रासक्रीडा १ Rasakrida 1

श्रीगर्ग उवाचहेमन्ते मासि पूर्वस्मिन् राकायां राधिकेश्वरः ।वंशीं वशकरीं दघ्मौ यथा वृन्दावने पुरा ॥ १॥

śrīgarga uvācahemante māsi pūrvasmin rākāyāṃ rādhikeśvaraḥ |vaṃśīṃ vaśakarīṃ daghmau yathā vṛndāvane purā || 1||

ध्वनिर्बभूव तस्याश्च सर्वेषामाहरन्मनः ।निशम्य गोप्यः सङ्खिन्नाः कामखेदेन तत्रसुः ॥ २॥

dhvanirbabhūva tasyāśca sarveṣāmāharanmanaḥ |niśamya gopyaḥ saṅkhinnāḥ kāmakhedena tatrasuḥ || 2||

रुन्धन्नम्बुभृतश्चमत्कृतिपरं कुर्वन्मुहुस्त्वम्बरंध्यानाद्धन्त नयन्सनन्दनमुखान्विस्मेरयन्वेधसम् ।औत्सुक्याद्बलिभिर्बलिं चटुलयन्भोगेन्द्रमाघूर्णयन्भिन्दन्नण्डकटाहभित्तिमभितो बभ्राम वंशीध्वनिः ॥ ३॥

rundhannambubhṛtaścamatkṛtiparaṃ kurvanmuhustvambaraṃdhyānāddhanta nayansanandanamukhānvismerayanvedhasam |autsukyādbalibhirbaliṃ caṭulayanbhogendramāghūrṇayanbhindannaṇḍakaṭāhabhittimabhito babhrāma vaṃśīdhvaniḥ || 3||

अथोदगाच्चन्द्रमास्तु चर्षणीनां शुचो मृजन् ।यथा प्रियाया राजेन्द्र विदेशादागतः प्रियः ॥ ४॥

athodagāccandramāstu carṣaṇīnāṃ śuco mṛjan |yathā priyāyā rājendra videśādāgataḥ priyaḥ || 4||

तदैव यमुना राजंस्तनुं दिव्यं दधार ह ।वृन्दावनं गिरीन्द्रञ्च व्रजभूमिञ्च मानद ॥ ५॥

tadaiva yamunā rājaṃstanuṃ divyaṃ dadhāra ha |vṛndāvanaṃ girīndrañca vrajabhūmiñca mānada || 5||

कृष्णा नदी जयति यत्र मणीन्द्रमुक्तामाणिक्यशुभ्रहरिता करतोलिकाभिः ।वैदूर्यनीलकहरिद्धरिवज्रपीतसोपानमण्डपयुताभिरतिस्फुरन्ती ॥ ६॥

kṛṣṇā nadī jayati yatra maṇīndramuktāmāṇikyaśubhraharitā karatolikābhiḥ |vaidūryanīlakahariddharivajrapītasopānamaṇḍapayutābhiratisphurantī || 6||

स्वच्छन्दसूत्पतितमत्स्यगणैर्वहन्तीसच्छ्यामलेन वपुषाघगणं हरन्ती ।उत्तुङ्गलोललहरी कमलैर्लसन्तीकृष्णा नदी जयति कृष्णगृहे लुठन्ती ॥ ७॥

svacchandasūtpatitamatsyagaṇairvahantīsacchyāmalena vapuṣāghagaṇaṃ harantī |uttuṅgalolalaharī kamalairlasantīkṛṣṇā nadī jayati kṛṣṇagṛhe luṭhantī || 7||

गोवर्धनं भज गिरीं शतचन्द्रयुक्तंमन्दारचन्दनलतावृतकल्पवृक्षम् ।श्रीरासमण्डलयुतं मणिमण्डपाढ्यंकोटीरमञ्जुलनिकुञ्जकुटीरकोटिम् ॥ ८॥

govardhanaṃ bhaja girīṃ śatacandrayuktaṃmandāracandanalatāvṛtakalpavṛkṣam |śrīrāsamaṇḍalayutaṃ maṇimaṇḍapāḍhyaṃkoṭīramañjulanikuñjakuṭīrakoṭim || 8||

