नवरत्नमालिका अम्बिकास्तुतिः Navaratnamalika Ambikastutih

(श्रीकालहस्तिक्षेत्रस्थज्ञानप्रसूनाम्बिकास्तुतिः)श्रीनरकण्ठीरवशास्त्रिविरचिता ।श्रीनाकनाथमुखनानासहस्रसुरसेनाग्रमौलिवलभीसूनावलीबहुललीनालिनीमधुरगानाञ्चिताङ्घ्रिनलिना ।मानातिलङ्घिमहिमानादिरानतजनानामनेकफलदाज्ञानाम्बिका भवतु दीनावनी कुशलदानाय मे भगवती ॥ १॥

(śrīkālahastikṣetrasthajñānaprasūnāmbikāstutiḥ)śrīnarakaṇṭhīravaśāstriviracitā |śrīnākanāthamukhanānāsahasrasurasenāgramaulivalabhīsūnāvalībahulalīnālinīmadhuragānāñcitāṅghrinalinā |mānātilaṅghimahimānādirānatajanānāmanekaphaladājñānāmbikā bhavatu dīnāvanī kuśaladānāya me bhagavatī || 1||

राकाशशाङ्करुचिराकारचारुपादना(पतदा)काशसिन्धुलहरीनीकाशसूक्तिसरणीकारिणी प्रकृतिमूकात्मनामपि नृणाम् ।पाकाहितप्रमुखनाकालयप्रकरशोकापनोदनचणाश्रीकालहस्तिनगरैकायनावतु पिनाकायुधस्य दयिता ॥ २॥

rākāśaśāṅkarucirākāracārupādanā(patadā)kāśasindhulaharīnīkāśasūktisaraṇīkāriṇī prakṛtimūkātmanāmapi nṛṇām |pākāhitapramukhanākālayaprakaraśokāpanodanacaṇāśrīkālahastinagaraikāyanāvatu pinākāyudhasya dayitā || 2||

श्रेणीभवद्दिविषदेणीदृगुल्लसितवेणीपिनद्धसुमनोद्रोणीमरन्दरसवेणीप्रसारभृशशोणीकृताङ्घ्रिकमला ।श्रोणीनटत्सरकृपाणीमनोज्ञघनवेणी कृपार्द्रहृदयाक्षोणीधरेन्द्रतनयाणीयसीमपि च वाणीं प्रगल्भयतु मे ॥ ३॥

śreṇībhavaddiviṣadeṇīdṛgullasitaveṇīpinaddhasumanodroṇīmarandarasaveṇīprasārabhṛśaśoṇīkṛtāṅghrikamalā |śroṇīnaṭatsarakṛpāṇīmanojñaghanaveṇī kṛpārdrahṛdayākṣoṇīdharendratanayāṇīyasīmapi ca vāṇīṃ pragalbhayatu me || 3||

केलीसमाकलिततालीदलश्रवणपालीविभूषणमणीवा(पा)ली मदोद्धतमरालीगतिर्दिंशतु नालीकदीर्घनयना ।चूलीतलाभरणनालीकवैरिशकलालीभवत्सुरवधूःऽकाली गिरं मृदु मृणालीभुजा मम मधूलीरसोर्मिमधुराम् ॥ ४॥

kelīsamākalitatālīdalaśravaṇapālīvibhūṣaṇamaṇīvā(pā)lī madoddhatamarālīgatirdiṃśatu nālīkadīrghanayanā |cūlītalābharaṇanālīkavairiśakalālībhavatsuravadhūḥ'kālī giraṃ mṛdu mṛṇālībhujā mama madhūlīrasormimadhurām || 4||

हृद्यानवद्यतरगद्यानुबद्धमृदुपद्याभिरूपकवितांदद्याज्जगन्महितविद्यां त्रयीशिखरवेद्या हिमाद्रितनया ।आद्या परा मम शरद्यामिनीशभृदविद्याविलासशमनीविद्याधरी समभिवाद्या ज्वलन्मणिनिषद्यायमाणरशना ॥ ५॥

hṛdyānavadyataragadyānubaddhamṛdupadyābhirūpakavitāṃdadyājjaganmahitavidyāṃ trayīśikharavedyā himādritanayā |ādyā parā mama śaradyāminīśabhṛdavidyāvilāsaśamanīvidyādharī samabhivādyā jvalanmaṇiniṣadyāyamāṇaraśanā || 5||

हालामदाकलितहेलालसद्बहुललोलारुणाक्षियुगलीलीलापिनद्धसुरसालावलीप्रसवमालासुगन्धचिकुरा ।कैलासनाथहितशीला कराञ्चितशुकालापलोलहृदयावेलातिलङ्घिशुभजालाय मे भवतु शैलाधिनाथतनया ॥ ६॥

hālāmadākalitahelālasadbahulalolāruṇākṣiyugalīlīlāpinaddhasurasālāvalīprasavamālāsugandhacikurā |kailāsanāthahitaśīlā karāñcitaśukālāpalolahṛdayāvelātilaṅghiśubhajālāya me bhavatu śailādhināthatanayā || 6||

