कार्तवीर्यकवचकथनम् Kartaviryakavachakathanam

नारद उवाच ।साधु साधु महाप्राज्ञ सर्व तन्त्रविशारद ।त्वया मह्यं समाख्यातं विधानं तन्त्रगोपितम् ॥ १॥

nārada uvāca |sādhu sādhu mahāprājña sarva tantraviśārada |tvayā mahyaṃ samākhyātaṃ vidhānaṃ tantragopitam || 1||

अधुना तु महाभाग कार्तवीर्यहनूमतोः ।कवचे श्रोतुमिच्छामि तद्वदस्वकृपानिधे ॥ २॥

adhunā tu mahābhāga kārtavīryahanūmatoḥ |kavace śrotumicchāmi tadvadasvakṛpānidhe || 2||

सनत्कुमार उवाच ।शृणु विप्रेन्द्र वक्ष्यामि कवचं परमाद्भुतम् ।कार्तवीर्यस्य येनासौ प्रसन्नः कार्यसिद्धिकृत् ॥ ३॥

sanatkumāra uvāca |śṛṇu viprendra vakṣyāmi kavacaṃ paramādbhutam |kārtavīryasya yenāsau prasannaḥ kāryasiddhikṛt || 3||

सहस्रादित्यसङ्काशे नानारत्नसमुज्ज्वले ।भास्वद्ध्वजपताकाढ्ये तुरगायुतभूषिते ॥ ४॥

sahasrādityasaṅkāśe nānāratnasamujjvale |bhāsvaddhvajapatākāḍhye turagāyutabhūṣite || 4||

महासंवर्तकाम्भोधिभीमरावविराविणि ।समुद्धृतमहाछत्रवितानितवियत्पथे ॥ ५॥

mahāsaṃvartakāmbhodhibhīmarāvavirāviṇi |samuddhṛtamahāchatravitānitaviyatpathe || 5||

महारथवरे दीप्तनानायुधविराजिते ।सुस्थितं विपुलोदारं सहस्रभुजमण्डितम् ॥ ६॥

mahārathavare dīptanānāyudhavirājite |susthitaṃ vipulodāraṃ sahasrabhujamaṇḍitam || 6||

वामैरुद्दण्डकोदण्डान्दधानमपरैः शरान् ।किरीटहारमुकुटकेयूरवलयाङ्गदैः ॥ ७॥

vāmairuddaṇḍakodaṇḍāndadhānamaparaiḥ śarān |kirīṭahāramukuṭakeyūravalayāṅgadaiḥ || 7||

मुद्रिकोदरबन्धाद्यैर्मौञ्जीनूपुरकादिभिः ।भूषितं विविधाकल्पैर्भास्वरैः सुमहाधनैः ॥ ८॥

mudrikodarabandhādyairmauñjīnūpurakādibhiḥ |bhūṣitaṃ vividhākalpairbhāsvaraiḥ sumahādhanaiḥ || 8||

आबद्धकवचं वीरं सुप्रसन्नाननाम्बुजम् ।धनुर्ज्यासिंहनादेन कम्पयन्तं जगत्त्रयम् ॥ ९॥

ābaddhakavacaṃ vīraṃ suprasannānanāmbujam |dhanurjyāsiṃhanādena kampayantaṃ jagattrayam || 9||

सर्वशत्रुक्षयकरं सर्वव्याधिविनाशनम् ।सर्वसम्पत्प्रदातारं विजयश्रीनिषेवितम् ॥ १०॥

sarvaśatrukṣayakaraṃ sarvavyādhivināśanam |sarvasampatpradātāraṃ vijayaśrīniṣevitam || 10||

सर्वसौभाग्यदं भद्रं भक्ताभयविधायिनम् ।दिव्यमाल्यानुलेपाढ्यं सर्वलक्षणसंयुतम् ॥ ११॥

sarvasaubhāgyadaṃ bhadraṃ bhaktābhayavidhāyinam |divyamālyānulepāḍhyaṃ sarvalakṣaṇasaṃyutam || 11||

रथनागाश्वपादातवृन्दमध्यगमीश्वरम् ।वरदं चक्रवर्तीनं सर्वलोकैकपालकम् ॥ १२॥

rathanāgāśvapādātavṛndamadhyagamīśvaram |varadaṃ cakravartīnaṃ sarvalokaikapālakam || 12||

समानोदितसाहस्रदिवाकरसमद्युतिम् ।महायोगभवैश्वर्यकीर्त्याक्रान्तजगत्त्रयम् ॥ १३॥

samānoditasāhasradivākarasamadyutim |mahāyogabhavaiśvaryakīrtyākrāntajagattrayam || 13||

श्रीमच्चक्रं हरेरंशादवतीर्णं महीतले ।सम्यगात्मादिभेदेन ध्यात्वा रक्षामुदीरयेत् ॥ १४॥

śrīmaccakraṃ hareraṃśādavatīrṇaṃ mahītale |samyagātmādibhedena dhyātvā rakṣāmudīrayet || 14||

अस्याङ्गमूर्तयः पञ्च पान्तु मां स्फटिकोज्ज्वलाः ।अग्नीशासुरवायव्यकोणेषु हृदयादिकाः ॥ १५॥

asyāṅgamūrtayaḥ pañca pāntu māṃ sphaṭikojjvalāḥ |agnīśāsuravāyavyakoṇeṣu hṛdayādikāḥ || 15||

सर्वतोऽस्त्रज्वलद्रूपा दरचर्मासिपाणयः ।अव्याहतबलैश्वर्यशक्तिसामर्थ्यविग्रहाः ॥ १६॥

sarvato'strajvaladrūpā daracarmāsipāṇayaḥ |avyāhatabalaiśvaryaśaktisāmarthyavigrahāḥ || 16||

क्षेमङ्करीशक्तियुतश्चौरवर्गविभञ्जनः ।प्राचीं दिशं रक्षतु मे बाणबाणासनायुधः ॥ १७॥

kṣemaṅkarīśaktiyutaścauravargavibhañjanaḥ |prācīṃ diśaṃ rakṣatu me bāṇabāṇāsanāyudhaḥ || 17||

श्रीकरीशक्तिसहितो मारीभयविनाशकः ।शरचापधरः श्रीमान् दिशं मे पातु दक्षिणाम् ॥ १८॥

śrīkarīśaktisahito mārībhayavināśakaḥ |śaracāpadharaḥ śrīmān diśaṃ me pātu dakṣiṇām || 18||

