लक्ष्मीवरप्रदानवर्णनम् शैलक्षेत्रे Shri Shailakshetre Lakshmivarapradana Varnanam

(शिवगौरीसंवादे)ईश्वरःश्रीशैलेशोऽहमीशानि तत्तुङ्गशिखरे स्थितः ।ब्रह्मविष्ण्वादिभिर्देवैर्गणेन्द्रैरपि सेवितः ॥ ५०॥

(śivagaurīsaṃvāde)īśvaraḥśrīśaileśo'hamīśāni tattuṅgaśikhare sthitaḥ |brahmaviṣṇvādibhirdevairgaṇendrairapi sevitaḥ || 50||

तत्र मां नियमाद्दृष्ट्वा सर्वपापैः प्रमुच्यते ।पुरा श्रिया तपस्तप्तं तत् शृणुष्वाम्बिके मुदा ॥ ५१॥

tatra māṃ niyamāddṛṣṭvā sarvapāpaiḥ pramucyate |purā śriyā tapastaptaṃ tat śṛṇuṣvāmbike mudā || 51||

यदाऽनङ्गो मया दग्धः श्रियः पुत्रो महेश्वरि ।तेन दुःखेन सन्तप्ता भस्मरुद्राक्षभूषणा ॥ ५२॥

yadā'naṅgo mayā dagdhaḥ śriyaḥ putro maheśvari |tena duḥkhena santaptā bhasmarudrākṣabhūṣaṇā || 52||

पञ्चाग्निनिरता देवी पञ्चाक्षरपरायणा ।लक्ष्मीः सन्तपदत्युग्रं वर्षाणां शतकं शिवे ॥ ५३॥ (तताप तप अत्युग्रं)

pañcāgniniratā devī pañcākṣaraparāyaṇā |lakṣmīḥ santapadatyugraṃ varṣāṇāṃ śatakaṃ śive || 53|| (tatāpa tapa atyugraṃ)

दत्तं च दर्शनं देवि तस्याः कालान्तरे मया ।मां दृष्ट्वा नियता गौरि तुष्टाव नियता तदा ॥ ५४॥

dattaṃ ca darśanaṃ devi tasyāḥ kālāntare mayā |māṃ dṛṣṭvā niyatā gauri tuṣṭāva niyatā tadā || 54||

लक्ष्मीःशर्वरीरमणखण्डमौलिनं शर्वरीकृतविहारहारिणम् ।शर्वसर्वपतिमाश्रये सदा दूर्वया तु सततं समर्च्यसे ॥ ५५॥

lakṣmīḥśarvarīramaṇakhaṇḍamaulinaṃ śarvarīkṛtavihārahāriṇam |śarvasarvapatimāśraye sadā dūrvayā tu satataṃ samarcyase || 55||

कुम्भिकुम्भदलनोज्ज्वलत्पदं कुम्भिवक्त्रवृतमान्यपुत्रकम् ।कुम्भसम्भवमुनीन्द्रपूजितं कुम्भिभिन्नटनमीशमाश्रये ॥ ५६॥

kumbhikumbhadalanojjvalatpadaṃ kumbhivaktravṛtamānyaputrakam |kumbhasambhavamunīndrapūjitaṃ kumbhibhinnaṭanamīśamāśraye || 56||

(शिवगौरीसंवादे ईश्वरःइत्थं स्तुत्वा हि मां लक्ष्मीस्त्वामस्तौषीत् तदाम्बिके ।)अमरीकबरीभारचञ्चरीकैः मुखरितवेदशिरोभिरीड्यपादाम् ।सुखकरकिन्नरमौलिपुष्पजालैः भ्रमराम्बां प्रणतास्मि शङ्करीं ताम् ॥ ५७॥

(śivagaurīsaṃvāde īśvaraḥitthaṃ stutvā hi māṃ lakṣmīstvāmastauṣīt tadāmbike |)amarīkabarībhāracañcarīkaiḥ mukharitavedaśirobhirīḍyapādām |sukhakarakinnaramaulipuṣpajālaiḥ bhramarāmbāṃ praṇatāsmi śaṅkarīṃ tām || 57||

