रघुनन्दनतीर्थस्तुतिः Shriraghunandanatirthastutih

ॐ ।विश्वानि देव सवितर्दुरितानि परा सुव । यद्भद्रं तन्न आ सुव ॥श्रीशः सर्वोत्तमः कृष्णो दण्डदामधरो हरिः ।श्रीमध्वहृदयावासो रूप्यपीठगतोवतात् ॥ १॥

oṃ |viśvāni deva savitarduritāni parā suva | yadbhadraṃ tanna ā suva ||śrīśaḥ sarvottamaḥ kṛṣṇo daṇḍadāmadharo hariḥ |śrīmadhvahṛdayāvāso rūpyapīṭhagatovatāt || 1||

जयन्ति जानकीजानेः पादम्भोजरजकणाः ।लेभे शिलापि यैः स्पृष्टावाचं वाक्पतिदुर्लभाम् ॥ २॥

jayanti jānakījāneḥ pādambhojarajakaṇāḥ |lebhe śilāpi yaiḥ spṛṣṭāvācaṃ vākpatidurlabhām || 2||

श्रीभारतप्रवरयुद्धरथोद्धतश्रीःपार्थैककेतनकरालविशालमूर्तिः ।उच्छैर्घनाघनघटाविकटाट्टहासःश्रीकृष्णभक्षभरणो हनुमान् पुनातु ॥ ३॥

śrībhāratapravarayuddharathoddhataśrīḥpārthaikaketanakarālaviśālamūrtiḥ |ucchairghanāghanaghaṭāvikaṭāṭṭahāsaḥśrīkṛṣṇabhakṣabharaṇo hanumān punātu || 3||

श्रीमध्वागमसिद्धभव्यविभवं सौभाग्यभाग्योदयंग्रन्थग्रन्थिविभेदने पटुतरं मायीभपञ्चाननम् ।वैराग्याङ्कुरवर्धने जलधरं श्रीमूलरामार्चकंवन्दे श्रीरघुनन्दनं यतिवृषं मध्वाध्वनीनावनम् ॥ ४॥

śrīmadhvāgamasiddhabhavyavibhavaṃ saubhāgyabhāgyodayaṃgranthagranthivibhedane paṭutaraṃ māyībhapañcānanam |vairāgyāṅkuravardhane jaladharaṃ śrīmūlarāmārcakaṃvande śrīraghunandanaṃ yativṛṣaṃ madhvādhvanīnāvanam || 4||

आ कुमारं यशो यस्य वैष्णवस्य महात्मनः ।सत्यधर्मरतः सोसौ पातु श्रीरघुनन्दनः ॥ ५॥

ā kumāraṃ yaśo yasya vaiṣṇavasya mahātmanaḥ |satyadharmarataḥ sosau pātu śrīraghunandanaḥ || 5||

रोगपङ्कार्णवे मग्नान् यः समुद्धरते नरान् ।सोपूर्ववैद्यः पुण्यात्मा पातु श्रीरघुनन्दनः ॥ ६॥

rogapaṅkārṇave magnān yaḥ samuddharate narān |sopūrvavaidyaḥ puṇyātmā pātu śrīraghunandanaḥ || 6||

त्रिकोटिरूपः प्राणो यो वामनस्यार्चकोभवत् ।तन्मुख्यवायुसेवोत्कः पातु श्रीरघुनन्दनः ॥ ७॥

trikoṭirūpaḥ prāṇo yo vāmanasyārcakobhavat |tanmukhyavāyusevotkaḥ pātu śrīraghunandanaḥ || 7||

प्राणाग्नीसूक्तवेद्यो यः पवमानो गुणोज्ज्वलः ।तन्मध्वदेवसेवोत्कः पातु श्रीरघुनन्दनः ॥ ८॥

prāṇāgnīsūktavedyo yaḥ pavamāno guṇojjvalaḥ |tanmadhvadevasevotkaḥ pātu śrīraghunandanaḥ || 8||

श्रीमध्वदेवसिद्दान्तवियद्विष्णुपदीधरम् ।रघुनन्दनतीर्थार्यं प्रणमामि मुहुर्मुहुः ॥ ९॥

śrīmadhvadevasiddāntaviyadviṣṇupadīdharam |raghunandanatīrthāryaṃ praṇamāmi muhurmuhuḥ || 9||

परैरपहृता मूलरामार्चा गुर्वनुग्रहात् ।येनानीता नमस्तस्मै रघुनन्दनभिक्षवे ॥ १०॥

parairapahṛtā mūlarāmārcā gurvanugrahāt |yenānītā namastasmai raghunandanabhikṣave || 10||

