सम्प्रदायगुरुपरम्परास्तोत्रम् Shrisampradayaguruparampara Stotram

श्रीअग्रदास उवाचशुभासने समासीनमनन्तानन्दमच्युतम् ।कृष्णदासो नमस्कृत्य पप्रच्छ गुरुसन्ततिम् ॥ १॥

śrīagradāsa uvācaśubhāsane samāsīnamanantānandamacyutam |kṛṣṇadāso namaskṛtya papraccha gurusantatim || 1||

श्रीकृष्णदास उवाचभगवन् यमिनां श्रेष्ठ प्रपन्नोऽस्मि दयां कुरु ।ज्ञातुमिच्छाम्यहं सर्वां पूर्वेषां सत्परम्पराम् ॥ २॥

śrīkṛṣṇadāsa uvācabhagavan yamināṃ śreṣṭha prapanno'smi dayāṃ kuru |jñātumicchāmyahaṃ sarvāṃ pūrveṣāṃ satparamparām || 2||

मन्त्रराजश्च केनादौ प्रोक्तः कस्मै पुरा विभो ।कथञ्च भुवि विख्यातो मन्त्रोऽयं मोक्षदायकः ॥ ३॥

mantrarājaśca kenādau proktaḥ kasmai purā vibho |kathañca bhuvi vikhyāto mantro'yaṃ mokṣadāyakaḥ || 3||

श्रीअग्रदास उवाचकृष्णदासवचः श्रुत्वाऽनन्तानन्दो दयानिधिः ।उवाच श्रूयतां सौम्य वक्ष्यामि तद् यथाक्रमम् ॥ ४॥

śrīagradāsa uvācakṛṣṇadāsavacaḥ śrutvā'nantānando dayānidhiḥ |uvāca śrūyatāṃ saumya vakṣyāmi tad yathākramam || 4||

श्रीअनन्तानन्द उवाचपरधाम्नि स्थितो रामःपुण्डरीकायतेक्षणः ।सेवया परया जुष्टो जानक्यै तारकं ददौ ॥ ५॥

śrīanantānanda uvācaparadhāmni sthito rāmaḥpuṇḍarīkāyatekṣaṇaḥ |sevayā parayā juṣṭo jānakyai tārakaṃ dadau || 5||

श्रियः श्रीरपि लोकानां दुखोद्धरणहेतवे ।हनूमते ददौ मन्त्रं सदा रामाङ्घ्रिसेविने ॥ ६॥

śriyaḥ śrīrapi lokānāṃ dukhoddharaṇahetave |hanūmate dadau mantraṃ sadā rāmāṅghrisevine || 6||

ततस्तु ब्रह्मणा प्राप्तो मुह्यमानेन मायया ।कल्पान्तरे तु रामो वै ब्रह्मणे दत्तवानिमम् ॥ ७॥

tatastu brahmaṇā prāpto muhyamānena māyayā |kalpāntare tu rāmo vai brahmaṇe dattavānimam || 7||

मन्त्रराजजपं कृत्वा धाता निर्मातृतां गतः ।त्रयीसारमिमं धातुर्वसिष्ठो लब्धवान् परम् ॥ ८॥

mantrarājajapaṃ kṛtvā dhātā nirmātṛtāṃ gataḥ |trayīsāramimaṃ dhāturvasiṣṭho labdhavān param || 8||

पराशरो वसिष्ठाच्च सर्वसंस्कारसंयुतम् ।मन्त्रराजं परं लब्ध्वा कृतकृत्यो बभूव ह ॥ ९॥

parāśaro vasiṣṭhācca sarvasaṃskārasaṃyutam |mantrarājaṃ paraṃ labdhvā kṛtakṛtyo babhūva ha || 9||

पराशरस्य सत्पुत्रो व्यासः सत्यवतीसुतः ।पितुः षडक्षरं लब्ध्वा चक्रे वेदोपबृंहणम् ॥ १०॥

parāśarasya satputro vyāsaḥ satyavatīsutaḥ |pituḥ ṣaḍakṣaraṃ labdhvā cakre vedopabṛṃhaṇam || 10||

व्यासोऽपि बहुशिष्येषु मन्वानः शुभयोग्यताम् ।परमहंसवर्य्याय शुकदेवाय दत्तवान् ॥ ११॥

vyāso'pi bahuśiṣyeṣu manvānaḥ śubhayogyatām |paramahaṃsavaryyāya śukadevāya dattavān || 11||

शुकदेवकृपापात्रो ब्रह्मचर्यव्रतेस्थितः ।नरोत्तमस्तु तच्छिष्यो निर्वाणपदवीं गतः ॥ १२॥