इत्थं स्तुत्वा तदा मां त्वां ययाचे वरमुत्तमम् ॥ ५८॥

itthaṃ stutvā tadā māṃ tvāṃ yayāce varamuttamam || 58||

अनङ्गः कोपतस्तेऽद्य त्वया दग्धो महेश्वर ।साङ्गतां प्राप्नुयाच्छम्भो एष देयो वरो मम ॥ ५९॥

anaṅgaḥ kopataste'dya tvayā dagdho maheśvara |sāṅgatāṃ prāpnuyācchambho eṣa deyo varo mama || 59||

ईश्वरःतदा लक्ष्म्या वचः श्रुत्वा तामवोचं तदाम्बिके ।त्वत्कटाक्षेण देवेशि पुनरुज्जीव्यतां स्मरः ।पुत्रीणीयं भवेल्लक्ष्मीः सदा मुदितमानसा ॥ ६०॥

īśvaraḥtadā lakṣmyā vacaḥ śrutvā tāmavocaṃ tadāmbike |tvatkaṭākṣeṇa deveśi punarujjīvyatāṃ smaraḥ |putrīṇīyaṃ bhavellakṣmīḥ sadā muditamānasā || 60||

इत्थं मद्वचनात्त्वं हि त्वत्कटाक्षोत्थकोणतः ।अनङ्ग साङ्गतां नीतो विबभौ स यथापुरम् ॥ ६१॥

itthaṃ madvacanāttvaṃ hi tvatkaṭākṣotthakoṇataḥ |anaṅga sāṅgatāṃ nīto vibabhau sa yathāpuram || 61||

ऐक्षवं कार्मुकं बिभ्रत् पुष्पबाणांस्तथांऽबिके ।रत्या सह तदा गौरि मां तुष्टाव प्रहृष्टधीः ॥ ६२॥

aikṣavaṃ kārmukaṃ bibhrat puṣpabāṇāṃstathāṃ'bike |ratyā saha tadā gauri māṃ tuṣṭāva prahṛṣṭadhīḥ || 62||

मन्मथःदुग्धाब्धिप्रभवप्रचण्डौरगक्ष्वेडव्यथासंहृतौत्वामेकं ददृशुर्निलिम्पमुखराः सोत्कम्पगात्राः शिवम् ।तत्पानारुणलोलनेत्रयुगलं वीक्ष्याकृतार्थस्मितंशम्भो शङ्कर शाश्वतेति बहुधा त्वां तुष्टुवुः सुस्तवैः ॥ ६३॥

manmathaḥdugdhābdhiprabhavapracaṇḍauragakṣveḍavyathāsaṃhṛtautvāmekaṃ dadṛśurnilimpamukharāḥ sotkampagātrāḥ śivam |tatpānāruṇalolanetrayugalaṃ vīkṣyākṛtārthasmitaṃśambho śaṅkara śāśvateti bahudhā tvāṃ tuṣṭuvuḥ sustavaiḥ || 63||

ईश्वरःइत्थं स्मरेण देवेशि श्रीशैलेशः स्तुतोऽस्म्यवहम् ।लक्ष्मीः पुत्रं तदा वीक्ष्य साङ्गमुद्यतकार्मुकम् ॥ ६४॥

īśvaraḥitthaṃ smareṇa deveśi śrīśaileśaḥ stuto'smyavaham |lakṣmīḥ putraṃ tadā vīkṣya sāṅgamudyatakārmukam || 64||

प्रहृष्टा साऽभवद्गौरि वृतश्चापि तया वरः ॥ ६५॥

prahṛṣṭā sā'bhavadgauri vṛtaścāpi tayā varaḥ || 65||

लक्ष्मीःमन्नामा पर्वतश्चायं भवत्वद्य महेश्वर ।तस्यै दत्तो वरो देवि तन्नामख्यापनाय मे ॥ ६६॥

lakṣmīḥmannāmā parvataścāyaṃ bhavatvadya maheśvara |tasyai datto varo devi tannāmakhyāpanāya me || 66||

॥ इति शिवरहस्यान्तर्गते श्रीशैलक्षेत्रे लक्ष्मीवरप्रदानवर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः २७॥– ॥ श्रीशिवरहस्यम् । भर्गाख्यः पन्चमांशः । अध्यायः २७॥

|| iti śivarahasyāntargate śrīśailakṣetre lakṣmīvarapradānavarṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 27||– || śrīśivarahasyam | bhargākhyaḥ pancamāṃśaḥ | adhyāyaḥ 27||