रामकृष्णसुप्रभातम् ३ Shri Ramakrishna Suprabhatam (3)

श्रीरामकृष्ण, परिपूर्णतमावतार, कारुण्यसागर, समुद्धृतधर्मराशे, ।भूमन्, नरेन्द्रतुलसीगुरुभूत, नित्यमाशास्महे तव गदाधर सुप्रभातम् ॥ १॥

śrīrāmakṛṣṇa, paripūrṇatamāvatāra, kāruṇyasāgara, samuddhṛtadharmarāśe, |bhūman, narendratulasīgurubhūta, nityamāśāsmahe tava gadādhara suprabhātam || 1||

श्रीमद्गयाविबुधमन्दिरविष्णुपादात् कामारपुष्करसुरालयशैवलिङ्गात् ।मायागुणोत्तरचिदम्बरमण्डलाच्च मर्त्त्यात्मनावतरतस्तव सुप्रभातम् ॥ २॥

śrīmadgayāvibudhamandiraviṣṇupādāt kāmārapuṣkarasurālayaśaivaliṅgāt |māyāguṇottaracidambaramaṇḍalācca marttyātmanāvataratastava suprabhātam || 2||

कामारपुष्करमहीतललब्धजाते, चन्द्रातनूज, भगवन्, क्षुदिरामसूनो, ।कन्दर्पसुन्दरतनो, स्मितशोभितास्य, भक्तानुकूलविहृते, तव सुप्रभातम् ॥ ३॥

kāmārapuṣkaramahītalalabdhajāte, candrātanūja, bhagavan, kṣudirāmasūno, |kandarpasundaratano, smitaśobhitāsya, bhaktānukūlavihṛte, tava suprabhātam || 3||

लम्बालकावलिलसन्निटिलान्तरस्य स्मेरावलोकपरिशोभिमुखाम्बुजस्य ।चन्द्राङ्कशायिकमनीयकलेवरस्य कैशोरवैभवभृतस्तव सुप्रभातम् ॥ ४॥

lambālakāvalilasanniṭilāntarasya smerāvalokapariśobhimukhāmbujasya |candrāṅkaśāyikamanīyakalevarasya kaiśoravaibhavabhṛtastava suprabhātam || 4||

कौमारकेलिपरितोषितबन्धुवर्ग, निश्शेषलोकहृदयङ्गमशीलशालिन्, ।आजन्मबुद्धपरिशुद्धविमुक्तचित्त, हृद्वागगम्यमहिमंस्तव सुप्रभातम् ॥ ५॥

kaumārakeliparitoṣitabandhuvarga, niśśeṣalokahṛdayaṅgamaśīlaśālin, |ājanmabuddhapariśuddhavimuktacitta, hṛdvāgagamyamahimaṃstava suprabhātam || 5||

नीलाभ्रदर्शनविमूर्च्छितशुद्धबुद्धे, कात्यायनीस्मरणलब्धसमाधिवृत्ते, ।तद्वेषमात्रसमुपार्जितशर्वभाव, शश्वत्समाहितमनस्तव सुप्रभातम् ॥ ६॥

nīlābhradarśanavimūrcchitaśuddhabuddhe, kātyāyanīsmaraṇalabdhasamādhivṛtte, |tadveṣamātrasamupārjitaśarvabhāva, śaśvatsamāhitamanastava suprabhātam || 6||

नानाविनोदरत, चित्रकलाविदग्ध, सङ्गीतकोविद, कथाभिनयप्रवीण, ।आमुग्धताण्डवपटो, सरसोक्तिदक्ष, शिल्पक्रियाकुशलधीस्तव सुप्रभातम् ॥ ७॥

nānāvinodarata, citrakalāvidagdha, saṅgītakovida, kathābhinayapravīṇa, |āmugdhatāṇḍavapaṭo, sarasoktidakṣa, śilpakriyākuśaladhīstava suprabhātam || 7||

कौमारचापलकृतैर्विविधैर्विहारैः सङ्गीतनाट्यनटनादिमयैर्विनोदैः ।विस्मार्यसंसृतिशुचःस्वजनानशेषान् मोदेनिमज्जितवतस्तव सुप्रभातम् ॥ ८॥

kaumāracāpalakṛtairvividhairvihāraiḥ saṅgītanāṭyanaṭanādimayairvinodaiḥ |vismāryasaṃsṛtiśucaḥsvajanānaśeṣān modenimajjitavatastava suprabhātam || 8||

आपादितोपनयनक्रिय,भक्तिवश्य, धानीकरप्रतिगृहीतपवित्रभिक्ष, ।आविष्टपाठनिलयोज्झितशुष्कविद्य, सत्यैकमार्गणरुचे तव सुप्रभातम् ॥ ९॥

āpāditopanayanakriya,bhaktivaśya, dhānīkarapratigṛhītapavitrabhikṣa, |āviṣṭapāṭhanilayojjhitaśuṣkavidya, satyaikamārgaṇaruce tava suprabhātam || 9||

भ्रातुः प्रियार्थमतिदूरदिशङ्गतस्य शोकाब्धिमज्जितसमस्तसुहृद्गणस्य ।श्रीदक्षिणेश्वरसुरालयवासगृह्णोरुच्चैर्निरङ्कुशगतेस्तव सुप्रभातम् ॥ १०॥

bhrātuḥ priyārthamatidūradiśaṅgatasya śokābdhimajjitasamastasuhṛdgaṇasya |śrīdakṣiṇeśvarasurālayavāsagṛhṇoruccairniraṅkuśagatestava suprabhātam || 10||

कालीपदाम्बुजसमर्चनलालसस्य तद्धिप्रयोगकठिनव्यसनातुरस्य ।निश्शेषरोमविवरस्रुतरक्तबिन्दोर्मूर्च्छाभिभूतमनसस्तव सुप्रभातम् ॥ ११॥

kālīpadāmbujasamarcanalālasasya taddhiprayogakaṭhinavyasanāturasya |niśśeṣaromavivarasrutaraktabindormūrcchābhibhūtamanasastava suprabhātam || 11||

त्यक्तान्नपानशयनादिशरीरधर्मान्, शश्वद्धरातललुठल् कमनीयमूर्ते, ।अम्बाभिधानमुखरीकृतपुण्यकण्ठ, त्रैलोक्यपावन, विभो, तव सुप्रभातम् ॥ १२॥

tyaktānnapānaśayanādiśarīradharmān, śaśvaddharātalaluṭhal kamanīyamūrte, |ambābhidhānamukharīkṛtapuṇyakaṇṭha, trailokyapāvana, vibho, tava suprabhātam || 12||

खड्गेनकण्ठदलनायसमुद्यतस्य सद्योविलोकितजगज्जननीमुखस्य ।तत्कान्तिवीचिकबलीकृतविग्रहस्य सम्मूर्च्छयाप्रपततस्तव सुप्रभातम् ॥ १३॥

khaḍgenakaṇṭhadalanāyasamudyatasya sadyovilokitajagajjananīmukhasya |tatkāntivīcikabalīkṛtavigrahasya sammūrcchayāprapatatastava suprabhātam || 13||

