उच्छिष्टमहागणपति ध्यानम् Shri Uchchhhishtamahaganapati Dhyanam

मूलाधारे सुयोन्याख्ये चिदग्निवरमण्डले ।समासीनं पराशक्तिविग्रहं गणनायकम् ॥ १॥रक्तोत्पलसमप्रख्यं नीलमेघसमप्रभम् ।रत्नप्रभालसद्दीप्तमुकुटाञ्चितमस्तकम् ॥ २॥करुणारससुधाधारास्रवदक्षित्रयान्वितम् ।अक्षिकुक्षिमहावक्षः गण्डशूकादिभूषणम् ॥ ३॥पाशाङ्कुशेक्षुकोदण्डपञ्चबाणलसत्करम् ।नीलकान्तिघनीभूतनीलवाणीसुपार्श्वकम् ॥ ४॥सुत्रिकोणाख्यनीलाङ्गरसास्वादनतत्परम् ।पत्न्यालिङ्गतवामाङ्गं सप्तमातृनिषेवितम् ॥ ५॥ब्रह्मविष्णुमहेन्द्रादिसम्प्रपूजितपादुकम् ।महद्द्वयपदोवाच्यपादुकामन्त्रसारकम् ॥ ६॥नवावरणयज्ञाख्य वरिवस्याविधिप्रियम् ।पञ्चावरणयज्ञाख्य विधिसम्पूज्यपादुकम् ॥ ७॥अखण्डकोटिब्रह्माण्डामण्डलेश्वरमव्ययम् ।रदनाक्षरसम्पूर्णमन्त्रराजस्वरूपिणम् ॥ ८॥गिरिव्याहृतिवर्णात्ममन्त्रतत्वप्रदर्शकम् ।अरुणारुणतनुच्छायमहाकामकलात्मकम् ॥ ९॥महागोप्यमहाविद्या प्रकाशितकलेवरम् ।चिच्छिवं चिद्भवं शान्तं त्रिगुणादिविवर्जितम् ॥ १०॥अष्टोत्तरशताभिख्यकलान्यासविधिप्रियम् ।चिदाकारमहाद्वीपमध्यवाससुविग्रहम् ॥ ११॥चिदब्धिमथनोत्पन्नचित्सारघनविग्रहम् ।वाचामगोचरं शान्तं शुद्धचैतन्यरूपिणम् ॥ १२॥मूलकन्दस्थचिद्देशनवताण्डवपण्डितम् ।षडम्बुरुहसंस्थायिपरचिव्द्योमभासुरम् ॥ १३॥अकारादिक्षकारान्तवर्णलक्षितचित्सुखम् ।अकाराक्षरनिर्दिष्टप्रकाशमयविग्रहम् ॥ १४॥हकाराख्यविमर्शात्मप्रभादीप्तजगत्त्रयम् ।महाहंसजपध्यानविधिज्ञातस्वरूपकम् ॥ १५॥सदोदितमहाप्रज्ञाकारं संसारतारकम् ।मोक्षलक्ष्मीप्रदातारं कालातीतमहाप्रभुम् ॥ १६॥नामरूपादिसम्भिन्ननित्यपूर्णचिदुत्तमम् ।प्रत्यग्भूतमहाप्रज्ञागात्रगोचरविग्रहम् ॥ १७॥महाकुण्डलिनीरूपं षट्च्क्रनगरेश्वरम् ।अप्राकृतमहादिव्यचैतन्यात्मस्वरूपिणम् ॥ १८॥नादबिन्दुकलातीतं कार्यकारणवर्जितम् ।षडम्बुरुहचक्रान्तः स्फुरत्सौदामिनीप्रभम् ॥ १९॥तत्त्वमस्यादिवाक्यार्थपरिबोधनपण्डितम् ।ब्रह्मादिकीटपर्यन्तव्याप्तसंवित्सुधारसम् ॥ २०॥इच्छाज्ञानक्रियानन्दसर्वतन्त्र स्वतन्त्रिणम् ।हृदयग्रन्थिभिद्विद्यादर्शनोत्सुकमानसम् ॥ २१॥पञ्चकृत्यपरेशानं महात्रैपुरविग्रहम् ।श्रीचक्रराजमध्यस्थशून्यग्राममहेश्वरम् ॥ २२॥ब्रह्मविद्यास्वरूपश्रीललितारूपधारिणम् ।वशिन्याद्यावृतं साध्यं अद्वयानन्दवर्धनम् ॥ २३॥आदिशङ्कररूपेशदक्षिणामूर्तिपूजितम् ।असंस्पृष्टमहाप्रज्ञाभिख्याद्वैतस्थितिप्रभम् ॥ २४॥एवं सञ्चितयेद्देवं उच्छिष्टगणनायकम् ।नीलतारासमेतं तु सच्चिदानन्दविग्रहम् ॥ २५॥

