रामानुस्मृतिः Shri Ramanusmritih

ब्रह्मोवाचवन्दे रामं जगद्वन्द्यं सुन्दरास्यं शुचिस्मितम् ।कन्दर्पकोटिलावण्यं कामितार्थप्रदायकम् ॥ १॥

brahmovācavande rāmaṃ jagadvandyaṃ sundarāsyaṃ śucismitam |kandarpakoṭilāvaṇyaṃ kāmitārthapradāyakam || 1||

भास्वकिरीटकटककटिसूत्रोपशोभितम् ।विशाललोचनं भ्राजत्तरुणारुणकुण्डलम् ॥ २॥

bhāsvakirīṭakaṭakakaṭisūtropaśobhitam |viśālalocanaṃ bhrājattaruṇāruṇakuṇḍalam || 2||

श्रीवत्सकौस्तुभलसद्वक्षसं वनमालिनम् ।मुक्ताहारसुशोभाढ्यं मुद्रिकारत्नभासुरम् ॥ ३॥

śrīvatsakaustubhalasadvakṣasaṃ vanamālinam |muktāhārasuśobhāḍhyaṃ mudrikāratnabhāsuram || 3||

सर्वाङ्गसुन्दरं हृद्यं द्विभुजं रघुनन्दनम् ।नीलजीमूतसङ्काशं नीलालकवृताननम् ॥ ४॥

sarvāṅgasundaraṃ hṛdyaṃ dvibhujaṃ raghunandanam |nīlajīmūtasaṅkāśaṃ nīlālakavṛtānanam || 4||

ज्ञानमुद्रालसद्वक्षोबाहुं ज्ञानमयं हरिम् ।वामजानूपरिन्यस्तवामहस्ताम्बुजं प्रभुम् ॥ ५॥

jñānamudrālasadvakṣobāhuṃ jñānamayaṃ harim |vāmajānūparinyastavāmahastāmbujaṃ prabhum || 5||

वीरासने समासीनं विद्युत्पुञ्जनिभाम्बरम् ।कोटिसूर्यप्रतीकाशं कोमलाङ्गसमुज्ज्वलम् ॥ ६॥

vīrāsane samāsīnaṃ vidyutpuñjanibhāmbaram |koṭisūryapratīkāśaṃ komalāṅgasamujjvalam || 6||

जानकीलक्ष्मणाभ्यां च वामदक्षिणशोभितम् ।हनुमद्रविमुख्यादिकपिमुख्यैश्च सेवितम् ॥ ७॥

jānakīlakṣmaṇābhyāṃ ca vāmadakṣiṇaśobhitam |hanumadravimukhyādikapimukhyaiśca sevitam || 7||

दिव्यरत्नसमायुक्तसिंहासनगतं प्रभुम् ।प्रत्यहं प्रातरुत्थाय ध्यात्वैवं राघवं हृदि ॥ ८॥

divyaratnasamāyuktasiṃhāsanagataṃ prabhum |pratyahaṃ prātarutthāya dhyātvaivaṃ rāghavaṃ hṛdi || 8||

एभिः षोडशभिर्नामपदैः स्तुत्वा नमेद्धरिम् ।ॐ नमो रामाय शुद्धाय बुद्धाय परमात्मने ॥ ९॥

ebhiḥ ṣoḍaśabhirnāmapadaiḥ stutvā nameddharim |oṃ namo rāmāya śuddhāya buddhāya paramātmane || 9||

विशुद्धज्ञानदेहाय रघुनाथाय ते नमः ।नमो रावणहन्त्रे ते नमो वालिविनाशिने ॥ १०॥

viśuddhajñānadehāya raghunāthāya te namaḥ |namo rāvaṇahantre te namo vālivināśine || 10||

नमो वैकुण्ठनाथाय नमो विष्णुस्वरूपिणे ।नमो यज्ञस्वरूपाय यज्ञभोक्त्रे नमो नमः ॥ ११॥

namo vaikuṇṭhanāthāya namo viṣṇusvarūpiṇe |namo yajñasvarūpāya yajñabhoktre namo namaḥ || 11||

योगिध्येयाय योगाय परमानन्दरूपिणे ।शङ्करप्रियमित्राय जानकीजानये नमः ॥ १२॥

yogidhyeyāya yogāya paramānandarūpiṇe |śaṅkarapriyamitrāya jānakījānaye namaḥ || 12||

य एवं प्रातरुत्थाय भक्तिश्रद्धासमन्वितः ।षोडशैतानि नामानि रामचन्द्रस्य नित्यशः ॥ १३॥

ya evaṃ prātarutthāya bhaktiśraddhāsamanvitaḥ |ṣoḍaśaitāni nāmāni rāmacandrasya nityaśaḥ || 13||

पठेद्विद्वान् स्मरन् रामं स एव स्याद्रघूत्तमः ।श्रीरामे भक्तिरचला भवत्येव हि सर्वदा ॥ १४॥

paṭhedvidvān smaran rāmaṃ sa eva syādraghūttamaḥ |śrīrāme bhaktiracalā bhavatyeva hi sarvadā || 14||

समये समनुप्राप्ते राघवः सीतया सह ।हृदि सन्दृश्यते तस्य साक्षात् सौमित्रिणा सह ॥ १५॥

samaye samanuprāpte rāghavaḥ sītayā saha |hṛdi sandṛśyate tasya sākṣāt saumitriṇā saha || 15||

नित्यं चापररात्रेषु रामस्यैतां सत्यमाहितः ।मुच्यतेऽनुस्मृतिं जप्त्वा मृत्युदारिद्यरपातकैः ॥ १६॥

nityaṃ cāpararātreṣu rāmasyaitāṃ satyamāhitaḥ |mucyate'nusmṛtiṃ japtvā mṛtyudāridyarapātakaiḥ || 16||

इति ब्रह्मप्रोक्तं श्रीरामानुस्मृतिस्तोत्रं सम्पूणम् ।

iti brahmaproktaṃ śrīrāmānusmṛtistotraṃ sampūṇam |