पुष्टिप्रवाहमर्यादाभेदः Pushtipravahamaryadabhedah

पुष्टिप्रवाहमर्यादा विशेषेण पृथक्पृथक् ।जीवदेहक्रियाभेदैः प्रवाहेण फलेन च ॥ १॥

puṣṭipravāhamaryādā viśeṣeṇa pṛthakpṛthak |jīvadehakriyābhedaiḥ pravāheṇa phalena ca || 1||

वक्ष्यामि सर्वसन्देहा न भविष्यन्ति यच्छ्रुते ।भक्तिमार्गस्य कथनात्पुष्टिरस्तीति निश्चयः ॥ २॥

vakṣyāmi sarvasandehā na bhaviṣyanti yacchrute |bhaktimārgasya kathanātpuṣṭirastīti niścayaḥ || 2||

द्वौ भूतसर्गावित्युक्तेः प्रवाहोऽपि व्यवस्थितः ।द्वौ भूतसर्गावित्युक्तेः प्रवाहोऽपि व्यवस्थिता ॥ ३॥

dvau bhūtasargāvityukteḥ pravāho'pi vyavasthitaḥ |dvau bhūtasargāvityukteḥ pravāho'pi vyavasthitā || 3||

कश्चिदेव हि भक्तो हि यो मद्भक्त इतीरणात् ।सर्वत्रोत्कर्षकथनात्पुष्टिरस्तीति निश्चयः ॥ ४॥

kaścideva hi bhakto hi yo madbhakta itīraṇāt |sarvatrotkarṣakathanātpuṣṭirastīti niścayaḥ || 4||

न सर्वोऽतः प्रवाहाद्धि भिन्नो वेदाच्च भेदतः ।यदा यस्येति वचनान्नाहं वेदैरितीरणात् ॥ ५॥

na sarvo'taḥ pravāhāddhi bhinno vedācca bhedataḥ |yadā yasyeti vacanānnāhaṃ vedairitīraṇāt || 5||

मार्गेकत्वेऽपि चेदन्त्यौ तनू भक्त्यागमौ मतौ ।न तद्युक्तं सूत्रतो हि भिन्नो युक्त्या हि वैदिकः ॥ ६॥

mārgekatve'pi cedantyau tanū bhaktyāgamau matau |na tadyuktaṃ sūtrato hi bhinno yuktyā hi vaidikaḥ || 6||

जीवदेहकृतीनां च भिन्नत्त्वं नित्यता श्रुतेः ।यथा तद्वत्पुष्टिमार्गे द्वयोरपि निषेधतः ॥ ७॥

jīvadehakṛtīnāṃ ca bhinnattvaṃ nityatā śruteḥ |yathā tadvatpuṣṭimārge dvayorapi niṣedhataḥ || 7||

प्रमाणभेदाद्भिन्नो हि पुष्टिमार्गो निरूपितः ।सर्गभेदं प्रवक्ष्यामि स्वरूपाङ्गक्रियायुतम् ॥ ८॥

pramāṇabhedādbhinno hi puṣṭimārgo nirūpitaḥ |sargabhedaṃ pravakṣyāmi svarūpāṅgakriyāyutam || 8||

इच्छामात्रेण मनसा प्रवाहं सृष्टवान् हरिः ।वचसा वेदमार्गे हि पुष्टिं कायेन निश्चयः ॥ ९॥

icchāmātreṇa manasā pravāhaṃ sṛṣṭavān hariḥ |vacasā vedamārge hi puṣṭiṃ kāyena niścayaḥ || 9||

मूलेच्छातः फलं लोके वेदोक्तं वैदिकेऽपि च ।कायेन तु फलं पुष्टौ भिन्नेच्छातोऽपि नैकता ॥ १०॥

mūlecchātaḥ phalaṃ loke vedoktaṃ vaidike'pi ca |kāyena tu phalaṃ puṣṭau bhinnecchāto'pi naikatā || 10||

तानहं द्विषतो वाक्याद्भिन्ना जीवाः प्रवाहिणः ।अत एवेतरौ भिन्नौ सान्तौ मोक्षप्रवेशतः ॥ ११॥

tānahaṃ dviṣato vākyādbhinnā jīvāḥ pravāhiṇaḥ |ata evetarau bhinnau sāntau mokṣapraveśataḥ || 11||

तस्माज्जीवाः पुष्टिमार्गे भिन्ना एव न संशयः ।भगवद्रूपसेवार्थं तत्सृष्टिर्नान्यथा भवेत् ॥ १२॥

tasmājjīvāḥ puṣṭimārge bhinnā eva na saṃśayaḥ |bhagavadrūpasevārthaṃ tatsṛṣṭirnānyathā bhavet || 12||

स्वरूपेणावतारेण लिङ्गेन च गुणेन च ।तारतम्यं न स्वरूपे देहे वा तत्क्रियासु वा ॥ १३॥

svarūpeṇāvatāreṇa liṅgena ca guṇena ca |tāratamyaṃ na svarūpe dehe vā tatkriyāsu vā || 13||

