

प्रतप्तजाम्बूनद कायकान्तिच्छटापि शङ्गीकृतसौधमालाम् ।शृत्यन्त सीमान्त विभाग रेखाप्रमाणदण्डायितगात्रयष्टिम् ॥ २०॥

prataptajāmbūnada kāyakānticchaṭāpi śaṅgīkṛtasaudhamālām |śṛtyanta sīmānta vibhāga rekhāpramāṇadaṇḍāyitagātrayaṣṭim || 20||

शीतांशुतारालि तुषारहीर निभोत्तरासङ्गसमृद्धशोभाम् ।सर्वज्ञताध्यापन लब्धवर्णप्रसाददाना दृतपक्ष्यलाक्षि ॥ २१॥

śītāṃśutārāli tuṣārahīra nibhottarāsaṅgasamṛddhaśobhām |sarvajñatādhyāpana labdhavarṇaprasādadānā dṛtapakṣyalākṣi || 21||

जगत्रयापत्यसपीति मोदपर्यासवक्षोरुह पूर्णकुम्भाम् ।लोकत्रयी संवननप्रयुक्त यन्त्रोपमासचेनवक्त्रबिम्बाम् ॥ २२॥

jagatrayāpatyasapīti modaparyāsavakṣoruha pūrṇakumbhām |lokatrayī saṃvananaprayukta yantropamāsacenavaktrabimbām || 22||

सांसिद्धिकागन्तुक कान्तिपूरतरङ्गरिङ्गत्तरलागशोभाम् ।निजाङ्ग संसर्गविशेषरम्यदुकूल रत्नाभरण प्रसूनाम् ॥ २३॥

sāṃsiddhikāgantuka kāntipūrataraṅgariṅgattaralāgaśobhām |nijāṅga saṃsargaviśeṣaramyadukūla ratnābharaṇa prasūnām || 23||

पूर्णेन्दु कल्लोलितदुग्ध सिन्धुफेनायमानाम्बवर संवृताङ्गी ।भेदभ्रमोन्मूलनदक्षतत्व विज्ञानमुद्राञ्चितपाणिपद्माम् ॥ २४॥

pūrṇendu kallolitadugdha sindhuphenāyamānāmbavara saṃvṛtāṅgī |bhedabhramonmūlanadakṣatatva vijñānamudrāñcitapāṇipadmām || 24||

मृणालसूत्रीविशदोपवीत मुक्ताक्षमालाकनकालुरम्याम् ।भ्रूवल्लरीकोमलरुन्दकल्प काश्मीरपङ्कार्द्रतमालपत्राम् ॥ २५॥

mṛṇālasūtrīviśadopavīta muktākṣamālākanakāluramyām |bhrūvallarīkomalarundakalpa kāśmīrapaṅkārdratamālapatrām || 25||

सिन्दूरपाली सुषुमानुषङ्ग किम्मीरकालागरुचैत्रकाढ्याम् ।विरञ्चिनेत्राष्टकपीयमान सौन्दर्यपीयूषमुखेन्दुलक्ष्मीम् ॥ २६॥

sindūrapālī suṣumānuṣaṅga kimmīrakālāgarucaitrakāḍhyām |virañcinetrāṣṭakapīyamāna saundaryapīyūṣamukhendulakṣmīm || 26||

ध्यानायन यच्चजगद्गुरूणा क्षेमायनं भक्तिपरायणानाम् ।रसायनं धातृविलोचनानामेकायनं नश्शरणागतानाम् ॥ २७॥

dhyānāyana yaccajagadgurūṇā kṣemāyanaṃ bhaktiparāyaṇānām |rasāyanaṃ dhātṛvilocanānāmekāyanaṃ naśśaraṇāgatānām || 27||

भक्तावलीमानसराजहंसी श्रीचक्रराजाश्रितदिव्यमूर्तिम् ।श्रीशृङ्गशैलेन्द्रविहारलोलां श्रीशारदाम्बां सततं स्मरामि ॥ २८॥

bhaktāvalīmānasarājahaṃsī śrīcakrarājāśritadivyamūrtim |śrīśṛṅgaśailendravihāralolāṃ śrīśāradāmbāṃ satataṃ smarāmi || 28||

श्रीहरीमतीमन्दवखण्डचूडः दयारसल्लिन्नविलोचनान्ताम् ।चकोरसाहित्यनिदानवक्त्रां स्मरामि भक्तेष्टदकल्पवल्लीम् ॥ २९॥