mūlādhāre suyonyākhye cidagnivaramaṇḍale |samāsīnaṃ parāśaktivigrahaṃ gaṇanāyakam || 1||raktotpalasamaprakhyaṃ nīlameghasamaprabham |ratnaprabhālasaddīptamukuṭāñcitamastakam || 2||karuṇārasasudhādhārāsravadakṣitrayānvitam |akṣikukṣimahāvakṣaḥ gaṇḍaśūkādibhūṣaṇam || 3||pāśāṅkuśekṣukodaṇḍapañcabāṇalasatkaram |nīlakāntighanībhūtanīlavāṇīsupārśvakam || 4||sutrikoṇākhyanīlāṅgarasāsvādanatatparam |patnyāliṅgatavāmāṅgaṃ saptamātṛniṣevitam || 5||brahmaviṣṇumahendrādisamprapūjitapādukam |mahaddvayapadovācyapādukāmantrasārakam || 6||navāvaraṇayajñākhya varivasyāvidhipriyam |pañcāvaraṇayajñākhya vidhisampūjyapādukam || 7||akhaṇḍakoṭibrahmāṇḍāmaṇḍaleśvaramavyayam |radanākṣarasampūrṇamantrarājasvarūpiṇam || 8||girivyāhṛtivarṇātmamantratatvapradarśakam |aruṇāruṇatanucchāyamahākāmakalātmakam || 9||mahāgopyamahāvidyā prakāśitakalevaram |cicchivaṃ cidbhavaṃ śāntaṃ triguṇādivivarjitam || 10||aṣṭottaraśatābhikhyakalānyāsavidhipriyam |cidākāramahādvīpamadhyavāsasuvigraham || 11||cidabdhimathanotpannacitsāraghanavigraham |vācāmagocaraṃ śāntaṃ śuddhacaitanyarūpiṇam || 12||mūlakandasthaciddeśanavatāṇḍavapaṇḍitam |ṣaḍamburuhasaṃsthāyiparacivdyomabhāsuram || 13||akārādikṣakārāntavarṇalakṣitacitsukham |akārākṣaranirdiṣṭaprakāśamayavigraham || 14||hakārākhyavimarśātmaprabhādīptajagattrayam |mahāhaṃsajapadhyānavidhijñātasvarūpakam || 15||sadoditamahāprajñākāraṃ saṃsāratārakam |mokṣalakṣmīpradātāraṃ kālātītamahāprabhum || 16||nāmarūpādisambhinnanityapūrṇaciduttamam |pratyagbhūtamahāprajñāgātragocaravigraham || 17||mahākuṇḍalinīrūpaṃ ṣaṭckranagareśvaram |aprākṛtamahādivyacaitanyātmasvarūpiṇam || 18||nādabindukalātītaṃ kāryakāraṇavarjitam |ṣaḍamburuhacakrāntaḥ sphuratsaudāminīprabham || 19||tattvamasyādivākyārthaparibodhanapaṇḍitam |brahmādikīṭaparyantavyāptasaṃvitsudhārasam || 20||icchājñānakriyānandasarvatantra svatantriṇam |hṛdayagranthibhidvidyādarśanotsukamānasam || 21||pañcakṛtyapareśānaṃ mahātraipuravigraham |śrīcakrarājamadhyasthaśūnyagrāmamaheśvaram || 22||brahmavidyāsvarūpaśrīlalitārūpadhāriṇam |vaśinyādyāvṛtaṃ sādhyaṃ advayānandavardhanam || 23||ādiśaṅkararūpeśadakṣiṇāmūrtipūjitam |asaṃspṛṣṭamahāprajñābhikhyādvaitasthitiprabham || 24||evaṃ sañcitayeddevaṃ ucchiṣṭagaṇanāyakam |nīlatārāsametaṃ tu saccidānandavigraham || 25||