चण्डापदानयुतचण्डाभिधासुरपिचण्डावदारणचणाभण्डासुरोग्रभुजदण्डाग्रनिर्दलनशौण्डायुधोद्धतकरा ।शुण्डानुकारिकरकाण्डावदीर्णजगदण्डाट्टहासभयदादण्डायुधाय शशिखण्डावतंसितशिखण्डा न चार्पयतु माम् ॥ ७॥

caṇḍāpadānayutacaṇḍābhidhāsurapicaṇḍāvadāraṇacaṇābhaṇḍāsurograbhujadaṇḍāgranirdalanaśauṇḍāyudhoddhatakarā |śuṇḍānukārikarakāṇḍāvadīrṇajagadaṇḍāṭṭahāsabhayadādaṇḍāyudhāya śaśikhaṇḍāvataṃsitaśikhaṇḍā na cārpayatu mām || 7||

हुङ्कारनिर्गलदशङ्कापतद्।ह्विषदहङ्कारमारतिमिरांअङ्कान्तलम्बिसितक्ङ्कालहारसदलङ्कारबन्धुरगलाम् ।ह्रीङ्कारिणीं भयदटङ्कारकार्मुककरां कालहस्तिनिलयांपङ्कापहामपकलङ्कावतंसहरिणाङ्कां भजे भगवतीम् ॥ ८॥

huṅkāranirgaladaśaṅkāpatad|hviṣadahaṅkāramāratimirāṃaṅkāntalambisitakṅkālahārasadalaṅkārabandhuragalām |hrīṅkāriṇīṃ bhayadaṭaṅkārakārmukakarāṃ kālahastinilayāṃpaṅkāpahāmapakalaṅkāvataṃsahariṇāṅkāṃ bhaje bhagavatīm || 8||

कण्ठारवोद्यदुपकण्ठारिदुर्विषहकण्ठीरवेन्द्रगमनोत्कण्ठा निकामशितिकण्ठानुकर्षिकलकण्ठानुलापललिता ।शुण्ठीभवद्दनुजकण्ठीरवप्रकरकुण्ठीकृतिक्षमबलाकुण्ठीकरोतु नरकण्ठीरवाख्यकविकण्ठीरवस्य दुरितम् ॥ ९॥

kaṇṭhāravodyadupakaṇṭhāridurviṣahakaṇṭhīravendragamanotkaṇṭhā nikāmaśitikaṇṭhānukarṣikalakaṇṭhānulāpalalitā |śuṇṭhībhavaddanujakaṇṭhīravaprakarakuṇṭhīkṛtikṣamabalākuṇṭhīkarotu narakaṇṭhīravākhyakavikaṇṭhīravasya duritam || 9||

श्रीकालहस्तिनिलयज्ञानप्रसवाम्बिकामुदे रचिता ।नरकण्ठीरवकृतिना नवरत्नस्तुतिरियं चिरं जयतु ॥ १०॥

śrīkālahastinilayajñānaprasavāmbikāmude racitā |narakaṇṭhīravakṛtinā navaratnastutiriyaṃ ciraṃ jayatu || 10||

॥ इति श्रीनरकण्ठीरवशास्त्रिविरचिता नवरत्नमालिका समाप्ता ॥श्रीनरकण्ठीरवशास्त्रि कविरयं आन्ध्रो वट्टियल्लिवंशीयः१९शतकान्ते मद्रासनगरान्नतिदवीयसि कार्वेटिनगरनाम्नि स्थलेतदधीशस्य बोम्मराजस्यास्थानकविरासीत् । अस्य पौत्रा अद्यापि जीवन्ति ।अस्य कृतय१ अभिनवासवदत्ता (सुबन्धुकृतवासवदत्तागद्यकाव्यस्य पद्यैः सङ्ग्रहः),२ यतिसार्वभौमोपहारः (श्रीशङ्कराचार्यपारम्पर्यवर्णनम्)३ कपिलेश्वरस्तुतिः (तिरुप्पतिक्षेत्रस्थशिवस्तुतिः); गैर्वाण्यां (४११, १५११६६) मुद्रिता ।४ ज्ञानप्रसूनाम्बिका नवरत्नमालिका (अत्र मुद्र्यमाणा)।एता अद्य उपलभ्यन्ते । केचन शास्त्रग्रन्थाश्चानेन रचिताः ।नवरत्नमालिकाया मातृका अड्यारकोशागारेऽप्युपलभ्यते । इयंक्वचिदन्यत्र मुद्रितेति श्रूयते, किन्तु अप्रसिद्धा दुर्लभा च ।

|| iti śrīnarakaṇṭhīravaśāstriviracitā navaratnamālikā samāptā ||śrīnarakaṇṭhīravaśāstri kavirayaṃ āndhro vaṭṭiyallivaṃśīyaḥ19śatakānte madrāsanagarānnatidavīyasi kārveṭinagaranāmni sthaletadadhīśasya bommarājasyāsthānakavirāsīt | asya pautrā adyāpi jīvanti |asya kṛtaya1 abhinavāsavadattā (subandhukṛtavāsavadattāgadyakāvyasya padyaiḥ saṅgrahaḥ),2 yatisārvabhaumopahāraḥ (śrīśaṅkarācāryapāramparyavarṇanam)3 kapileśvarastutiḥ (tiruppatikṣetrasthaśivastutiḥ); gairvāṇyāṃ (411, 151166) mudritā | 4 jñānaprasūnāmbikā navaratnamālikā (atra mudryamāṇā)|etā adya upalabhyante | kecana śāstragranthāścānena racitāḥ |navaratnamālikāyā mātṛkā aḍyārakośāgāre'pyupalabhyate | iyaṃkvacidanyatra mudriteti śrūyate, kintu aprasiddhā durlabhā ca |