śrīharīmatīmandavakhaṇḍacūḍaḥ dayārasallinnavilocanāntām |cakorasāhityanidānavaktrāṃ smarāmi bhakteṣṭadakalpavallīm || 29||

तालीपलाशाञ्चितकर्णजाहा काश्मीररेखोज्ज्वलफालमूला ।निशाह्वयाचूर्णविमृष्टगण्डा धातुःपुरन्ध्री हृदि सन्निधत्ताम् ॥ ३०॥

tālīpalāśāñcitakarṇajāhā kāśmīrarekhojjvalaphālamūlā |niśāhvayācūrṇavimṛṣṭagaṇḍā dhātuḥpurandhrī hṛdi sannidhattām || 30||

प्रतिष्ठितां श्रीगुरुशङ्करार्यैः समर्चिता संयमिसार्वभौमैः ।तपोभिरेषां सुसमिद्धशक्तिं स्थाने श्रुतिस्त्वां गुरुमूर्तिमाह ॥ ३१॥

pratiṣṭhitāṃ śrīguruśaṅkarāryaiḥ samarcitā saṃyamisārvabhaumaiḥ |tapobhireṣāṃ susamiddhaśaktiṃ sthāne śrutistvāṃ gurumūrtimāha || 31||

नारायणोरस्थलगेहिनीति विरिञ्चिवक्राब्जकुटुम्बिनीति ।श्रीकण्ठवामाङ्गवशंवदेति यथाभिलाषं समुपासते त्वाम् ॥ ३२॥

nārāyaṇorasthalagehinīti viriñcivakrābjakuṭumbinīti |śrīkaṇṭhavāmāṅgavaśaṃvadeti yathābhilāṣaṃ samupāsate tvām || 32||

श्रुत्वा स्वरासि प्रकृतिः पदेषु वाक्येषु हेतुः प्रमितिः प्रमाणे ।क्रियाफला तत्प्रतिभूस्त्वमेव सर्वात्मना व्याप्य विभासि विश्वम् ॥ ३३॥

śrutvā svarāsi prakṛtiḥ padeṣu vākyeṣu hetuḥ pramitiḥ pramāṇe |kriyāphalā tatpratibhūstvameva sarvātmanā vyāpya vibhāsi viśvam || 33||

कल्या प्रदुग्धे चतुरः पुमर्थान् हिंसा च घोरा मुषती विधत्ते ।शक्तिद्वयी तेऽम्ब निसर्गसिद्धा नवास्बुदस्येव सुवृष्टिवज्रे ॥ ३४॥

kalyā pradugdhe caturaḥ pumarthān hiṃsā ca ghorā muṣatī vidhatte |śaktidvayī te'mba nisargasiddhā navāsbudasyeva suvṛṣṭivajre || 34||

या ते प्रतिष्ठेति कला प्रसिद्धा भूमौ यया व्याप्तमिदं समग्रम् ।तयैकया विश्वमिदं बिभर्षि विश्वम्भरां त्वां हृदि भावयामि ॥ ३५॥

yā te pratiṣṭheti kalā prasiddhā bhūmau yayā vyāptamidaṃ samagram |tayaikayā viśvamidaṃ bibharṣi viśvambharāṃ tvāṃ hṛdi bhāvayāmi || 35||

मातश्चतुष्षष्टिकलाभिरेतच्चराचरं विश्वमनुप्रविश्य ।त्वमेव तच्चेतयसीह सर्वचैतन्यरूपां शरणं प्रपद्ये ॥ ३६॥

mātaścatuṣṣaṣṭikalābhiretaccarācaraṃ viśvamanupraviśya |tvameva taccetayasīha sarvacaitanyarūpāṃ śaraṇaṃ prapadye || 36||

विद्येत्यविद्येति च यत्स्वरूपे मोक्षाय बन्धाय च हेतुभूते ।लीला तवैवाम्ब नचेत्कुतावो तमःप्रकाशौ सहयोगिनौ स्तः ॥ ३७॥

vidyetyavidyeti ca yatsvarūpe mokṣāya bandhāya ca hetubhūte |līlā tavaivāmba nacetkutāvo tamaḥprakāśau sahayoginau staḥ || 37||

याश्शक्तयस्सर्गविधौ विधातुरुच्चावचाः कारणतां प्रसन्नाः ।तासां परासां च समष्टिरूपामम्बामहं भावनयाऽवलम्बे ॥ ३८॥

yāśśaktayassargavidhau vidhāturuccāvacāḥ kāraṇatāṃ prasannāḥ |tāsāṃ parāsāṃ ca samaṣṭirūpāmambāmahaṃ bhāvanayā'valambe || 38||