कालीनिरन्तरनिरीक्षणनन्दितस्य वातात्मजेन परमैक्य ।रामोपधावनपरस्य तदीयसाक्षात्कारानुरज्जितधियस्तव सुप्रभातम् ॥ १४॥

kālīnirantaranirīkṣaṇananditasya vātātmajena paramaikya |rāmopadhāvanaparasya tadīyasākṣātkārānurajjitadhiyastava suprabhātam || 14||

निष्कामलोभमदमत्सरमानसस्य सच्छिक्षणार्थकृतदारपरिग्रहस्य ।वैतृष्ण्यविस्मृतविवाहकथस्यसाधोः श्रीशारदामणिपतेस्तव सुप्रभातम् ॥ १५॥

niṣkāmalobhamadamatsaramānasasya sacchikṣaṇārthakṛtadāraparigrahasya |vaitṛṣṇyavismṛtavivāhakathasyasādhoḥ śrīśāradāmaṇipatestava suprabhātam || 15||

सर्वाङ्गदाहशमनार्थमुदप्लुतस्य श्रीभैरवीविहितभेषजनिर्वृतस्य ।तन्त्रोक्तसाधनसहस्रनिषेवकस्य सर्वेषुसिद्धिमयतस्तव सुप्रभातम् ॥ १६॥

sarvāṅgadāhaśamanārthamudaplutasya śrībhairavīvihitabheṣajanirvṛtasya |tantroktasādhanasahasraniṣevakasya sarveṣusiddhimayatastava suprabhātam || 16||

स्वस्याङ्गतस्सुकृतपातकरूपपुंसोर्निर्याणमुत्कटपरस्परमल्लयुद्धम् ।पुण्येनपापहननञ्चनिशम्यसाक्षाच्छान्तज्वरस्यसुखिनस्तव सुप्रभातम् ॥ १७॥

svasyāṅgatassukṛtapātakarūpapuṃsorniryāṇamutkaṭaparasparamallayuddham |puṇyenapāpahananañcaniśamyasākṣācchāntajvarasyasukhinastava suprabhātam || 17||

स्वर्णे तृणे मलयजे विषि तुल्यदृष्टे जीवे शिवे नृषु मृगेषु समानबुद्धे ।भिक्षौ गृहिण्यविषमं प्रसमीक्ष्यमाणस्स्यान्तर्बहिर्समदृशस्तव सुप्रभातम् ॥ १८॥

svarṇe tṛṇe malayaje viṣi tulyadṛṣṭe jīve śive nṛṣu mṛgeṣu samānabuddhe |bhikṣau gṛhiṇyaviṣamaṃ prasamīkṣyamāṇassyāntarbahirsamadṛśastava suprabhātam || 18||

भोगेषु योगविभवेषु विरागशालिन्, क्षेत्रेषु वेशभवनेषु परात्मदर्शिन्, ।शिष्टेषु दुष्टनिकरेषु कृपादिवर्षिन्, त्रैलोक्यपावनयशस्तव सुप्रभातम् ॥ १९॥

bhogeṣu yogavibhaveṣu virāgaśālin, kṣetreṣu veśabhavaneṣu parātmadarśin, |śiṣṭeṣu duṣṭanikareṣu kṛpādivarṣin, trailokyapāvanayaśastava suprabhātam || 19||

अन्तर्बहिश्च भुवनत्रितयंसमस्तं सर्वेश्वरस्यमहसा तिमितं ततं च ।आलक्ष्यहर्षजवधर्षितमानसस्य मत्तप्रनर्त्तनभृतस्तव सुप्रभातम् ॥ २०॥

antarbahiśca bhuvanatritayaṃsamastaṃ sarveśvarasyamahasā timitaṃ tataṃ ca |ālakṣyaharṣajavadharṣitamānasasya mattapranarttanabhṛtastava suprabhātam || 20||

आलोक्यलोकजननी प्रतिमां प्रदीपानाराधनोपकरणानि समर्चकांश्च ।देवालयं च सकलानि चिदात्मकानि विष्वक्सुमानि किरतस्तव सुप्रभातम् ॥ २१॥

ālokyalokajananī pratimāṃ pradīpānārādhanopakaraṇāni samarcakāṃśca |devālayaṃ ca sakalāni cidātmakāni viṣvaksumāni kiratastava suprabhātam || 21||

राधाप्रविष्टहृदयस्यतदात्मकस्य माधुर्यभावमधुपानमदोल्कस्य ।प्रेयोवियोगदवतप्तकलेवरस्य निर्जीवसाम्यमयतस्तव सुप्रभातम् ॥ २२॥

rādhāpraviṣṭahṛdayasyatadātmakasya mādhuryabhāvamadhupānamadolkasya |preyoviyogadavataptakalevarasya nirjīvasāmyamayatastava suprabhātam || 22||

गोपालनन्दन निरीक्षणविज्वरस्य तन्नित्ययोग परमोत्सवनिर्वृतस्य ।सर्वत्र तत्तनुविलोकनविस्मितस्य तत्सात्मताङ्गतवतस्तव सुप्रभातम् ॥ २३॥

gopālanandana nirīkṣaṇavijvarasya tannityayoga paramotsavanirvṛtasya |sarvatra tattanuvilokanavismitasya tatsātmatāṅgatavatastava suprabhātam || 23||

भक्तोत्तमो महितभागवतं पुराणं तत्संश्रयश्च भगवानिति कीर्तितस्य ।वस्तुत्रयस्य परमैक्यमहारहस्यं साक्षाद्विलोकितवतस्तव सुप्रभातम् ॥ २४॥

bhaktottamo mahitabhāgavataṃ purāṇaṃ tatsaṃśrayaśca bhagavāniti kīrtitasya |vastutrayasya paramaikyamahārahasyaṃ sākṣādvilokitavatastava suprabhātam || 24||

अन्यादृशात्मतपसामनुभावहेतोरेकैकरोमविवरात् स्वतनोर्गलन्तीम् ।आलक्ष्यकान्तिमभिनन्दितुमक्षमस्य तन्नष्टयेस्पृहयतस्तव सुप्रभातम् ॥ २५॥

anyādṛśātmatapasāmanubhāvahetorekaikaromavivarāt svatanorgalantīm |ālakṣyakāntimabhinanditumakṣamasya tannaṣṭayespṛhayatastava suprabhātam || 25||

अस्तेयसत्यकरुणादियमैर्यतस्य कार्येनसाधनचतुष्टयपुष्कलस्य ।अज्ञानतोऽपिकनकादिसमस्तलोहस्पर्शाक्षमस्य भगवन्, तव सुप्रभातम् ॥ २६॥

asteyasatyakaruṇādiyamairyatasya kāryenasādhanacatuṣṭayapuṣkalasya |ajñānato'pikanakādisamastalohasparśākṣamasya bhagavan, tava suprabhātam || 26||