तथापि तावता कार्यं यावत्तस्य करोति हि ।ते हि द्विधा शुद्धमिश्रभेदान्मिश्रास्त्रिधा पुनः ॥ १४॥

tathāpi tāvatā kāryaṃ yāvattasya karoti hi |te hi dvidhā śuddhamiśrabhedānmiśrāstridhā punaḥ || 14||

प्रवाहादिविभेदेन भगवत्कार्यसिद्धये ।पुष्ट्या विमिश्राः सर्वज्ञाः प्रवाहेण क्रियारताः ॥ १५॥

pravāhādivibhedena bhagavatkāryasiddhaye |puṣṭyā vimiśrāḥ sarvajñāḥ pravāheṇa kriyāratāḥ || 15||

मर्यादया गुणज्ञास्ते शुद्धाः प्रेम्णातिदुर्लभाः ।एवं सर्गस्तु तेषां हि फलं त्वत्र निरूप्यते ॥ १६॥

maryādayā guṇajñāste śuddhāḥ premṇātidurlabhāḥ |evaṃ sargastu teṣāṃ hi phalaṃ tvatra nirūpyate || 16||

भगवानेव हि फलं स यथाऽऽविर्भवेद्भुवि ।गुणस्वरूपभेदेन तथा तेषां फलं भवेत् ॥ १७॥

bhagavāneva hi phalaṃ sa yathā''virbhavedbhuvi |guṇasvarūpabhedena tathā teṣāṃ phalaṃ bhavet || 17||

आसक्तौ भगवानेव शापं दापयति क्वचित् ।अहङ्कारेऽथवा लोके तन्मार्गस्थापनाय हि ॥ १८॥

āsaktau bhagavāneva śāpaṃ dāpayati kvacit |ahaṅkāre'thavā loke tanmārgasthāpanāya hi || 18||

न ते पाषण्डतां यान्ति न च रोगाद्युपद्रवाः ।महानुभावाः प्रायेण शास्त्रं शुद्धत्वहेतवे ॥ १९॥

na te pāṣaṇḍatāṃ yānti na ca rogādyupadravāḥ |mahānubhāvāḥ prāyeṇa śāstraṃ śuddhatvahetave || 19||

भगवत्तारतम्येन तारतम्यं भजन्ति हि ।वैदिकत्वं लौकिकत्त्वं कापट्यात्तेषु नान्यथा ॥ २०॥

bhagavattāratamyena tāratamyaṃ bhajanti hi |vaidikatvaṃ laukikattvaṃ kāpaṭyātteṣu nānyathā || 20||

वैष्णवत्वं हि सहजं ततोऽन्यत्र विपर्ययः ।सम्बन्धिनस्तु ये जीवाः प्रवाहस्थास्तथापरे ॥ २१॥

vaiṣṇavatvaṃ hi sahajaṃ tato'nyatra viparyayaḥ |sambandhinastu ye jīvāḥ pravāhasthāstathāpare || 21||

चर्षणीशब्दवाच्यास्ते ते सर्वे सर्ववर्त्मसु ।क्षणात्सर्वत्वमायान्ति रुचिस्तेषां न कुत्रचित् ॥ २२॥

carṣaṇīśabdavācyāste te sarve sarvavartmasu |kṣaṇātsarvatvamāyānti rucisteṣāṃ na kutracit || 22||

तेषां क्रियानुसारेण सर्वत्र सकलं फलम् ।प्रवाहस्थान्प्रवक्ष्यामि स्वरूपाङ्गक्रियायुतान् ॥ २३॥

teṣāṃ kriyānusāreṇa sarvatra sakalaṃ phalam |pravāhasthānpravakṣyāmi svarūpāṅgakriyāyutān || 23||

जीवास्ते ह्यासुरा सर्वे प्रवृत्तिं चेति वर्णिताः ।ते च द्विधा प्रकीर्त्यन्ते ह्यज्ञदुर्ज्ञविभेदतः ॥ २४॥

jīvāste hyāsurā sarve pravṛttiṃ ceti varṇitāḥ |te ca dvidhā prakīrtyante hyajñadurjñavibhedataḥ || 24||

दुर्ज्ञास्ते भगवत्प्रोक्ता ह्यज्ञास्ताननु ये पुनः ।प्रवाहेऽपि समागत्य पुष्टिस्थस्तैर्न युज्यते ।सोऽपि तैस्तत्कुले जातः कर्मणा जायते यतः ॥ २५॥

durjñāste bhagavatproktā hyajñāstānanu ye punaḥ |pravāhe'pi samāgatya puṣṭisthastairna yujyate |so'pi taistatkule jātaḥ karmaṇā jāyate yataḥ || 25||

इति श्रीवल्लभाचार्यविरचितः पुष्टिप्रवाहमर्यादाभेदः समाप्तः ।

iti śrīvallabhācāryaviracitaḥ puṣṭipravāhamaryādābhedaḥ samāptaḥ |