महावश्यकरीयुक्तः सर्वशत्रुविनाशकृत् ।महेषुचापधृक्पातु मम प्राचेतसीं दिशम् ॥ १९॥

mahāvaśyakarīyuktaḥ sarvaśatruvināśakṛt |maheṣucāpadhṛkpātu mama prācetasīṃ diśam || 19||

यशःकर्या समायुक्तो दैत्यसङ्घविनाशनः ।परिरक्षतु मे सम्यग्विदिशं चैत्रभानवीम् ॥ २०॥

yaśaḥkaryā samāyukto daityasaṅghavināśanaḥ |parirakṣatu me samyagvidiśaṃ caitrabhānavīm || 20||

विद्याकरीसमायुक्तः सुमहद्दुःखनाशनः ।पातु मे नैरृतीं चापपाणिर्विदिशमीश्वरः ॥ २१॥

vidyākarīsamāyuktaḥ sumahadduḥkhanāśanaḥ |pātu me nairṛtīṃ cāpapāṇirvidiśamīśvaraḥ || 21||

धनकर्या समायुक्तो महादुरितनाशनः ।इष्वासनेषुधृक्पातु विदिशं मम वायवीम् ॥ २२॥

dhanakaryā samāyukto mahāduritanāśanaḥ |iṣvāsaneṣudhṛkpātu vidiśaṃ mama vāyavīm || 22||

आयुःकर्या युतः श्रीमान्महाभयविनाशनः ।चापेषुधारी शैवीं मे विदिशं परिरक्षतु ॥ २३॥

āyuḥkaryā yutaḥ śrīmānmahābhayavināśanaḥ |cāpeṣudhārī śaivīṃ me vidiśaṃ parirakṣatu || 23||

विजयश्रीयुतः साक्षात्सहस्रारधरो विभुः ।दिशमूर्द्ध्वामवतु मे सर्वदुष्टभयङ्करः ॥ २४॥

vijayaśrīyutaḥ sākṣātsahasrāradharo vibhuḥ |diśamūrddhvāmavatu me sarvaduṣṭabhayaṅkaraḥ || 24||

शङ्खभृत्सुमहाशक्तिसंयुतोऽप्यधरां दिशम् ।परिरक्षतु मे दुःखध्वान्तसम्भेदभास्करः ॥ २५॥

śaṅkhabhṛtsumahāśaktisaṃyuto'pyadharāṃ diśam |parirakṣatu me duḥkhadhvāntasambhedabhāskaraḥ || 25||

महायोगसमायुक्तः सर्वदिक्चक्रमण्डलः ।महायोगीश्वरः पातु सर्वतो मम पद्मभृत् ॥ २६॥

mahāyogasamāyuktaḥ sarvadikcakramaṇḍalaḥ |mahāyogīśvaraḥ pātu sarvato mama padmabhṛt || 26||

एतास्तु मूर्तयो रक्ता रक्तमाल्यांशुकावृताः ।प्रधानदेवतारूपाः पृथग्रथवरे स्थिताः ॥ २७॥

etāstu mūrtayo raktā raktamālyāṃśukāvṛtāḥ |pradhānadevatārūpāḥ pṛthagrathavare sthitāḥ || 27||

शक्तयः पद्महस्ताश्च नीलेन्दीवरसन्न्निभाः ।शुक्लमाल्यानुवसनाः सुलिप्ततिलकोज्ज्वलाः ॥ २८॥

śaktayaḥ padmahastāśca nīlendīvarasannnibhāḥ |śuklamālyānuvasanāḥ suliptatilakojjvalāḥ || 28||

तत्पार्षदेश्वराः स्वस्ववाहनायुधभूषणाः ।स्वस्वदिक्षु स्थिताः पान्तु मामिन्द्राद्या महाबलाः ॥ २९॥

tatpārṣadeśvarāḥ svasvavāhanāyudhabhūṣaṇāḥ |svasvadikṣu sthitāḥ pāntu māmindrādyā mahābalāḥ || 29||

एतास्तस्य समाख्याताः सर्वावरणदेवताः ।सर्वतो मां सदा पान्तु सर्वशक्तिसमन्विताः ॥ ३०॥

etāstasya samākhyātāḥ sarvāvaraṇadevatāḥ |sarvato māṃ sadā pāntu sarvaśaktisamanvitāḥ || 30||

हृदये चोदरे नाभौ जठरे गुह्यमण्डले ।तेजोरूपाः स्थिताः पान्तु वाञ्छासुखवनद्रुमाः ॥ ३१॥

hṛdaye codare nābhau jaṭhare guhyamaṇḍale |tejorūpāḥ sthitāḥ pāntu vāñchāsukhavanadrumāḥ || 31||

दिशं चान्ये महावर्णा मन्त्ररूपा महोज्ज्वलाः ।व्यापकत्वेन पान्त्वस्मानापादतलमस्तकम् ॥ ३२॥

diśaṃ cānye mahāvarṇā mantrarūpā mahojjvalāḥ |vyāpakatvena pāntvasmānāpādatalamastakam || 32||

कार्तवीर्यः शिरः पातु ललाटं हैहयेश्वरः ।सुमुखो मे मुखं पातु कर्णौ व्याप्तजगत्त्रयः ॥ ३३॥

kārtavīryaḥ śiraḥ pātu lalāṭaṃ haihayeśvaraḥ |sumukho me mukhaṃ pātu karṇau vyāptajagattrayaḥ || 33||

सुकुमारो हनुं पातु भ्रूयुगं मे धनुर्धरः ।नयनं पुण्डरीकाक्षो नासिकां मे गुणाकरः ॥ ३४॥

sukumāro hanuṃ pātu bhrūyugaṃ me dhanurdharaḥ |nayanaṃ puṇḍarīkākṣo nāsikāṃ me guṇākaraḥ || 34||

अधरोष्ठौ सदा पातु ब्रह्मज्ञेयो द्विजान्कविः ।सर्वशास्त्रकलाधारी जिह्वां चिबुकमव्ययः ॥ ३५॥

adharoṣṭhau sadā pātu brahmajñeyo dvijānkaviḥ |sarvaśāstrakalādhārī jihvāṃ cibukamavyayaḥ || 35||

