कृष्णनारायणस्तोत्रम् (राजाउदयकृतं लक्ष्मीनारायणीयसंहितान्तर्गतम्) Raja Udayakritam Krishnanarayana Stotram

अथ सर्वं क्षणाल्लीनं नृपस्त्वाश्चर्यमाप्तवान् ।ततः क्षणान्तरे नैजोटजां ददर्श शोभनाम् ॥ ५२॥

atha sarvaṃ kṣaṇāllīnaṃ nṛpastvāścaryamāptavān |tataḥ kṣaṇāntare naijoṭajāṃ dadarśa śobhanām || 52||

स्वस्थो भूत्वा दिशो नत्वा तुष्टाव ध्यानसंस्थितः ।ॐ नमः श्रीनिवासाय मूलप्रकृतियामिने ॥ ५३॥

svastho bhūtvā diśo natvā tuṣṭāva dhyānasaṃsthitaḥ |oṃ namaḥ śrīnivāsāya mūlaprakṛtiyāmine || 53||

अजिताय च देवाय महात्मने नमोऽस्तु ते ।अनाश्रिताय शान्ताय निःस्पृहाय नमोऽस्तु ते ॥ ५४॥

ajitāya ca devāya mahātmane namo'stu te |anāśritāya śāntāya niḥspṛhāya namo'stu te || 54||

नम आद्याय देवाय सर्वदेवमयाय च ।आर्षायादिस्वरूपाय श्रीकृष्णाय च ते नमः ॥ ५५॥

nama ādyāya devāya sarvadevamayāya ca |ārṣāyādisvarūpāya śrīkṛṣṇāya ca te namaḥ || 55||

अनन्तराय चैकाय सदा व्यक्ताय ते नमः ।नमो गुप्ताय काशाय गुणेश्वराय ते नमः ॥ ५६॥

anantarāya caikāya sadā vyaktāya te namaḥ |namo guptāya kāśāya guṇeśvarāya te namaḥ || 56||

अतर्क्यायाऽप्रमेयाय चातुलाय च ते नमः ।निश्चिन्ताय च पूर्वाय सनातनाय ते नमः ॥ ५७॥

atarkyāyā'prameyāya cātulāya ca te namaḥ |niścintāya ca pūrvāya sanātanāya te namaḥ || 57||

पुराणाय नमस्तस्मै निर्गुणाय नमोऽस्तु ते ।नमो जगत्प्रतिष्ठाय ब्रह्मनिष्ठाय ते नमः ॥ ५८॥

purāṇāya namastasmai nirguṇāya namo'stu te |namo jagatpratiṣṭhāya brahmaniṣṭhāya te namaḥ || 58||

पद्मनाभाय योगाय गोविन्दाय नमो नमः ।नमोऽस्तु साङ्ख्यवेद्याय विश्वेश्वराय ते नमः ॥ ५९॥

padmanābhāya yogāya govindāya namo namaḥ |namo'stu sāṅkhyavedyāya viśveśvarāya te namaḥ || 59||

हरये शिवरक्षाय नारायणाय ते नमः ।परात्मनेऽमितदात्रेऽमितक्रमाय ते नमः ॥ ६०॥

haraye śivarakṣāya nārāyaṇāya te namaḥ |parātmane'mitadātre'mitakramāya te namaḥ || 60||

शार्ङ्गचक्रगदापद्मशालिने ते नमो नमः ।महोरगाय सिंहाय नमोऽस्तु वेदवासिने ॥ ६१॥

śārṅgacakragadāpadmaśāline te namo namaḥ |mahoragāya siṃhāya namo'stu vedavāsine || 61||

महामत्स्याय कान्ताय कच्छपाय च ते नमः ।वामनाय च दीर्घाय चतुर्भुजाय ते नमः ॥ ६२॥

mahāmatsyāya kāntāya kacchapāya ca te namaḥ |vāmanāya ca dīrghāya caturbhujāya te namaḥ || 62||

सिद्धचारणगन्धर्वसंस्तुताय नमो नमः ।अच्युताय सकलाय नागेन्द्रशयनाय च ॥ ६३॥

siddhacāraṇagandharvasaṃstutāya namo namaḥ |acyutāya sakalāya nāgendraśayanāya ca || 63||

दुग्धवर्णाय कृष्णाय हेमाभाय नमो नमः ।पीताम्बराय दैत्यादिनाशनाय च ते नमः ॥ ६४॥

dugdhavarṇāya kṛṣṇāya hemābhāya namo namaḥ |pītāmbarāya daityādināśanāya ca te namaḥ || 64||

