हरिहरस्तुतिः ३ Harihara Stuti

हरिभक्ता हयवदनं हरभक्ताः प्रार्थयन्ति गजवदनम् ।हरिहरभक्तास्तु वयं गुरुवदनं प्रार्थयामहे प्रथमम् ॥ १॥

haribhaktā hayavadanaṃ harabhaktāḥ prārthayanti gajavadanam |hariharabhaktāstu vayaṃ guruvadanaṃ prārthayāmahe prathamam || 1||

कपिशरुचिजटामण्डितहिमकरकोटिस्फुरन्मणीमुकुटः ।अविरलविभूतिसङ्गो बहुमायोमाधवः सुखं दिशतु ॥ २॥

kapiśarucijaṭāmaṇḍitahimakarakoṭisphuranmaṇīmukuṭaḥ |aviralavibhūtisaṅgo bahumāyomādhavaḥ sukhaṃ diśatu || 2||

यो ह्यङ्गुलीयकधरो यो हि कटकवांश्च यो हि कुण्डलवान् ।यः श्यामलाधिकरुचिर्बहुमायोमाधवः सुखं दिशतु ॥ ३॥

yo hyaṅgulīyakadharo yo hi kaṭakavāṃśca yo hi kuṇḍalavān |yaḥ śyāmalādhikarucirbahumāyomādhavaḥ sukhaṃ diśatu || 3||

निटिललसत्तिलकतया कनकप्रभमध्यनेत्रदेदीप्रः ।मुग्धस्मरमदहन्ता बहुमायोमाधवः सुखं दिशतु ॥ ४॥

niṭilalasattilakatayā kanakaprabhamadhyanetradedīpraḥ |mugdhasmaramadahantā bahumāyomādhavaḥ sukhaṃ diśatu || 4||

गणनायकतातोऽयं वेदस्तुत्यो न लोकवाग्विषयः ।कालो वैकुण्ठपदो बहुमायोमाधवः सुखं दिशतु ॥ ५॥

gaṇanāyakatāto'yaṃ vedastutyo na lokavāgviṣayaḥ |kālo vaikuṇṭhapado bahumāyomādhavaḥ sukhaṃ diśatu || 5||

वपुषि कलत्रं वहते सानुमतो यः सुतां न दीनस्य ।वृषभारोहविलासी बहुमायोमाधवः सुखं दिशतु ॥ ६॥

vapuṣi kalatraṃ vahate sānumato yaḥ sutāṃ na dīnasya |vṛṣabhārohavilāsī bahumāyomādhavaḥ sukhaṃ diśatu || 6||

यस्य सुतश्च स्कन्दः श्रीमान् ब्रह्माण्डमप्यसमबाणः ।देवाग्रण्यो जितवान् बहुमायोमाधवः सुखं दिशतु ॥ ७॥

yasya sutaśca skandaḥ śrīmān brahmāṇḍamapyasamabāṇaḥ |devāgraṇyo jitavān bahumāyomādhavaḥ sukhaṃ diśatu || 7||

क्लृप्त्वा कामपि मायां सन्ध्याविर्भावसमयकौतुकवान् ।यो बहुधा नटति नटो बहुमायोमाधवः सुखं दिशतु ॥ ८॥

klṛptvā kāmapi māyāṃ sandhyāvirbhāvasamayakautukavān |yo bahudhā naṭati naṭo bahumāyomādhavaḥ sukhaṃ diśatu || 8||

यद्यप्यनन्तनामा शिवनामायं जनैः सदा जप्यः ।ननु धीवरो ध्रुवोऽभूद् बहुमायोमाधवः सुखं दिशतु ॥ ९॥

yadyapyanantanāmā śivanāmāyaṃ janaiḥ sadā japyaḥ |nanu dhīvaro dhruvo'bhūd bahumāyomādhavaḥ sukhaṃ diśatu || 9||

वृषभचरो दिग्वसनो जितेन्द्रियो गाङ्गजलधरो धन्वी ।लिङ्गाकृतिरनलाक्षो धरणिरथः शम्भुरस्ति गोविन्दः ॥ १०॥

vṛṣabhacaro digvasano jitendriyo gāṅgajaladharo dhanvī |liṅgākṛtiranalākṣo dharaṇirathaḥ śambhurasti govindaḥ || 10||

चन्द्रान्वयमूर्धन्यो गोपालो गरुडविहरणश्वेति ।हरिरस्ति विरूपाक्षः पशुपतिरपि चन्द्रशेखरो व्यक्तम् ॥ ११॥

candrānvayamūrdhanyo gopālo garuḍaviharaṇaśveti |harirasti virūpākṣaḥ paśupatirapi candraśekharo vyaktam || 11||

लक्ष्मीवेङ्कटनाम्नोस्तनयः सन् श्रीनिवासाख्यः ।विप्रो वाजसनेयी स्तुतिमेकोक्त्या चकार हरिहरयोः ॥ १२॥

lakṣmīveṅkaṭanāmnostanayaḥ san śrīnivāsākhyaḥ |vipro vājasaneyī stutimekoktyā cakāra hariharayoḥ || 12||

इति श्रीनिवासविरचिता हरिहरस्तुतिः सम्पूर्णा ।स्तोत्रसमुच्चयः २ (१००)

iti śrīnivāsaviracitā hariharastutiḥ sampūrṇā |stotrasamuccayaḥ 2 (100)