बिन्दुमाधवाष्टकम् Bindumadhavashtakam

श्री गणेशाय नमः ।कलिन्दजातटाटवीलतानिकेतनान्तरप्रगल्भवल्लविस्फुरद्रतिप्रसङ्गसङ्गतम् ।सुधारसार्द्रवेणुनादमोदमाधुरीमदप्रमत्तगोपगोव्रजं भजामि बिन्दुमाधवम् ॥ १॥

śrī gaṇeśāya namaḥ |kalindajātaṭāṭavīlatāniketanāntarapragalbhavallavisphuradratiprasaṅgasaṅgatam |sudhārasārdraveṇunādamodamādhurīmadapramattagopagovrajaṃ bhajāmi bindumādhavam || 1||

गदारिशङ्खचक्रशार्ङ्गभृच्चतुष्करं कृपाकटाक्षवीक्षणामृताक्षितामरेन्द्रनन्दनम् ।सनन्दनादिमौनिमानसारविन्दमन्दिरंजगत्पवित्रकीर्तिदं भजामि बिन्दुमाधवम् ॥ २॥

gadāriśaṅkhacakraśārṅgabhṛccatuṣkaraṃ kṛpākaṭākṣavīkṣaṇāmṛtākṣitāmarendranandanam |sanandanādimaunimānasāravindamandiraṃjagatpavitrakīrtidaṃ bhajāmi bindumādhavam || 2||

दिगीशमौलिनूत्नरत्ननिःसरत्प्रभावलीविराजितांघ्रिपङ्कजं नवेन्दुशेखराब्जजम् ।दयामरन्दतुन्दिलारविन्दपत्रलोचनंविरोधियूथभेदनं भजामि बिन्दुमाधवम् ॥ ३॥

digīśamaulinūtnaratnaniḥsaratprabhāvalīvirājitāṃghripaṅkajaṃ navenduśekharābjajam |dayāmarandatundilāravindapatralocanaṃvirodhiyūthabhedanaṃ bhajāmi bindumādhavam || 3||

पयः पयोधिवीचिकावलीपयःपृषन्मिलद्भुजङ्गपुङ्गवाङ्गकल्पपुष्पतल्पशायिनम् ।कटीतटिस्फुटीभवत्प्रतप्तहाटकाम्बरंनिशाटकोटिपाटनं भजामि बिन्दुमाधवम् ॥ ४॥

payaḥ payodhivīcikāvalīpayaḥpṛṣanmiladbhujaṅgapuṅgavāṅgakalpapuṣpatalpaśāyinam |kaṭītaṭisphuṭībhavatprataptahāṭakāmbaraṃniśāṭakoṭipāṭanaṃ bhajāmi bindumādhavam || 4||

अनुश्रवापहारकावलेपलोपनैपुणीपयश्चरावतारतोषितारविन्दसम्भवम् ।महाभवाब्धिमध्यमग्रदीनलोकतारकंविहङ्गराट्तुरङ्गमं भजामि बिन्दुमाधवम् ॥ ५॥

anuśravāpahārakāvalepalopanaipuṇīpayaścarāvatāratoṣitāravindasambhavam |mahābhavābdhimadhyamagradīnalokatārakaṃvihaṅgarāṭturaṅgamaṃ bhajāmi bindumādhavam || 5||

समुद्रतोयमध्यदेवदानवोत्क्षिपद्धराधरेन्द्रमूलधारणक्षमादिकूर्मविग्रहम् ।दुराग्रहावलिप्तहाटकाक्षनाशसूकरंहिरण्यदानवान्तकं भजामि बिन्दुमाधवम् ॥ ६॥

samudratoyamadhyadevadānavotkṣipaddharādharendramūladhāraṇakṣamādikūrmavigraham |durāgrahāvaliptahāṭakākṣanāśasūkaraṃhiraṇyadānavāntakaṃ bhajāmi bindumādhavam || 6||

विरोचनात्मसम्भवोत्तमाङ्गकृत्पदक्रमंपरश्वधोपसंहृताखिलावनीशमण्डलम् ।कठोरनीलकण्ठकार्मुकप्रदर्शितादिदोर्बलान्वितक्षितीसुतं भजामि बिन्दुमाधवम् ॥ ७॥

virocanātmasambhavottamāṅgakṛtpadakramaṃparaśvadhopasaṃhṛtākhilāvanīśamaṇḍalam |kaṭhoranīlakaṇṭhakārmukapradarśitādidorbalānvitakṣitīsutaṃ bhajāmi bindumādhavam || 7||

यमानुजोदकप्रवाहसत्त्वराभिजित्वरंपुरासुराङ्गनाभिमाननूपभूपनायकम् ।स्वमण्डलाग्रखण्डनीययावनारिमण्डलंबलानुजं गदाग्रजं भजामि बिन्दुमाधवम् ॥ ८॥

yamānujodakapravāhasattvarābhijitvaraṃpurāsurāṅganābhimānanūpabhūpanāyakam |svamaṇḍalāgrakhaṇḍanīyayāvanārimaṇḍalaṃbalānujaṃ gadāgrajaṃ bhajāmi bindumādhavam || 8||

प्रशस्तपञ्चचामराख्यवृत्तभेदभासितंदशावतारवर्णनं नृसिंहभक्तवर्णितम् ।प्रसिद्धबिन्दुमाधवाष्टकं पठन्ति ये भृशंनरा सुदुर्लभं भजन्ति ते मनोरथं निरन्तम् ॥ ९॥

praśastapañcacāmarākhyavṛttabhedabhāsitaṃdaśāvatāravarṇanaṃ nṛsiṃhabhaktavarṇitam |prasiddhabindumādhavāṣṭakaṃ paṭhanti ye bhṛśaṃnarā sudurlabhaṃ bhajanti te manorathaṃ nirantam || 9||

॥ इति श्रीबिन्दुमाधवाष्टकं सम्पूर्णम् ॥

|| iti śrībindumādhavāṣṭakaṃ sampūrṇam ||