कृष्णस्तोत्रम् (ब्रह्मदेवरचितम्) Brahma Rachita Krishnastotra

श्री गणेशाय नमः ।ब्रह्मोवाच ।रक्ष रक्ष हरे मां च निमग्नं कामसागरे ।दुष्कीर्तिजलपूर्णे च दुष्पारे बहुसङ्कटे ॥ १॥

śrī gaṇeśāya namaḥ |brahmovāca |rakṣa rakṣa hare māṃ ca nimagnaṃ kāmasāgare |duṣkīrtijalapūrṇe ca duṣpāre bahusaṅkaṭe || 1||

भक्तिविस्मृतिबीजे च विपत्सोपानदुस्तरे ।अतीव निर्मलज्ञानचक्षुःप्रच्छन्नकारणे ॥ २॥

bhaktivismṛtibīje ca vipatsopānadustare |atīva nirmalajñānacakṣuḥpracchannakāraṇe || 2||

जन्मोर्मिसङ्गसहिते योषिन्नक्रौधसङ्कुले ।रतिस्रोतःसमायुक्ते गम्भीरे घोर एव च ॥ ३॥

janmormisaṅgasahite yoṣinnakraudhasaṅkule |ratisrotaḥsamāyukte gambhīre ghora eva ca || 3||

प्रथमामृतरूपे च परिणामविषालये ।यमालयप्रवेशाय मुक्तिद्वारातिविस्मृतौ ॥ ४॥

prathamāmṛtarūpe ca pariṇāmaviṣālaye |yamālayapraveśāya muktidvārātivismṛtau || 4||

बुद्ध्या तरण्या विज्ञानैरुद्धरास्मानतः स्वयम् ।स्वयं च त्व कर्णधारः प्रसीद मधुसूदन ॥ ५॥

buddhyā taraṇyā vijñānairuddharāsmānataḥ svayam |svayaṃ ca tva karṇadhāraḥ prasīda madhusūdana || 5||

मद्विधाः कतिचिन्नाथ नियोज्या भवकर्मणि ।सन्ति विश्वेश विधयो हे विश्वेश्वर माधव ॥ ६॥

madvidhāḥ katicinnātha niyojyā bhavakarmaṇi |santi viśveśa vidhayo he viśveśvara mādhava || 6||

न कर्मक्षेत्रमेवेदं ब्रह्मलोकोऽयमीप्सितः ।तथापि न स्पृहा कामे त्वद्भक्तिव्यवधायके ॥ ७॥

na karmakṣetramevedaṃ brahmaloko'yamīpsitaḥ |tathāpi na spṛhā kāme tvadbhaktivyavadhāyake || 7||

हे नाथ करुणासिन्धो दीनबन्धो कृपां कुरु ।त्वं महेश महाज्ञाता दुःस्वप्नं मां न दर्शय ॥ ८॥

he nātha karuṇāsindho dīnabandho kṛpāṃ kuru |tvaṃ maheśa mahājñātā duḥsvapnaṃ māṃ na darśaya || 8||

इत्युक्त्वा जगतां धाता विरराम सनातनः ।ध्यायं ध्यायं मत्पदाब्जं शश्वत्सस्मार मामिति ॥ ९॥

ityuktvā jagatāṃ dhātā virarāma sanātanaḥ |dhyāyaṃ dhyāyaṃ matpadābjaṃ śaśvatsasmāra māmiti || 9||

ब्रह्मणा च कृतं स्तोत्रं भक्तियुक्तश्च यः पठेत् ।स चैवाकर्मविषये न निमग्नो भवेद्ध्रुवम् ॥ १०॥

brahmaṇā ca kṛtaṃ stotraṃ bhaktiyuktaśca yaḥ paṭhet |sa caivākarmaviṣaye na nimagno bhaveddhruvam || 10||

मम मायां विनिर्जित्य स ज्ञानं लभते ध्रुवम् ।इह लोके भक्तियुक्तो मद्भक्तप्रवरो भवेत् ॥ ११॥

mama māyāṃ vinirjitya sa jñānaṃ labhate dhruvam |iha loke bhaktiyukto madbhaktapravaro bhavet || 11||

॥ इति श्रीब्रह्मदेवकृतं श्रीकृष्णस्तोत्रं सम्पूर्णम् ॥

|| iti śrībrahmadevakṛtaṃ śrīkṛṣṇastotraṃ sampūrṇam ||