श्रीकृष्णस्तोत्रराजपठनम् Brahmeshadharmakritam Shri Krishnastotrarajapathanam

ब्रह्मोवाच ।वरं वरेण्यं वरदं वरदानां च कारणम् ।कारणं सर्वभूतानां तेजोरूपं नमाम्यहम् ॥ ९३॥

brahmovāca |varaṃ vareṇyaṃ varadaṃ varadānāṃ ca kāraṇam |kāraṇaṃ sarvabhūtānāṃ tejorūpaṃ namāmyaham || 93||

मङ्गलं मङ्गलानां च मङ्गलं मङ्गलप्रदम् ।समस्तमङ्गलाधारं तेजोरूपं नमाम्यहम् ॥ ९४॥

maṅgalaṃ maṅgalānāṃ ca maṅgalaṃ maṅgalapradam |samastamaṅgalādhāraṃ tejorūpaṃ namāmyaham || 94||

स्थितं सर्वत्र निर्लिप्तमात्मरूपं परात्परम् ।निरीहमवितर्क्यं च तेजोरूपं नमाम्यहम् ॥ ९५॥

sthitaṃ sarvatra nirliptamātmarūpaṃ parātparam |nirīhamavitarkyaṃ ca tejorūpaṃ namāmyaham || 95||

सगुणं निर्गुणं ब्रह्म ज्योतीरूपं सनातनम् ।साकारं च निराकारं तेजोरूपं नमाम्यहम् ॥ ९६॥

saguṇaṃ nirguṇaṃ brahma jyotīrūpaṃ sanātanam |sākāraṃ ca nirākāraṃ tejorūpaṃ namāmyaham || 96||

तमनिर्वचनीयं च व्यक्तमव्यक्तमेककम् ।स्वेच्छामयं सर्वरूपं तेजोरूपं नमाम्यहम् ॥ ९७॥

tamanirvacanīyaṃ ca vyaktamavyaktamekakam |svecchāmayaṃ sarvarūpaṃ tejorūpaṃ namāmyaham || 97||

गुणत्रयविभागाय रूपत्रयधरं परम् ।कलया ते कृताः सर्वे किं जानन्ति श्रुतेः परम् ॥ ९८॥

guṇatrayavibhāgāya rūpatrayadharaṃ param |kalayā te kṛtāḥ sarve kiṃ jānanti śruteḥ param || 98||

सर्वाधारं सर्वरूपं सर्वबीजमबीजकम् ।सर्वान्तकमनन्तं च तेजोरूपं नमाम्यहम् ॥ ९९॥

sarvādhāraṃ sarvarūpaṃ sarvabījamabījakam |sarvāntakamanantaṃ ca tejorūpaṃ namāmyaham || 99||

लक्ष्यं षड्गुणरूपं च वर्णनीयं विचक्षणैः ।किं वर्णयामि लक्ष्यं च तेजोरूपं नमाम्यहम् ॥ ५\।१००॥अशरीरं विग्रहवदिन्द्रियं यदतीन्द्रियम् ।यदसाक्षि सर्वसाक्षि तेजोरूपं नमाम्यहम् ॥ १०१॥

lakṣyaṃ ṣaḍguṇarūpaṃ ca varṇanīyaṃ vicakṣaṇaiḥ |kiṃ varṇayāmi lakṣyaṃ ca tejorūpaṃ namāmyaham || 5\|100||aśarīraṃ vigrahavadindriyaṃ yadatīndriyam |yadasākṣi sarvasākṣi tejorūpaṃ namāmyaham || 101||

गमनार्हमपादं यदचक्षुः सर्वदर्शनम् ।हस्तास्यहीनं यद्भोक्तृ तेजोरूपं नमाम्यहम् ॥ १०२॥

gamanārhamapādaṃ yadacakṣuḥ sarvadarśanam |hastāsyahīnaṃ yadbhoktṛ tejorūpaṃ namāmyaham || 102||

वेदे निरूपितं वस्तु सन्तः शक्ताश्च वर्णितुम् ।वेदेऽनिरूपितं यत्तत्तेजोरूपं नमाम्यहम् ॥ १०३॥

vede nirūpitaṃ vastu santaḥ śaktāśca varṇitum |vede'nirūpitaṃ yattattejorūpaṃ namāmyaham || 103||

सर्वेशं यदनीशं यत्सर्वादि यदनादि यत् ।सर्वात्मकमनात्मं यत्तेजोरूपं नमाम्यहम् ॥ १०४॥

sarveśaṃ yadanīśaṃ yatsarvādi yadanādi yat |sarvātmakamanātmaṃ yattejorūpaṃ namāmyaham || 104||