पूगादियत् किमपिवस्तु करारविन्दे सङ्गृह्यते यदि कदापि निजोपयुक्तैः ।तञ्जिसा कुरुटतामतिमूढतांश्च सम्प्राप्यकश्मलभुजस्तव सुप्रभातम् ॥ २७॥

pūgādiyat kimapivastu karāravinde saṅgṛhyate yadi kadāpi nijopayuktaiḥ |tañjisā kuruṭatāmatimūḍhatāṃśca samprāpyakaśmalabhujastava suprabhātam || 27||

सन्ताडनस्य परकायनिपातितस्य सुस्पष्टचिह्नमखिलात्मतया स्वदेहे ।सङ्क्रान्तमत्भुतविमोहितमानुषाणां नेत्रस्य गोचरयतस्तव सुप्रभातम् ॥ २८॥

santāḍanasya parakāyanipātitasya suspaṣṭacihnamakhilātmatayā svadehe |saṅkrāntamatbhutavimohitamānuṣāṇāṃ netrasya gocarayatastava suprabhātam || 28||

तोतापुरीचरणभक्त, ततोगृहीत संन्यासदीक्ष, विदितस्वपरात्मभाव, ।मासान्षडुञ्झितविकल्पमहासमाधौ निर्म्मज्यसंस्थित, विभो, तव सुप्रभातम् ॥ २९॥

totāpurīcaraṇabhakta, tatogṛhīta saṃnyāsadīkṣa, viditasvaparātmabhāva, |māsānṣaḍuñjhitavikalpamahāsamādhau nirmmajyasaṃsthita, vibho, tava suprabhātam || 29||

आचारपूतकरणस्य शुभाशयस्य बद्धासनस्य विजितानल पञ्चकस्य ।प्रत्याहृतेन्द्रियगणस्य समाहितस्य ब्रह्मामृतरसयतस्तव सुप्रभातम् ॥ ३०॥

ācārapūtakaraṇasya śubhāśayasya baddhāsanasya vijitānala pañcakasya |pratyāhṛtendriyagaṇasya samāhitasya brahmāmṛtarasayatastava suprabhātam || 30||

स्वेच्छागृहीत मथुरप्रमदामयस्य वर्षार्द्धभुक्त बहुदुस्सहयातनस्य ।इत्थं शनैर्जडसमाधि समुत्थितस्य स्थानत्रयं गतवतस्तव सुप्रभातम् ॥ ३१॥

svecchāgṛhīta mathurapramadāmayasya varṣārddhabhukta bahudussahayātanasya |itthaṃ śanairjaḍasamādhi samutthitasya sthānatrayaṃ gatavatastava suprabhātam || 31||

इस्लाम्मतोत्सुक, मुहम्मदमूर्तिदर्शिन्, येशोन्निरीक्षित, विलोकितगौरकृष्ण ।तेषामशेषवपुषांस्वतनौप्रवेशं निर्वण्यविस्मृतमते, तव सुप्रभातम् ॥ ३२॥

islāmmatotsuka, muhammadamūrtidarśin, yeśonnirīkṣita, vilokitagaurakṛṣṇa |teṣāmaśeṣavapuṣāṃsvatanaupraveśaṃ nirvaṇyavismṛtamate, tava suprabhātam || 32||

साक्षात्कृतेश गिरिजाच्युतरामराधा सीताञ्जनेयनबिकृस्तु शचीतनूज ।अन्यैरदृष्टचरयोगरहस्यवेदिन्, सङ्क्षुण्णसर्वसरणे, तव सुप्रभातम् ॥ ३३॥

sākṣātkṛteśa girijācyutarāmarādhā sītāñjaneyanabikṛstu śacītanūja |anyairadṛṣṭacarayogarahasyavedin, saṅkṣuṇṇasarvasaraṇe, tava suprabhātam || 33||

त्यक्त्वाविकल्परहितां जडयोगनिद्रामम्बाज्ञयाकुशलभावमुखस्थितस्य ।लोकम्महेश्वरमपिस्फुटमेककाले सम्पश्यतो खिलगुरोस्तव सुप्रभातम् ॥ ३४॥

tyaktvāvikalparahitāṃ jaḍayoganidrāmambājñayākuśalabhāvamukhasthitasya |lokammaheśvaramapisphuṭamekakāle sampaśyato khilagurostava suprabhātam || 34||

पादाब्जचङ्क्रमणपावितसर्वतीर्थ, काशीमृताखिलसमार्जितमोक्षसाक्षिन्, ।आर्त्तव्यथात् द्रवदुदारमते, दरिद्रनारायणार्चनरते, तव सुप्रभातम् ॥ ३५॥

pādābjacaṅkramaṇapāvitasarvatīrtha, kāśīmṛtākhilasamārjitamokṣasākṣin, |ārttavyathāt dravadudāramate, daridranārāyaṇārcanarate, tava suprabhātam || 35||

दीर्घप्रतप्तबहुरूपतपोविलास, नानाबुभुत्सुजनसन्ततवेष्ट्यमान, ।निश्शेषपात्रपरिवेषितमोक्षभैक्ष, सञ्जीवितार्षधरणे, तव सुप्रभातम् ॥ ३६॥

dīrghaprataptabahurūpatapovilāsa, nānābubhutsujanasantataveṣṭyamāna, |niśśeṣapātrapariveṣitamokṣabhaikṣa, sañjīvitārṣadharaṇe, tava suprabhātam || 36||

लूचीविपाटनसमुद्यमनेकदाचित् यस्यक्षतात् करतलात् रुधिरञ्जगाल ।तेनप्रसूनमृदुनावपुषातपांसि विश्वोत्तराणिचरतस्तव सुप्रभातम् ॥ ३७॥

lūcīvipāṭanasamudyamanekadācit yasyakṣatāt karatalāt rudhirañjagāla |tenaprasūnamṛdunāvapuṣātapāṃsi viśvottarāṇicaratastava suprabhātam || 37||

पत्न्यैस्वपादभजनावसरप्रदायिन्, मातुर्निरन्तरहिताचरणावधायिन्, ।काल्यास्समर्चननुतिप्रणिधानशालिन्, अद्वैतभावितमते, तव सुप्रभातम् ॥ ३८॥

patnyaisvapādabhajanāvasarapradāyin, māturnirantarahitācaraṇāvadhāyin, |kālyāssamarcananutipraṇidhānaśālin, advaitabhāvitamate, tava suprabhātam || 38||

श्रीशारदां परममङ्गलभर्तृपादसंवाहनं परिसमाप्यततोऽपयाताम् ।भक्त्यापरोक्षमनुवासरमव्यलीकं कालीधियाप्रणमतस्तव सुप्रभातम् ॥ ३९॥

