नागशान्तिस्तोत्रम् Nagashantistotram

श्री गणेशाय नमः ।श्री हाटकेश्वराय नमः ।आरक्तेन शरीरेण रक्तान्तायतलोचनः ।महाभोगकृताटोपः शङ्खाब्जकृतलाञ्छनः ॥ १॥

śrī gaṇeśāya namaḥ |śrī hāṭakeśvarāya namaḥ |āraktena śarīreṇa raktāntāyatalocanaḥ |mahābhogakṛtāṭopaḥ śaṅkhābjakṛtalāñchanaḥ || 1||

अनन्तो नागराजेन्द्रः शिवपादार्चने रतः ।महापापविषं हत्वा शान्तिमाशु करोतु मे ॥ २॥

ananto nāgarājendraḥ śivapādārcane rataḥ |mahāpāpaviṣaṃ hatvā śāntimāśu karotu me || 2||

सुश्वेतेन तु देहेन सुश्वेतोत्पलशेखरः ।चारुभोगकृताटोपो हारचारुविभूषणः ॥ ३॥

suśvetena tu dehena suśvetotpalaśekharaḥ |cārubhogakṛtāṭopo hāracāruvibhūṣaṇaḥ || 3||

वासुकिर्नाम नागेन्द्रो रुद्रपूजापरो महान् ।महापापं विषं हत्वा शान्तिमाशु (शान्तिं आशु) करोतु मे ॥ ४॥

vāsukirnāma nāgendro rudrapūjāparo mahān |mahāpāpaṃ viṣaṃ hatvā śāntimāśu (śāntiṃ āśu) karotu me || 4||

अतिपीतेन देहेन विस्फुरद्भोगसम्पदा ।तेजसाचाऽतिदीप्तेन कृतः स्वस्तिकलाञ्छनः ॥ ५॥

atipītena dehena visphuradbhogasampadā |tejasācā'tidīptena kṛtaḥ svastikalāñchanaḥ || 5||

नागराट् तक्षकः श्रीमान्नागकोट्यासमन्वितः ।करोतु मे महाशान्तिं सर्वदोषविषावहः ॥ ६॥

nāgarāṭ takṣakaḥ śrīmānnāgakoṭyāsamanvitaḥ |karotu me mahāśāntiṃ sarvadoṣaviṣāvahaḥ || 6||

अतिकृष्णेन वर्णेन स्फुटो विकटमस्तकः ।कण्ठे रेखात्रयोपेतो घोरदंष्ट्रायुधोद्यतः ॥ ७॥

atikṛṣṇena varṇena sphuṭo vikaṭamastakaḥ |kaṇṭhe rekhātrayopeto ghoradaṃṣṭrāyudhodyataḥ || 7||

कर्कोटको महानागो विषदर्पबलाऽन्वितः ।विषशस्त्राग्निसन्तापं हत्वा शान्तिं करोतु मे ॥ ८॥

karkoṭako mahānāgo viṣadarpabalā'nvitaḥ |viṣaśastrāgnisantāpaṃ hatvā śāntiṃ karotu me || 8||

पद्मवर्णेन देहेन चारुपद्मायतेक्षणः ।पञ्चबिन्दुकृताभासो ग्रीवायां शुभलक्षणः ॥ ९॥

padmavarṇena dehena cārupadmāyatekṣaṇaḥ |pañcabindukṛtābhāso grīvāyāṃ śubhalakṣaṇaḥ || 9||

ख्यातः पद्मो महानागो हरपादार्चने रतः ।करोतु मे महाशान्तिं महापापं विषक्षयम् ॥ १०॥

khyātaḥ padmo mahānāgo harapādārcane rataḥ |karotu me mahāśāntiṃ mahāpāpaṃ viṣakṣayam || 10||

पुण्डरीकनिभेनाऽपि देहेनाऽमिततेजसा ।शङ्खशूलाब्जरुचिरैर्भूषितो मूर्ध्नि सर्वदा ॥ ११॥

puṇḍarīkanibhenā'pi dehenā'mitatejasā |śaṅkhaśūlābjarucirairbhūṣito mūrdhni sarvadā || 11||