वृन्दावनं च यमुनातटनीरतीरसम्पृक्तमन्दगमनैरतिगन्धवातैः ।तत्कम्पितं च सुरभीकृतसर्वदेशंश्रीखण्डकुङ्कुममृदागुरुचर्चितं तम् ॥ ९॥

vṛndāvanaṃ ca yamunātaṭanīratīrasampṛktamandagamanairatigandhavātaiḥ |tatkampitaṃ ca surabhīkṛtasarvadeśaṃśrīkhaṇḍakuṅkumamṛdāgurucarcitaṃ tam || 9||

जुष्टं वसन्तनवपल्लवपुष्परङ्गैर्मन्दारचन्दनसुचम्पकनीपनिम्बैः ।आम्रातकाम्रपनसागुरुनागरङ्गैःश्रीतालपिप्पलवटैर्नवनारिकेलैः ॥ १०॥

juṣṭaṃ vasantanavapallavapuṣparaṅgairmandāracandanasucampakanīpanimbaiḥ |āmrātakāmrapanasāgurunāgaraṅgaiḥśrītālapippalavaṭairnavanārikelaiḥ || 10||

खर्जूरश्रीफललवङ्गविराजमानमञ्जीरशालकतमालकदम्बयुक्तम् ।सन्तानकुन्दबदरीकदलीसिताढ्यंश्रीशाल्मलीबकुलकेतकिसच्छिरीषम् ॥ ११॥

kharjūraśrīphalalavaṅgavirājamānamañjīraśālakatamālakadambayuktam |santānakundabadarīkadalīsitāḍhyaṃśrīśālmalībakulaketakisacchirīṣam || 11||

सन्मोदिनीजलजवृन्दमनोहराभंवृन्दारकं वरवनं तुलसीलताढ्यम् ।श्रीमल्लिकामृतलतामधुमाधवीभिःसंराजितं स्मर नृपेन्द्र व्रजस्य मध्ये ॥ १२॥

sanmodinījalajavṛndamanoharābhaṃvṛndārakaṃ varavanaṃ tulasīlatāḍhyam |śrīmallikāmṛtalatāmadhumādhavībhiḥsaṃrājitaṃ smara nṛpendra vrajasya madhye || 12||

वंशीवटं च कलकण्ठविहंङ्गमैश्चकृष्णातटे च पुलिनं किल बालुकाढ्यम् ।श्रीपाटलैर्मधुककिंशुकसत्प्रियालैरौदुम्बरैः क्रमुकद्राक्षकपित्थयुक्तम् ॥ १३॥

vaṃśīvaṭaṃ ca kalakaṇṭhavihaṃṅgamaiścakṛṣṇātaṭe ca pulinaṃ kila bālukāḍhyam |śrīpāṭalairmadhukakiṃśukasatpriyālairaudumbaraiḥ kramukadrākṣakapitthayuktam || 13||

श्रीकोविदारपिचुमन्दलतार्जुनैश्चप्लक्षैरशोकसरलैः सुरदारुभिश्च ।जम्बूसुवेत्रनलकुब्जकस्वर्णयूथीपुन्नागनागकुटजैः कुरबैर्वृतं च ॥ १४॥

śrīkovidārapicumandalatārjunaiścaplakṣairaśokasaralaiḥ suradārubhiśca |jambūsuvetranalakubjakasvarṇayūthīpunnāganāgakuṭajaiḥ kurabairvṛtaṃ ca || 14||

चक्राह्वसारसशुकैः सितराजहंसैः ।कारण्डवैश्च जलकुक्कुटकूजितं च ॥ १५॥

cakrāhvasārasaśukaiḥ sitarājahaṃsaiḥ |kāraṇḍavaiśca jalakukkuṭakūjitaṃ ca || 15||