śrīśāradāṃ paramamaṅgalabhartṛpādasaṃvāhanaṃ parisamāpyatato'payātām |bhaktyāparokṣamanuvāsaramavyalīkaṃ kālīdhiyāpraṇamatastava suprabhātam || 39||

श्रीशारदाहृदयशुद्धिपरीक्षकस्य तत्तीव्रभोगविरतौमुदिताशयस्य ।साकं तया निशि विकारमृते शयित्वा स्वप्रत्ययन्दृढतयस्तव सुप्रभातम् ॥ ४०॥

śrīśāradāhṛdayaśuddhiparīkṣakasya tattīvrabhogavirataumuditāśayasya |sākaṃ tayā niśi vikāramṛte śayitvā svapratyayandṛḍhatayastava suprabhātam || 40||

लीलासहायविरहव्यथितान्तरङ्ग, तेषामुपागमनदर्शनसुप्रसन्न, ।तेषाम्पुरः प्रकटितात्ममहाप्रभाव, स्वामिन् जगत्रयगुरो, तव सुप्रभातम् ॥ ४१॥

līlāsahāyavirahavyathitāntaraṅga, teṣāmupāgamanadarśanasuprasanna, |teṣāmpuraḥ prakaṭitātmamahāprabhāva, svāmin jagatrayaguro, tava suprabhātam || 41||

आजन्मशुद्धचरितस्य तपोधनस्य दिव्यानुभूतिरसिकस्य दयादितस्य ।शिष्यावृतस्य जगदुद्धरणोत्सुकस्य धर्मात्मकस्य सततं तव सुप्रभातम् ॥ ४२॥

ājanmaśuddhacaritasya tapodhanasya divyānubhūtirasikasya dayāditasya |śiṣyāvṛtasya jagaduddharaṇotsukasya dharmātmakasya satataṃ tava suprabhātam || 42||

नानामतस्थनत, तत्तदुपास्यमूर्त्या प्रत्येकमर्चकजनेषुविराजमान ।भक्तेस्वरूपमवलम्ब्य, विना तु रूपं विज्ञे, प्रकाशनपटो, तव सुप्रभातम् ॥ ४३॥

nānāmatasthanata, tattadupāsyamūrtyā pratyekamarcakajaneṣuvirājamāna |bhaktesvarūpamavalambya, vinā tu rūpaṃ vijñe, prakāśanapaṭo, tava suprabhātam || 43||

काली नरेन्द्र तुलसी शशि बाबुराम राखाल तारक सुबोध गिरीशवन्ध, ।गोपाल लाट्टु हरि योगि शरत् प्रसन्न गङ्गा निरञ्जनगुरो, तव सुप्रभातम् ॥ ४४॥

kālī narendra tulasī śaśi bāburāma rākhāla tāraka subodha girīśavandha, |gopāla lāṭṭu hari yogi śarat prasanna gaṅgā nirañjanaguro, tava suprabhātam || 44||

देवेन्द्र राम हरिपाद महेन्द्र पूर्ण वैकुण्ठ कालिपद नागमहाशयेड्य, ।गोलाब घोरमणिलालित योगिनीमा गौरीपणायित, विभो, तव सुप्रभातम् ॥ ४५॥

devendra rāma haripāda mahendra pūrṇa vaikuṇṭha kālipada nāgamahāśayeḍya, |golāba ghoramaṇilālita yoginīmā gaurīpaṇāyita, vibho, tava suprabhātam || 45||

श्रीवास रासमणि केशव तेजचन्द्र नारायण द्विज हृदुप्रमुखार्चिताङ्घ्रे, ।श्रीब्राह्मणीप्रभृतिनैजमहागुरूणां विज्ञानपूरक, विभो, तव सुप्रभातम् ॥ ४६॥

śrīvāsa rāsamaṇi keśava tejacandra nārāyaṇa dvija hṛdupramukhārcitāṅghre, |śrībrāhmaṇīprabhṛtinaijamahāgurūṇāṃ vijñānapūraka, vibho, tava suprabhātam || 46||

श्रीभैरवीमखिलभेदविहीनबोधे तोतापुरीङ्गिरिसुताङ्घ्रिसरोजभक्तौ ।सम्यङनियम्य बहुशो गुरुतां गुरुणां स्वस्यप्रदर्शितवतस्तव सुप्रभातम् ॥ ४७॥

śrībhairavīmakhilabhedavihīnabodhe totāpurīṅgirisutāṅghrisarojabhaktau |samyaṅaniyamya bahuśo gurutāṃ guruṇāṃ svasyapradarśitavatastava suprabhātam || 47||

गोपालबालकसमक्ष, मघोरमण्या नानावतारजलधे, पुरतस्तुकाल्याम् ।मेरीसुतप्रभुदयालुविलोचनेच सर्वप्रियाकृतिकृते, तव सुप्रभातम् ॥ ४८॥

gopālabālakasamakṣa, maghoramaṇyā nānāvatārajaladhe, puratastukālyām |merīsutaprabhudayāluvilocaneca sarvapriyākṛtikṛte, tava suprabhātam || 48||

दैन्यार्प्पणात्तदुपशान्त्यभियाचनार्थं दैवोपकण्ठनयनात्तदयाचनाच्ची ।अन्यं कुचेलमति भक्तनरेन्द्रनाथे कौतूहलेन सृजतस्तव सुप्रभातम् ॥ ४९॥

dainyārppaṇāttadupaśāntyabhiyācanārthaṃ daivopakaṇṭhanayanāttadayācanāccī |anyaṃ kucelamati bhaktanarendranāthe kautūhalena sṛjatastava suprabhātam || 49||

चित्तप्रलोभकरयौगिकसिद्धिराशेरत्यत्भुतप्रकटनं क्वचिदप्यकृत्वा ।शुद्धानुरागभरशृङ्खलयैव लोकानाकर्षतो निजपदं तव सुप्रभातम् ॥ ५०॥

cittapralobhakarayaugikasiddhirāśeratyatbhutaprakaṭanaṃ kvacidapyakṛtvā |śuddhānurāgabharaśṛṅkhalayaiva lokānākarṣato nijapadaṃ tava suprabhātam || 50||

चेष्टानृणाम्बहुविधाननुकृत्यकांश्चिदेकान् प्रदर्श्यनिजनित्यसमाधियोगान् ।अन्यांश्चभक्तिरभसादसकृत् प्रनृत्य भक्तान् सदारमयतस्तव सुप्रभातम् ॥ ५१॥

ceṣṭānṛṇāmbahuvidhānanukṛtyakāṃścidekān pradarśyanijanityasamādhiyogān |anyāṃścabhaktirabhasādasakṛt pranṛtya bhaktān sadāramayatastava suprabhātam || 51||

आलोकनेन हसनेन विनोदनेन संवाहनेन हृदयङ्गमभाषणेन ।अध्यापनेन मधुरान्नसमर्पणेन भक्तान् मुहुः सुखयतस्तव सुप्रभातम् ॥ ५२॥

