राघवेन्द्रकवचम् Shri Raghavendra Kavacham

(श्रीअप्पण्णाचार्य कृत)कवचं राघवेन्द्रस्य यतीन्द्रस्य महात्मनः ।वक्ष्यामि गुरुवर्यस्य वाञ्छितार्थप्रदायकम् ॥ १॥

(śrīappaṇṇācārya kṛta)kavacaṃ rāghavendrasya yatīndrasya mahātmanaḥ |vakṣyāmi guruvaryasya vāñchitārthapradāyakam || 1||

ऋषिरस्याप्पणाचार्यः छन्दोऽनुष्टुप् प्रकीर्तितम् ।देवता श्रीराघवेन्द्रगुरुरिष्टार्थसिद्धये ॥ २॥

ṛṣirasyāppaṇācāryaḥ chando'nuṣṭup prakīrtitam |devatā śrīrāghavendragururiṣṭārthasiddhaye || 2||

अष्टोत्तरशतं जप्यं भक्तियुक्तेन चेतसा ।उद्यत्प्रद्योतनद्योतभर्मकूर्मासने स्थितम् ॥ ३॥

aṣṭottaraśataṃ japyaṃ bhaktiyuktena cetasā |udyatpradyotanadyotabharmakūrmāsane sthitam || 3||

एद्यखद्योतनद्योतप्रतापं राममानसम् ।धृतकाषायवसनं तुलसीहारवक्षसम् ॥ ४॥

edyakhadyotanadyotapratāpaṃ rāmamānasam |dhṛtakāṣāyavasanaṃ tulasīhāravakṣasam || 4||

दोर्दण्डविलसद्दण्डकमण्डलुविराजितम् ।अभयज्ञानमुद्राक्षमालाशीलकराम्बुजम् ॥ ५॥

dordaṇḍavilasaddaṇḍakamaṇḍaluvirājitam |abhayajñānamudrākṣamālāśīlakarāmbujam || 5||

योगीन्द्रवन्द्यपादाब्जं राघवेन्द्रगुरुं भजे ।शिरो रक्षतु मे नित्यं राघवेन्द्रोऽखिलेष्टदः ॥ ६॥

yogīndravandyapādābjaṃ rāghavendraguruṃ bhaje |śiro rakṣatu me nityaṃ rāghavendro'khileṣṭadaḥ || 6||

पापाद्रिपाटने वज्रः केशान् रक्षतु मे सदा ।क्षमासुरगणाधीशो मुखं रक्षतु मे गुरुः ॥ ७॥

pāpādripāṭane vajraḥ keśān rakṣatu me sadā |kṣamāsuragaṇādhīśo mukhaṃ rakṣatu me guruḥ || 7||

हरिसेवालब्धसर्वसम्पत्भालं ममावतु ।देवस्वभावोऽवतु मे दृशौ तत्त्वप्रदर्शकः ॥ ८॥

harisevālabdhasarvasampatbhālaṃ mamāvatu |devasvabhāvo'vatu me dṛśau tattvapradarśakaḥ || 8||

इष्टप्रदाने कल्पद्रुः श्रोत्रे श्रुत्यर्थबोधकः ।भव्यस्वरूपो मे नासां जिह्वां मेऽवतु भव्यकृत् ॥ ९॥

iṣṭapradāne kalpadruḥ śrotre śrutyarthabodhakaḥ |bhavyasvarūpo me nāsāṃ jihvāṃ me'vatu bhavyakṛt || 9||

आस्यं रक्षतु मे दुःखतूलसङ्घाग्निचर्यकः ।सुखधैर्यादिसुगुणो भ्रुवौ मम सदाऽवतु ॥ १०॥

āsyaṃ rakṣatu me duḥkhatūlasaṅghāgnicaryakaḥ |sukhadhairyādisuguṇo bhruvau mama sadā'vatu || 10||

