विद्याशङ्करपञ्चरत्नस्तवः Shri Vidyashankara Pancharatnastavah

विद्याशङ्कर मां त्वं विद्याशं कुरु सदैव करुणाब्धे ।विद्या शं कुरुते खलु विद्या शङ्कां छिनत्ति चित्तस्थाम् ॥ १॥

vidyāśaṅkara māṃ tvaṃ vidyāśaṃ kuru sadaiva karuṇābdhe |vidyā śaṃ kurute khalu vidyā śaṅkāṃ chinatti cittasthām || 1||

चिन्तयतो हृदयाब्जे योगीन्द्रस्यास्य योगबलात् ।पुरतः प्रादुरभूतां किं करुणाब्धी गिरीन्द्रजाशम्भू ॥ २॥

cintayato hṛdayābje yogīndrasyāsya yogabalāt |purataḥ prādurabhūtāṃ kiṃ karuṇābdhī girīndrajāśambhū || 2||

सालङ्काररमापतेर्हृदि सदा ध्यानात्कृतात्सादरंतादात्म्यं किमु योगिशेखर समापन्नोऽसि नूनं गुरो ।नो चेद्दूरनिरस्तसर्वविभवस्याशाम्बरस्याप्यहोचित्रं भूषणजालमाततमिदं कस्मात्समागाद्वद ॥ ३॥

sālaṅkāraramāpaterhṛdi sadā dhyānātkṛtātsādaraṃtādātmyaṃ kimu yogiśekhara samāpanno'si nūnaṃ guro |no ceddūranirastasarvavibhavasyāśāmbarasyāpyahocitraṃ bhūṣaṇajālamātatamidaṃ kasmātsamāgādvada || 3||

विद्यातीर्थ कृपाम्बुधे कलिमलप्रध्वंसनैकव्रतप्रज्ञादानसुदीक्षित प्रणमतां मां सर्वमित्रैर्युतम् ।पाह्यम्ब्वग्निनृपादिजन्यभयतस्तद्वच्च रोगादितोदत्त्वाऽऽयुष्यमरोगतां च दृढतां विद्यां च लोकोत्तराम् ॥ ४॥

vidyātīrtha kṛpāmbudhe kalimalapradhvaṃsanaikavrataprajñādānasudīkṣita praṇamatāṃ māṃ sarvamitrairyutam |pāhyambvagninṛpādijanyabhayatastadvacca rogāditodattvā''yuṣyamarogatāṃ ca dṛḍhatāṃ vidyāṃ ca lokottarām || 4||

विद्यादाननिबद्धदीक्ष करुणावारान्निधे सद्गुरोविद्यातीर्थ ममादिशस्व सुखदं योगं द्रुतं सिद्धिदम् ।यस्माच्छीघ्रमहं प्रपद्य सकलाः सिद्धीश्च विद्यास्तथास्वात्मानन्दनिमग्नचित्तसरसीजातो भवेयं सदा ॥ ५॥

vidyādānanibaddhadīkṣa karuṇāvārānnidhe sadgurovidyātīrtha mamādiśasva sukhadaṃ yogaṃ drutaṃ siddhidam |yasmācchīghramahaṃ prapadya sakalāḥ siddhīśca vidyāstathāsvātmānandanimagnacittasarasījāto bhaveyaṃ sadā || 5||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितः श्रीविद्याशङ्करपञ्चरत्नस्तवः सम्पूर्णः ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaḥ śrīvidyāśaṅkarapañcaratnastavaḥ sampūrṇaḥ |