अव्याकृतं पूर्वमिदं समग्रं तत्तद्विशेषग्रहणाय नाम्ना ।तद्व्याकरोस्त्वं वचसां सवित्रि तत्त्वां विना चेतयते न किञ्चित् ॥ ३९॥

avyākṛtaṃ pūrvamidaṃ samagraṃ tattadviśeṣagrahaṇāya nāmnā |tadvyākarostvaṃ vacasāṃ savitri tattvāṃ vinā cetayate na kiñcit || 39||

ऋचा नुवाकेन च सामशस्त्रैर्विधिप्रयोगान् विविधान्विधाय ।ददासि लोकद्वयसौख्यमेषां तां वाङ्गमयीं शान्तिकलामुपासे ॥ ४०॥

ṛcā nuvākena ca sāmaśastrairvidhiprayogān vividhānvidhāya |dadāsi lokadvayasaukhyameṣāṃ tāṃ vāṅgamayīṃ śāntikalāmupāse || 40||

सुधासवर्णां तरुणारुणाभामाराध्य केचिद्वृणुते स्वकामान् ।जुषन्ति भोगान्विहितान् त्वयैव ते वञ्चितास्त्वन्महिमानभिज्ञाः ॥ ४१॥

sudhāsavarṇāṃ taruṇāruṇābhāmārādhya kecidvṛṇute svakāmān |juṣanti bhogānvihitān tvayaiva te vañcitāstvanmahimānabhijñāḥ || 41||

संविन्मयीं त्वां समुपासते ये संवित्स्वरूपाः खलु ते भवन्ति ।श्रद्धामयोयं पुरुषश्रुतश्च कीटोऽपि पेशस्करतां प्रयाति ॥ ४२॥

saṃvinmayīṃ tvāṃ samupāsate ye saṃvitsvarūpāḥ khalu te bhavanti |śraddhāmayoyaṃ puruṣaśrutaśca kīṭo'pi peśaskaratāṃ prayāti || 42||

सेवालसोऽहं न च कामकामी सेवार्थिनी त्वं नहि पूर्णकामा ।नैवावयोस्सेवकसेव्यभावस्तद्भेदहानौ किमुशिष्यते सा ॥ ४३॥

sevālaso'haṃ na ca kāmakāmī sevārthinī tvaṃ nahi pūrṇakāmā |naivāvayossevakasevyabhāvastadbhedahānau kimuśiṣyate sā || 43||

ब्रह्माहमस्मीति निदशर्यन्तु गवेषितं तैरपि तावदेव ।तस्यापि चैतन्य मुपानयन्ती चिद्रूपिणीं त्वामहमित्यवैमि ॥ ४४॥

brahmāhamasmīti nidaśaryantu gaveṣitaṃ tairapi tāvadeva |tasyāpi caitanya mupānayantī cidrūpiṇīṃ tvāmahamityavaimi || 44||

दयाम्बुधिं त्वां जननीति मत्वा विधूयगर्वाज्जननीतिमम्ब ।अत्याचरं धर्मपथं च मूढो मामुद्धरेति प्रलपन्नलज्जे ॥ ४५॥

dayāmbudhiṃ tvāṃ jananīti matvā vidhūyagarvājjananītimamba |atyācaraṃ dharmapathaṃ ca mūḍho māmuddhareti pralapannalajje || 45||

त्वत्पादपङ्केरुहदासमेनं नैवप्रतीकर्तुमलं सुरा वा ।इति प्रमत्तः करवाणि पापं यशस्त्वकीयं परिरक्ष मा वा ॥ ४६॥

tvatpādapaṅkeruhadāsamenaṃ naivapratīkartumalaṃ surā vā |iti pramattaḥ karavāṇi pāpaṃ yaśastvakīyaṃ parirakṣa mā vā || 46||

न प्रार्थितामेव सुरराजलक्ष्मीर्नवाञ्छितं वा भुवनाधिपत्यम् ।इयन्मया प्रीयितमेव देहि तवाम्ब पादाम्बुरुहस्य दास्यम् ॥ ४७॥

na prārthitāmeva surarājalakṣmīrnavāñchitaṃ vā bhuvanādhipatyam |iyanmayā prīyitameva dehi tavāmba pādāmburuhasya dāsyam || 47||