ओष्ठौ रक्षतु मे सर्वग्रहनिग्रहशक्तिमान् ।उपप्लवोदधेस्सेतुर्दन्तान् रक्षतु मे सदा ॥ ११॥

oṣṭhau rakṣatu me sarvagrahanigrahaśaktimān |upaplavodadhesseturdantān rakṣatu me sadā || 11||

निरस्तदोषो मे पातु कपोलौ सर्वपालकः ।निरवद्यमहावेषः कण्ठं मेऽवतु सर्वदा ॥ १२॥

nirastadoṣo me pātu kapolau sarvapālakaḥ |niravadyamahāveṣaḥ kaṇṭhaṃ me'vatu sarvadā || 12||

कर्णमूले तु प्रत्यर्थिमूकत्वाकरवाङ् मम ।बहुवादिजयी पातु हस्तौ सत्तत्त्ववादकृत् ॥ १३॥

karṇamūle tu pratyarthimūkatvākaravāṅ mama |bahuvādijayī pātu hastau sattattvavādakṛt || 13||

करौ रक्षतु मे विद्वत्परिज्ञेयविशेषवान् ।वाग्वैखरीभव्यशेषजयी वक्षस्थलं मम ॥ १४॥

karau rakṣatu me vidvatparijñeyaviśeṣavān |vāgvaikharībhavyaśeṣajayī vakṣasthalaṃ mama || 14||

सतीसन्तानसम्पत्तिभक्तिज्ञानादिवृद्धिकृत् ।स्तनौ रक्षतु मे नित्यं शरीरावद्यहानिकृत् ॥ १५॥

satīsantānasampattibhaktijñānādivṛddhikṛt |stanau rakṣatu me nityaṃ śarīrāvadyahānikṛt || 15||

पुण्यवर्धनपादाब्जाभिषेकजलसञ्चयः ।नाभिं रक्षतु मे पार्श्वौ द्युनदीतुल्यसद्गुणः ॥ १६॥

puṇyavardhanapādābjābhiṣekajalasañcayaḥ |nābhiṃ rakṣatu me pārśvau dyunadītulyasadguṇaḥ || 16||

पृष्ठं रक्षतु मे नित्यं तापत्रयविनाशकृत् ।कटिं मे रक्षतु सदा वन्ध्यासत्पुत्रदायकः ॥ १७॥

pṛṣṭhaṃ rakṣatu me nityaṃ tāpatrayavināśakṛt |kaṭiṃ me rakṣatu sadā vandhyāsatputradāyakaḥ || 17||

जघनं मेऽवतु सदा व्यङ्गस्वङ्गसमृद्धिकृत् ।गुह्यं रक्षतु मे पापग्रहारिष्टविनाशकृत् ॥ १८॥

jaghanaṃ me'vatu sadā vyaṅgasvaṅgasamṛddhikṛt |guhyaṃ rakṣatu me pāpagrahāriṣṭavināśakṛt || 18||

भक्ताघविध्वंसकरनिजमूर्तिप्रदर्शकः ।मूर्तिमान्पातु मे रोमं राघवेन्द्रो जगद्गुरुः ॥ १९॥

bhaktāghavidhvaṃsakaranijamūrtipradarśakaḥ |mūrtimānpātu me romaṃ rāghavendro jagadguruḥ || 19||

सर्वतन्त्रस्वतन्त्रोऽसौ जानुनी मे सदाऽवतु ।जङ्घे रक्षतु मे नित्यं श्रीमध्वमतवर्धनः ॥ २०॥

sarvatantrasvatantro'sau jānunī me sadā'vatu |jaṅghe rakṣatu me nityaṃ śrīmadhvamatavardhanaḥ || 20||

विजयीन्द्रकराब्जोत्थसुधीन्द्रवरपुत्रकः ।गुल्फौ श्रीराघवेन्द्रो मे यतिराट् सर्वदाऽवतु ॥। २१॥

vijayīndrakarābjotthasudhīndravaraputrakaḥ |gulphau śrīrāghavendro me yatirāṭ sarvadā'vatu ||| 21||

