विनायकस्तोत्रम् ३ Shri Vinayaka Stotram

गण्डस्थलद्धरागलन्मदवारिधारासौरभ्यलुभ्यदलिडिम्भकगुम्भनादैः ।वाचालिताखिलदिशं वरदं नतानांवन्दामहे गजमुखं वयमादिदेवम् ॥ १॥

gaṇḍasthaladdharāgalanmadavāridhārāsaurabhyalubhyadaliḍimbhakagumbhanādaiḥ |vācālitākhiladiśaṃ varadaṃ natānāṃvandāmahe gajamukhaṃ vayamādidevam || 1||

गर्विष्ठखेचरपुरत्रयनाथदैत्यभङ्गोद्यतः स्वयमयं परमेश्वरोऽपि ।आदौ यमेव परिपूज्य विधूतसर्वविघ्नो जिगाय तमिमं वयमाश्रयामः ॥ २॥

garviṣṭhakhecarapuratrayanāthadaityabhaṅgodyataḥ svayamayaṃ parameśvaro'pi |ādau yameva paripūjya vidhūtasarvavighno jigāya tamimaṃ vayamāśrayāmaḥ || 2||

प्रणष्टवर्णततिपञ्चमषष्ठवर्णयुग्माविधेयविरहादतिमात्रदीनम् ।प्रायेत मामनुदिनं निजपुष्करात्तकुम्भस्थरत्ननिकरानभिवृध्य देवः ॥ ३॥

praṇaṣṭavarṇatatipañcamaṣaṣṭhavarṇayugmāvidheyavirahādatimātradīnam |prāyeta māmanudinaṃ nijapuṣkarāttakumbhastharatnanikarānabhivṛdhya devaḥ || 3||

पद्मासहायगिरिजापतिरत्यवागधीशदेवादिनाकनिलयैर्वनितासहायैः ।अन्वास्यमानमखिलास्वपि दिक्षु सिद्धलक्ष्मीसहायमनिशं शरणं भजामः ॥ ४॥

padmāsahāyagirijāpatiratyavāgadhīśadevādinākanilayairvanitāsahāyaiḥ |anvāsyamānamakhilāsvapi dikṣu siddhalakṣmīsahāyamaniśaṃ śaraṇaṃ bhajāmaḥ || 4||

तन्वीत नः शुभमतिं तरुणारुणश्रीदायादकायरुचिरिन्दुक्तंससूनुः ।प्रत्यूहभङ्गपटुभिः सहितो वधूभिरामोदमुख्यनिजपारिषदैः समेतः ॥ ५॥

tanvīta naḥ śubhamatiṃ taruṇāruṇaśrīdāyādakāyarucirinduktaṃsasūnuḥ |pratyūhabhaṅgapaṭubhiḥ sahito vadhūbhirāmodamukhyanijapāriṣadaiḥ sametaḥ || 5||

ये चिन्तयन्ति निमिषार्धमपि प्रभो त्वांश्रीमानिभानन विधूतभिदान्धकाराः ।बाभासमानमनिशं हृदये समुद्यदानन्दबोधघनमेकममी नमस्याः ॥ ६॥

ye cintayanti nimiṣārdhamapi prabho tvāṃśrīmānibhānana vidhūtabhidāndhakārāḥ |bābhāsamānamaniśaṃ hṛdaye samudyadānandabodhaghanamekamamī namasyāḥ || 6||

न श्रौतकर्मसु रतिर्न च बोधनिष्ठास्वामिन्नुमासुत न जातु कृतापि पूजा ।निस्सारवैषयिकसौख्यदुराशयैवनीतान्यहान्यहह किं कथये दयस्व ॥ ७॥

na śrautakarmasu ratirna ca bodhaniṣṭhāsvāminnumāsuta na jātu kṛtāpi pūjā |nissāravaiṣayikasaukhyadurāśayaivanītānyahānyahaha kiṃ kathaye dayasva || 7||

वस्त्राज्यदुग्धमधुभिः सितशर्कराद्यैःपुण्ड्रेक्षुखण्डकदलीफलनारिकेलैः ।लाजैश्च मोदकयुतैः परिपूजितुं त्वां (लाभैश्च)धन्याः क्षमाः परमहं शरणं प्रपद्ये ॥ ८॥

vastrājyadugdhamadhubhiḥ sitaśarkarādyaiḥpuṇḍrekṣukhaṇḍakadalīphalanārikelaiḥ |lājaiśca modakayutaiḥ paripūjituṃ tvāṃ (lābhaiśca)dhanyāḥ kṣamāḥ paramahaṃ śaraṇaṃ prapadye || 8||

समीरैः प्रोच्चण्डैः श्रवणयुगलीचालनभवैर्नतानां प्रत्यूहच्छलजलदराशिं विदलयन् ।कटायोगोदश्चन्मदसुरभिलादोषभुवनःशिवाचन्द्रोत्सप्रणयपरिणामोऽवतु गजः ॥ ९॥

samīraiḥ proccaṇḍaiḥ śravaṇayugalīcālanabhavairnatānāṃ pratyūhacchalajaladarāśiṃ vidalayan |kaṭāyogodaścanmadasurabhilādoṣabhuvanaḥśivācandrotsapraṇayapariṇāmo'vatu gajaḥ || 9||

॥ इति श्रीविनायकस्तोत्रं सम्पूर्णम् ॥

|| iti śrīvināyakastotraṃ sampūrṇam ||