अक्षरायाऽक्षरेशाय नाभिपद्माय ते नमः ।चतुर्मुखाय देवाय पञ्चवक्त्राय ते नमः ॥ ६५॥

akṣarāyā'kṣareśāya nābhipadmāya te namaḥ |caturmukhāya devāya pañcavaktrāya te namaḥ || 65||

क्षीरवासाय यशसे कान्तये वरदाय च ।सर्वेश्वराय कान्ताय कामिनीशाय ते नमः ॥ ६६॥

kṣīravāsāya yaśase kāntaye varadāya ca |sarveśvarāya kāntāya kāminīśāya te namaḥ || 66||

वरेण्याय विघ्नहर्त्रे भक्तिप्रियाय ते नमः ।पद्मायतसुनेत्राय शुकनासाय शार्ङ्गिणे ॥ ६७॥

vareṇyāya vighnahartre bhaktipriyāya te namaḥ |padmāyatasunetrāya śukanāsāya śārṅgiṇe || 67||

योगेश्वराय वृक्षाय शाखिने ते नमो नमः ।देवायनाय मुनये साधवे ते नमो नमः ॥ ६८॥

yogeśvarāya vṛkṣāya śākhine te namo namaḥ |devāyanāya munaye sādhave te namo namaḥ || 68||

मोहिनीरूपभासाय जीववासाय ते नमः ।वाराहाय नृसिंहाय शरभाय च ते नमः ॥ ६९॥

mohinīrūpabhāsāya jīvavāsāya te namaḥ |vārāhāya nṛsiṃhāya śarabhāya ca te namaḥ || 69||

कूटस्थं सर्वहेतुं च पुरुषं च पुरातनम् ।मायाकान्तं चेशकान्तं सर्वकान्तं नमाम्यहम् ॥ ७०॥

kūṭasthaṃ sarvahetuṃ ca puruṣaṃ ca purātanam |māyākāntaṃ ceśakāntaṃ sarvakāntaṃ namāmyaham || 70||

क्षेत्रज्ञं कालमायेशं व्यूहेशं मुक्तजीवकम् ।वासुदेवं सतीकान्तं कृष्णनारायणं प्रभुम् ॥ ७१॥

kṣetrajñaṃ kālamāyeśaṃ vyūheśaṃ muktajīvakam |vāsudevaṃ satīkāntaṃ kṛṣṇanārāyaṇaṃ prabhum || 71||

कम्भरानन्दनं कृष्णं गोपालकृष्णबालकम् ।परधामनिवासं तं पुमुत्तमं नमाम्यहम् ॥ ७२॥

kambharānandanaṃ kṛṣṇaṃ gopālakṛṣṇabālakam |paradhāmanivāsaṃ taṃ pumuttamaṃ namāmyaham || 72||

ब्रह्मर्षयो ब्रह्मरूपं यं वदन्ति सनातनम् ।अक्षरेशं च मुक्तेशं प्रपद्ये शरणं हरिम् ॥ ७३॥

brahmarṣayo brahmarūpaṃ yaṃ vadanti sanātanam |akṣareśaṃ ca mukteśaṃ prapadye śaraṇaṃ harim || 73||

श्रीवत्साङ्कं श्वेतपद्मरेखं विगुणहारकम् ।षोडशादिचिह्नशोभं प्रपद्ये शरणं पतिम् ॥ ७४॥

śrīvatsāṅkaṃ śvetapadmarekhaṃ viguṇahārakam |ṣoḍaśādicihnaśobhaṃ prapadye śaraṇaṃ patim || 74||

यत्र विश्वं यश्च विश्वे सर्वं यत्र प्रतिष्ठते ।प्रभवं सर्वभूतानां दिव्यगुणं परेश्वरम् ॥ ७५॥

yatra viśvaṃ yaśca viśve sarvaṃ yatra pratiṣṭhate |prabhavaṃ sarvabhūtānāṃ divyaguṇaṃ pareśvaram || 75||

प्रपद्ये मुक्तसङ्गानां साधूनां परमां गतिम् ।भगवन्तं चात्मवासं स्त्रीवासं पुष्करेक्षणम् ॥ ७६॥

prapadye muktasaṅgānāṃ sādhūnāṃ paramāṃ gatim |bhagavantaṃ cātmavāsaṃ strīvāsaṃ puṣkarekṣaṇam || 76||

