पार्वतीस्तवः कुमारविरचितम् Kumaravirachitam Parvati Stava

उमा गौरी महाकाली महागौरी शिवा सती ।शर्वाणी चण्डिका दुर्गा रुद्राणी गिरिकन्यका ॥ १॥

umā gaurī mahākālī mahāgaurī śivā satī |śarvāṇī caṇḍikā durgā rudrāṇī girikanyakā || 1||

मृडानी पार्वती माया महामाया महेश्वरी ।अपर्णा शाम्भवी भद्रा शुभा त्रिपुरभैरवी ॥ २॥

mṛḍānī pārvatī māyā mahāmāyā maheśvarī |aparṇā śāmbhavī bhadrā śubhā tripurabhairavī || 2||

श्रीः सर्वमङ्गला लक्ष्मीः भवानी दक्षकन्यका ।आर्या हैमवती चेति स्मृत्वा जयमवाप्नुयात् ॥ ३॥

śrīḥ sarvamaṅgalā lakṣmīḥ bhavānī dakṣakanyakā |āryā haimavatī ceti smṛtvā jayamavāpnuyāt || 3||

एकैकमपि यन्नाम गौर्यास्तद्दुःखनाशकम् ।जयदं धनदं चैतत् आयुर्वृद्धिकरं परम् ॥ ४॥ (जयप्रदमिदं चैतत्)

ekaikamapi yannāma gauryāstadduḥkhanāśakam |jayadaṃ dhanadaṃ caitat āyurvṛddhikaraṃ param || 4|| (jayapradamidaṃ caitat)

ततः कुमार तां गौरीं स्मृत्वा युद्धाय याहि ते ।जयो भवत्यसन्दिग्धं तन्नाम जयदं यतः ॥ ५॥

tataḥ kumāra tāṃ gaurīṃ smṛtvā yuddhāya yāhi te |jayo bhavatyasandigdhaṃ tannāma jayadaṃ yataḥ || 5||

स्मृत्वापि गौरीं गिरिराजकन्यां धन्यां च मान्यां च कलङ्कशून्याम् ।दुर्गामनन्यामपि भावयन्तः सद्यो भवन्त्येव हि भाग्यवन्तः ॥ ६॥

smṛtvāpi gaurīṃ girirājakanyāṃ dhanyāṃ ca mānyāṃ ca kalaṅkaśūnyām |durgāmananyāmapi bhāvayantaḥ sadyo bhavantyeva hi bhāgyavantaḥ || 6||

स्मृत्वापि यां पातकमागरेभ्यो निर्गत्य सङ्गत्य च सौख्यसङ्घैः ।स्वर्गं समेत्याप्यपवर्गमेत्य तिष्ठन्ति भाग्येन नराः शिवाग्रे ॥ ७॥

smṛtvāpi yāṃ pātakamāgarebhyo nirgatya saṅgatya ca saukhyasaṅghaiḥ |svargaṃ sametyāpyapavargametya tiṣṭhanti bhāgyena narāḥ śivāgre || 7||

यद्दृष्टिपातेन जगत्समस्तमुत्पन्नमेतत् परिपालितं च ।कल्पावसाने प्रलयं प्रयाति सा देवता मङ्गलदेवता या ॥ ८॥

yaddṛṣṭipātena jagatsamastamutpannametat paripālitaṃ ca |kalpāvasāne pralayaṃ prayāti sā devatā maṅgaladevatā yā || 8||

यत्पादपद्मस्मरणं मुनीनां तपस्यया केवलमम्बिका सा ।स्मृता सदा सर्व सुखप्रदात्री सैषा विधात्री सुखसागराणाम् ॥ ९॥

yatpādapadmasmaraṇaṃ munīnāṃ tapasyayā kevalamambikā sā |smṛtā sadā sarva sukhapradātrī saiṣā vidhātrī sukhasāgarāṇām || 9||

यामन्नपूर्णां प्रवदन्ति देवाः स्तुवन्ति गन्धर्वगणा मुनीन्द्राः ।मर्त्याश्च तत्पादरजःप्रसादात् रमादिभिः सा खलु पूजनीया ॥ १०॥ (रमादयः)

yāmannapūrṇāṃ pravadanti devāḥ stuvanti gandharvagaṇā munīndrāḥ |martyāśca tatpādarajaḥprasādāt ramādibhiḥ sā khalu pūjanīyā || 10|| (ramādayaḥ)

यस्याः कटाक्षप्रसरेण धन्यो दीनो दरिद्रः कृपणोऽपि धन्यः ।मान्यः सुराणां धनसागराणामधीश्वरः स्यादिति तां भजाम्याम् ॥ ११॥

yasyāḥ kaṭākṣaprasareṇa dhanyo dīno daridraḥ kṛpaṇo'pi dhanyaḥ |mānyaḥ surāṇāṃ dhanasāgarāṇāmadhīśvaraḥ syāditi tāṃ bhajāmyām || 11||

यत्पादपद्माम्बुजरेणुलेशं दधार शौरिर्धृतकूर्मरूपः ।शेषः सहस्रेण दधार मूर्ध्ना सैपा भवानी शुभराजधानी ॥ १२॥

yatpādapadmāmbujareṇuleśaṃ dadhāra śaurirdhṛtakūrmarūpaḥ |śeṣaḥ sahasreṇa dadhāra mūrdhnā saipā bhavānī śubharājadhānī || 12||

कुलाचलैः मेरुसमानधैर्यैः अतिप्रयत्नेन विभुग्नकायैः ।यत्पादपद्माम्बुजरेणुशैलो धृतो मुदा सा गिरिजा सदाऽम्बा ॥ १३॥

kulācalaiḥ merusamānadhairyaiḥ atiprayatnena vibhugnakāyaiḥ |yatpādapadmāmbujareṇuśailo dhṛto mudā sā girijā sadā'mbā || 13||

दिग्दन्तिभिर्यत्पदपद्मरेणुः धृतः स्वकुम्भस्थलपङ्किलोऽपि ।मदाम्बुधारापरिवीतगात्रैः तद्धारणायासगतैः स्वतन्त्रैः ॥ १४॥

digdantibhiryatpadapadmareṇuḥ dhṛtaḥ svakumbhasthalapaṅkilo'pi |madāmbudhārāparivītagātraiḥ taddhāraṇāyāsagataiḥ svatantraiḥ || 14||

यत्पादपद्माम्बुरुहार्चनाय रत्नाकरो नूतनरत्नजालम् ।सम्पादयत्यन्वहमादरेण सा किं न गौरी तव पूजनीया ॥ १५॥

yatpādapadmāmburuhārcanāya ratnākaro nūtanaratnajālam |sampādayatyanvahamādareṇa sā kiṃ na gaurī tava pūjanīyā || 15||

॥ इति शिवरहस्यान्तर्गते कुमारविरचितं पार्वतीस्तवः सम्पूर्णः ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः १३। २९४३॥

|| iti śivarahasyāntargate kumāraviracitaṃ pārvatīstavaḥ sampūrṇaḥ |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 13| 2943||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः १३। २९-४३॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 13| 29-43||