ālokanena hasanena vinodanena saṃvāhanena hṛdayaṅgamabhāṣaṇena |adhyāpanena madhurānnasamarpaṇena bhaktān muhuḥ sukhayatastava suprabhātam || 52||

नित्योन्मिषत्सरसनर्मविजल्पनेन सर्वश्रुतिश्रुतिनिषेचकगायनेन ।ब्रह्माण्डमण्डलविघूर्णकताण्डवेन शिष्योत्करान् वशयतस्तव सुप्रभातम् ॥ ५३॥

nityonmiṣatsarasanarmavijalpanena sarvaśrutiśrutiniṣecakagāyanena |brahmāṇḍamaṇḍalavighūrṇakatāṇḍavena śiṣyotkarān vaśayatastava suprabhātam || 53||

वेदैःपुराणनिकरैःस्मृतिभिश्चसम्यक् स्पष्टानयोभवतितं गहनं स्वधर्मम् ।स्वाचारतस्सुललितैश्चनिजोपदेशैः एकान्ततस्फुटयतस्तव सुप्रभातम् ॥ ५४॥

vedaiḥpurāṇanikaraiḥsmṛtibhiścasamyak spaṣṭānayobhavatitaṃ gahanaṃ svadharmam |svācāratassulalitaiścanijopadeśaiḥ ekāntatasphuṭayatastava suprabhātam || 54||

चेतोहरैर्विवरणैरुपपादनैश्च वेदान्ततत्वमतिदुर्ग्रहमाश्रितानाम् ।क्लेशं विना करतलामलकोपमानं भूयस्तरां स्फुटयतस्तव सुप्रभातम् ॥ ५५॥

cetoharairvivaraṇairupapādanaiśca vedāntatatvamatidurgrahamāśritānām |kleśaṃ vinā karatalāmalakopamānaṃ bhūyastarāṃ sphuṭayatastava suprabhātam || 55||

सन्मण्डलेन सहसंवदतः कदाचिदातन्वतः सरसताण्डवमन्यकाले ।कुत्रापि भेदरहिते पततस्समाधौ विश्वस्य विस्मयपुषस्तव सुप्रभातम् ॥ ५६॥

sanmaṇḍalena sahasaṃvadataḥ kadācidātanvataḥ sarasatāṇḍavamanyakāle |kutrāpi bhedarahite patatassamādhau viśvasya vismayapuṣastava suprabhātam || 56||

संशोधकस्य कृतपातकसञ्चयानां वैराग्यदस्य विमलीकृतमानसानाम् ।निर्वेदिनां तनुभृतां अपवर्गदातुस्सर्वैस्समाश्रितपदस्तव सुप्रभातम् ॥ ५७॥

saṃśodhakasya kṛtapātakasañcayānāṃ vairāgyadasya vimalīkṛtamānasānām |nirvedināṃ tanubhṛtāṃ apavargadātussarvaissamāśritapadastava suprabhātam || 57||

स्पर्शेन मन्त्रचणनेन निरीक्षणेन सङ्कल्पनेन च यथेष्टमशेषजीवान् ।क्लेशं विनैव सहसाभवभीमसिन्धोरुद्धर्तुमीश, भगवन्, तव सुप्रभातम् ॥ ५८॥

sparśena mantracaṇanena nirīkṣaṇena saṅkalpanena ca yatheṣṭamaśeṣajīvān |kleśaṃ vinaiva sahasābhavabhīmasindhoruddhartumīśa, bhagavan, tava suprabhātam || 58||

भक्तिक्रियाद्यखिलयोगपथाध्वगस्य दुर्गामृडादिसकलेश्वरदर्शकस्य ।अद्वैततुङ्गपदवी परिनिष्ठितस्य कारुण्यपीडितधियस्तव सुप्रभातम् ॥ ५९॥

bhaktikriyādyakhilayogapathādhvagasya durgāmṛḍādisakaleśvaradarśakasya |advaitatuṅgapadavī pariniṣṭhitasya kāruṇyapīḍitadhiyastava suprabhātam || 59||

मुक्तात्मनोप्यखिललोकमहागुरोरप्येकान्त मुग्धशिशुवद्जगदम्बिकायाः ।वस्त्राञ्जलेऽतिकुतुकेन सदाविलम्ब्य वैवश्यतः प्रलपतस्तव सुप्रभातम् ॥ ६०॥

muktātmanopyakhilalokamahāgurorapyekānta mugdhaśiśuvadjagadambikāyāḥ |vastrāñjale'tikutukena sadāvilambya vaivaśyataḥ pralapatastava suprabhātam || 60||

योगाद्यसङ्ख्यविधसाधनपुष्पजातेर्माध्वीं विलिह्य परितृप्तिवशादिवान्ते ।कालीपदाब्जमकरन्दरसैकतृष्णामागृह्णतस्सदलितस्तव सुप्रभातम् ॥ ६१॥

yogādyasaṅkhyavidhasādhanapuṣpajātermādhvīṃ vilihya paritṛptivaśādivānte |kālīpadābjamakarandarasaikatṛṣṇāmāgṛhṇatassadalitastava suprabhātam || 61||

भिक्षुव्रतान्यनतिलङ्ख्य गृहस्थभावं शास्त्रप्रपञ्चमनधीत्य विचक्षणत्वम्लाक ।शस्त्रप्रयोगमनपेक्ष्यच दिग्जयित्वं स्वस्मिन् सुखङ्घटयतस्तव सुप्रभातम् ॥ ६२॥

bhikṣuvratānyanatilaṅkhya gṛhasthabhāvaṃ śāstraprapañcamanadhītya vicakṣaṇatvamlāka |śastraprayogamanapekṣyaca digjayitvaṃ svasmin sukhaṅghaṭayatastava suprabhātam || 62||

कृस्त्यानिभिर्महितमेरितनूजभावाद् अल्लाहुसम्मिततया च मुहम्मदीयैः ।नानाविधया च शिखधर्मिशिखावतंस्यैराराधितस्य भवता तव सुप्रभातम् ॥ ६३॥

kṛstyānibhirmahitameritanūjabhāvād allāhusammitatayā ca muhammadīyaiḥ |nānāvidhayā ca śikhadharmiśikhāvataṃsyairārādhitasya bhavatā tava suprabhātam || 63||

विप्रस्यपुल्कसगृहाजिरमार्जिकस्य योगाधिरूढमनसःप्रतिमार्चकस्य ।मायाधिपस्य निजभक्तवशंवदस्य धर्मान् पिपालयिषतस्तव सुप्रभातम् ॥ ६४॥

viprasyapulkasagṛhājiramārjikasya yogādhirūḍhamanasaḥpratimārcakasya |māyādhipasya nijabhaktavaśaṃvadasya dharmān pipālayiṣatastava suprabhātam || 64||

