शङ्कराचार्यसुवर्णमालास्तवः Shankaracharyasuvarnamalastavah

ओमिति दिविषत्प्रवराः शीर्षे कुर्वन्ति शासनं यस्य ।ओङ्कारपद्मभृङ्गं तमहं प्रणमामि शङ्कराचार्यम् ॥ १॥

omiti diviṣatpravarāḥ śīrṣe kurvanti śāsanaṃ yasya |oṅkārapadmabhṛṅgaṃ tamahaṃ praṇamāmi śaṅkarācāryam || 1||

नत्वा यत्पदयुग्मं वाचस्पतिगर्वहारिवाक्ततयः ।प्रभवन्ति हि भुवि मूकास्तमहं प्रणमामि शङ्कराचार्यम् ॥ २॥

natvā yatpadayugmaṃ vācaspatigarvahārivāktatayaḥ |prabhavanti hi bhuvi mūkāstamahaṃ praṇamāmi śaṅkarācāryam || 2||

मन्मथमातङ्गजये कण्ठीरवतां प्रयाति जनसङ्घः ।यत्पादाम्बुजनत्या तमहं प्रणमामि शङ्कराचार्यम् ॥ ३॥

manmathamātaṅgajaye kaṇṭhīravatāṃ prayāti janasaṅghaḥ |yatpādāmbujanatyā tamahaṃ praṇamāmi śaṅkarācāryam || 3||

शम्पा प्राप पुरात्तैः पुण्यैर्नूनं यदीयतनुसाम्यम् ।शङ्कादुर्द्रुमपरशुं तमहं प्रणमामि शङ्कराचार्यम् ॥ ४॥

śampā prāpa purāttaiḥ puṇyairnūnaṃ yadīyatanusāmyam |śaṅkādurdrumaparaśuṃ tamahaṃ praṇamāmi śaṅkarācāryam || 4||

कम्बुस्तपञ्जलान्तर्न प्राप तुला यदीयकण्ठस्य ।काङ्क्षितदानधुरीणं तमहं प्रणमामि शङ्कराचार्यम् ॥ ५॥

kambustapañjalāntarna prāpa tulā yadīyakaṇṭhasya |kāṅkṣitadānadhurīṇaṃ tamahaṃ praṇamāmi śaṅkarācāryam || 5||

राजाधिराजपदवीं सद्यः प्राप्नोति दीनधौरेयः ।यस्यापाङ्गालोकात्तमहं प्रणमामि शङ्कराचार्यम् ॥ ६॥

rājādhirājapadavīṃ sadyaḥ prāpnoti dīnadhaureyaḥ |yasyāpāṅgālokāttamahaṃ praṇamāmi śaṅkarācāryam || 6||

यमनियमाद्यङ्गयुतो योगः सुलभो यदीयपदभाजाम् ।यमभीतिभञ्जनकरं तमहं प्रणमामि शङ्कराचार्यम् ॥ ७॥

yamaniyamādyaṅgayuto yogaḥ sulabho yadīyapadabhājām |yamabhītibhañjanakaraṃ tamahaṃ praṇamāmi śaṅkarācāryam || 7||

स्तवराजं गुरुकृपया कृतवान् श्रीसच्चिदानन्दः ।अवनौ भक्त्या पठतां शं तनुताच्छङ्कराचार्यः ॥ ८॥

stavarājaṃ gurukṛpayā kṛtavān śrīsaccidānandaḥ |avanau bhaktyā paṭhatāṃ śaṃ tanutācchaṅkarācāryaḥ || 8||

इति शृङ्गेरि श्रीजगद्गुरु श्रीसच्चिदानन्दशिवाभिनवनृसिंहभारतीस्वामिभिः विरचितः श्रीशङ्करचार्यसुवर्णमालास्तवः सम्पूर्णः ।

iti śṛṅgeri śrījagadguru śrīsaccidānandaśivābhinavanṛsiṃhabhāratīsvāmibhiḥ viracitaḥ śrīśaṅkaracāryasuvarṇamālāstavaḥ sampūrṇaḥ |