दात्यूहकोकिलकपोतकनीलकण्ठै ।र्नृत्यन्मयूरकलराववृतं स्मर त्वम् ॥ १६॥

dātyūhakokilakapotakanīlakaṇṭhai |rnṛtyanmayūrakalarāvavṛtaṃ smara tvam || 16||

श्यामाचकोरकलखञ्जनसारिकाभिःपारावतैर्भ्रमरतित्तिरतित्तिरीभिः ।श्रीकाञ्चनीमधुलतामधुयूथिकाभिःसंवेष्टितं हरिणमर्कटमर्कटीभिः ॥ १७॥

śyāmācakorakalakhañjanasārikābhiḥpārāvatairbhramaratittiratittirībhiḥ |śrīkāñcanīmadhulatāmadhuyūthikābhiḥsaṃveṣṭitaṃ hariṇamarkaṭamarkaṭībhiḥ || 17||

श्रीपद्मरागशिखरं च निकुञ्जगेहंश्रीकौस्तुभेन्द्रमणिराजिविराजमानम् ।कोटीन्दुमण्डलवितानगणैश्च हैमैःश्रीपट्टसूत्ररचितैर्मणितोरणाढ्यम् ॥ १८॥

śrīpadmarāgaśikharaṃ ca nikuñjagehaṃśrīkaustubhendramaṇirājivirājamānam |koṭīndumaṇḍalavitānagaṇaiśca haimaiḥśrīpaṭṭasūtraracitairmaṇitoraṇāḍhyam || 18||

मुक्तावृतैः कनकपीतपतत्पताकैःपारावतैः सितपतत्रिभिरावृतञ्च ।मन्दारकुन्दकरवीरकयूथिकानांमालाविचित्ररचितं नवचम्पकानाम् ॥ १९॥

muktāvṛtaiḥ kanakapītapatatpatākaiḥpārāvataiḥ sitapatatribhirāvṛtañca |mandārakundakaravīrakayūthikānāṃmālāvicitraracitaṃ navacampakānām || 19||

नागेशपद्महरिचन्दनपल्लवानांश्रीमालतीकुरबकाञ्चनयूथिकानाम् ।मालाभिरावृतमनङ्गहरं गृहं तत्सद्रत्नदर्पणवृतं सितचामरैश्च ॥ २०॥

nāgeśapadmaharicandanapallavānāṃśrīmālatīkurabakāñcanayūthikānām |mālābhirāvṛtamanaṅgaharaṃ gṛhaṃ tatsadratnadarpaṇavṛtaṃ sitacāmaraiśca || 20||

सिंहासनैश्च नवपल्लवपुष्पयुक्तैःशय्यासनैः कनकविद्रुमपादवृन्दैः ।श्रीचन्दनागुरुजलैर्मकरन्दसङ्घैःकस्तूरिकामुदितकुङ्कुमचर्चितं तत् ॥ २१॥

siṃhāsanaiśca navapallavapuṣpayuktaiḥśayyāsanaiḥ kanakavidrumapādavṛndaiḥ |śrīcandanāgurujalairmakarandasaṅghaiḥkastūrikāmuditakuṅkumacarcitaṃ tat || 21||

एजद्वसन्ततरुपल्लवमेव वातैःशीतैर्गजेन्द्रगमनैः सुरभीकृताङ्गम् ।एतादृशं हरिनिकुञ्जगृहं स्मर त्वंसन्नम्रशाखतरुयुक्तमतीव पुष्पैः ॥ २२॥

ejadvasantatarupallavameva vātaiḥśītairgajendragamanaiḥ surabhīkṛtāṅgam |etādṛśaṃ harinikuñjagṛhaṃ smara tvaṃsannamraśākhataruyuktamatīva puṣpaiḥ || 22||

श्रीवेणुगीतं बहुकामवर्द्धनं निशम्य सर्वा व्रजयोषितो नृप ।श्रीकृष्णकान्तेन गृहीतमानसा विसृज्य कर्माणि समाययुर्वने ॥ २३॥

śrīveṇugītaṃ bahukāmavarddhanaṃ niśamya sarvā vrajayoṣito nṛpa |śrīkṛṣṇakāntena gṛhītamānasā visṛjya karmāṇi samāyayurvane || 23||