दत्तात्रेयप्रियः कण्ठं स्कन्धौ राजकुलेश्वरः ।भुजौ दशास्यदर्पघ्नो हृदयं मे महाबलः ॥ ३६॥

dattātreyapriyaḥ kaṇṭhaṃ skandhau rājakuleśvaraḥ |bhujau daśāsyadarpaghno hṛdayaṃ me mahābalaḥ || 36||

कुक्षिं रक्षतु मे विद्वान् वक्षः परपुरञ्जयः ।करौ सर्वार्थदः पातु कराग्राणि जगत्प्रियः ॥ ३७॥

kukṣiṃ rakṣatu me vidvān vakṣaḥ parapurañjayaḥ |karau sarvārthadaḥ pātu karāgrāṇi jagatpriyaḥ || 37||

रेवाम्बुलीलासन्दृप्तो जठरं परिरक्षतु ।वीरशूरस्तु मे नाभिं पार्श्वौ मे सर्वदुष्टहा ॥ ३८॥

revāmbulīlāsandṛpto jaṭharaṃ parirakṣatu |vīraśūrastu me nābhiṃ pārśvau me sarvaduṣṭahā || 38||

सहस्रभुजभृत्पृष्टं सप्तद्वीपाधिपः कटिम् ।ऊरू माहिष्मतीनाथो जानुनी वल्लभो भुवः ॥ ३९॥

sahasrabhujabhṛtpṛṣṭaṃ saptadvīpādhipaḥ kaṭim |ūrū māhiṣmatīnātho jānunī vallabho bhuvaḥ || 39||

जङ्घे वीराधिपः पातु पातु पादौ मनोजवः ।पातु सर्वायुधधरः सर्वाङ्गं सर्वमर्मसु ॥ ४०॥

jaṅghe vīrādhipaḥ pātu pātu pādau manojavaḥ |pātu sarvāyudhadharaḥ sarvāṅgaṃ sarvamarmasu || 40||

सर्वदुष्टान्तकः पातु धात्वष्टककलेवरम् ।प्राणादिदशजीवेशान्सर्वशिष्टेष्टदोऽवतु ॥ ४१॥

sarvaduṣṭāntakaḥ pātu dhātvaṣṭakakalevaram |prāṇādidaśajīveśānsarvaśiṣṭeṣṭado'vatu || 41||

वशीकृतेन्द्रियग्रामः पातु सर्वेन्द्रियाणि मे ।अनुक्तमपि यत्स्थानं शरीरान्तर्बहिश्च यत् ॥ ४२॥

vaśīkṛtendriyagrāmaḥ pātu sarvendriyāṇi me |anuktamapi yatsthānaṃ śarīrāntarbahiśca yat || 42||

तत्सर्वं पातु मे सर्वलोकनाथेश्वरेश्वरः ।वज्रात्सारतरं चेदं शरीरं कवचावृतम् ॥ ४३॥

tatsarvaṃ pātu me sarvalokanātheśvareśvaraḥ |vajrātsārataraṃ cedaṃ śarīraṃ kavacāvṛtam || 43||

बाधाशतविनिर्मुक्तमस्तु मे भयवर्जितम् ।बद्ध्वेदं कवचं दिव्यमभेद्यं हैहयेशितुः ॥ ४४॥

bādhāśatavinirmuktamastu me bhayavarjitam |baddhvedaṃ kavacaṃ divyamabhedyaṃ haihayeśituḥ || 44||

विचरामि दिवा रात्रौ निर्भयेनान्तरात्मना ।राजमार्गे महादुर्गे मार्गे चौरादिसङ्कुले ॥ ४५॥

vicarāmi divā rātrau nirbhayenāntarātmanā |rājamārge mahādurge mārge caurādisaṅkule || 45||

विषमे विपिने घोरे दावाग्नौ गिरिकन्दरे ।सङ्ग्रामे शस्त्रसङ्घाते सिंहव्याघ्रनिषेविते ॥ ४६॥

viṣame vipine ghore dāvāgnau girikandare |saṅgrāme śastrasaṅghāte siṃhavyāghraniṣevite || 46||

गह्वरे सर्वसङ्कीर्णे सन्ध्याकाले नृपालये ।विवादे विपुलावर्ते समुद्रे च नदीतटे ॥ ४७॥

gahvare sarvasaṅkīrṇe sandhyākāle nṛpālaye |vivāde vipulāvarte samudre ca nadītaṭe || 47||

परिपन्थिजनाकीर्णे देशे दस्युगणावृते ।सर्वस्वहरणे प्राप्ते प्राप्ते प्राणस्य सङ्कटे ॥ ४८॥

paripanthijanākīrṇe deśe dasyugaṇāvṛte |sarvasvaharaṇe prāpte prāpte prāṇasya saṅkaṭe || 48||

नानारोगज्वरावेशे पिशाचप्रेतयातने ।मारीदुःस्वप्नपीडासु क्लिष्टे विश्वासघातके ॥ ४९॥

nānārogajvarāveśe piśācapretayātane |mārīduḥsvapnapīḍāsu kliṣṭe viśvāsaghātake || 49||

शारीरे च महादुःखे मानसे च महाज्वरे ।आधिव्याधिभये विघ्नज्वालोपद्रवकेऽपि च ॥ ५०॥

śārīre ca mahāduḥkhe mānase ca mahājvare |ādhivyādhibhaye vighnajvālopadravake'pi ca || 50||

न भवतु भयं किञ्चित्कवचेनावृतस्य मे ।आगुन्तुकामानखिलानस्मद्वसुविलुम्पकान् ॥ ५१॥

na bhavatu bhayaṃ kiñcitkavacenāvṛtasya me |āguntukāmānakhilānasmadvasuvilumpakān || 51||

निवारयतु दोर्दण्डसहस्रेण महारथः ।स्वकरोद्धृतसाहस्रपाशबद्धान्सुदुर्जयान् ॥ ५२॥

nivārayatu dordaṇḍasahasreṇa mahārathaḥ |svakaroddhṛtasāhasrapāśabaddhānsudurjayān || 52||