महापद्मो महानागो नित्यं पशुपतौ रतः ।विनिर्धूत(विनिहत्य) विषं घोरं शान्तिमाशु करोतु मे ॥ १२॥

mahāpadmo mahānāgo nityaṃ paśupatau rataḥ |vinirdhūta(vinihatya) viṣaṃ ghoraṃ śāntimāśu karotu me || 12||

श्यामेन देहभारेण श्रीमत्कमललोचनः ।विषदर्पबलोन्मत्तो ग्रीवायामेकरेखया ॥ १३॥

śyāmena dehabhāreṇa śrīmatkamalalocanaḥ |viṣadarpabalonmatto grīvāyāmekarekhayā || 13||

शङ्खपालः श्रिया दीप्तः शिवपादाब्जपूजकः ।महाविषं महापापं हत्वा शान्तिं करोतु मे ॥ १४॥

śaṅkhapālaḥ śriyā dīptaḥ śivapādābjapūjakaḥ |mahāviṣaṃ mahāpāpaṃ hatvā śāntiṃ karotu me || 14||

अतिगौरेण देहेन चन्द्रार्धकृतमस्तकः ।दीप्तभोगकृताटोपः शुभलक्षणलक्षितः ॥ १५॥

atigaureṇa dehena candrārdhakṛtamastakaḥ |dīptabhogakṛtāṭopaḥ śubhalakṣaṇalakṣitaḥ || 15||

कुलिको नागराजेशो नित्यं हरपरायणः ।अपहृत्य विषं घोरं करोतु मम शान्तिकम् ॥ १६॥

kuliko nāgarājeśo nityaṃ haraparāyaṇaḥ |apahṛtya viṣaṃ ghoraṃ karotu mama śāntikam || 16||

अन्तरिक्षे च ये नागा ये नागाः स्वर्गसंस्थिताः ।गिरिकन्दरदुर्गेषु ये नागा भूमिसंस्थिताः ॥ १७॥

antarikṣe ca ye nāgā ye nāgāḥ svargasaṃsthitāḥ |girikandaradurgeṣu ye nāgā bhūmisaṃsthitāḥ || 17||

पाताले ये स्थिता नागाः सर्वेप्यन्ये समाहिताः ।रुद्रपादार्चने शान्ताः कुर्वन्तु मम शान्तिकम् ॥ १८॥

pātāle ye sthitā nāgāḥ sarvepyanye samāhitāḥ |rudrapādārcane śāntāḥ kurvantu mama śāntikam || 18||

नागिन्यो नागपत्न्यश्च तथा कन्याः कुमारिकाः ।शिवभक्ताः सुमनसः शान्तिं कुर्वन्तु मे सदा ॥ १९॥

nāginyo nāgapatnyaśca tathā kanyāḥ kumārikāḥ |śivabhaktāḥ sumanasaḥ śāntiṃ kurvantu me sadā || 19||

यदिदं नागसंस्थानं कीर्तनाच्छ्रवणादपि ।न तं सर्पा विहिंसन्ति न विषं क्रमते सदा ॥ २०॥

yadidaṃ nāgasaṃsthānaṃ kīrtanācchravaṇādapi |na taṃ sarpā vihiṃsanti na viṣaṃ kramate sadā || 20||

चिन्तितं सिध्यते(लभ्यते) नित्यं तथा पापपरिक्षयः ।सिद्धिमाशु प्रयच्छन्ति सर्वविघ्न विवर्जिताः ॥ २१॥

cintitaṃ sidhyate(labhyate) nityaṃ tathā pāpaparikṣayaḥ |siddhimāśu prayacchanti sarvavighna vivarjitāḥ || 21||

इति नागशान्तिस्तोत्रं सम्पूर्णम् ।

iti nāgaśāntistotraṃ sampūrṇam |