रुद्धा याः पतिभी राजन्कृष्णेन हृतमानसाः ।स्थूलं शरीरं तास्त्यक्त्वा त्वरं कृष्णान्तिकं ययुः ॥ २४॥

ruddhā yāḥ patibhī rājankṛṣṇena hṛtamānasāḥ |sthūlaṃ śarīraṃ tāstyaktvā tvaraṃ kṛṣṇāntikaṃ yayuḥ || 24||

सिंहासने हेमदुकूलसंयुते मध्ये स्थितं सुन्दरनन्दनन्दनम् ।श्रीसुन्दरी राधिकया समं परं गले दधानं मधुमालतीस्रजम् ॥ २५॥

siṃhāsane hemadukūlasaṃyute madhye sthitaṃ sundaranandanandanam |śrīsundarī rādhikayā samaṃ paraṃ gale dadhānaṃ madhumālatīsrajam || 25||

श्यामं प्रभातार्ककिरीटिनं हरिं स्फुरत्प्रभं श्रीमुरलीमनोहरम् ।पीताम्बरं मन्मथराशिमोहनं व्रजस्त्रियस्तं ददृशुः समागताः ॥ २६॥

śyāmaṃ prabhātārkakirīṭinaṃ hariṃ sphuratprabhaṃ śrīmuralīmanoharam |pītāmbaraṃ manmatharāśimohanaṃ vrajastriyastaṃ dadṛśuḥ samāgatāḥ || 26||

दृष्ट्वा प्रियाः प्रियतमं मत्स्यकुण्डलिनं हरिम् ।गोप्यो मूर्च्छां गताः सद्यो भूप चालक्षितोद्यमाः ॥ २७॥

dṛṣṭvā priyāḥ priyatamaṃ matsyakuṇḍalinaṃ harim |gopyo mūrcchāṃ gatāḥ sadyo bhūpa cālakṣitodyamāḥ || 27||

सान्त्वयामास ताः कृष्णो मिष्टवाक्यैः सुधासमैः ।तदा गोप्यो वनोद्देशे सर्वाश्चैतन्यतां गताः ॥ २८॥

sāntvayāmāsa tāḥ kṛṣṇo miṣṭavākyaiḥ sudhāsamaiḥ |tadā gopyo vanoddeśe sarvāścaitanyatāṃ gatāḥ || 28||

कृष्णं गद्गदया वाचा स्तुत्वा भीताः स्त्रियो वराः ।त्यक्त्वा विरहजं दुःखं गोविन्दं ददृशुः प्रियम् ॥ २९॥

kṛṣṇaṃ gadgadayā vācā stutvā bhītāḥ striyo varāḥ |tyaktvā virahajaṃ duḥkhaṃ govindaṃ dadṛśuḥ priyam || 29||

वृन्दावने भ्राजमाने मालतीवनसङ्कुले ।दिव्यद्रुमलताजाले मधुपध्वनिनादिते ॥ ३०॥

vṛndāvane bhrājamāne mālatīvanasaṅkule |divyadrumalatājāle madhupadhvaninādite || 30||

विचचार हरिः साक्षाद्देवो मदनमोहनः ।पद्माभं पद्महस्तेन गृहीत्वा राधिकाकरम् ॥ ३१॥

vicacāra hariḥ sākṣāddevo madanamohanaḥ |padmābhaṃ padmahastena gṛhītvā rādhikākaram || 31||

प्रहसन्भगवान्साक्षादाययौ यमुनातटम् ।कृष्णातीरे निकुञ्जे वै श्रीकृष्णो निषसाद ह ॥ ३२॥

prahasanbhagavānsākṣādāyayau yamunātaṭam |kṛṣṇātīre nikuñje vai śrīkṛṣṇo niṣasāda ha || 32||