संरुद्धगतिसामर्थ्यान्करोतु कृतवीर्यजः ।सृणिसाहस्रनिर्भिन्नान्सहस्रशरखण्डितान् ॥ ५३॥

saṃruddhagatisāmarthyānkarotu kṛtavīryajaḥ |sṛṇisāhasranirbhinnānsahasraśarakhaṇḍitān || 53||

राजचूडामणिः क्षिप्रं करोत्वस्मद्विरोधकान् ।खड्गसाहस्रदलितान्सहस्रमुसलार्दितान् ॥ ५४॥

rājacūḍāmaṇiḥ kṣipraṃ karotvasmadvirodhakān |khaḍgasāhasradalitānsahasramusalārditān || 54||

चौरादिदुष्टसत्त्वौघान्करोतु कमलेक्षणः ।स्वशङ्खनादसन्त्रस्तान्सहस्रारसहस्रभृत् ॥ ५५॥

caurādiduṣṭasattvaughānkarotu kamalekṣaṇaḥ |svaśaṅkhanādasantrastānsahasrārasahasrabhṛt || 55||

अवतारो हरेः साक्षात्पालयत्वखिलं मम ।कार्तवीर्य महावीर्य सर्वदुष्टविनाशन ॥ ५६॥

avatāro hareḥ sākṣātpālayatvakhilaṃ mama |kārtavīrya mahāvīrya sarvaduṣṭavināśana || 56||

सर्वत्र सर्वदा दुष्टचौरान्नाशाय नाशय ।किं त्वं स्वपिषि दुष्टघ्न किं तिष्टसि चिरायसि ॥ ५७॥

sarvatra sarvadā duṣṭacaurānnāśāya nāśaya |kiṃ tvaṃ svapiṣi duṣṭaghna kiṃ tiṣṭasi cirāyasi || 57||

उत्तिष्ठ पाहि नः सर्वभयेभ्यः स्वसुतानिव ।ये चौरा वसुहर्तारो विद्विषो ये च हिंसकाः ॥ ५८॥

uttiṣṭha pāhi naḥ sarvabhayebhyaḥ svasutāniva |ye caurā vasuhartāro vidviṣo ye ca hiṃsakāḥ || 58||

साधुभीतिकरा दुष्टाश्छद्मका ये दुराशयाः ।दुर्हृदो दुष्टभूपाला दुष्टामात्याश्च पापकाः ॥ ५९॥

sādhubhītikarā duṣṭāśchadmakā ye durāśayāḥ |durhṛdo duṣṭabhūpālā duṣṭāmātyāśca pāpakāḥ || 59||

ये च कार्यविलोप्तोरो ये खलाः परिपन्थिनः ।सर्वस्वहारिणां ये च पञ्च मायाविनोऽपरे ॥ ६०॥

ye ca kāryaviloptoro ye khalāḥ paripanthinaḥ |sarvasvahāriṇāṃ ye ca pañca māyāvino'pare || 60||

महाक्लेशकरा म्लेच्छा दस्यवो वृषलाश्च ये ।येऽग्निदा गरदातारो वञ्चकाः शस्त्रपाणयः ॥ ६१॥

mahākleśakarā mlecchā dasyavo vṛṣalāśca ye |ye'gnidā garadātāro vañcakāḥ śastrapāṇayaḥ || 61||

ये पापा दुष्टकर्माणो दुःखदा दुष्टबुद्धयः ।व्याजकाः कुपथासक्ता ये च नानाभयप्रदाः ॥ ६२॥

ye pāpā duṣṭakarmāṇo duḥkhadā duṣṭabuddhayaḥ |vyājakāḥ kupathāsaktā ye ca nānābhayapradāḥ || 62||

छिद्रान्वेषरता नित्यं येऽस्मान्बाधितुमुद्यताः ।ते सर्वे कार्तवीर्यस्य महाशङ्खरवाहताः ॥ ६३॥

chidrānveṣaratā nityaṃ ye'smānbādhitumudyatāḥ |te sarve kārtavīryasya mahāśaṅkharavāhatāḥ || 63||

सहसा विलयं यान्तु दूरादिव विमोहिताः ।ये दानवा महादैत्या ये यक्षा ये च राक्षसाः ॥ ६४॥

sahasā vilayaṃ yāntu dūrādiva vimohitāḥ |ye dānavā mahādaityā ye yakṣā ye ca rākṣasāḥ || 64||

पिशाचा ये महासत्त्वा ये भूतब्रह्मराक्षसाः ।अपस्मारग्रहा ये च ये ग्रहाः पिशिताशनाः ॥ ६५॥

piśācā ye mahāsattvā ye bhūtabrahmarākṣasāḥ |apasmāragrahā ye ca ye grahāḥ piśitāśanāḥ || 65||

महालोहितभोक्तारो वेताला ये च गुह्यकाः ।गन्धर्वाप्सरसः सिद्धा ये च देवादियोनयः ॥ ६६॥

mahālohitabhoktāro vetālā ye ca guhyakāḥ |gandharvāpsarasaḥ siddhā ye ca devādiyonayaḥ || 66||

डाकिन्यो द्रुणसाः प्रेताः क्षेत्रपाला विनायकाः ।महाव्याघ्रमहामेघा महातुरगरूपकाः ॥ ६७॥

ḍākinyo druṇasāḥ pretāḥ kṣetrapālā vināyakāḥ |mahāvyāghramahāmeghā mahāturagarūpakāḥ || 67||

महागजा महासिंहा महामहिषयोनयः ।ऋक्षवाराहशुनकवानरोलूकमूर्तयः ॥ ६८॥

mahāgajā mahāsiṃhā mahāmahiṣayonayaḥ |ṛkṣavārāhaśunakavānarolūkamūrtayaḥ || 68||

महोष्ट्रखरमार्जारसर्पगोवृषमस्तकाः ।नानारूपा महासत्त्वा नानाक्लेशसहस्रदाः ॥ ६९॥

mahoṣṭrakharamārjārasarpagovṛṣamastakāḥ |nānārūpā mahāsattvā nānākleśasahasradāḥ || 69||

नानारोगकराः क्षुद्रा महावीर्या महाबलाः ।वातिकाः पैत्तिका घोरा श्लैष्मिकाः सान्निपातिकाः ॥ ७०॥

nānārogakarāḥ kṣudrā mahāvīryā mahābalāḥ |vātikāḥ paittikā ghorā ślaiṣmikāḥ sānnipātikāḥ || 70||