बालस्य मूकस्य जडस्य चापि दयाम्बुरारो दयसे त्वमम्ब ।मामडेमूकं समुपेक्षसे किं विशृङ्खला ते प्रभुता धरित्र्याम् ॥ ४८॥

bālasya mūkasya jaḍasya cāpi dayāmburāro dayase tvamamba |māmaḍemūkaṃ samupekṣase kiṃ viśṛṅkhalā te prabhutā dharitryām || 48||

मातुर्दयापात्रमहं भवेयं परुत्परार्यैषम इत्यवेक्ष्य ।इयन्ति वर्षाण्यतिवाहितानि फले विलम्बः किमभाववादः ॥ ४९॥

māturdayāpātramahaṃ bhaveyaṃ parutparāryaiṣama ityavekṣya |iyanti varṣāṇyativāhitāni phale vilambaḥ kimabhāvavādaḥ || 49||

अनुग्रहं वा मयि निग्रहं वा यत्कर्तुकामासि कुरुष्व तूर्णम् ।द्वयेपि तस्मिन्विहिते त्वयैकः सूतेत्रिवर्गन्त्वपरोपवर्गः ॥ ५०॥

anugrahaṃ vā mayi nigrahaṃ vā yatkartukāmāsi kuruṣva tūrṇam |dvayepi tasminvihite tvayaikaḥ sūtetrivargantvaparopavargaḥ || 50||

त्वय्यर्पिते कर्मणि तत्फले च मांमाविकुर्यादिति निव्वृतेपि ।सा वासना मां नजहाति किं तत् त्वया गृहीतन्नु समुज्झितं नु ॥ ५१॥

tvayyarpite karmaṇi tatphale ca māṃmāvikuryāditi nivvṛtepi |sā vāsanā māṃ najahāti kiṃ tat tvayā gṛhītannu samujjhitaṃ nu || 51||

उपासनाभिर्दहरात्मविद्याविशेषावज्ञीननिवर्तिताभिः ।प्रीणासिचेत्त्वं तदबोधयन्त्या त्वयैव मातर्ननु वञ्चितास्स्मः ॥ ५२॥

upāsanābhirdaharātmavidyāviśeṣāvajñīnanivartitābhiḥ |prīṇāsicettvaṃ tadabodhayantyā tvayaiva mātarnanu vañcitāssmaḥ || 52||

गुरूपदेशैर्निगमावबोधैस्सतां चरित्रैर्मनसः प्रसादैः ।निश्चप्रचन्ते करुणामयी त्वं कथं मृषोद्यं तदिति प्रतीमः ॥ ५३॥

gurūpadeśairnigamāvabodhaissatāṃ caritrairmanasaḥ prasādaiḥ |niścapracante karuṇāmayī tvaṃ kathaṃ mṛṣodyaṃ taditi pratīmaḥ || 53||

नापेक्षसे त्वं विधिवत्सपर्यां न योगसिद्धिं न दृढां च भक्तिम् ।सकृत्प्रणामाञ्जलिनैव तुष्टा तनोषि कल्याणपरम्परां नः ॥ ५४॥

nāpekṣase tvaṃ vidhivatsaparyāṃ na yogasiddhiṃ na dṛḍhāṃ ca bhaktim |sakṛtpraṇāmāñjalinaiva tuṣṭā tanoṣi kalyāṇaparamparāṃ naḥ || 54||

स्मृतापि तापत्रयदारिणीति कृतापराधेपि दयामयीति ।मत्वा शरण्यां शरणागतोहमीदृग्गुणान्या क्व च वा वदान्या ॥ ५५॥

smṛtāpi tāpatrayadāriṇīti kṛtāparādhepi dayāmayīti |matvā śaraṇyāṃ śaraṇāgatohamīdṛgguṇānyā kva ca vā vadānyā || 55||

शोणाश्मनीकाशतनुप्रकाशां विकोशितश्यामकुशेशयाक्षीम् ।दिशामहेशाश्रितपाददेशां स्मरामि कामेश्वरकोशनाथाम् ॥ ५६॥

śoṇāśmanīkāśatanuprakāśāṃ vikośitaśyāmakuśeśayākṣīm |diśāmaheśāśritapādadeśāṃ smarāmi kāmeśvarakośanāthām || 56||

एणीनिभाक्षीं करुणाम्बुराशिद्रोणीकृतापाङ्गझरीं पुराणीम् ।श्रोणीतटालम्बितचारुवेणीं वाणीं भजे मोहलताकृपाणीम् ॥ ५७॥

eṇīnibhākṣīṃ karuṇāmburāśidroṇīkṛtāpāṅgajharīṃ purāṇīm |śroṇītaṭālambitacāruveṇīṃ vāṇīṃ bhaje mohalatākṛpāṇīm || 57||

