वरदगणेशाष्टोत्तरशतनामस्तोत्रम् Shri Varadaganesha Ashtottarashata Nama Stotram

गणेशो विघ्नराजश्च विघ्नहर्ता गणाधिपः ।लम्बोदरो वक्रतुण्डो विकटो गणनायकः ॥ १॥

gaṇeśo vighnarājaśca vighnahartā gaṇādhipaḥ |lambodaro vakratuṇḍo vikaṭo gaṇanāyakaḥ || 1||

गजास्यः सिद्धिदाता च खर्वो मूषकवाहनः ।मूषको गणराजश्च शैलजानन्ददायकः ॥ २॥

gajāsyaḥ siddhidātā ca kharvo mūṣakavāhanaḥ |mūṣako gaṇarājaśca śailajānandadāyakaḥ || 2||

गुहाग्रजो महातेजाः कुब्जो भक्तप्रियः प्रभुः ।सिन्दूराभो गणाध्यक्षस्त्रिनेत्रो धनदायकः ॥ ३॥

guhāgrajo mahātejāḥ kubjo bhaktapriyaḥ prabhuḥ |sindūrābho gaṇādhyakṣastrinetro dhanadāyakaḥ || 3||

वामनः शूर्पकर्णश्च धूम्रः शङ्करनन्दनः ।सर्वार्तिनाशको विज्ञः कपिलो मोदकप्रियः ॥ ४॥

vāmanaḥ śūrpakarṇaśca dhūmraḥ śaṅkaranandanaḥ |sarvārtināśako vijñaḥ kapilo modakapriyaḥ || 4||

सङ्कष्टनाशनो देवः सुरासुरनमस्कृतः ।उमासुतः कृपालुश्च सर्वज्ञः प्रियदर्शनः ॥ ५॥

saṅkaṣṭanāśano devaḥ surāsuranamaskṛtaḥ |umāsutaḥ kṛpāluśca sarvajñaḥ priyadarśanaḥ || 5||

हेरम्बो रक्तनेत्रश्च स्थूलमूर्तिः प्रतापवान् ।सुखदः कार्यकर्त्ता च बुद्धिदो व्याधिनाशकः ॥ ६॥

herambo raktanetraśca sthūlamūrtiḥ pratāpavān |sukhadaḥ kāryakarttā ca buddhido vyādhināśakaḥ || 6||

इक्षुदण्डप्रियः शूरः क्षमायुक्तोऽघनाशकः ।एकदन्तो महोदारः सर्वदो गजकर्षकः ॥ ७॥

ikṣudaṇḍapriyaḥ śūraḥ kṣamāyukto'ghanāśakaḥ |ekadanto mahodāraḥ sarvado gajakarṣakaḥ || 7||

विनायको जगत्पूज्यः फलदो दीनवत्सलः ।विद्याप्रदो महोत्साहो दुःखदौर्भाग्यनाशकः ॥ ८॥

vināyako jagatpūjyaḥ phalado dīnavatsalaḥ |vidyāprado mahotsāho duḥkhadaurbhāgyanāśakaḥ || 8||

मिष्टप्रियो भालचन्द्रो नित्यसौभाग्यवर्धनः ।दानपूरार्द्रगण्डश्च अंशको विबुधप्रियः ॥ ९॥

miṣṭapriyo bhālacandro nityasaubhāgyavardhanaḥ |dānapūrārdragaṇḍaśca aṃśako vibudhapriyaḥ || 9||

रक्ताम्बरधरः श्रेष्ठः सुभगो नागभूषणः ।शत्रुध्वंसी चतुर्बाहुः सौम्यो दारिद्र्यनाशकः ॥ १०॥

raktāmbaradharaḥ śreṣṭhaḥ subhago nāgabhūṣaṇaḥ |śatrudhvaṃsī caturbāhuḥ saumyo dāridryanāśakaḥ || 10||

आदिपूज्यो दयाशीलो रक्तमुण्डो महोदयः ।सर्वगः सौख्यकृच्छुद्धः कृत्यपूज्यो बुधप्रियः ॥ ११॥

ādipūjyo dayāśīlo raktamuṇḍo mahodayaḥ |sarvagaḥ saukhyakṛcchuddhaḥ kṛtyapūjyo budhapriyaḥ || 11||

सर्वदेवमयः शान्तो भुक्तिमुक्तिप्रदायकः ।विद्यावान्दानशीलश्च वेदविन्मन्त्रवित्सुधीः ॥ १२॥

sarvadevamayaḥ śānto bhuktimuktipradāyakaḥ |vidyāvāndānaśīlaśca vedavinmantravitsudhīḥ || 12||

अविज्ञातगतिर्ज्ञानी ज्ञानिगम्यो मुनिस्तुतः ।योगज्ञो योगपूज्यश्च भालनेत्रः शिवात्मजः ॥ १३॥

avijñātagatirjñānī jñānigamyo munistutaḥ |yogajño yogapūjyaśca bhālanetraḥ śivātmajaḥ || 13||

सर्वमन्त्रमयः श्रीमान् अवशो वशकारकः ।विघ्नध्वंसी सदा हृष्टो भक्तानां फलदायकः ॥ १४॥

sarvamantramayaḥ śrīmān avaśo vaśakārakaḥ |vighnadhvaṃsī sadā hṛṣṭo bhaktānāṃ phaladāyakaḥ || 14||

इदं स्तोत्रं गणेशस्य पठेच्च सादरं नरः ।तस्य वाञ्छितकामस्य सिद्धिर्भवति निश्चितम् ॥ १५॥

idaṃ stotraṃ gaṇeśasya paṭhecca sādaraṃ naraḥ |tasya vāñchitakāmasya siddhirbhavati niścitam || 15||

इति श्रीवरदगणेशाष्टोत्तरशतनामस्तोत्रं सम्पूर्णम् ।

iti śrīvaradagaṇeśāṣṭottaraśatanāmastotraṃ sampūrṇam |