अहं विधाता जगतो वेदानां जनकः स्वयम् ।पाता धर्मो हरो हर्ता स्तोतुं शक्ता न केऽपि यत् ॥ १०५॥

ahaṃ vidhātā jagato vedānāṃ janakaḥ svayam |pātā dharmo haro hartā stotuṃ śaktā na ke'pi yat || 105||

सेवया तव धर्मोऽयं पालने च निरूपितः ।तवाज्ञया च संहर्ता त्वया काले निरूपिते ॥ १०६॥

sevayā tava dharmo'yaṃ pālane ca nirūpitaḥ |tavājñayā ca saṃhartā tvayā kāle nirūpite || 106||

निःशेषोत्पत्तिकर्त्ताऽहं त्वत्पादाम्भोजसेवया ।कर्मिणां फलदाता च त्वं भक्तानां च नः प्रभुः ॥ १०७॥

niḥśeṣotpattikarttā'haṃ tvatpādāmbhojasevayā |karmiṇāṃ phaladātā ca tvaṃ bhaktānāṃ ca naḥ prabhuḥ || 107||

ब्रह्माण्डे बिम्बसदृशे भूत्वा विषयिणो वयम् ।एवं कतिविधाः सन्ति तेष्वनन्तेषु सेवकाः ॥ १०८॥

brahmāṇḍe bimbasadṛśe bhūtvā viṣayiṇo vayam |evaṃ katividhāḥ santi teṣvananteṣu sevakāḥ || 108||

यथा न सङ्ख्या रेणूनां तथा तेषामणीयसाम् ।सर्वेषां जनकश्चेशो यस्तं स्तोतुं च के क्षमाः ॥ १०९॥

yathā na saṅkhyā reṇūnāṃ tathā teṣāmaṇīyasām |sarveṣāṃ janakaśceśo yastaṃ stotuṃ ca ke kṣamāḥ || 109||

एकैकलोमविवरे ब्रह्माण्डमेकमेककम् ।यस्यैव महतो विष्णोः षोडशांशस्तवैव सः ॥ ५\।११०॥ध्यायन्ते योगिनः सर्वे तवैतद्रूपमीप्सितम् ।त्वद्भक्तदास्यनिरताः सेवन्ते चरणाम्बुजम् ॥ १११॥

ekaikalomavivare brahmāṇḍamekamekakam |yasyaiva mahato viṣṇoḥ ṣoḍaśāṃśastavaiva saḥ || 5\|110||dhyāyante yoginaḥ sarve tavaitadrūpamīpsitam |tvadbhaktadāsyaniratāḥ sevante caraṇāmbujam || 111||

किशोरं सुन्दरतरं यद्रूपं कमनीयकम् ।मन्त्रध्यानानुरूपं च दर्शयास्माकमीश्वर ॥ ११२॥

kiśoraṃ sundarataraṃ yadrūpaṃ kamanīyakam |mantradhyānānurūpaṃ ca darśayāsmākamīśvara || 112||

नवीनजलदश्यामपीताम्बरधरं वरम् ।द्विभुजं मुरलीहस्तं सस्मितं सुमनोहरम् ॥ ११३॥

navīnajaladaśyāmapītāmbaradharaṃ varam |dvibhujaṃ muralīhastaṃ sasmitaṃ sumanoharam || 113||

मयूरपिच्छचूडं च मालतीजालमण्डितम् ।चन्दनागुरुकस्तूरीकुङ्कुमद्रवचर्चितम् ॥ ११४॥

mayūrapicchacūḍaṃ ca mālatījālamaṇḍitam |candanāgurukastūrīkuṅkumadravacarcitam || 114||

अमूल्यरत्नसाराणां सारभूषणभूषितम् ।अमूल्यरत्नरचितकिरीटमुकुटोज्ज्वलम् ॥ ११५॥

amūlyaratnasārāṇāṃ sārabhūṣaṇabhūṣitam |amūlyaratnaracitakirīṭamukuṭojjvalam || 115||

शरत्प्रफुल्लपद्मानां प्रभामोष्यास्यचन्द्रकम् ।पक्वबिम्बसमानेन ह्यधरोष्ठेन राजितम् ॥ ११६॥

śaratpraphullapadmānāṃ prabhāmoṣyāsyacandrakam |pakvabimbasamānena hyadharoṣṭhena rājitam || 116||

पक्वदाडिमबीजाभदन्तपङ्क्तिमनोहरम् ।केलीकदम्बमूले च स्थितं रासरसोन्मुखम् ॥ ११७॥

pakvadāḍimabījābhadantapaṅktimanoharam |kelīkadambamūle ca sthitaṃ rāsarasonmukham || 117||

