अनुभूतसिद्धसारस्वतस्तवः Anubhuta Siddha Sarasvata Stavah

कलमरालविहङ्गमवाहना सितदुकूलविभूषणलेपना ।प्रणतभूमिरुहामृतसारिणी प्रवरदेहविभाभरधारिणी ॥ १॥

kalamarālavihaṅgamavāhanā sitadukūlavibhūṣaṇalepanā |praṇatabhūmiruhāmṛtasāriṇī pravaradehavibhābharadhāriṇī || 1||

अमृतपूर्णकमण्डलुधारिणी त्रिदशदानवमानवसेविता ।भगवती परमैव सरस्वती मम पुनातु सदा नयनाम्बुजम् ॥ २॥

amṛtapūrṇakamaṇḍaludhāriṇī tridaśadānavamānavasevitā |bhagavatī paramaiva sarasvatī mama punātu sadā nayanāmbujam || 2||

जिनपतिप्रथिताखिलवाङ्मयी गणधराननमण्डपनर्तकी ।गुरुमुखाम्बुजखेलनहंसिका विजयते जगति श्रुतदेवता ॥ ३॥

jinapatiprathitākhilavāṅmayī gaṇadharānanamaṇḍapanartakī |gurumukhāmbujakhelanahaṃsikā vijayate jagati śrutadevatā || 3||

अमृतदीधितिबिम्बसमाननां त्रिजगतीजननिर्मितमाननाम् ।नवरसामृतवीचिसरस्वतीं प्रमुदितः प्रणमामि सरस्वतीम् ॥ ४॥

amṛtadīdhitibimbasamānanāṃ trijagatījananirmitamānanām |navarasāmṛtavīcisarasvatīṃ pramuditaḥ praṇamāmi sarasvatīm || 4||

विततकेतकपत्रविलोचने विहितसंसृतिदुःकृतमोचने ।धवलपक्षविहङ्गमलाञ्छिते जय सरस्वति पूरितवाञ्छिते ॥ ५॥

vitataketakapatravilocane vihitasaṃsṛtiduḥkṛtamocane |dhavalapakṣavihaṅgamalāñchite jaya sarasvati pūritavāñchite || 5||

भवदनुग्रहलेशतरङ्गितास्तदुचितं प्रवदन्ति विपश्चितः ।नृपसभासु यतः कमलाबलाकुचकलाललनानि वितन्वते ॥ ६॥

bhavadanugrahaleśataraṅgitāstaducitaṃ pravadanti vipaścitaḥ |nṛpasabhāsu yataḥ kamalābalākucakalālalanāni vitanvate || 6||

गतधना अपि हि त्वदनुग्रहात् कलितकोमलवाक्यसुधोर्मयः ।चकितबालकुरङ्गविलोचना जनमनांसि हरन्तितरां नराः ॥ ७॥

gatadhanā api hi tvadanugrahāt kalitakomalavākyasudhormayaḥ |cakitabālakuraṅgavilocanā janamanāṃsi harantitarāṃ narāḥ || 7||

करसरोरुहखेलनचञ्चला तव विभाति वरा जपमालिका ।श्रुतिपयोनिधिमध्यविकस्वरोज्ज्वलतरङ्गकलाग्रहसाग्रहा ॥ ८॥

karasaroruhakhelanacañcalā tava vibhāti varā japamālikā |śrutipayonidhimadhyavikasvarojjvalataraṅgakalāgrahasāgrahā || 8||

द्विरदकेसरिमारिभुजङ्गमासहनतस्करराजिरुजां भयम् ।तव गुणावलिगानतरङ्गिणां न भविनां भवति श्रुतदेवते ॥ ९॥

dviradakesarimāribhujaṅgamāsahanataskararājirujāṃ bhayam |tava guṇāvaligānataraṅgiṇāṃ na bhavināṃ bhavati śrutadevate || 9||

ॐ ह्रीं क्लीं ब्लीं(१) ततः श्रीं तदनु हसकल ह्रीमथो ऐं नमोऽन्तेलक्षं साक्षाज्जपन्(२) यः करसमविधिना सत्तपा ब्रह्मचारी ।निर्यान्ती चन्द्रबिम्बात् कलयति मनसा त्वां जगच्चन्द्रिकाभांसोऽत्यर्थं वह्निकुण्डे विहितघृतहुतिः स्याद् दशांशेन(३) विद्वान् ॥ १०॥

oṃ hrīṃ klīṃ blīṃ(1) tataḥ śrīṃ tadanu hasakala hrīmatho aiṃ namo'ntelakṣaṃ sākṣājjapan(2) yaḥ karasamavidhinā sattapā brahmacārī |niryāntī candrabimbāt kalayati manasā tvāṃ jagaccandrikābhāṃso'tyarthaṃ vahnikuṇḍe vihitaghṛtahutiḥ syād daśāṃśena(3) vidvān || 10||

रे रे लक्षणकाव्यनाटककथा(४) चम्पूसमालोकने(५)क्वायासं वितनोषि(६) बालिश मुधा किं नम्रवक्त्राम्बुजः ।भक्त्याराधय(७) मन्त्रराजसहसा येना(८)निशं भारतींतेन(९) त्वं कवितावितानसविताद्वैतप्रबुद्धायसे ॥ ११॥

re re lakṣaṇakāvyanāṭakakathā(4) campūsamālokane(5)kvāyāsaṃ vitanoṣi(6) bāliśa mudhā kiṃ namravaktrāmbujaḥ |bhaktyārādhaya(7) mantrarājasahasā yenā(8)niśaṃ bhāratīṃtena(9) tvaṃ kavitāvitānasavitādvaitaprabuddhāyase || 11||

चञ्चच्चन्द्रमुखी प्रसिद्धमहिमा स्वाच्छन्द्य(१०)राज्यप्रदाऽनायासेन सुरासुरगणैरभ्यर्थिता(११) भक्तितः ।देवी संस्तुतवैभवा मलयजालेपाङ्गरत्नद्युतिःसा मां पातु सरस्वती भगवती त्रैलोक्यसञ्जीविनी ॥ १२॥

cañcaccandramukhī prasiddhamahimā svācchandya(10)rājyapradā'nāyāsena surāsuragaṇairabhyarthitā(11) bhaktitaḥ |devī saṃstutavaibhavā malayajālepāṅgaratnadyutiḥsā māṃ pātu sarasvatī bhagavatī trailokyasañjīvinī || 12||

स्तवनमेतदनेकगुणान्वितं पठति यो भाविकः प्रमनाः प्रगे ।स सहसा मधुरैर्वचनामृतैर्नृपगणानपि रञ्जयति स्फुटम् ॥ १३॥

stavanametadanekaguṇānvitaṃ paṭhati yo bhāvikaḥ pramanāḥ prage |sa sahasā madhurairvacanāmṛtairnṛpagaṇānapi rañjayati sphuṭam || 13||

॥ इत्यनुभूतसिद्धसारस्वतस्तवः परिपूर्णः ॥ २ ०जपेत् यः । ३ संसेवि विद्वान् । ४ तथा । ५ ०लोकनेष्वायासम् ।६ वितनोति । ७ ०राधन । ८ तेना०। ९ येन । १० स्यात् सद्यराज्य० ।११ ०रभ्यर्चिता ।

|| ityanubhūtasiddhasārasvatastavaḥ paripūrṇaḥ || 2 0japet yaḥ | 3 saṃsevi vidvān | 4 tathā | 5 0lokaneṣvāyāsam | 6 vitanoti | 7 0rādhana | 8 tenā0| 9 yena | 10 syāt sadyarājya0 | 11 0rabhyarcitā |