गायत्रीस्तोत्रम् १ Shri Gayatri Stotram 1

नमस्ते देवि गायत्रि सावित्रि त्रिपदेऽक्षरे ।अजरे अमरे मातस्त्राहि मां भवसागरात् ॥ १॥

namaste devi gāyatri sāvitri tripade'kṣare |ajare amare mātastrāhi māṃ bhavasāgarāt || 1||

नमस्ते सूर्यसङ्काशे सूर्यसावित्रि कोमले ।ब्रह्मविद्ये महाविद्ये वेदमातर्नमोस्तु ते ॥ २॥

namaste sūryasaṅkāśe sūryasāvitri komale |brahmavidye mahāvidye vedamātarnamostu te || 2||

अनन्तकोटिब्रह्माण्डव्यापिनि ब्रह्मचारिणि ।नित्यानन्दे महामाये परेशानि नमोस्तु ते ॥ ३॥

anantakoṭibrahmāṇḍavyāpini brahmacāriṇi |nityānande mahāmāye pareśāni namostu te || 3||

त्वं ब्रह्मा त्वं हरिः साक्षाद्रुद्रस्त्वमिन्द्रदेवता ।मित्रस्त्वं वरुणस्त्वं च त्वमग्निरश्विनौ भगः ॥ ४॥

tvaṃ brahmā tvaṃ hariḥ sākṣādrudrastvamindradevatā |mitrastvaṃ varuṇastvaṃ ca tvamagniraśvinau bhagaḥ || 4||

पूषार्यमा मरुत्वांश्च ऋषयोऽपि मुनीश्वराः ।पितरो नागयक्षाश्च गन्धर्वाप्सरसां गणाः ॥ ५॥

pūṣāryamā marutvāṃśca ṛṣayo'pi munīśvarāḥ |pitaro nāgayakṣāśca gandharvāpsarasāṃ gaṇāḥ || 5||

रक्षोभूतपिशाचाश्च त्वमेव परमेश्वरि ।ऋग्यजुस्सामवेदाश्च अथर्वाङ्गिरसानि च ॥ ६॥

rakṣobhūtapiśācāśca tvameva parameśvari |ṛgyajussāmavedāśca atharvāṅgirasāni ca || 6||

त्वमेव पञ्चभूतानि तत्त्वानि जगदीश्वरि ।ब्राह्मी सरस्वती सन्ध्या तुरीया त्वं महेश्वरि ॥ ७॥

tvameva pañcabhūtāni tattvāni jagadīśvari |brāhmī sarasvatī sandhyā turīyā tvaṃ maheśvari || 7||

त्वमेव सर्वशास्त्राणि त्वमेव सर्वसंहिताः ।पुराणानि च मन्त्राणि महागम मतानि च ॥ ८॥

tvameva sarvaśāstrāṇi tvameva sarvasaṃhitāḥ |purāṇāni ca mantrāṇi mahāgama matāni ca || 8||

तत्सद्ब्रह्मस्वरूपा त्वं कञ्चित्सदसदात्मिका ।परात्परेशि गायत्रि नमस्ते मातरम्बिके ॥ ९॥

tatsadbrahmasvarūpā tvaṃ kañcitsadasadātmikā |parātpareśi gāyatri namaste mātarambike || 9||

चन्द्रे कलात्मिके नित्ये कालरात्रि स्वधे स्वरे ।स्वाहाकारेऽग्निवक्त्रे त्वां नमामि जगदीश्वरि ॥ १०॥

candre kalātmike nitye kālarātri svadhe svare |svāhākāre'gnivaktre tvāṃ namāmi jagadīśvari || 10||

नमो नमस्ते गायत्रि सावित्रि त्वां नमाम्यहम् ।सरस्वति नमस्तुभ्यं तुरीये ब्रह्मरूपिणि ॥ ११॥

namo namaste gāyatri sāvitri tvāṃ namāmyaham |sarasvati namastubhyaṃ turīye brahmarūpiṇi || 11||

अपराधसहस्राणि त्वसत्कर्मशतानि च ।मत्तो जातानि देवेशि त्वं क्षमस्व दिने दिने ॥ १२॥

aparādhasahasrāṇi tvasatkarmaśatāni ca |matto jātāni deveśi tvaṃ kṣamasva dine dine || 12||

॥ इति वसिष्ठसंहितायां गायत्रीस्तोत्रं सम्पूर्णम् ॥

|| iti vasiṣṭhasaṃhitāyāṃ gāyatrīstotraṃ sampūrṇam ||