गोपीवक्त्रस्मिततनुं राधावक्षःस्थलस्थितम् ।एवं वाञ्छितरूपं ते द्रष्टुं को वा न चोत्सुकः ॥ ११८॥

gopīvaktrasmitatanuṃ rādhāvakṣaḥsthalasthitam |evaṃ vāñchitarūpaṃ te draṣṭuṃ ko vā na cotsukaḥ || 118||

इत्येवमुक्त्वा विश्वसृट् प्रणनाम पुनः पुनः ।एवं स्तोत्रेण तुष्टाव धर्मोऽपि शङ्करः स्वयम् ॥ ११९॥

ityevamuktvā viśvasṛṭ praṇanāma punaḥ punaḥ |evaṃ stotreṇa tuṣṭāva dharmo'pi śaṅkaraḥ svayam || 119||

ननाम भूयो भूयश्च साश्रुपूर्णविलोचनः ।तिष्ठतोऽपि पुनः स्तोत्रं प्रचक्रुस्त्रिदशेश्वराः ॥ ५\।१२०॥व्याप्तास्तत्राश्रमे सर्वे श्रीकृष्णतेजसा मुने ।स्तवराजमिमं नित्यं ब्रह्मेशधर्मभिः कृतम् ॥ १२१॥

nanāma bhūyo bhūyaśca sāśrupūrṇavilocanaḥ |tiṣṭhato'pi punaḥ stotraṃ pracakrustridaśeśvarāḥ || 5\|120||vyāptāstatrāśrame sarve śrīkṛṣṇatejasā mune |stavarājamimaṃ nityaṃ brahmeśadharmabhiḥ kṛtam || 121||

पूजाकाले हरेरेवं भक्तियुक्तश्च यः पठेत् ।सुदुर्लभां दृढां भक्तिं निश्चलां लभते हरेः ॥ १२२॥

pūjākāle harerevaṃ bhaktiyuktaśca yaḥ paṭhet |sudurlabhāṃ dṛḍhāṃ bhaktiṃ niścalāṃ labhate hareḥ || 122||

सुरासुरमुनीन्द्राणां दुर्लभं दास्यमेव च ।अणिमादिकसिद्धिं च सालोक्यादि चतुष्टयम् ॥ १२३॥

surāsuramunīndrāṇāṃ durlabhaṃ dāsyameva ca |aṇimādikasiddhiṃ ca sālokyādi catuṣṭayam || 123||

इहैव विष्णुतुल्यश्च विख्यातः पूजितो ध्रुवम् ।वाक्सिद्धिर्मन्त्रसिद्धिश्च भवेत्तस्य सुनिश्चितम् ॥ १२४॥

ihaiva viṣṇutulyaśca vikhyātaḥ pūjito dhruvam |vāksiddhirmantrasiddhiśca bhavettasya suniścitam || 124||

सर्वसौभाम्यसंयुक्तं यशसा पूरितं जगत् ।पुत्रश्च विद्या कविता निश्चला कमला तथा ॥ १२५॥

sarvasaubhāmyasaṃyuktaṃ yaśasā pūritaṃ jagat |putraśca vidyā kavitā niścalā kamalā tathā || 125||

पत्नी पतिव्रता साध्वी सुशीला सुस्थिराः प्रजाः ।कीर्तिश्च चिरकालीना त्वन्ते कृष्णान्तिके गतिः ॥ १२६॥

patnī pativratā sādhvī suśīlā susthirāḥ prajāḥ |kīrtiśca cirakālīnā tvante kṛṣṇāntike gatiḥ || 126||

इति श्रीब्रह्मवैवर्ते महापुराणे श्रीकृष्णजन्मखण्डे ।गोलोकवर्णने श्रीकृष्णस्तोत्रराजपठनं नाम पञ्चमोऽध्यायः ॥ ५॥

iti śrībrahmavaivarte mahāpurāṇe śrīkṛṣṇajanmakhaṇḍe |golokavarṇane śrīkṛṣṇastotrarājapaṭhanaṃ nāma pañcamo'dhyāyaḥ || 5||

ब्रह्मवैवर्तपुराण । श्रीकृष्णजन्म, पूर्वभाग । अध्याय ५/९४११९॥ब्रह्मवैवर्तपुराण । श्रीकृष्णजन्म, पूर्वभाग । अध्याय ५/९४-११९॥

brahmavaivartapurāṇa | śrīkṛṣṇajanma, pūrvabhāga | adhyāya 5/94119||brahmavaivartapurāṇa | śrīkṛṣṇajanma, pūrvabhāga | adhyāya 5/94-119||