अज्ञस्यसर्वविदुषःकमनीमयस्य पुंसश्शिशोः प्रवयस्रो बलवर्ज्जितस्य ।शक्तस्य शिष्यतिलकस्यगुरुन्तमस्य जीवस्य केवलचितस्तव सुप्रभातम् ॥ ६५॥

ajñasyasarvaviduṣaḥkamanīmayasya puṃsaśśiśoḥ pravayasro balavarjjitasya |śaktasya śiṣyatilakasyaguruntamasya jīvasya kevalacitastava suprabhātam || 65||

सम्मूढवद्बुधजनैःखलवन्नृशंसैः सन्मानुषैस्सुजनवमुनिवद्वनस्थैः ।मुक्तात्मभिःपरमहंसवदात्मभक्तैः सर्वेशवद्कृतमितेस्तव सुप्रभातम् ॥ ६६॥

sammūḍhavadbudhajanaiḥkhalavannṛśaṃsaiḥ sanmānuṣaissujanavamunivadvanasthaiḥ |muktātmabhiḥparamahaṃsavadātmabhaktaiḥ sarveśavadkṛtamitestava suprabhātam || 66||

पुण्या निजप्रतिकृतिं कुहचिद्विलोक्य लोकाम्बिकैवनिवसत्यपरोक्षमस्याम् ।इत्थ निगद्य सकुतूहलमाशुतस्यै पुष्पाञ्जलिं कृतवतस्तव सुप्रभातम् ॥ ६७॥

puṇyā nijapratikṛtiṃ kuhacidvilokya lokāmbikaivanivasatyaparokṣamasyām |ittha nigadya sakutūhalamāśutasyai puṣpāñjaliṃ kṛtavatastava suprabhātam || 67||

विप्राग्रगण्य, नृपपुङ्गव, वैश्यशूद्रवर्णिन्, गृहस्थ, विपिनस्थ, यतिप्रधान, ।ज्ञानिन्, क्रियानिरत, योगिवरेण्य, भक्त, सर्वात्मकाखिलगुरो, तव सुप्रभातम् ॥ ६८॥

viprāgragaṇya, nṛpapuṅgava, vaiśyaśūdravarṇin, gṛhastha, vipinastha, yatipradhāna, |jñānin, kriyānirata, yogivareṇya, bhakta, sarvātmakākhilaguro, tava suprabhātam || 68||

नस्पन्दितुं त्रिभुवनैकतमोपिजन्तुशक्नोति यस्य करुणादृशमन्तरेण ।तं सर्वशक्तमखिलेश्वरमात्मदेहे पूर्णात्मनैववहतस्तव सुप्रभातम् ॥ ६९॥

naspandituṃ tribhuvanaikatamopijantuśaknoti yasya karuṇādṛśamantareṇa |taṃ sarvaśaktamakhileśvaramātmadehe pūrṇātmanaivavahatastava suprabhātam || 69||

सम्मोहसंशयभयामयतापकोपवैषम्य जन्ममरणादि मनुष्यधर्मान् ।स्वस्मिन् प्रदर्श्यसविलासमनर्हलोकान् प्रायोमुहुश्छलयतस्तव सुप्रभातम् ॥ ७०॥

sammohasaṃśayabhayāmayatāpakopavaiṣamya janmamaraṇādi manuṣyadharmān |svasmin pradarśyasavilāsamanarhalokān prāyomuhuśchalayatastava suprabhātam || 70||

काली, कपालि, नबि, कृस्तु, मुनीन्द्र, सीता राधा, शचीतनय, राम, मुरान्तकादि ।मूर्तीनिजेवपुषिवासयतोऽपिगूढं मूढात्मनाविलसतस्तव सुप्रभातम् ॥ ७१॥

kālī, kapāli, nabi, kṛstu, munīndra, sītā rādhā, śacītanaya, rāma, murāntakādi |mūrtīnijevapuṣivāsayato'pigūḍhaṃ mūḍhātmanāvilasatastava suprabhātam || 71||

स्फूर्ज्जत्रयीनिटिलवाचकगज्जितस्य शश्वत्प्रकीर्णनिरुपाधिकृपामृतस्य ।क्वापिस्फुरत् स्वगुरुभावतडिल्लतस्य सच्चित्धनस्यभवतात्तव सुप्रभातम् ॥ ७२॥

sphūrjjatrayīniṭilavācakagajjitasya śaśvatprakīrṇanirupādhikṛpāmṛtasya |kvāpisphurat svagurubhāvataḍillatasya saccitdhanasyabhavatāttava suprabhātam || 72||

यत् पादपांसुलुठनङ्कमलासनाद्याः मत्वाऽपुनर्भवसुखादपिकामनीयम् ।तत्सिद्धयेकठिनसंयममाचरन्ति तस्यत्रिविष्टपपतेः तव सुप्रभातम् ॥ ७३॥

yat pādapāṃsuluṭhanaṅkamalāsanādyāḥ matvā'punarbhavasukhādapikāmanīyam |tatsiddhayekaṭhinasaṃyamamācaranti tasyatriviṣṭapapateḥ tava suprabhātam || 73||

नैवाध्वरो न नियमो न यमो न होमो नो दक्षिणा न च जपो न च तीर्थयात्रा ।यत्पादसेवनलवस्यकलाक्वचित् स्यात्तस्याप्रमेयमहसस्तव सुप्रभातम् ॥ ७४॥

naivādhvaro na niyamo na yamo na homo no dakṣiṇā na ca japo na ca tīrthayātrā |yatpādasevanalavasyakalākvacit syāttasyāprameyamahasastava suprabhātam || 74||

माया न तिष्ठति यदक्षिपथे भयेन सिद्धाः यदीक्षणलवाय तपस्तपन्ति ।यन्नामतारयति संसृतितस्समस्तां स्तस्य प्रभोरिदमिदं तव सुप्रभातम् ॥ ७५॥

māyā na tiṣṭhati yadakṣipathe bhayena siddhāḥ yadīkṣaṇalavāya tapastapanti |yannāmatārayati saṃsṛtitassamastāṃ stasya prabhoridamidaṃ tava suprabhātam || 75||

गङ्गादि तीर्थनिकरप्रभवैकमूले ब्रह्माद्यमानुषशिरश्चिरमृग्यमाणे ।एकैकनैजपदविन्यसने धरण्याः रोमाञ्चमङ्कुरयतस्तव सुप्रभातम् ॥ ७६॥

gaṅgādi tīrthanikaraprabhavaikamūle brahmādyamānuṣaśiraściramṛgyamāṇe |ekaikanaijapadavinyasane dharaṇyāḥ romāñcamaṅkurayatastava suprabhātam || 76||

विश्वाकृतिप्रकटनेन विनापवित्र कीर्त्यास्वतःप्रसृमरस्यसमस्तदिक्षु ।हित्वायुधानि निरुपाधिकसौहृदेन लोकत्रयीविजयिन स्तव सुप्रभातम् ॥ ७७॥

viśvākṛtiprakaṭanena vināpavitra kīrtyāsvataḥprasṛmarasyasamastadikṣu |hitvāyudhāni nirupādhikasauhṛdena lokatrayīvijayina stava suprabhātam || 77||