पादौ रक्षतु मे सर्वभयहारी कृपानिधिः ।ज्ञानभक्तिसुपुत्रायुर्यशः श्रीपुण्यवर्धनः ॥ २२॥

pādau rakṣatu me sarvabhayahārī kṛpānidhiḥ |jñānabhaktisuputrāyuryaśaḥ śrīpuṇyavardhanaḥ || 22||

करपादाङ्गुलीः सर्वा ममावतु जगद्गुरुः ।प्रतिवादिजयस्वान्तभेदचिह्नादरो गुरुः ॥ २३॥

karapādāṅgulīḥ sarvā mamāvatu jagadguruḥ |prativādijayasvāntabhedacihnādaro guruḥ || 23||

नखानवतु मे सर्वान् सर्वशास्त्रविशारदः ।अपरोक्षीकृतश्रीशः प्राच्यां दिशि सदाऽवतु ॥ २४॥

nakhānavatu me sarvān sarvaśāstraviśāradaḥ |aparokṣīkṛtaśrīśaḥ prācyāṃ diśi sadā'vatu || 24||

स दक्षिणे चावतु मां समुपेक्षितभावजः ।अपेक्षितप्रदाता च प्रतीच्यामवतु प्रभुः ॥ २५॥

sa dakṣiṇe cāvatu māṃ samupekṣitabhāvajaḥ |apekṣitapradātā ca pratīcyāmavatu prabhuḥ || 25||

दयादाक्षिण्यवैराग्यवाक्पाटवमुखाङ्कितः ।सदोदीच्यामवतु मां शापानुग्रहशक्तिमान् ॥ २६॥

dayādākṣiṇyavairāgyavākpāṭavamukhāṅkitaḥ |sadodīcyāmavatu māṃ śāpānugrahaśaktimān || 26||

निखिलेन्द्रियदोषघ्नो महानुग्रहकृद्गुरुः ।अधश्चोर्ध्वं चावतु मामष्टाक्षरमनूदितम् ॥ २७॥

nikhilendriyadoṣaghno mahānugrahakṛdguruḥ |adhaścordhvaṃ cāvatu māmaṣṭākṣaramanūditam || 27||

आत्माऽऽत्मीयाघराशिघ्नो मां रक्षतु विदिक्षु च ।चतुर्णां च पुमर्थानां दाता प्रातः सदाऽवतु ॥ २८॥

ātmā''tmīyāgharāśighno māṃ rakṣatu vidikṣu ca |caturṇāṃ ca pumarthānāṃ dātā prātaḥ sadā'vatu || 28||

सङ्ग्रामेऽवतु मां नित्यं तत्त्ववित्सर्वसौख्यकृत् ।मध्याह्नेऽगम्यमहिमा मां रक्षतु महायशाः ॥ २९॥

saṅgrāme'vatu māṃ nityaṃ tattvavitsarvasaukhyakṛt |madhyāhne'gamyamahimā māṃ rakṣatu mahāyaśāḥ || 29||

मृतपोतप्राणदाता सायाह्ने मां सदाऽवतु ।वेदिस्थपुरुषोज्जीवी निशीथे पातु मां गुरुः ॥ ३०॥

mṛtapotaprāṇadātā sāyāhne māṃ sadā'vatu |vedisthapuruṣojjīvī niśīthe pātu māṃ guruḥ || 30||

वह्निस्थमालिकोद्धर्ता वह्नितापात्सदाऽवतु ।समग्रटीकाव्याख्याता गुरुर्मे विषयेऽवतु ॥ ३१॥

vahnisthamālikoddhartā vahnitāpātsadā'vatu |samagraṭīkāvyākhyātā gururme viṣaye'vatu || 31||

