गोपालाष्टकम् Shrigopalashtakam

श्री गणेशाय नमः ॥यस्माद्विश्वं जातमिदं चित्रमतर्क्यं यस्मिन्नानन्दात्मनि नित्यं रमते वै ।यत्रान्ते संयाति लयं चैतदशेषं तं गोपालं सन्ततकालं प्रति वन्दे ॥ १॥

śrī gaṇeśāya namaḥ ||yasmādviśvaṃ jātamidaṃ citramatarkyaṃ yasminnānandātmani nityaṃ ramate vai |yatrānte saṃyāti layaṃ caitadaśeṣaṃ taṃ gopālaṃ santatakālaṃ prati vande || 1||

यस्याज्ञानाज्जन्मजरारोगकदम्बं ज्ञाते यस्मिन्नश्यति तत्सर्वमिहाशु ।गत्वा यत्रायाति पुनर्नो भवभूमिं तं गोपालं सन्ततकालं प्रति वन्दे ॥ २॥

yasyājñānājjanmajarārogakadambaṃ jñāte yasminnaśyati tatsarvamihāśu |gatvā yatrāyāti punarno bhavabhūmiṃ taṃ gopālaṃ santatakālaṃ prati vande || 2||

तिष्ठन्नन्तर्यो यमयत्येतदजस्रं यं कश्चिन्नो वेद जनोऽप्यात्मनि सन्तम् ।सर्वं यस्येदं च वशे तिष्ठति विश्वं तं गोपालं सन्ततकालं प्रति वन्दे ॥ ३॥

tiṣṭhannantaryo yamayatyetadajasraṃ yaṃ kaścinno veda jano'pyātmani santam |sarvaṃ yasyedaṃ ca vaśe tiṣṭhati viśvaṃ taṃ gopālaṃ santatakālaṃ prati vande || 3||

धर्मोऽधर्मेणेह तिरस्कारमुपैति काले यस्मिन्मत्स्यमुखैश्चारुचरित्रैः ।नानारूपैः पाति तदा योऽवनिबिम्बं तं गोपालं सन्ततकालं प्रति वन्दे ॥ ४॥

dharmo'dharmeṇeha tiraskāramupaiti kāle yasminmatsyamukhaiścārucaritraiḥ |nānārūpaiḥ pāti tadā yo'vanibimbaṃ taṃ gopālaṃ santatakālaṃ prati vande || 4||

प्राणायामैर्ध्वस्तसमस्तेन्द्रियदोषा रुध्वा चित्तं यं हृदि पश्यन्ति समाधौ ।ज्योतीरूपं योगिजनामोदनिमग्नास्तं गोपालं सन्ततकालं प्रति वन्दे ॥ ५॥

prāṇāyāmairdhvastasamastendriyadoṣā rudhvā cittaṃ yaṃ hṛdi paśyanti samādhau |jyotīrūpaṃ yogijanāmodanimagnāstaṃ gopālaṃ santatakālaṃ prati vande || 5||

भानुश्चन्द्रश्चोडुगणैश्चैव हुताशो यस्मिन्नैवाभाति तडिच्चापि कदापि ।यद्भासा चाभाति समस्तं जगदेतत् तं गोपालं सन्ततकालं प्रति वन्दे ॥ ६॥

bhānuścandraścoḍugaṇaiścaiva hutāśo yasminnaivābhāti taḍiccāpi kadāpi |yadbhāsā cābhāti samastaṃ jagadetat taṃ gopālaṃ santatakālaṃ prati vande || 6||

सत्यज्ञानं मोदमवोचुर्निगमा यं यो ब्रह्मेन्द्रादित्यगिरीशार्चितपादः ।शेतेऽनन्तोऽनन्ततनावम्बुनिधौ यस्तं गोपालं सन्ततकालं प्रति वन्दे ॥ ७॥

satyajñānaṃ modamavocurnigamā yaṃ yo brahmendrādityagirīśārcitapādaḥ |śete'nanto'nantatanāvambunidhau yastaṃ gopālaṃ santatakālaṃ prati vande || 7||

शैवाः प्राहुर्यं शिवमन्ये गणनाथं शक्तिं चैकेऽर्कं च तथान्ये मतिभेदात् ।नानाकारैर्भाति य एकोऽखिलशक्तिस्तं गोपालं सन्ततकालं प्रति वन्दे ॥ ८॥

śaivāḥ prāhuryaṃ śivamanye gaṇanāthaṃ śaktiṃ caike'rkaṃ ca tathānye matibhedāt |nānākārairbhāti ya eko'khilaśaktistaṃ gopālaṃ santatakālaṃ prati vande || 8||

श्रीमद्गोपालाष्टकमेतत् समधीते भक्त्या नित्यं यो मनुजो वै स्थिरचेताः ।हित्वा तूर्णं पापकलापं स समेति पुण्यं विष्णोर्धाम यतो नैव निपातः ॥ ९॥

śrīmadgopālāṣṭakametat samadhīte bhaktyā nityaṃ yo manujo vai sthiracetāḥ |hitvā tūrṇaṃ pāpakalāpaṃ sa sameti puṇyaṃ viṣṇordhāma yato naiva nipātaḥ || 9||

इति श्रीपरमहंसस्वामिब्रह्मानन्दविरचितं श्री गोपालाष्टकं सम्पूर्णम् ॥

iti śrīparamahaṃsasvāmibrahmānandaviracitaṃ śrī gopālāṣṭakaṃ sampūrṇam ||