माहेश्वरा वैष्णवाश्च वैरिञ्च्याश्च महाग्रहाः ।स्कान्दा वैनायकाः क्रूरा ये च प्रमथगुह्यकाः ॥ ७१॥

māheśvarā vaiṣṇavāśca vairiñcyāśca mahāgrahāḥ |skāndā vaināyakāḥ krūrā ye ca pramathaguhyakāḥ || 71||

महाशत्रुग्रहा रौद्रा महामारीमसूरिकाः ।ऐकाहिका व्द्याहिकाश्च त्र्याहिकाश्च महाज्वराः ॥ ७२॥

mahāśatrugrahā raudrā mahāmārīmasūrikāḥ |aikāhikā vdyāhikāśca tryāhikāśca mahājvarāḥ || 72||

चातुर्थिकाः पाक्षिकाश्च मास्याः षाण्मासिकाश्च ये ।सांवत्सरा दुर्निवार्या ज्वराः परमदारुणाः ॥ ७३॥

cāturthikāḥ pākṣikāśca māsyāḥ ṣāṇmāsikāśca ye |sāṃvatsarā durnivāryā jvarāḥ paramadāruṇāḥ || 73||

स्वाप्निका ये महोत्पाता ये च दुःस्वाप्निका ग्रहाः ।कूष्माण्डा जृम्भिका भौमा द्रोणाः सान्निध्यवञ्चकाः ॥ ७४॥

svāpnikā ye mahotpātā ye ca duḥsvāpnikā grahāḥ |kūṣmāṇḍā jṛmbhikā bhaumā droṇāḥ sānnidhyavañcakāḥ || 74||

भ्रमिकाः प्राणहर्तारो ये च बालग्रहादयः ।मनोबुद्धीन्द्रियहराः स्फोटकाश्च महाग्रहाः ॥ ७५॥

bhramikāḥ prāṇahartāro ye ca bālagrahādayaḥ |manobuddhīndriyaharāḥ sphoṭakāśca mahāgrahāḥ || 75||

महाशना बलिभुजो महाकुणपभोजनाः ।दिवाचरा रात्रिचरा ये च सन्ध्यासु दारुणाः ॥ ७६॥

mahāśanā balibhujo mahākuṇapabhojanāḥ |divācarā rātricarā ye ca sandhyāsu dāruṇāḥ || 76||

प्रमत्ता वाऽप्रमत्ता वै ये मां बाधितुमुद्यताः ।ते सर्वे कार्त्तवीर्यस्य धनुर्मुक्तशराहताः ॥ ७७॥

pramattā vā'pramattā vai ye māṃ bādhitumudyatāḥ |te sarve kārttavīryasya dhanurmuktaśarāhatāḥ || 77||

सहस्रधा प्रणश्यन्तु भग्नसत्त्वबलोद्यमाः ।ये सर्पा ये महानागा महागिरिबिलेशयाः ॥ ७८॥

sahasradhā praṇaśyantu bhagnasattvabalodyamāḥ |ye sarpā ye mahānāgā mahāgiribileśayāḥ || 78||

कालव्याला महादंष्ट्रा महाजगरसंज्ञकाः ।अनन्तशूलिकाद्याश्च दंष्ट्राविषमहाभयाः ॥ ७९॥

kālavyālā mahādaṃṣṭrā mahājagarasaṃjñakāḥ |anantaśūlikādyāśca daṃṣṭrāviṣamahābhayāḥ || 79||

अनेकशतशीर्षाश्च खण्डपुच्छाश्च दारुणाः ।महाविषजलौकाश्च वृश्चिका रुक्तपुच्छकाः ॥ ८०॥

anekaśataśīrṣāśca khaṇḍapucchāśca dāruṇāḥ |mahāviṣajalaukāśca vṛścikā ruktapucchakāḥ || 80||

आशीविषाः कालकूटा महाहालाहलाह्वयाः ।जलसर्पा जलव्याला जलग्राहाश्च कच्छपाः ॥ ८१॥

āśīviṣāḥ kālakūṭā mahāhālāhalāhvayāḥ |jalasarpā jalavyālā jalagrāhāśca kacchapāḥ || 81||

मत्स्यका विषपुच्छाश्च ये चान्ये जलवासिनः ।जलजाः स्थलजाश्चैव कृत्रिमाश्च महाविषाः ॥ ८२॥

matsyakā viṣapucchāśca ye cānye jalavāsinaḥ |jalajāḥ sthalajāścaiva kṛtrimāśca mahāviṣāḥ || 82||

गुप्तरूपा गुप्तविषा मूषिका गृहगोधिकाः ।नानाविषाश्च ये घोरा महोपविषसंज्ञकाः ॥ ८३॥

guptarūpā guptaviṣā mūṣikā gṛhagodhikāḥ |nānāviṣāśca ye ghorā mahopaviṣasaṃjñakāḥ || 83||

येऽस्मान्बाधितुमिच्छन्ति शरीरप्राणनाशकाः ।ते सर्वे कार्तवीर्यस्य खड्गसाहस्रदारिताः ॥ ८४॥

ye'smānbādhitumicchanti śarīraprāṇanāśakāḥ |te sarve kārtavīryasya khaḍgasāhasradāritāḥ || 84||

दूरादेव विनश्यन्तु प्रणष्टेन्द्रियसाहसाः ।मनुष्याः पशवो त्वृक्षवानरा वनगोचराः ॥ ८५॥

dūrādeva vinaśyantu praṇaṣṭendriyasāhasāḥ |manuṣyāḥ paśavo tvṛkṣavānarā vanagocarāḥ || 85||

सिंहव्याघ्रवराहाश्च महिषा ये महामृगाः ।गजास्तुरङ्गा गवया रासभाः शरभा वृकाः ॥ ८६॥

siṃhavyāghravarāhāśca mahiṣā ye mahāmṛgāḥ |gajāsturaṅgā gavayā rāsabhāḥ śarabhā vṛkāḥ || 86||

शुनका द्वीपिनः शुभ्रा मार्जारा बिललोलुपाः ।शृगालाः शशकाः श्येना गरुत्मन्तो विहङ्गमाः ॥ ८७॥

śunakā dvīpinaḥ śubhrā mārjārā bilalolupāḥ |śṛgālāḥ śaśakāḥ śyenā garutmanto vihaṅgamāḥ || 87||