तस्मिन्गृहे मधुपतेः शृणु गोपिकानांश्रीकृष्णचन्द्रचरणस्मरणावृतानाम् ।झङ्कारनूपुरझणत्करकङ्कणानांमञ्जीररत्नविचलत्कटिकिङ्किणीनाम् ॥ ३३॥

tasmingṛhe madhupateḥ śṛṇu gopikānāṃśrīkṛṣṇacandracaraṇasmaraṇāvṛtānām |jhaṅkāranūpurajhaṇatkarakaṅkaṇānāṃmañjīraratnavicalatkaṭikiṅkiṇīnām || 33||

स्मेरद्युतिस्फुटचमत्कृतगण्डदेशैःश्रीदन्तपङ्क्तिविलसत्तडितालिलेशैः ।कोटीरहारहरिताङ्गदभूषितानांबालार्कमण्डलविकुण्डलमण्डितानाम् ॥ ३४॥

smeradyutisphuṭacamatkṛtagaṇḍadeśaiḥśrīdantapaṅktivilasattaḍitālileśaiḥ |koṭīrahāraharitāṅgadabhūṣitānāṃbālārkamaṇḍalavikuṇḍalamaṇḍitānām || 34||

तासां तु कापि युवती कथिता च मुग्धामध्यापि कापि तरुणी रुचिरा प्रगल्भा ।काचित्तरुं विनयती मधुरं हसन्तीकाचित्सखी मदयुता सुवने व्रजन्ती ॥ ३५॥

tāsāṃ tu kāpi yuvatī kathitā ca mugdhāmadhyāpi kāpi taruṇī rucirā pragalbhā |kācittaruṃ vinayatī madhuraṃ hasantīkācitsakhī madayutā suvane vrajantī || 35||

सन्ताड्य तामपि करेण तु काप्यधावत्सङ्गृह्य कापि भुवने कमलैर्जघान ।काचिच्छ्लथत्कनकहारमुपाजहारकाचित्प्रमुक्तकबरी तु विहारमत्ता ॥ ३६॥

santāḍya tāmapi kareṇa tu kāpyadhāvatsaṅgṛhya kāpi bhuvane kamalairjaghāna |kācicchlathatkanakahāramupājahārakācitpramuktakabarī tu vihāramattā || 36||

श्रीजाह्नवी च यमुना मधु माधवी चशीला रमा शशिमुखी विरजा सुशीला ।चन्द्रानना च ललिता त्वचला विशाखामायाल्प एव कथिता भवने त्वसङ्ख्याः ॥ ३७॥

śrījāhnavī ca yamunā madhu mādhavī caśīlā ramā śaśimukhī virajā suśīlā |candrānanā ca lalitā tvacalā viśākhāmāyālpa eva kathitā bhavane tvasaṅkhyāḥ || 37||

लीलातपत्रमतिमौक्तिकदामजालंनीत्वा चलन्ति मणिभूमिषु तत्र काश्चित् ।श्रीचामरव्यजनदण्डधरा वयस्याःकाश्चिद्व्रजन्ति धृतपीतपतत्पताकाः ॥ ३८॥

līlātapatramatimauktikadāmajālaṃnītvā calanti maṇibhūmiṣu tatra kāścit |śrīcāmaravyajanadaṇḍadharā vayasyāḥkāścidvrajanti dhṛtapītapatatpatākāḥ || 38||

नृत्यन्ति तत्र हरिवेषधरास्तु काश्चिद्वीणाकरा मधुरतालमृदङ्गहस्ताः ।वंशीधराश्च वृषभानुसुताः सुवेषाःकेयुरकुण्डलयुता मणिवेत्रहस्ताः ॥ ३९॥

nṛtyanti tatra hariveṣadharāstu kāścidvīṇākarā madhuratālamṛdaṅgahastāḥ |vaṃśīdharāśca vṛṣabhānusutāḥ suveṣāḥkeyurakuṇḍalayutā maṇivetrahastāḥ || 39||