śukadevakṛpāpātro brahmacaryavratesthitaḥ |narottamastu tacchiṣyo nirvāṇapadavīṃ gataḥ || 12||

स चापि परमाचार्यो गङ्गाधराय सूरये ।मन्त्राणां परमं तत्त्वं राममन्त्रं प्रदत्तवान् ॥ १३॥

sa cāpi paramācāryo gaṅgādharāya sūraye |mantrāṇāṃ paramaṃ tattvaṃ rāmamantraṃ pradattavān || 13||

गङ्गाधरात् सदाचार्यस्ततो रामेश्वरो यतिः ।द्वारानन्दस्ततो लब्ध्वा परब्रह्मरतोऽभवत् ॥ १४॥

gaṅgādharāt sadācāryastato rāmeśvaro yatiḥ |dvārānandastato labdhvā parabrahmarato'bhavat || 14||

देवानन्दस्तु तच्छिष्यः श्यामानन्दस्ततोऽग्रहीत् ।तत्सेवया श्रुतानन्दश्चिदानन्दस्ततोऽभवत् ॥ १५॥

devānandastu tacchiṣyaḥ śyāmānandastato'grahīt |tatsevayā śrutānandaścidānandastato'bhavat || 15||

पूर्णानन्दस्ततो लब्ध्वा श्रियानन्दाय दत्तवान् ।हर्यानन्दो महायोगी श्रियानन्दाङ्घ्रिसेवकः ॥ १६॥

pūrṇānandastato labdhvā śriyānandāya dattavān |haryānando mahāyogī śriyānandāṅghrisevakaḥ || 16||

हर्यानन्दस्य शिष्यो हि राघवानन्ददेशिकः ।यस्य वै शिष्यतां प्राप्तो रामानन्दः स्वयं हरि ॥ १७॥

haryānandasya śiṣyo hi rāghavānandadeśikaḥ |yasya vai śiṣyatāṃ prāpto rāmānandaḥ svayaṃ hari || 17||

तस्माद् गुरुवारल्लब्ध्वा देवानामपि दुर्लभम् ।प्रादात्तुभ्यमहन्तात गुह्यं तारकसंज्ञकम् ॥ १८॥

tasmād guruvārallabdhvā devānāmapi durlabham |prādāttubhyamahantāta guhyaṃ tārakasaṃjñakam || 18||

एवं परम्परा सौम्य प्रोक्ता श्रीसम्प्रदायिनाम् ।मन्त्रराजस्य चाख्यातिर्भूम्यामेवमवातरत् ॥ १९॥

evaṃ paramparā saumya proktā śrīsampradāyinām |mantrarājasya cākhyātirbhūmyāmevamavātarat || 19||

श्रीअग्रदास उवाचकृष्णदासस्तु तच्छ्रुत्वा लेभे परमहर्षताम् ।साष्टाङ्गं प्रणतिं कृत्वा वचनं चेदमब्रवीत् ॥ २०॥

śrīagradāsa uvācakṛṣṇadāsastu tacchrutvā lebhe paramaharṣatām |sāṣṭāṅgaṃ praṇatiṃ kṛtvā vacanaṃ cedamabravīt || 20||

श्रीकृष्णदास उवाचपीत्वा श्रीमुखवाक्यजन्यममृतं तापत्रयोद्धारकंश्रुत्वा वेदनिगूढतत्त्वजनिकां वाणीं समुल्लासिनीम् ।हित्वा मोक्षदरामतारकमिमं जाने न सारं परंनीत्वा कालमहं सुसाधकधिया वक्तुं न शक्नोम्यलम् ॥ २१॥

śrīkṛṣṇadāsa uvācapītvā śrīmukhavākyajanyamamṛtaṃ tāpatrayoddhārakaṃśrutvā vedanigūḍhatattvajanikāṃ vāṇīṃ samullāsinīm |hitvā mokṣadarāmatārakamimaṃ jāne na sāraṃ paraṃnītvā kālamahaṃ susādhakadhiyā vaktuṃ na śaknomyalam || 21||

श्रीअग्रदास उवाचयः पठेच्छ्रद्धया नित्यं पूर्वाचार्यपरम्पराम् ।मन्त्रराजरतिं प्राप्य सद्यो रामपदं व्रजेत् ॥ २२॥

śrīagradāsa uvācayaḥ paṭhecchraddhayā nityaṃ pūrvācāryaparamparām |mantrarājaratiṃ prāpya sadyo rāmapadaṃ vrajet || 22||

इति श्रीअग्रदेवाचार्यविरचितं श्रीसम्प्रदायगुरुपरम्परास्तोत्रं सम्पूर्णम् ।

iti śrīagradevācāryaviracitaṃ śrīsampradāyaguruparamparāstotraṃ sampūrṇam |