मङ्गलाचरणम् ४ Mangalacharanam 4

श्रीगणेशाय नमः ।श्रीमते रामानुजाय नमः ।श्रीमद्वेङ्कटेशाय नमः ।वक्रतुण्ड महाकाय कोटिसूर्यसमप्रभ ।निर्विघ्नं कुरु मे देव सर्वकार्येषु सर्वदा ॥ १॥

śrīgaṇeśāya namaḥ |śrīmate rāmānujāya namaḥ |śrīmadveṅkaṭeśāya namaḥ |vakratuṇḍa mahākāya koṭisūryasamaprabha |nirvighnaṃ kuru me deva sarvakāryeṣu sarvadā || 1||

सर्वरूपमयी देवी सर्वं देवीमयं जगत् ।अतोऽहं विश्वरूपां तां नमामि परमेश्वरीम् ॥ २॥

sarvarūpamayī devī sarvaṃ devīmayaṃ jagat |ato'haṃ viśvarūpāṃ tāṃ namāmi parameśvarīm || 2||

उद्भवस्थितिसंहारकारिणीं क्लेशहारिणीम् ।सर्वश्रेयस्करीं सीतां नतोऽहं रामवल्लभाम् ॥ ३॥

udbhavasthitisaṃhārakāriṇīṃ kleśahāriṇīm |sarvaśreyaskarīṃ sītāṃ nato'haṃ rāmavallabhām || 3||

श्रीरामचन्द्र रघुपुङ्गव राजवर्यराजेन्द्र राम रघुनायक राघवेश ।राजाधिराज रघुनन्दन रामचन्द्रदासोऽहमद्य भवतः शरणागतोऽस्मि ॥ ४॥

śrīrāmacandra raghupuṅgava rājavaryarājendra rāma raghunāyaka rāghaveśa |rājādhirāja raghunandana rāmacandradāso'hamadya bhavataḥ śaraṇāgato'smi || 4||

महालक्ष्मि नमस्तुभ्यं नमस्तुभ्यं सुरेश्वरि ।हरिप्रिये नमस्तुभ्यं नमस्तुभ्यं दयानिधे ॥ ५॥

mahālakṣmi namastubhyaṃ namastubhyaṃ sureśvari |haripriye namastubhyaṃ namastubhyaṃ dayānidhe || 5||

राधा साध्यं साधनं यस्य राधामन्त्रो राधा मन्त्रदात्री च राधा ।सर्वं राधा जीवनं यस्य राधाराधा वाचिं किं तस्य शेषम् ॥ ६॥

rādhā sādhyaṃ sādhanaṃ yasya rādhāmantro rādhā mantradātrī ca rādhā |sarvaṃ rādhā jīvanaṃ yasya rādhārādhā vāciṃ kiṃ tasya śeṣam || 6||

कृष्णाय वासुदेवाय हरये परमात्मने ।प्रणतक्लेशनाशाय गोविन्दाय नमो नमः ॥ ७॥

kṛṣṇāya vāsudevāya haraye paramātmane |praṇatakleśanāśāya govindāya namo namaḥ || 7||

अशेषसंसारविहारहीनमादित्यगं पूर्णसुखाभिरामम् ।समस्तसाक्षिं तमसः परस्तान्नारायणं विष्णुमहं भजामि ॥ ८॥

aśeṣasaṃsāravihārahīnamādityagaṃ pūrṇasukhābhirāmam |samastasākṣiṃ tamasaḥ parastānnārāyaṇaṃ viṣṇumahaṃ bhajāmi || 8||

यं शैवाः समुपासते शिव इति ब्रह्मेति वेदान्तिनोबौद्धा बुद्ध इति प्रमाणपटवः कर्तेति नैयायिकाः ।अर्हन्नित्यथ जैनशासनरताः कर्मेति मीमांसकाःसोऽयं वो विदधातु वाञ्छितफलं त्रैलोक्यनाथो हरिः ॥ ९॥

yaṃ śaivāḥ samupāsate śiva iti brahmeti vedāntinobauddhā buddha iti pramāṇapaṭavaḥ karteti naiyāyikāḥ |arhannityatha jainaśāsanaratāḥ karmeti mīmāṃsakāḥso'yaṃ vo vidadhātu vāñchitaphalaṃ trailokyanātho hariḥ || 9||

गुरुर्ब्रह्मा गुरुर्विष्णुः गुरुर्देवो महेश्वरः ।गुरुः साक्षात्परब्रह्म तस्मै श्रीगुरवे नमः ॥ १०॥

gururbrahmā gururviṣṇuḥ gururdevo maheśvaraḥ |guruḥ sākṣātparabrahma tasmai śrīgurave namaḥ || 10||

अज्ञानतिमिरान्धस्य ज्ञानाञ्जनशलाकया ।चक्षुरुन्मीलितं येन तस्मै श्रीगुरवे नमः ॥ ११॥

ajñānatimirāndhasya jñānāñjanaśalākayā |cakṣurunmīlitaṃ yena tasmai śrīgurave namaḥ || 11||

लक्ष्मीनाथसमारम्भां नाथयामुनमध्यमाम् ।अस्मदाचार्यपर्यन्तां वन्दे गुरुपरम्पराम् ॥ १२॥

lakṣmīnāthasamārambhāṃ nāthayāmunamadhyamām |asmadācāryaparyantāṃ vande guruparamparām || 12||

श्रीमान् वेङ्कटनाथार्यः कवितार्किककेसरी ।वेदान्ताचार्यवर्यो मे सन्निधत्तां सदा हृदि ॥ १३॥

śrīmān veṅkaṭanāthāryaḥ kavitārkikakesarī |vedāntācāryavaryo me sannidhattāṃ sadā hṛdi || 13||

इति श्रीमङ्गलाचरणम् ४ ॥

iti śrīmaṅgalācaraṇam 4 ||