सद्धावभावरसतालयुतस्मिताक्तैर्झङ्कारनूपुरयुतैर्विशदैः कटाक्षैः ।सङ्गीतनृत्यविदितैर्भ्रुकुटीविभङ्गैराधां हरिं च सततं परितोषयन्त्यः ॥ ४०॥

saddhāvabhāvarasatālayutasmitāktairjhaṅkāranūpurayutairviśadaiḥ kaṭākṣaiḥ |saṅgītanṛtyaviditairbhrukuṭīvibhaṅgairādhāṃ hariṃ ca satataṃ paritoṣayantyaḥ || 40||

तस्मिन्निकुञ्जभवने यमुनातटेऽपिवंशीवटे वनधरानिकटे हरिं तम् ।श्रीराधया च गिरिराजतटं व्रजन्तंनन्दात्मजं च नटवेषधरं स्मर त्वम् ॥ ४१॥

tasminnikuñjabhavane yamunātaṭe'pivaṃśīvaṭe vanadharānikaṭe hariṃ tam |śrīrādhayā ca girirājataṭaṃ vrajantaṃnandātmajaṃ ca naṭaveṣadharaṃ smara tvam || 41||

श्रीपद्मरागनखदीप्तिपदारविन्दंझङ्कारनूपुरधरं स्फुरदङ्गदेशम् ।कुर्वन्तमेव तु पदारुणभूमिदेशंश्रीमत्परागसुरुचालमितस्ततस्तु ॥ ४२॥

śrīpadmarāganakhadīptipadāravindaṃjhaṅkāranūpuradharaṃ sphuradaṅgadeśam |kurvantameva tu padāruṇabhūmideśaṃśrīmatparāgasurucālamitastatastu || 42||

लक्ष्मीकराब्जपरिलालितजानुदेशंरम्भोरु पीतवसनं तु कृशोदराभम् ।रोमावलिभ्रमरनाभिसरस्त्रिरेखंकाञ्चीधरं भृगुपदं मणीकौस्तुभाढ्यम् ॥ ४३॥

lakṣmīkarābjaparilālitajānudeśaṃrambhoru pītavasanaṃ tu kṛśodarābham |romāvalibhramaranābhisarastrirekhaṃkāñcīdharaṃ bhṛgupadaṃ maṇīkaustubhāḍhyam || 43||

श्रीवत्सहाररुचिरं नवमेघनीलंपीताम्बरं करिकरस्फुटबाहुदण्डम् ।रत्नाङ्गदं च मणिकङ्कणपद्महस्तंश्रीराजहंसवरकन्धरशोभमानम् ॥ ४४॥

śrīvatsahāraruciraṃ navameghanīlaṃpītāmbaraṃ karikarasphuṭabāhudaṇḍam |ratnāṅgadaṃ ca maṇikaṅkaṇapadmahastaṃśrīrājahaṃsavarakandharaśobhamānam || 44||

श्रीकम्बुकण्ठललितं विलसत्कपोलंमध्यं तु निम्नचिबुकं किल कुन्ददन्तम् ।बिम्बाधरं स्मितलसच्छुकचञ्चुनासंपीयूषकल्पवचनं प्रचलत्कटाक्षम् ॥ ४५॥

śrīkambukaṇṭhalalitaṃ vilasatkapolaṃmadhyaṃ tu nimnacibukaṃ kila kundadantam |bimbādharaṃ smitalasacchukacañcunāsaṃpīyūṣakalpavacanaṃ pracalatkaṭākṣam || 45||

श्रीपुण्डरीकदलनेत्रमनङ्गलीलंभ्रूमण्डलस्मितगुणावृतकामचापम् ।विद्युच्छटोच्छलितरत्नकिरीटकोटिंमार्तण्डमण्डलविकुण्डलमण्डिताभम् ॥ ४६॥

śrīpuṇḍarīkadalanetramanaṅgalīlaṃbhrūmaṇḍalasmitaguṇāvṛtakāmacāpam |vidyucchaṭocchalitaratnakirīṭakoṭiṃmārtaṇḍamaṇḍalavikuṇḍalamaṇḍitābham || 46||