भेरुण्डा वायसा गूध्रा हंसाद्याः पक्षिजातयः ।उद्भिज्जाश्चाण्डजाश्चैव स्वेदजाश्च जरायुजाः ॥ ८८॥

bheruṇḍā vāyasā gūdhrā haṃsādyāḥ pakṣijātayaḥ |udbhijjāścāṇḍajāścaiva svedajāśca jarāyujāḥ || 88||

नानाभेदकुले जाता नानाभेदाः पृथग्विधाः ।येऽस्मान्बाधितुमिच्छन्ति सन्ध्यासु च दिवा निशि ॥ ८९॥

nānābhedakule jātā nānābhedāḥ pṛthagvidhāḥ |ye'smānbādhitumicchanti sandhyāsu ca divā niśi || 89||

ते सर्वे कार्तवीर्यस्य गदासाहस्रदारिताः ।दूरादेव विनश्यन्तु विनष्टगतिपौरुषाः ॥ ९०॥

te sarve kārtavīryasya gadāsāhasradāritāḥ |dūrādeva vinaśyantu vinaṣṭagatipauruṣāḥ || 90||

ये चाक्षेमप्रदातारः कूटमायाविनश्च ये ।मारणोत्सादनोन्मूलद्वेषमोहनकारकाः ॥ ९१॥

ye cākṣemapradātāraḥ kūṭamāyāvinaśca ye |māraṇotsādanonmūladveṣamohanakārakāḥ || 91||

विश्वासघातका दुष्टा ये च स्वामिद्रुहो नराः ।ये चाततायिनो दुष्टा ये पापा गोप्यहारिणः ॥ ९२॥

viśvāsaghātakā duṣṭā ye ca svāmidruho narāḥ |ye cātatāyino duṣṭā ye pāpā gopyahāriṇaḥ || 92||

दाहोपघातगरलशस्त्रपातातिदुःखदाः ।क्षेत्रवित्तादिहरणबन्धनादिभयप्रदाः ॥ ९३॥

dāhopaghātagaralaśastrapātātiduḥkhadāḥ |kṣetravittādiharaṇabandhanādibhayapradāḥ || 93||

ईतयो विविधाकारो ये चान्ये दुष्टजातयः ।पीडाकरा ये सततं छिद्रमिच्छन्ति बाधितुम् ॥ ९४॥

ītayo vividhākāro ye cānye duṣṭajātayaḥ |pīḍākarā ye satataṃ chidramicchanti bādhitum || 94||

ते सर्वे कार्तवीर्यस्य चक्रसाहस्रदारिताः ।दूरादेव क्षयं यान्तु विनष्टबलसाहसाः ॥ ९५॥

te sarve kārtavīryasya cakrasāhasradāritāḥ |dūrādeva kṣayaṃ yāntu vinaṣṭabalasāhasāḥ || 95||

ये मेघा ये महावर्षा ये वाता याश्च विद्युतः ।ये महाशनयो दीप्ता ये निर्घाताश्च दारुणाः ॥ ९६॥

ye meghā ye mahāvarṣā ye vātā yāśca vidyutaḥ |ye mahāśanayo dīptā ye nirghātāśca dāruṇāḥ || 96||

उल्कापाताश्च ये घोरा ये महेन्द्रायुधादयः ।सूर्येन्दुकुजसौम्याश्च गुरुकाव्यशनैश्चराः ॥ ९७॥

ulkāpātāśca ye ghorā ye mahendrāyudhādayaḥ |sūryendukujasaumyāśca gurukāvyaśanaiścarāḥ || 97||

राहुश्च केतवो घोरा नक्षत्रा राशयस्तथा ।तिथयः सङ्क्रमा मासा हायना युगनायकाः ॥ ९८॥

rāhuśca ketavo ghorā nakṣatrā rāśayastathā |tithayaḥ saṅkramā māsā hāyanā yuganāyakāḥ || 98||

मन्वन्तराधिपाः सिद्धा ऋषयो योगसिद्धयः ।निधयो ऋग्यजुःसामाथर्वणाश्चैव वह्नयः ॥ ९९॥

manvantarādhipāḥ siddhā ṛṣayo yogasiddhayaḥ |nidhayo ṛgyajuḥsāmātharvaṇāścaiva vahnayaḥ || 99||

ऋतवो लोकपालाश्च पितरो देवसंहतिः ।विद्याश्चैव चतुःषष्टिभेदा या भुवनत्रये ॥ १००॥

ṛtavo lokapālāśca pitaro devasaṃhatiḥ |vidyāścaiva catuḥṣaṣṭibhedā yā bhuvanatraye || 100||

ये त्वत्र कीर्तिताः सर्वे ये चान्ये नानुकीर्तिताः ।ते सन्तु नः सदा सौम्याः सर्वकालसुखावहाः ॥ १०१॥

ye tvatra kīrtitāḥ sarve ye cānye nānukīrtitāḥ |te santu naḥ sadā saumyāḥ sarvakālasukhāvahāḥ || 101||

आज्ञया कार्तवीर्यस्य योगीन्द्रस्यामितद्युतेः ।कार्तवीर्यार्जुनो धन्वी राजेन्द्रो हैहयेश्वरः ॥ १०२॥

ājñayā kārtavīryasya yogīndrasyāmitadyuteḥ |kārtavīryārjuno dhanvī rājendro haihayeśvaraḥ || 102||

दशास्यदर्पहा रेवालीलादृप्तः सुदुर्जयः ।दुःखहा चौरदमनो राजराजेश्वरः प्रभुः ॥ १०३॥

daśāsyadarpahā revālīlādṛptaḥ sudurjayaḥ |duḥkhahā cauradamano rājarājeśvaraḥ prabhuḥ || 103||

सर्वज्ञः सर्वदः श्रीमान् सर्वशिष्टेष्टदः कृती ।राजचूडामणिर्योगी सप्तद्वीपाधिनायकः ॥ १०४॥

sarvajñaḥ sarvadaḥ śrīmān sarvaśiṣṭeṣṭadaḥ kṛtī |rājacūḍāmaṇiryogī saptadvīpādhināyakaḥ || 104||