कान्तारेऽवतु मां नित्यं भाट्ट (भाष्य) सङ्ग्रहकृद्गुरुः ।सुधापरिमळोद्धर्ता सु (स्व)च्छन्दस्तु सदाऽवतु ॥ ३२॥

kāntāre'vatu māṃ nityaṃ bhāṭṭa (bhāṣya) saṅgrahakṛdguruḥ |sudhāparimaḷoddhartā su (sva)cchandastu sadā'vatu || 32||

राजचोरविषव्याधियादोवन्यमृगादिभिः ।अपस्मारापहर्ता नः शास्त्रवित्सर्वदाऽवतु ॥ ३३॥

rājacoraviṣavyādhiyādovanyamṛgādibhiḥ |apasmārāpahartā naḥ śāstravitsarvadā'vatu || 33||

गतौ सर्वत्र मां पातूपनिषदर्थकृद्गुरुः ।ऋग्व्याख्यानकृदाचार्यः स्थितौ रक्षतु मां सदा ॥ ३४॥

gatau sarvatra māṃ pātūpaniṣadarthakṛdguruḥ |ṛgvyākhyānakṛdācāryaḥ sthitau rakṣatu māṃ sadā || 34||

मन्त्रालयनिवासी मां जाग्रत्काले सदाऽवतु ।न्यायमुक्तावलीकर्ता स्वप्ने रक्षतु मां सदा ॥ ३५॥

mantrālayanivāsī māṃ jāgratkāle sadā'vatu |nyāyamuktāvalīkartā svapne rakṣatu māṃ sadā || 35||

मां पातु चन्द्रिकाव्याख्याकर्ता सुप्तौ हि तत्त्वकृत् ।सुतन्त्रदीपिकाकर्ता मुक्तौ रक्षतु मां गुरुः ॥ ३६॥

māṃ pātu candrikāvyākhyākartā suptau hi tattvakṛt |sutantradīpikākartā muktau rakṣatu māṃ guruḥ || 36||

गीतार्थसङ्ग्रहकरस्सदा रक्षतु मां गुरुः ।श्रीमध्वमतदुग्धाब्धिचन्द्रोऽवतु सदाऽनघः ॥ ३७॥

gītārthasaṅgrahakarassadā rakṣatu māṃ guruḥ |śrīmadhvamatadugdhābdhicandro'vatu sadā'naghaḥ || 37||

इति श्रीराघवेन्द्रस्य कवचं पापनाशनम् ।सर्वव्याधिहरं सद्यः पावनं पुण्यवर्धनम् ॥ ३८॥

iti śrīrāghavendrasya kavacaṃ pāpanāśanam |sarvavyādhiharaṃ sadyaḥ pāvanaṃ puṇyavardhanam || 38||

य इदं पठते नित्यं नियमेन समाहितः ।अदृष्टिः पूर्णदृष्टिः स्यादेडमूकोऽपि वाक्पतिः ॥ ३९॥

ya idaṃ paṭhate nityaṃ niyamena samāhitaḥ |adṛṣṭiḥ pūrṇadṛṣṭiḥ syādeḍamūko'pi vākpatiḥ || 39||

पूर्णायुः पूर्णसम्पत्तिभक्तिज्ञानाभिवृद्धिकृत् ।पीत्वा वारि नरो येन कवचेनाभिमन्त्रितम् ॥ ४०॥

pūrṇāyuḥ pūrṇasampattibhaktijñānābhivṛddhikṛt |pītvā vāri naro yena kavacenābhimantritam || 40||

जहाति कुक्षिगान् रोगान् गुरुवर्यप्रसादतः ।प्रदक्षिणनमस्कारान् गुरोर्वृन्दावनस्य यः ॥ ४१॥

jahāti kukṣigān rogān guruvaryaprasādataḥ |pradakṣiṇanamaskārān gurorvṛndāvanasya yaḥ || 41||