वंशीधरं त्वहिविलोलगुडालकाढ्यंराधापतिं सजलपद्ममुखं चलन्तम् ।कन्दर्पकोटिघनमानहरं कृशाङ्गंवंशीवटे नटवरं भज सर्वथा त्वम् ॥ ४७॥

vaṃśīdharaṃ tvahivilolaguḍālakāḍhyaṃrādhāpatiṃ sajalapadmamukhaṃ calantam |kandarpakoṭighanamānaharaṃ kṛśāṅgaṃvaṃśīvaṭe naṭavaraṃ bhaja sarvathā tvam || 47||

आरक्तरक्तनखचन्द्रपदाब्जशोभांमञ्जीरनूपुररणत्कटिकिङ्किणीकाम् ।श्रीघण्टिकाकनककङ्कणशब्दमुक्तांराधां दधामि तरुपुञ्जनिकुञ्जमध्ये ॥ ४८॥

āraktaraktanakhacandrapadābjaśobhāṃmañjīranūpuraraṇatkaṭikiṅkiṇīkām |śrīghaṇṭikākanakakaṅkaṇaśabdamuktāṃrādhāṃ dadhāmi tarupuñjanikuñjamadhye || 48||

नीलाम्बरैः कनकरश्मितटस्फुरद्भिःश्रीभानुजातटमरुद्गतिचञ्चलाङ्गैः ।सूक्ष्मस्वरूपललितैरतिगौरवर्णांरासेश्वरीं भज मनोहरमन्दहासाम् ॥ ४९॥

nīlāmbaraiḥ kanakaraśmitaṭasphuradbhiḥśrībhānujātaṭamarudgaticañcalāṅgaiḥ |sūkṣmasvarūpalalitairatigauravarṇāṃrāseśvarīṃ bhaja manoharamandahāsām || 49||

बालार्कमण्डलमहाङ्गदरत्नहारांताटङ्कतोरणमणीन्द्रमनोहराभाम् ।श्रीकण्ठभालसुमनोनवपञ्चदाम्नींरत्नाङ्गुलीयललितां व्रजराजपत्नीम् ॥ ५०॥

bālārkamaṇḍalamahāṅgadaratnahārāṃtāṭaṅkatoraṇamaṇīndramanoharābhām |śrīkaṇṭhabhālasumanonavapañcadāmnīṃratnāṅgulīyalalitāṃ vrajarājapatnīm || 50||

चूडामणिद्युतिलसत्स्फुरदर्द्धचन्द्रांग्रैवेयकालपनपत्रविचित्ररूपाम् ।श्रीपट्टसूत्रमणीपट्टचलद्।ह्विदाम्नींस्फूर्ज्जत्सहस्रदलपद्मधरां भजस्व ॥ ५१॥

cūḍāmaṇidyutilasatsphuradarddhacandrāṃgraiveyakālapanapatravicitrarūpām |śrīpaṭṭasūtramaṇīpaṭṭacalad|hvidāmnīṃsphūrjjatsahasradalapadmadharāṃ bhajasva || 51||

श्रीबाहुकङ्कणलसत्कुचरत्नदीप्तिंश्रीनासिकाभरणभूषितगण्डदेशाम् ।सद्यौवनालसगतिं कलसर्पवेणींमध्येन्दुकोटिवदनां स्फुटचम्पकाभाम् ॥ ५२॥

śrībāhukaṅkaṇalasatkucaratnadīptiṃśrīnāsikābharaṇabhūṣitagaṇḍadeśām |sadyauvanālasagatiṃ kalasarpaveṇīṃmadhyendukoṭivadanāṃ sphuṭacampakābhām || 52||

सद्धावभावसहितां नवपद्मनेत्रांस्फूर्ज्जत्स्मितद्युतिकलां प्रचलत्कटाक्षाम् ।कृष्णप्रियां ललितकुन्तलपुञ्जलाभांमन्दारहारमधुरभ्रमरीरवाढ्याम् ॥ ५३॥

saddhāvabhāvasahitāṃ navapadmanetrāṃsphūrjjatsmitadyutikalāṃ pracalatkaṭākṣām |kṛṣṇapriyāṃ lalitakuntalapuñjalābhāṃmandārahāramadhurabhramarīravāḍhyām || 53||