विजयी विश्वजिद्वाग्मी महागतिरलोलुपः ।यज्वा विप्रप्रियो विद्वान् ब्रह्मज्ञेयः सनातनः ॥ १०५॥

vijayī viśvajidvāgmī mahāgatiralolupaḥ |yajvā viprapriyo vidvān brahmajñeyaḥ sanātanaḥ || 105||

माहिष्मतीपतिर्योधा महाकीर्तिर्महाभुजः ।सुकुमारो महावीरो मारीघ्नो मदिरेक्षणः ॥ १०६॥

māhiṣmatīpatiryodhā mahākīrtirmahābhujaḥ |sukumāro mahāvīro mārīghno madirekṣaṇaḥ || 106||

शत्रुघ्नः शाश्वतः शूरः शङ्खभृद्योगिवल्लभः ।महाभागवतो धीमान्महाभयविनाशनः ॥ १०७॥

śatrughnaḥ śāśvataḥ śūraḥ śaṅkhabhṛdyogivallabhaḥ |mahābhāgavato dhīmānmahābhayavināśanaḥ || 107||

असाध्यी विग्रहो दिव्यो भावो व्याप्तजगत्त्रयः ।जितेन्द्रियो जितारातिः स्वच्छन्दोऽनन्तविक्रमः ॥ १०८॥

asādhyī vigraho divyo bhāvo vyāptajagattrayaḥ |jitendriyo jitārātiḥ svacchando'nantavikramaḥ || 108||

चक्रभृत्परचक्रघ्नः सङ्ग्रामविधिपूजितः ।सर्वशास्त्रकलाधारी विरजा लोकवन्दितः ॥ १०९॥

cakrabhṛtparacakraghnaḥ saṅgrāmavidhipūjitaḥ |sarvaśāstrakalādhārī virajā lokavanditaḥ || 109||

वीरो विमलसत्त्वाढ्यो महाबलपराक्रमः ।विजयश्रीमहामान्यो जितारिर्मन्त्रनायकः ॥ ११०॥

vīro vimalasattvāḍhyo mahābalaparākramaḥ |vijayaśrīmahāmānyo jitārirmantranāyakaḥ || 110||

खड्गभृत्कामदः कान्तः कालघ्नः कमलेक्षणः ।भद्रवादप्रियो वैद्यो विबुधो वरदो वशी ॥ १११॥

khaḍgabhṛtkāmadaḥ kāntaḥ kālaghnaḥ kamalekṣaṇaḥ |bhadravādapriyo vaidyo vibudho varado vaśī || 111||

महाधनो निधिपतिर्महायोगी गुरुप्रियः ।योगाढ्यः सर्वरोगघ्नो राजिताखिलभूतलः ॥ ११२॥

mahādhano nidhipatirmahāyogī gurupriyaḥ |yogāḍhyaḥ sarvarogaghno rājitākhilabhūtalaḥ || 112||

दिव्यास्त्रभृदमेयात्मा सर्वगोप्ता महोज्ज्वलः ।सर्वायुधधरोऽभीष्टप्रदः परपुरञ्जयः ॥ ११३॥

divyāstrabhṛdameyātmā sarvagoptā mahojjvalaḥ |sarvāyudhadharo'bhīṣṭapradaḥ parapurañjayaḥ || 113||

योगसिद्धो महाकायो महावृन्दशताधिपः ।सर्वज्ञाननिधिः सर्वसिद्धिदानकृतोद्यमः ॥ ११४॥

yogasiddho mahākāyo mahāvṛndaśatādhipaḥ |sarvajñānanidhiḥ sarvasiddhidānakṛtodyamaḥ || 114||

इत्यष्टशतनामोक्त्या मूर्तयो दश दिक्पथि ।सम्यग्दशदिशो व्याप्य पालयन्तु च मां सदा ॥ ११५॥

ityaṣṭaśatanāmoktyā mūrtayo daśa dikpathi |samyagdaśadiśo vyāpya pālayantu ca māṃ sadā || 115||

स्वस्थाः सर्वेन्द्रियाः सन्तु शान्तिरस्तु सदा मम ।शेषाद्या मूर्तयोऽष्टौ च विक्रमेणैव भास्वराः ॥ ११६॥

svasthāḥ sarvendriyāḥ santu śāntirastu sadā mama |śeṣādyā mūrtayo'ṣṭau ca vikrameṇaiva bhāsvarāḥ || 116||

अग्निनिरृतिवाय्वीशकोणगाः पान्तु मां सदा ।मम सौख्यमसम्बाधमारोग्यमपराजयः ॥ ११७॥

agninirṛtivāyvīśakoṇagāḥ pāntu māṃ sadā |mama saukhyamasambādhamārogyamaparājayaḥ || 117||

दुःखहानिरविघ्नश्च प्रजावृद्धिः सुखोदयः ।वाञ्छाप्तिरतिकल्याणमवैषम्यमनामयम् ॥ ११८॥

duḥkhahāniravighnaśca prajāvṛddhiḥ sukhodayaḥ |vāñchāptiratikalyāṇamavaiṣamyamanāmayam || 118||

अनालस्यमभीष्टं स्यान्मृत्युहानिर्बलोन्नतिः ।भयहानिर्यशः कान्तिर्विद्या ऋद्धिर्महाश्रियः ॥ ११९॥

anālasyamabhīṣṭaṃ syānmṛtyuhānirbalonnatiḥ |bhayahāniryaśaḥ kāntirvidyā ṛddhirmahāśriyaḥ || 119||

अनष्टद्रव्यता चैव नष्टस्य पुनरागमः ।दीर्घायुष्यं मनोहर्षः सौकुमार्यमभीप्सितम् ॥ १२०॥

anaṣṭadravyatā caiva naṣṭasya punarāgamaḥ |dīrghāyuṣyaṃ manoharṣaḥ saukumāryamabhīpsitam || 120||

अप्रधृष्यतमत्वं च महासामर्थ्यमेव च ।सन्तु मे कार्तवीर्यस्य हैहयेन्द्रस्य कीर्तनात् ॥ १२१॥

apradhṛṣyatamatvaṃ ca mahāsāmarthyameva ca |santu me kārtavīryasya haihayendrasya kīrtanāt || 121||

य इदं कार्तवीर्यस्य कवचं पुण्यवर्द्धनम् ।सर्वपापप्रशमनं सर्वोपद्रवनाशनम् ॥ १२२॥

ya idaṃ kārtavīryasya kavacaṃ puṇyavarddhanam |sarvapāpapraśamanaṃ sarvopadravanāśanam || 122||