वीटीरसापाटलदन्तवाटी चेटीकृताशेषसुपर्वकोटी ।पाटीरगौरा त्रिजगन्नटीयमाटीकतां चेतसि वाग्वधूटी ॥ ५८॥

vīṭīrasāpāṭaladantavāṭī ceṭīkṛtāśeṣasuparvakoṭī |pāṭīragaurā trijagannaṭīyamāṭīkatāṃ cetasi vāgvadhūṭī || 58||

कराग्रसंलालितराजकीरान् प्रालम्बिमुक्ताफलतारहारान् ।गिरांविदूरान्निगमान्तसारान् समाश्रयामो विधिधर्मदारान् ॥ ५९॥

karāgrasaṃlālitarājakīrān prālambimuktāphalatārahārān |girāṃvidūrānnigamāntasārān samāśrayāmo vidhidharmadārān || 59||

श्रीशारदेति चतुरास्यकुटुम्बिनीति वाग्वादिनीति वरदेति च नामपङ्क्तौ ।एकैकमेव निखिलार्थकरं तदन्यदाम्रेडितं हि चरितार्थपदेषु रूढम् ॥ ६०॥

śrīśāradeti caturāsyakuṭumbinīti vāgvādinīti varadeti ca nāmapaṅktau |ekaikameva nikhilārthakaraṃ tadanyadāmreḍitaṃ hi caritārthapadeṣu rūḍham || 60||

बालार्कपाटलमरीचलसद्दुकूला लीलास्मितद्विगुणमौक्तिकरम्यमालाम् ।वेलातिलन्घितदयोर्मिलनेत्रखेलां बालां नमामि कुटिलालकशोभिफालाम् ॥ ६१॥

bālārkapāṭalamarīcalasaddukūlā līlāsmitadviguṇamauktikaramyamālām |velātilanghitadayormilanetrakhelāṃ bālāṃ namāmi kuṭilālakaśobhiphālām || 61||

धात्री समस्तजगतां दुरिताब्धियानपात्री समग्रनिगमान्तगिरां सवित्री ।दात्री त्रिवर्गविभवस्य दयासुधायाः पात्रीकरोतु हृदि मां सुकृतस्य गोप्त्री ॥ ६२॥

dhātrī samastajagatāṃ duritābdhiyānapātrī samagranigamāntagirāṃ savitrī |dātrī trivargavibhavasya dayāsudhāyāḥ pātrīkarotu hṛdi māṃ sukṛtasya goptrī || 62||

अभ्यर्चितासि विनुतासिनतासि मातरुष्ट्रासिकांसमवलम्ब्यनिरीक्षितासि ।जानासि मामशरणं फलदासि नूनं काले दयस्व समयाप्तफलं सखाय ॥ ६३॥

abhyarcitāsi vinutāsinatāsi mātaruṣṭrāsikāṃsamavalambyanirīkṣitāsi |jānāsi māmaśaraṇaṃ phaladāsi nūnaṃ kāle dayasva samayāptaphalaṃ sakhāya || 63||

निखिलभुवनरक्षा दक्षिणा नेक्षसे मांव्यवहितनिकटस्था न प्रलापं शृणोषि ।मयि ननु कुलदासे यद्युपेक्षां कृषीष्टाःभवतु मम हि चेतस्त्वस्मृतिं नैव जह्यात् ॥ ६४॥

nikhilabhuvanarakṣā dakṣiṇā nekṣase māṃvyavahitanikaṭasthā na pralāpaṃ śṛṇoṣi |mayi nanu kuladāse yadyupekṣāṃ kṛṣīṣṭāḥbhavatu mama hi cetastvasmṛtiṃ naiva jahyāt || 64||

सरसललितसूक्तैः फुल्लमल्लीमतल्लीविगलितमकरदस्फारमाधुर्यसिक्तैः ।कृतनुतिरतिवेलं जातचेतःप्रसक्तिःशृतिविततिसवित्री शारदां संस्मरामि ॥ ६५॥

sarasalalitasūktaiḥ phullamallīmatallīvigalitamakaradasphāramādhuryasiktaiḥ |kṛtanutirativelaṃ jātacetaḥprasaktiḥśṛtivitatisavitrī śāradāṃ saṃsmarāmi || 65||

इति कुक्के\। सुब्रह्मण्यशास्त्रीविरचिता शारदास्तुतिः सम्पूर्णा ।

iti kukke\| subrahmaṇyaśāstrīviracitā śāradāstutiḥ sampūrṇā |