लोकत्रयीदुरितसञ्चयकालकूटमापीय भूतदययार्बुदरोगभाजः ।कण्ठेव्यथातिशयतशितिकण्ठभावं प्राप्तस्यविश्वसुहृदस्तव सुप्रभातम् ॥ ७८॥

lokatrayīduritasañcayakālakūṭamāpīya bhūtadayayārbudarogabhājaḥ |kaṇṭhevyathātiśayataśitikaṇṭhabhāvaṃ prāptasyaviśvasuhṛdastava suprabhātam || 78||

स्वीयां चिदेकरचितां परमार्थभूतां आनन्दमूर्त्तिमखिलेषु चराचरेषु ।वैकुण्ठनामक निजाङ्घ्रि निषेवकाय व्यज्यस्फुटं कृपयतस्तव सुप्रभातम् ॥ ७९॥

svīyāṃ cidekaracitāṃ paramārthabhūtāṃ ānandamūrttimakhileṣu carācareṣu |vaikuṇṭhanāmaka nijāṅghri niṣevakāya vyajyasphuṭaṃ kṛpayatastava suprabhātam || 79||

नानाभिषक्प्रवरसाधुचिकित्सितस्य निश्शेषलोकभवरोगचिकित्सकस्य ।उच्चैस्तरां विविधयातनायादितस्य स्वानन्दनित्यविहृतेस्तव सुप्रभातम् ॥ ८०॥

nānābhiṣakpravarasādhucikitsitasya niśśeṣalokabhavarogacikitsakasya |uccaistarāṃ vividhayātanāyāditasya svānandanityavihṛtestava suprabhātam || 80||

कालेकदाचिदविषह्यकृपाजवेन पादाब्जसीम्नि पतितान् पतितानशेषान् ।स्पृष्ट्वा समाधिरसमीश्वरदर्शनं च दत्वा प्रहर्षितवतस्तव सुप्रभातम् ॥ ८१॥

kālekadācidaviṣahyakṛpājavena pādābjasīmni patitān patitānaśeṣān |spṛṣṭvā samādhirasamīśvaradarśanaṃ ca datvā praharṣitavatastava suprabhātam || 81||

कल्याणकेलिनिकरैर्भुवनं समस्तं उज्जीव्य सम्यगतिभासुरमात्मतेज ।शिष्याग्रवह्निषु निधाय तिरोबुभोषोः पूर्णावतारसवितुस्तव सुप्रभातम् ॥ ८२॥

kalyāṇakelinikarairbhuvanaṃ samastaṃ ujjīvya samyagatibhāsuramātmateja |śiṣyāgravahniṣu nidhāya tirobubhoṣoḥ pūrṇāvatārasavitustava suprabhātam || 82||

पाषण्डिनां सरभसाक्रमणेनभिन्नप्रायानशेषपरिपावनधर्मसेतून् ।भूयो निबद्।ह्ध्य सुदृढं सुजनान् प्रतोष्य नैजं पदं गतवतस्तव सुप्रभातम् ॥ ८३॥

pāṣaṇḍināṃ sarabhasākramaṇenabhinnaprāyānaśeṣaparipāvanadharmasetūn |bhūyo nibad|hdhya sudṛḍhaṃ sujanān pratoṣya naijaṃ padaṃ gatavatastava suprabhātam || 83||

निर्मूलया करुणया जगदुद्धिधीर्षोः धर्मोत्करानविविषोर्निगमानुशिष्टान् ।अन्यान् दिवङ्गमयितुं नरकेषु नित्यं तुष्ट्यास्वयम्पिपतिषोस्तव सुप्रभातम् ॥ ८४॥

nirmūlayā karuṇayā jagaduddhidhīrṣoḥ dharmotkarānaviviṣornigamānuśiṣṭān |anyān divaṅgamayituṃ narakeṣu nityaṃ tuṣṭyāsvayampipatiṣostava suprabhātam || 84||

निर्याणतो निजपतेः परिदेवयन्ती मङ्गल्यसूत्रवलयानि परित्यजन्तीम् ।देवीं निवार्य परिसान्त्वयितुं पुरस्तात् प्रत्यक्षतां प्रभजतस्तव सुप्रभातम् ॥ ८५॥

niryāṇato nijapateḥ paridevayantī maṅgalyasūtravalayāni parityajantīm |devīṃ nivārya parisāntvayituṃ purastāt pratyakṣatāṃ prabhajatastava suprabhātam || 85||

पृत्थ्यां मनुष्यवपुँषा प्रकटीकृता] त्मप्रत्यक्षकेलिरधुनोपरताप्यभङ्गम् ।स्वादृश्यकेलिरधुनाप्यनुवर्त्तमानेत्यस्मान् सिसान्त्वयिषतस्तव सुप्रभातम् ॥ ८६॥

pṛtthyāṃ manuṣyavapum̐ṣā prakaṭīkṛtā] tmapratyakṣakeliradhunoparatāpyabhaṅgam |svādṛśyakeliradhunāpyanuvarttamānetyasmān sisāntvayiṣatastava suprabhātam || 86||

स्थूलात्मकं परिसमाप्य निजावतारलीलाविलास रसमद्यतिरोहितस्य ।अस्मादृशेषु कृपणेषु कृपाद्रदृष्टिं गूढम्पिपातयिषतस्तव सुप्रभातम् ॥ ८७॥

sthūlātmakaṃ parisamāpya nijāvatāralīlāvilāsa rasamadyatirohitasya |asmādṛśeṣu kṛpaṇeṣu kṛpādradṛṣṭiṃ gūḍhampipātayiṣatastava suprabhātam || 87||

आरूढकर्ण, यशसा भुवि देहभाजां नाम्ना सुखाध्युषितजिह्व, शुभाशयानाम् ।आविष्टचित्त, महतामुरुपुण्यमूर्त्या नित्यानुवृत्तविहृते, तव सुप्रभातम् ॥ ८८॥

ārūḍhakarṇa, yaśasā bhuvi dehabhājāṃ nāmnā sukhādhyuṣitajihva, śubhāśayānām |āviṣṭacitta, mahatāmurupuṇyamūrtyā nityānuvṛttavihṛte, tava suprabhātam || 88||

पानोपवेश, शयनाशनमज्जनादौ ग्रामाटवीव्रजपुरीगिरिसागरादौ ।सम्पद्धिपद्भयजरामरणामयादौ भक्तान् सदानुभजतस्तव सुप्रभातम् ॥ ८९॥

pānopaveśa, śayanāśanamajjanādau grāmāṭavīvrajapurīgirisāgarādau |sampaddhipadbhayajarāmaraṇāmayādau bhaktān sadānubhajatastava suprabhātam || 89||