सर्वशान्तिकरं गुह्यं समस्तभयनाशनम् ।विजयार्थप्रदं नॄणां सर्वसम्पत्प्रदं शुभम् ॥ १२३॥

sarvaśāntikaraṃ guhyaṃ samastabhayanāśanam |vijayārthapradaṃ nṝṇāṃ sarvasampatpradaṃ śubham || 123||

शृणुयाद्वा पठेद्वापि सर्वकामानवाप्नुयात् ।चौरैर्हृतं यदा पश्येत्पश्वादिधनमात्मनः ॥ १२४॥

śṛṇuyādvā paṭhedvāpi sarvakāmānavāpnuyāt |caurairhṛtaṃ yadā paśyetpaśvādidhanamātmanaḥ || 124||

सप्तवारं तदा जप्येन्निशि पश्चिमदिङ्मुखः ।सप्तरात्रेण लभते नष्टद्रव्यं न संशयः ॥ १२५॥

saptavāraṃ tadā japyenniśi paścimadiṅmukhaḥ |saptarātreṇa labhate naṣṭadravyaṃ na saṃśayaḥ || 125||

सप्तविंशतिधा जप्त्वा प्राचीदिग्वदनः पुमान् ।देवासुरनिभं चापि परचक्रं निवारयेत् ॥ १२६॥

saptaviṃśatidhā japtvā prācīdigvadanaḥ pumān |devāsuranibhaṃ cāpi paracakraṃ nivārayet || 126||

विवादे कलहे घोरे पञ्चधा यः पठेदिदम् ।विजयो जायते तस्य न कदाचित्पराजयः ॥ १२७॥

vivāde kalahe ghore pañcadhā yaḥ paṭhedidam |vijayo jāyate tasya na kadācitparājayaḥ || 127||

सर्वरोगप्रपीडासु त्रेधा वा पञ्चधा पठेत् ।स रोगमृत्युवेतालभूतप्रेतैर्न बाध्यते ॥ १२८॥

sarvarogaprapīḍāsu tredhā vā pañcadhā paṭhet |sa rogamṛtyuvetālabhūtapretairna bādhyate || 128||

सम्यग्द्वादशधा रात्रौ प्रजपेद्बन्धमुक्तये ।त्रिदिनान्निगडाद्बद्धो मुच्यते नात्र संशयः ॥ १२९॥

samyagdvādaśadhā rātrau prajapedbandhamuktaye |tridinānnigaḍādbaddho mucyate nātra saṃśayaḥ || 129||

अनेनैव विधानेन सर्वसाधनकर्मणि ।असाध्यमपि सप्ताहात्साधयेन्मन्त्रवित्तमः ॥ १३०॥

anenaiva vidhānena sarvasādhanakarmaṇi |asādhyamapi saptāhātsādhayenmantravittamaḥ || 130||

यात्राकाले पठित्वेदं मार्गे गच्छति यः पुमान् ।न दुष्टचौरव्याघ्राद्यैर्भयं स्यात्परिपन्थिभिः ॥ १३१॥

yātrākāle paṭhitvedaṃ mārge gacchati yaḥ pumān |na duṣṭacauravyāghrādyairbhayaṃ syātparipanthibhiḥ || 131||

जपन्नासेचनं कुर्वञ्जलेनाञ्जलिना तनौ ।न चासौ विषकृत्यादिरोगस्फोटैः प्रबाध्यते ॥ १३२॥

japannāsecanaṃ kurvañjalenāñjalinā tanau |na cāsau viṣakṛtyādirogasphoṭaiḥ prabādhyate || 132||

कार्तवीर्यः खलद्वेषी कृतवीर्यसुतो बली ।सहस्रबाहुः शत्रुघ्नो रक्तवासा धनुर्धरः ॥ १३३॥

kārtavīryaḥ khaladveṣī kṛtavīryasuto balī |sahasrabāhuḥ śatrughno raktavāsā dhanurdharaḥ || 133||

रक्तगन्धो रक्तमाल्यो राजा स्मर्तुरभीष्टदः ।द्वादशैतानि नामानि कार्तवीर्यस्य यः पठेत् ॥ १३४॥

raktagandho raktamālyo rājā smarturabhīṣṭadaḥ |dvādaśaitāni nāmāni kārtavīryasya yaḥ paṭhet || 134||

सम्पदस्तस्य जायन्ते जनास्तस्य वशे सदा ।यः सेवते सदा विप्र श्रीमच्चक्रावतारकम् ॥ १३५॥

sampadastasya jāyante janāstasya vaśe sadā |yaḥ sevate sadā vipra śrīmaccakrāvatārakam || 135||

तस्य रक्षां सदा कुर्याच्चक्रं विष्णोर्महात्मनः ।मयैतत्कवचं विप्र दत्तात्रेयान्मुनीश्वरात् ॥ १३६॥

tasya rakṣāṃ sadā kuryāccakraṃ viṣṇormahātmanaḥ |mayaitatkavacaṃ vipra dattātreyānmunīśvarāt || 136||

श्रुतं तुभ्यं निगदितं धारयस्वाखिलेष्टदम् ॥ १३७॥

śrutaṃ tubhyaṃ nigaditaṃ dhārayasvākhileṣṭadam || 137||

इति श्रीबृहन्नारदीयपुराणे पूर्वभागे बृहदुपाख्याने तृतीयपादेकार्तवीर्यकवचकथनं नाम सप्तसप्ततितोमोऽध्यायः ॥ ७७॥

iti śrībṛhannāradīyapurāṇe pūrvabhāge bṛhadupākhyāne tṛtīyapādekārtavīryakavacakathanaṃ nāma saptasaptatitomo'dhyāyaḥ || 77||

बृहन्नारदीयपुराण । पूर्वभाग । अध्याय ७७/४१३ ७७/१५१३७॥बृहन्नारदीयपुराण । पूर्वभाग । अध्याय ७७/४-१३ ७७/१५-१३७॥

bṛhannāradīyapurāṇa | pūrvabhāga | adhyāya 77/413 77/15137||bṛhannāradīyapurāṇa | pūrvabhāga | adhyāya 77/4-13 77/15-137||