महाप्रभोरष्टकम् अथवा स्वरूपचरितामृतम् Mahaprabhorashtakam

स्वरूप भवतो भवत्वयमिति स्मितस्निग्धयागिरैव रघुनाथमुत्पुलिकगात्रमुल्लासयन् ।रहस्युपदिशन् निजप्रणयगूढमुद्रां स्वयंविराजतु चिराय मे हृदि स गौरचन्द्रः प्रभुः ॥ १॥

svarūpa bhavato bhavatvayamiti smitasnigdhayāgiraiva raghunāthamutpulikagātramullāsayan |rahasyupadiśan nijapraṇayagūḍhamudrāṃ svayaṃvirājatu cirāya me hṛdi sa gauracandraḥ prabhuḥ || 1||

स्वरूप मम हृद्व्रणं बत विवेद रूपः कथंलिलेख यदयं पठ त्वमपि तालपत्रेऽक्षरम् ।इति प्रणयवेल्लितं विदधदाशु रूपान्तरंविराजतु चिराय मे हृदि स गौरचन्द्रः प्रभुः ॥ २॥

svarūpa mama hṛdvraṇaṃ bata viveda rūpaḥ kathaṃlilekha yadayaṃ paṭha tvamapi tālapatre'kṣaram |iti praṇayavellitaṃ vidadhadāśu rūpāntaraṃvirājatu cirāya me hṛdi sa gauracandraḥ prabhuḥ || 2||

स्वरूप परकीयसत्प्रवरवस्तुनाशेच्छतांदधज्जन इह त्वया परिचितो न वेतीक्षयन् ।सनातनमुदित्य विस्मितमुखं महाविस्मितंविराजतु चिराय मे हृदि स गौरचन्द्रः प्रभुः ॥ ३॥

svarūpa parakīyasatpravaravastunāśecchatāṃdadhajjana iha tvayā paricito na vetīkṣayan |sanātanamuditya vismitamukhaṃ mahāvismitaṃvirājatu cirāya me hṛdi sa gauracandraḥ prabhuḥ || 3||

स्वरूप हरिनाम यज्जगदघोषयं तेन किंन वाचयितुमप्यथाशकमिमं शिवानन्दजम् ।इति स्वपदलेहनैः शिशुमचीकरद् यः कविंविराजतु चिराय मे हृदि स गौरचन्द्रः प्रभुः ॥ ४॥

svarūpa harināma yajjagadaghoṣayaṃ tena kiṃna vācayitumapyathāśakamimaṃ śivānandajam |iti svapadalehanaiḥ śiśumacīkarad yaḥ kaviṃvirājatu cirāya me hṛdi sa gauracandraḥ prabhuḥ || 4||

स्वरूप रसरीतिरम्बुजदृशाम् व्रजे भण्यतांघनप्रणयमानजा श्रुतियुगं ममोत्कण्ठते ।रमा यदिह मानिनी तदपि लोकयेति ब्रुवन्विराजतु चिराय मे हृदि स गौरचन्द्रः प्रभुः ॥ ५॥

svarūpa rasarītirambujadṛśām vraje bhaṇyatāṃghanapraṇayamānajā śrutiyugaṃ mamotkaṇṭhate |ramā yadiha māninī tadapi lokayeti bruvanvirājatu cirāya me hṛdi sa gauracandraḥ prabhuḥ || 5||

स्वरूप रसमन्दिरं भवसि मन्मुदामास्पदंत्वमत्र पुरुषोत्तमे व्रजभुवीव मे वर्तसे ।इति स्वपरिरम्भणैः पुलकिनं व्यधात् तं च योविराजतु चिराय मे हृदि स गौरचन्द्रः प्रभुः ॥ ६॥

svarūpa rasamandiraṃ bhavasi manmudāmāspadaṃtvamatra puruṣottame vrajabhuvīva me vartase |iti svaparirambhaṇaiḥ pulakinaṃ vyadhāt taṃ ca yovirājatu cirāya me hṛdi sa gauracandraḥ prabhuḥ || 6||

स्वरूप किमपीक्षितं क्व नु विभो निशि स्वप्नतःप्रभो कथय किम् नु तम् नवयुवा वराम्भोधरः ।व्यधात् किमयमीक्ष्यते किमु न हीत्यगात् तां दशांविराजतु चिराय मे हृदि स गौरचन्द्रः प्रभुः ॥ ७॥

svarūpa kimapīkṣitaṃ kva nu vibho niśi svapnataḥprabho kathaya kim nu tam navayuvā varāmbhodharaḥ |vyadhāt kimayamīkṣyate kimu na hītyagāt tāṃ daśāṃvirājatu cirāya me hṛdi sa gauracandraḥ prabhuḥ || 7||

स्वरूप मम नेत्रयोः पुरत एव कृष्णो हसन्न्अपैति न करग्रहं बत ददाति हा किं सखे ।इति स्खलति धावति श्वसिति घूर्णते यः सदाविराजतु चिराय मे हृदि स गौरचन्द्रः प्रभुः ॥ ८॥

svarūpa mama netrayoḥ purata eva kṛṣṇo hasannapaiti na karagrahaṃ bata dadāti hā kiṃ sakhe |iti skhalati dhāvati śvasiti ghūrṇate yaḥ sadāvirājatu cirāya me hṛdi sa gauracandraḥ prabhuḥ || 8||

स्वरूपचरितामृतं किल महाप्रभोरष्टकंरहस्यतममद्भुतं पठति यः कृती प्रत्यहम् ।स्वरूपपरिवारतां नयति ता शचीनन्दनोघनप्रणयमाधुरीं स्वपदयोः समास्वादयन् ॥ ९॥

svarūpacaritāmṛtaṃ kila mahāprabhoraṣṭakaṃrahasyatamamadbhutaṃ paṭhati yaḥ kṛtī pratyaham |svarūpaparivāratāṃ nayati tā śacīnandanoghanapraṇayamādhurīṃ svapadayoḥ samāsvādayan || 9||

इति श्रीविश्वनाथचक्रवर्तीठाकुरविरचितं महाप्रभोराष्टकं सम्पूर्णम् ।

iti śrīviśvanāthacakravartīṭhākuraviracitaṃ mahāprabhorāṣṭakaṃ sampūrṇam |