शिवशिवास्तुतिः २ कुमारकृता Kumarakrita Shivashiva Stuti

नमो नमस्ते गिरिशाय तुभ्यं नमो नमस्ते गिरिकन्यकायै ।नमो नमस्ते वृषभध्वजाय सिंहध्वजायै च नमो नमस्ते ॥ १॥

namo namaste giriśāya tubhyaṃ namo namaste girikanyakāyai |namo namaste vṛṣabhadhvajāya siṃhadhvajāyai ca namo namaste || 1||

नमो नमो भूतिविभूषणाय नमो नमश्चन्दनरूपितायै ।नमो नमः भालविलोचनाय नमो नमः पद्मविलोचनायै ॥ २॥

namo namo bhūtivibhūṣaṇāya namo namaścandanarūpitāyai |namo namaḥ bhālavilocanāya namo namaḥ padmavilocanāyai || 2||

त्रिशूलहस्ताय नमो नमस्ते नमो नमः पद्मलसत्करायै ।नमो नमो दिग्वसनाय तुभ्यं चित्राम्बरायै च नमो नमस्ते ॥ ३॥

triśūlahastāya namo namaste namo namaḥ padmalasatkarāyai |namo namo digvasanāya tubhyaṃ citrāmbarāyai ca namo namaste || 3||

चन्द्रावतंसाय नमो नमस्ते नमोऽस्तु चन्द्राभरणाञ्चितायै ।नमः सुवर्णाङ्कितकुण्डलाय नमोऽस्तु रत्नोज्वलकुण्डलायै ॥ ४॥

candrāvataṃsāya namo namaste namo'stu candrābharaṇāñcitāyai |namaḥ suvarṇāṅkitakuṇḍalāya namo'stu ratnojvalakuṇḍalāyai || 4||

नमोऽस्तु ताराग्रहमालिकाय नमोऽस्तु हारान्वितकन्धरायै ।सुवर्णवर्णाय नमो नमस्ते नमः सुवर्णाधिकसुन्दरायै ॥ ५॥

namo'stu tārāgrahamālikāya namo'stu hārānvitakandharāyai |suvarṇavarṇāya namo namaste namaḥ suvarṇādhikasundarāyai || 5||

नमो नमस्ते त्रिपुरान्तकाय नमो नमस्ते मधुनाशनायै ।नमो नमस्त्वन्धकसूदनाय नमो नमः कैटभसूदनायै ॥ ६॥

namo namaste tripurāntakāya namo namaste madhunāśanāyai |namo namastvandhakasūdanāya namo namaḥ kaiṭabhasūdanāyai || 6||

नमो नमो ज्ञानमयाय नित्यं नमश्चिदानन्दघनप्रदायै ।नमो जटाजूटविराजिताय नमोऽस्तु वेणीफणिमण्डितायै ॥ ७॥

namo namo jñānamayāya nityaṃ namaścidānandaghanapradāyai |namo jaṭājūṭavirājitāya namo'stu veṇīphaṇimaṇḍitāyai || 7||

नमोऽस्तु कर्पूररसाकराय नमो लसत्कुङ्कुममण्डितायै ।नमोऽस्तु बिल्वाम्रफलार्चिताय नमोऽस्तु कुन्दप्रसवार्चितायै ॥ ८॥

namo'stu karpūrarasākarāya namo lasatkuṅkumamaṇḍitāyai |namo'stu bilvāmraphalārcitāya namo'stu kundaprasavārcitāyai || 8||

नमो जगन्मण्डलमण्डनाय नमो मणिभ्राजितमण्डनायै ।नमोऽस्तु वेदान्तगणस्तुताय नमोऽस्तु विश्वेश्वरसंस्तुतायै ॥ ९॥

namo jaganmaṇḍalamaṇḍanāya namo maṇibhrājitamaṇḍanāyai |namo'stu vedāntagaṇastutāya namo'stu viśveśvarasaṃstutāyai || 9||

नमोऽस्तु सर्वामरपूजिताय नमोऽस्तु पद्मार्चितपादुकायै ।नमः शिवाऽऽलिङ्गितविग्रहाय नमः शिवालिङ्गितविग्रहायै ॥ १०॥

namo'stu sarvāmarapūjitāya namo'stu padmārcitapādukāyai |namaḥ śivā''liṅgitavigrahāya namaḥ śivāliṅgitavigrahāyai || 10||

नमो नमस्ते जनकाय नित्यं नमो नमस्ते गिरिजे जनन्यै ।नमो नमोऽनङ्गहाराय नित्यं नमो नमोऽनङ्गविवर्धनायै ॥ ११॥

namo namaste janakāya nityaṃ namo namaste girije jananyai |namo namo'naṅgahārāya nityaṃ namo namo'naṅgavivardhanāyai || 11||

नमो नमस्तेऽस्तु विषाशनाय नमो नमस्तेस्तु सुधाशनायै ।नमो नमस्तेऽस्तु महेश्वराय श्रीचन्दने देवि नमो नमस्ते ॥ १२॥

namo namaste'stu viṣāśanāya namo namastestu sudhāśanāyai |namo namaste'stu maheśvarāya śrīcandane devi namo namaste || 12||

॥ इति शिवरहस्यान्तर्गते कुमारकृता शिवशिवास्तुतिः सम्पूर्णा ॥शिवनैवेद्यशिवोच्छिष्टपात्रमहिम्नवर्णनं॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २१। ४१५ ॥

|| iti śivarahasyāntargate kumārakṛtā śivaśivāstutiḥ sampūrṇā ||śivanaivedyaśivocchiṣṭapātramahimnavarṇanaṃ|| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 21| 415 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २१। ४-१५ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 21| 4-15 ||