करोति परया भक्त्या तदेतत्कवचं पठन् ।पङ्गुः कूणिश्च पौगण्डः पूर्णाङ्गो जायते ध्रुवम् ॥ ४२॥

karoti parayā bhaktyā tadetatkavacaṃ paṭhan |paṅguḥ kūṇiśca paugaṇḍaḥ pūrṇāṅgo jāyate dhruvam || 42||

शेषाश्च कुष्ठपूर्वाश्च नश्यन्त्यामयराशयः ।अष्टाक्षरेण मन्त्रेण स्तोत्रेण कवचेन च ॥ ४३॥

śeṣāśca kuṣṭhapūrvāśca naśyantyāmayarāśayaḥ |aṣṭākṣareṇa mantreṇa stotreṇa kavacena ca || 43||

वृन्दावने सन्निहितमभिषिच्य यथाविधि ।यन्त्रे मन्त्राक्षराण्यष्टौ विलिख्यात्र प्रतिष्ठितम् ॥ ४४॥

vṛndāvane sannihitamabhiṣicya yathāvidhi |yantre mantrākṣarāṇyaṣṭau vilikhyātra pratiṣṭhitam || 44||

षोडशैरुपचारैश्च सम्पूज्य त्रिजगद्गुरुम् ।अष्टोत्तरशताख्याभिरर्चयेत्कुसुमादिभिः ॥ ४५॥

ṣoḍaśairupacāraiśca sampūjya trijagadgurum |aṣṭottaraśatākhyābhirarcayetkusumādibhiḥ || 45||

फलैश्च विविधैरेव गुरोरर्चां प्रकुर्वतः ।नामश्रवणमात्रेण गुरुवर्यप्रसादतः ॥ ४६॥

phalaiśca vividhaireva gurorarcāṃ prakurvataḥ |nāmaśravaṇamātreṇa guruvaryaprasādataḥ || 46||

भूतप्रेतपिशाचाद्याः विद्रवन्ति दिशो दश ।पठेदेतत्त्रिकं नित्यं गुरोर्वृन्दावनान्तिके ॥ ४७॥

bhūtapretapiśācādyāḥ vidravanti diśo daśa |paṭhedetattrikaṃ nityaṃ gurorvṛndāvanāntike || 47||

दीपं संयोज्य विद्यावान् सभासु विजयी भवेत् ।राजचोरमहाव्याघ्रसर्पनक्रादिपीडनात् ॥ ४८॥

dīpaṃ saṃyojya vidyāvān sabhāsu vijayī bhavet |rājacoramahāvyāghrasarpanakrādipīḍanāt || 48||

कवचस्य प्रभावेण भयं तस्य न जायते ।सोमसूर्योपरागादिकाले वृन्दावनान्तिके ॥ ४९॥

kavacasya prabhāveṇa bhayaṃ tasya na jāyate |somasūryoparāgādikāle vṛndāvanāntike || 49||

कवचादित्रिकं पुण्यमप्पणाचार्यदर्शितम् ।जपेद्यः स धनं पुत्रान् भार्यां च सुमनोरमाम् ॥ ५०॥

kavacāditrikaṃ puṇyamappaṇācāryadarśitam |japedyaḥ sa dhanaṃ putrān bhāryāṃ ca sumanoramām || 50||

ज्ञानं भक्तिं च वैराग्यं भुक्तिं मुक्तिं च शाश्वतीम् ।संप्राप्य मोदते नित्यं गुरुवर्यप्रसादतः ॥ ५१॥

jñānaṃ bhaktiṃ ca vairāgyaṃ bhuktiṃ muktiṃ ca śāśvatīm |saṃprāpya modate nityaṃ guruvaryaprasādataḥ || 51||

इति श्रीमदप्पणाचार्यविरचितं श्रीराघवेन्द्रकवचं सम्पूर्णम् ।

iti śrīmadappaṇācāryaviracitaṃ śrīrāghavendrakavacaṃ sampūrṇam |