शरण्यं शरणं भक्त्या प्रपद्ये भक्तवत्सलम् ।अन्तकाले समागत्य प्रदर्श्यात्मानमेव यः ॥ ७७॥

śaraṇyaṃ śaraṇaṃ bhaktyā prapadye bhaktavatsalam |antakāle samāgatya pradarśyātmānameva yaḥ || 77||

नैजं धाम निजं भक्तं नयत्येव प्रभुः परः ।तं नमामि परं देवं मोक्षदं पुरुषोत्तमम् ॥ ७८॥

naijaṃ dhāma nijaṃ bhaktaṃ nayatyeva prabhuḥ paraḥ |taṃ namāmi paraṃ devaṃ mokṣadaṃ puruṣottamam || 78||

पातालान्तं च सत्यादि सर्वं माति तु यत्र वै ।महामायान्तकं सर्वं यस्मिन् माति जनार्दने ॥ ७९॥

pātālāntaṃ ca satyādi sarvaṃ māti tu yatra vai |mahāmāyāntakaṃ sarvaṃ yasmin māti janārdane || 79||

धामानि मुक्तकोट्यश्च यस्मिन् मान्ति परेश्वरे ।तं प्रपद्ये परं कृष्णं नारायणं श्रियः पतिम् ॥ ८०॥

dhāmāni muktakoṭyaśca yasmin mānti pareśvare |taṃ prapadye paraṃ kṛṣṇaṃ nārāyaṇaṃ śriyaḥ patim || 80||

न त्वां स्तोतुं तथा वेद्मि यथा त्वं वर्तसे प्रभो! ।स्वरूपं न यथार्थं च वेद्मि वेद्मि तटस्थकम् ॥ ८१॥

na tvāṃ stotuṃ tathā vedmi yathā tvaṃ vartase prabho! |svarūpaṃ na yathārthaṃ ca vedmi vedmi taṭasthakam || 81||

त्वया यत् कृष्ण कृपया कृष्णनारायणात्मकम् ।रूपं प्रदर्शितं मह्यं तपः फलं कृपाफलम् ॥ ८२॥

tvayā yat kṛṣṇa kṛpayā kṛṣṇanārāyaṇātmakam |rūpaṃ pradarśitaṃ mahyaṃ tapaḥ phalaṃ kṛpāphalam || 82||

धाम प्रदर्शितं चापि तथा कुङ्कुमवापिका ।अश्वपट्टसरश्चापि दर्शितं लोमशाश्रमम् ॥ ८३॥

dhāma pradarśitaṃ cāpi tathā kuṅkumavāpikā |aśvapaṭṭasaraścāpi darśitaṃ lomaśāśramam || 83||

सर्वं पुनः पुनर्नाथ द्रष्टुमिच्छामि सेवया ।प्रसन्नतां समिच्छामि तथा मे वरदो भव ॥ ८४॥

sarvaṃ punaḥ punarnātha draṣṭumicchāmi sevayā |prasannatāṃ samicchāmi tathā me varado bhava || 84||

इत्येवं संस्तुतोऽनादिश्रीमत्कृष्णनरायणः ।सान्निध्यं चाजगाम द्राक् चक्रपद्मधरः प्रभुः ॥ ८५॥

ityevaṃ saṃstuto'nādiśrīmatkṛṣṇanarāyaṇaḥ |sānnidhyaṃ cājagāma drāk cakrapadmadharaḥ prabhuḥ || 85||

इति श्रीलक्ष्मीनारायणीयसंहिता । खण्ड २। अध्याय ६०अध्यायान्तर्गतंराजा उदयकृतं कृष्णनारायणस्तोत्रं सम्पूर्णम् ।लक्ष्मीनारायणीयसंहिता । खण्ड २। अध्याय ६०/५२८५॥लक्ष्मीनारायणीयसंहिता । खण्ड २। अध्याय ६०/५२-८५॥

iti śrīlakṣmīnārāyaṇīyasaṃhitā | khaṇḍa 2| adhyāya 60adhyāyāntargataṃrājā udayakṛtaṃ kṛṣṇanārāyaṇastotraṃ sampūrṇam |lakṣmīnārāyaṇīyasaṃhitā | khaṇḍa 2| adhyāya 60/5285||lakṣmīnārāyaṇīyasaṃhitā | khaṇḍa 2| adhyāya 60/52-85||