सम्प्रत्यतिस्फुटतरं भुवने समन्तात् सन्दृश्यमानसकलाभ्युदयोद्यमानाम् ।हेतोर्विशिष्य नवभारतशिल्पिसार्वभौमस्य, विष्टपसृजस्तव सुप्रभातम् ॥ ९०॥

sampratyatisphuṭataraṃ bhuvane samantāt sandṛśyamānasakalābhyudayodyamānām |hetorviśiṣya navabhārataśilpisārvabhaumasya, viṣṭapasṛjastava suprabhātam || 90||

आर्षक्षमासुचिरसम्भृतपुण्यपुञ्जपाकात्मकस्य, सुजनार्चितचन्द्रमण्या ।पाकायितस्य, निगमान्तसरस्वतीनां मूर्त्ताशयस्य, भगवंस्तव सुप्रभातम् ॥ ९१॥

ārṣakṣamāsucirasambhṛtapuṇyapuñjapākātmakasya, sujanārcitacandramaṇyā |pākāyitasya, nigamāntasarasvatīnāṃ mūrttāśayasya, bhagavaṃstava suprabhātam || 91||

लीलामनुष्य, भगवन्, क्षुदिरामसूनो, श्रीशारदारमण, चन्द्रमणीतनूज, ।सर्वावतारतिलकायित, पुण्यकीर्ते, श्रीरामकृष्ण, भवतात्तव सुप्रभातम् ॥ ९२॥

līlāmanuṣya, bhagavan, kṣudirāmasūno, śrīśāradāramaṇa, candramaṇītanūja, |sarvāvatāratilakāyita, puṇyakīrte, śrīrāmakṛṣṇa, bhavatāttava suprabhātam || 92||

मायापतेदुरवगाहमहामहिम्नः प्रेमार्णवस्यकृपणावनदीक्षितस्य ।साक्षान्नरेन्द्रतुलसीप्रियदेशिकस्य श्रीरामकृष्ण, भवतात्तव सुप्रभातम् ॥ ९३॥

māyāpateduravagāhamahāmahimnaḥ premārṇavasyakṛpaṇāvanadīkṣitasya |sākṣānnarendratulasīpriyadeśikasya śrīrāmakṛṣṇa, bhavatāttava suprabhātam || 93||

नानातपोव्रतजुषोगलदंशभासः व्यामोहशार्वरमुषोभवमुक्तिवाहः ।काली नरेन्द्र तुलसी मुखशिष्यतीर्थ, स्वामिन्, निगूढमहिमंस्तव सुप्रभातम् ॥ ९४॥

nānātapovratajuṣogaladaṃśabhāsaḥ vyāmohaśārvaramuṣobhavamuktivāhaḥ |kālī narendra tulasī mukhaśiṣyatīrtha, svāmin, nigūḍhamahimaṃstava suprabhātam || 94||

धर्मज्ञ, धर्मपथसञ्चर, सिद्धवर्य, साध्यस्वरूप, सकलात्मक, मूर्त्त्यतीत, ।ब्रह्मन्, नरेन्द्र तुलसी समुपाश्रिताङ्घ्रे, श्रीरामकृष्ण, भवतात्तव सुप्रभातम् ॥ ९५॥

dharmajña, dharmapathasañcara, siddhavarya, sādhyasvarūpa, sakalātmaka, mūrttyatīta, |brahman, narendra tulasī samupāśritāṅghre, śrīrāmakṛṣṇa, bhavatāttava suprabhātam || 95||

स्वानन्दतृप्तमनसोपि समाधियोगनिद्राजुषोपि करुणारभसादभीक्ष्णम् ।उत्थाय लोचनयुगं विकचय्य विष्वक् आलोकनव्यसनिनस्तव सुप्रभातम् ॥ ९६॥

svānandatṛptamanasopi samādhiyoganidrājuṣopi karuṇārabhasādabhīkṣṇam |utthāya locanayugaṃ vikacayya viṣvak ālokanavyasaninastava suprabhātam || 96||

सच्चित्समाधिरसनिर्वृतमानसस्य स्मेराननस्य मुकुलीकृतलोचनस्य ।बद्धाञ्जलेः स्थिरसुखासनसंस्थितस्य चन्द्रातपःपरिणतेस्तव सुप्रभातम् ॥ ९७॥

saccitsamādhirasanirvṛtamānasasya smerānanasya mukulīkṛtalocanasya |baddhāñjaleḥ sthirasukhāsanasaṃsthitasya candrātapaḥpariṇatestava suprabhātam || 97||

स्मेरावलोकनविमोहितमानुषस्य मञ्जुप्रगीतलहरीद्रवितोपलस्य ।आनन्दनृत्तपरिकम्पितभूतलस्य कृत्स्नात्भुतस्य भवतात्तव सुप्रभातम् ॥ ९८॥

smerāvalokanavimohitamānuṣasya mañjupragītalaharīdravitopalasya |ānandanṛttaparikampitabhūtalasya kṛtsnātbhutasya bhavatāttava suprabhātam || 98||

सच्चिन्मूर्ते, धृतनरतनोर्लीलया धर्मगुप्त्यैकृत्वा दीर्घं बहुविधतपांस्येषुसम्पाद्यसिद्धिः ।निक्षिप्यान्ते स्वयमुपचितं ज्ञानवित्तंस्वशिष्येष्वन्तर्द्धातुं व्यवसितमतेरस्तुते सुप्रभातम् ॥ ९९॥

saccinmūrte, dhṛtanaratanorlīlayā dharmaguptyaikṛtvā dīrghaṃ bahuvidhatapāṃsyeṣusampādyasiddhiḥ |nikṣipyānte svayamupacitaṃ jñānavittaṃsvaśiṣyeṣvantarddhātuṃ vyavasitamaterastute suprabhātam || 99||

सच्चित्सौख्यैकमूर्त्ते निजमहिमरवेभूरिकारुण्यराशेविप्राग्र्याल्लब्धजातेर्बहुविधतपसिव्यापृतस्वान्तवृत्तेः ।प्राप्तहह्मानुभूतेस्सहचरनिहितस्वीयतेजोविभूतेरानाकव्यापिकीर्त्तेरखिलजनपतेरस्तुते सुप्रभातम् ॥ १००॥

saccitsaukhyaikamūrtte nijamahimaravebhūrikāruṇyarāśeviprāgryāllabdhajāterbahuvidhatapasivyāpṛtasvāntavṛtteḥ |prāptahahmānubhūtessahacaranihitasvīyatejovibhūterānākavyāpikīrtterakhilajanapaterastute suprabhātam || 100||

इति श्री ओट्टूर् उण्णि नम्पूतिरिप्पाट् श्रीरामकृष्णसुप्रभातं सम्पूर्णम् ।ज़ै ष्रि ऱमक्रिश्न!!

iti śrī oṭṭūr uṇṇi nampūtirippāṭ śrīrāmakṛṣṇasuprabhātaṃ sampūrṇam |ज़ai ṣri ramakriśna!!