श्रीखण्डकुङ्कुममृदागुरुवारिसिक्तांश्रीबिन्दुकीरुचिरपत्रविचित्रचित्राम् ।सन्तानपत्ररुचिरामलमञ्जनाभांरासेश्वरीं गजगतिं भज पद्मिनीं ताम् ॥ ५४॥

śrīkhaṇḍakuṅkumamṛdāguruvārisiktāṃśrībindukīrucirapatravicitracitrām |santānapatrarucirāmalamañjanābhāṃrāseśvarīṃ gajagatiṃ bhaja padminīṃ tām || 54||

एतादृशीं रतिवरां तु समेत्य कृष्णोगच्छन्निकुञ्जवनजालविलोकानाय ।धावन्ति तत्र मणिछत्रधराश्च गोप्योनीत्वा तथा चमरचारुपतत्पताकाः ॥ ५५॥

etādṛśīṃ rativarāṃ tu sametya kṛṣṇogacchannikuñjavanajālavilokānāya |dhāvanti tatra maṇichatradharāśca gopyonītvā tathā camaracārupatatpatākāḥ || 55||

षड्रागमेव वरधैवतमध्यमाद्यैर्गायन्तमादिपुरुषं भज नन्दपुत्रम् ।षट्त्रिंशतस्तदनुवर्त्तितरागिणीनांवंशीवरेण ललितेन वरं व्रजन्तम् ॥ ५६॥

ṣaḍrāgameva varadhaivatamadhyamādyairgāyantamādipuruṣaṃ bhaja nandaputram |ṣaṭtriṃśatastadanuvarttitarāgiṇīnāṃvaṃśīvareṇa lalitena varaṃ vrajantam || 56||

शृङ्गारवीरकरुणाद्भुतहास्यरौद्रबीभत्सशान्तकभयानकनित्ययुक्तम् ।भक्तप्रियं व्रजवधूमुखपद्मभृङ्गंयोगीन्द्रहृत्कमलविस्फुरदङ्घ्रियुग्मम् ॥ ५७॥

śṛṅgāravīrakaruṇādbhutahāsyaraudrabībhatsaśāntakabhayānakanityayuktam |bhaktapriyaṃ vrajavadhūmukhapadmabhṛṅgaṃyogīndrahṛtkamalavisphuradaṅghriyugmam || 57||

क्षेत्रज्ञमादिपुरुषं स्वधियज्ञरूपंसर्वेश्वरं सकलकारणकारणेशम् ।कृष्णं हरिं प्रकृतिपूरषयोः पुमांसंसर्वं निरस्तकपटं निजतेजसेह ॥ ५८॥

kṣetrajñamādipuruṣaṃ svadhiyajñarūpaṃsarveśvaraṃ sakalakāraṇakāraṇeśam |kṛṣṇaṃ hariṃ prakṛtipūraṣayoḥ pumāṃsaṃsarvaṃ nirastakapaṭaṃ nijatejaseha || 58||

यं वै स्तुवन्ति शिवधर्मसुरेशशेषलोकेशसिद्धिदगणेशसुरादयोऽपि ।राधारमाप्रकृतिभूविरजास्वराद्यावेदा भजन्ति सततं तमहं भजामि ॥ ५९॥

yaṃ vai stuvanti śivadharmasureśaśeṣalokeśasiddhidagaṇeśasurādayo'pi |rādhāramāprakṛtibhūvirajāsvarādyāvedā bhajanti satataṃ tamahaṃ bhajāmi || 59||

इति गर्गसंहितायां अश्वमेधखण्डे द्विचत्वारिशोऽध्यायः रासक्रीडा समाप्ता ।ग़र्ग षम्हित, आश्वमेधखन्द, आधय ४२

iti gargasaṃhitāyāṃ aśvamedhakhaṇḍe dvicatvāriśo'dhyāyaḥ rāsakrīḍā samāptā |ग़rga ṣamhita, āśvamedhakhanda, ādhaya 42