यो ब्रह्मरुद्ररविन्द्रश्चन्द्रादिनामधेश्वरः ।तन्मूलरामसेवोत्कः पातु श्रीरघुनन्दनः ॥ ११॥

yo brahmarudraravindraścandrādināmadheśvaraḥ |tanmūlarāmasevotkaḥ pātu śrīraghunandanaḥ || 11||

प्राणेशं हनुमद्भीममध्वरूपिणमन्वहम् ।ध्यायं ध्यायं पुमान् प्राज्ञः पातु श्रीरघुनन्दनः ॥ १२॥

prāṇeśaṃ hanumadbhīmamadhvarūpiṇamanvaham |dhyāyaṃ dhyāyaṃ pumān prājñaḥ pātu śrīraghunandanaḥ || 12||

श्रीमद्भागवतो योसौ जितामित्रकरोद्भवः ।स एव पातु मां नित्यं रघुनन्दनमस्करी ॥ १३॥

śrīmadbhāgavato yosau jitāmitrakarodbhavaḥ |sa eva pātu māṃ nityaṃ raghunandanamaskarī || 13||

श्रीमत्सुरेन्द्रतीर्थाय योदात् तुर्याश्रमं शुभम् ।स एव पातु मां नित्यं रघुनन्दनमस्करी ॥ १४॥

śrīmatsurendratīrthāya yodāt turyāśramaṃ śubham |sa eva pātu māṃ nityaṃ raghunandanamaskarī || 14||

पदवाक्यप्रमाणज्ञं वेदवेदाङ्गभास्करम् ।यतीन्द्रं पुण्यदं धन्यं रघुनन्दनमाश्रये ॥ १५॥

padavākyapramāṇajñaṃ vedavedāṅgabhāskaram |yatīndraṃ puṇyadaṃ dhanyaṃ raghunandanamāśraye || 15||

पुरतो राजते यस्य श्रीहनूमान् चतुर्भुजः ।स एव प्राणतत्वज्ञः पातु श्रीरघुनन्दनः ॥ १६॥

purato rājate yasya śrīhanūmān caturbhujaḥ |sa eva prāṇatatvajñaḥ pātu śrīraghunandanaḥ || 16||

विष्णोःसर्वोत्तमत्वं च सर्वदा प्रतिपादयन् ।यो राजते स एवासौ पातु श्रीरघुनन्दनः ॥ १७॥

viṣṇoḥsarvottamatvaṃ ca sarvadā pratipādayan |yo rājate sa evāsau pātu śrīraghunandanaḥ || 17||

शङ्खचक्रगदाग्रन्थधारी यः प्राणनायकः ।पुरतो राजते यस्य सोव्यान्मां रघुनन्दनः ॥ १८॥

śaṅkhacakragadāgranthadhārī yaḥ prāṇanāyakaḥ |purato rājate yasya sovyānmāṃ raghunandanaḥ || 18||

यस्यास्थीनि विशुद्धानि शङ्खचक्राङ्कितानि च ।तं वन्दे वैष्णवं धन्यं रघुनन्दनयोगिनम् ॥ १९॥

yasyāsthīni viśuddhāni śaṅkhacakrāṅkitāni ca |taṃ vande vaiṣṇavaṃ dhanyaṃ raghunandanayoginam || 19||

दिव्यं वृन्दावनं यस्य पम्पाक्षेत्रे विराजते ।स एव पातु मां नित्यं रघुनन्दनमस्करी ॥ २०॥

divyaṃ vṛndāvanaṃ yasya pampākṣetre virājate |sa eva pātu māṃ nityaṃ raghunandanamaskarī || 20||

सतां कार्याणि सिद्।ह्ध्यन्ति यद्वृन्दावनसेवया ।तं सेवे रुद्रदेवांशं रघुनन्दनयोगिनम् ॥ २१॥

satāṃ kāryāṇi sid|hdhyanti yadvṛndāvanasevayā |taṃ seve rudradevāṃśaṃ raghunandanayoginam || 21||

रघुनन्दनस्तुतिं भक्त्या ये पठन्ति दिने दिने ।तेषु श्रीजानकीजानिः प्रसन्नो भवति ध्रुवम् ॥ २२॥

raghunandanastutiṃ bhaktyā ye paṭhanti dine dine |teṣu śrījānakījāniḥ prasanno bhavati dhruvam || 22||

इति प्रबन्धपण्डित आनन्दतीर्थशर्मा आचार्यकृताश्रीरघुनन्दनतीर्थस्तुतिः सम्पूर्णा ।श्रीकृष्णार्पणमस्तु ।

iti prabandhapaṇḍita ānandatīrthaśarmā ācāryakṛtāśrīraghunandanatīrthastutiḥ sampūrṇā |śrīkṛṣṇārpaṇamastu |