श्रीसूक्तार्थसङ्ग्रहः Shri Suktartha Sangrahah

हिरण्यं विष्णुराख्यातस्तस्य वर्णस्तु वैष्णवी ।लक्ष्मीहिरण्यवर्णेति श्रूयते कनकप्रभा ॥ १॥

hiraṇyaṃ viṣṇurākhyātastasya varṇastu vaiṣṇavī |lakṣmīhiraṇyavarṇeti śrūyate kanakaprabhā || 1||

हरिणीं तु हरेः पत्नीं दारिद्र्यपरिहारिणीम् ।प्रपद्येऽहं हरिद्राभां हरिणाक्षीं हिरण्मयीम् ॥ २॥

hariṇīṃ tu hareḥ patnīṃ dāridryaparihāriṇīm |prapadye'haṃ haridrābhāṃ hariṇākṣīṃ hiraṇmayīm || 2||

हिरण्यरेतसः शम्भोः शक्तिः प्रोक्ता हिरण्मयी ।धनार्थिभिरूपास्यैषा जातवेदसि सर्वदा ॥ ३॥

hiraṇyaretasaḥ śambhoḥ śaktiḥ proktā hiraṇmayī |dhanārthibhirūpāsyaiṣā jātavedasi sarvadā || 3||

चतुरङ्गबलोपेतां धनधान्य सुखेश्वरीम् ।अश्वारूढामहं वन्दे राजलक्ष्मीं हिरण्मयीम् ॥ ४॥

caturaṅgabalopetāṃ dhanadhānya sukheśvarīm |aśvārūḍhāmahaṃ vande rājalakṣmīṃ hiraṇmayīm || 4||

देवैर्जुष्टामुदारां च पद्मिनीमीं भजाम्यहम् ।त्वां वृणे त्वत्प्रसादेन ममालक्ष्मीर्विनश्यतु ॥ ५॥

devairjuṣṭāmudārāṃ ca padminīmīṃ bhajāmyaham |tvāṃ vṛṇe tvatprasādena mamālakṣmīrvinaśyatu || 5||

उद्यदादित्यसङ्काशां बिल्वकाननमध्यगाम् ।तनुमध्यां श्रियं ध्यायेदलक्ष्मीपरिहारिणीम् ॥ ६॥

udyadādityasaṅkāśāṃ bilvakānanamadhyagām |tanumadhyāṃ śriyaṃ dhyāyedalakṣmīparihāriṇīm || 6||

कुबेरस्तपसा पूर्वं तोषयामास शङ्करम् ।शिवार्थं तु महालक्ष्मीः कुबेरस्य वशे स्थिता ॥ ७॥

kuberastapasā pūrvaṃ toṣayāmāsa śaṅkaram |śivārthaṃ tu mahālakṣmīḥ kuberasya vaśe sthitā || 7||

तस्माद्धि भक्तवात्सल्यं श्रीदेव्याः प्रकटीकृतम् ।अनुगृह्णाति यं यं श्रीस्तं कुबेरोऽनुधावति ॥ ८॥

tasmāddhi bhaktavātsalyaṃ śrīdevyāḥ prakaṭīkṛtam |anugṛhṇāti yaṃ yaṃ śrīstaṃ kubero'nudhāvati || 8||

खड्गं सवातचक्रञ्च कमलं वरमेव च ।करैश्चतुर्भिर्बिभ्राणां ध्यायेच्चन्द्राननां श्रियम् ॥ ९॥

khaḍgaṃ savātacakrañca kamalaṃ varameva ca |karaiścaturbhirbibhrāṇāṃ dhyāyeccandrānanāṃ śriyam || 9||

गोवृन्दानुगतां ध्यात्वा सुरभिं सस्यमालिनीम् ।पृथुलां प्राणिनामीशां दुर्धर्षां श्रियमर्चयेत् ॥ १०॥

govṛndānugatāṃ dhyātvā surabhiṃ sasyamālinīm |pṛthulāṃ prāṇināmīśāṃ durdharṣāṃ śriyamarcayet || 10||

तां ध्यायेत् सत्यसङ्कल्पां लक्ष्मीं क्षीरौदनप्रियाम् ।ख्यातां सर्वेषु भूतेषु तत्तज्ज्ञानबलक्रियाम् ॥ ११॥

tāṃ dhyāyet satyasaṅkalpāṃ lakṣmīṃ kṣīraudanapriyām |khyātāṃ sarveṣu bhūteṣu tattajjñānabalakriyām || 11||

सवत्सागौरिव प्रीतां कर्दमेन तथेन्दिराम् ।कल्याणी मद्गृहे नित्यं निवसेत् पद्ममालिनीम् ॥ १२॥

savatsāgauriva prītāṃ kardamena tathendirām |kalyāṇī madgṛhe nityaṃ nivaset padmamālinīm || 12||

चिक्लीत श्रीसुत स्वामिन्श्चिरं निवस मद्गृहे ।मत्कुले सुचिरं तिष्ठ मच्चित्ते सन्निधिं कुरु ॥ १३॥

ciklīta śrīsuta svāminściraṃ nivasa madgṛhe |matkule suciraṃ tiṣṭha maccitte sannidhiṃ kuru || 13||

त्वदागमनमात्रेण त्वन्माता त्वामनुव्रजेत् ।श्रीदेवीं तां मम गृहे चिरं वासय मातरम् ॥ १४॥

tvadāgamanamātreṇa tvanmātā tvāmanuvrajet |śrīdevīṃ tāṃ mama gṛhe ciraṃ vāsaya mātaram || 14||

तां स्मरेदभिषेकार्द्रां पुष्टिदां पुष्टिरूपीणीम् ।सूर्यामैश्वर्यरूपां च सावित्रीं सूर्यरूपीणीम् ॥ १५॥

tāṃ smaredabhiṣekārdrāṃ puṣṭidāṃ puṣṭirūpīṇīm |sūryāmaiśvaryarūpāṃ ca sāvitrīṃ sūryarūpīṇīm || 15||

आत्मसज्ञां च चिद्रूपां ज्ञानदृष्टिस्वरूपिणीम् ।स्वर्णात्मनाविर्भूतां च जातवेदो म आवह ॥ १६॥

ātmasajñāṃ ca cidrūpāṃ jñānadṛṣṭisvarūpiṇīm |svarṇātmanāvirbhūtāṃ ca jātavedo ma āvaha || 16||

हिरण्मयीं महालक्ष्मीं ऋग्भिः सम्पूजयेन्नरः ।पूर्णानन्दप्रतिष्ठां च प्राप्नोत्येव न संशयः ॥ १७॥

hiraṇmayīṃ mahālakṣmīṃ ṛgbhiḥ sampūjayennaraḥ |pūrṇānandapratiṣṭhāṃ ca prāpnotyeva na saṃśayaḥ || 17||

इति श्रीसूक्तार्थसङ्ग्रहः सम्पूर्णा ।

iti śrīsūktārthasaṅgrahaḥ sampūrṇā |