गणेशस्तुतिः ससर्वस्वानन्दकृता Shri Ganesha Stuti Sasarvasvanandakrita

॥ श्रीगणेशाय नमः ॥ससर्वस्वानन्द उवाच ।अजं पुराणं परमव्ययं तं निवृत्तिमात्रं ह्यसमाधिसंस्थम् ।अयोगरूपं गणनाथमाद्यं नमामि निर्मायिकमप्रमेयम् ॥ २१॥

|| śrīgaṇeśāya namaḥ ||sasarvasvānanda uvāca |ajaṃ purāṇaṃ paramavyayaṃ taṃ nivṛttimātraṃ hyasamādhisaṃstham |ayogarūpaṃ gaṇanāthamādyaṃ namāmi nirmāyikamaprameyam || 21||

न जारजं स्वेदजमण्डजं न न चोद्भिदं स्थावरजङ्गमं न ।अनादिमध्यान्तममोघरूपं नमामि निर्मायिकमप्रमेयम् ॥ २२॥

na jārajaṃ svedajamaṇḍajaṃ na na codbhidaṃ sthāvarajaṅgamaṃ na |anādimadhyāntamamogharūpaṃ namāmi nirmāyikamaprameyam || 22||

न भूस्वरूपं न जलं प्रकाशं न वायुरूपं न खमेव ढुण्ढिम् ।न राजसं सत्त्वतमोयुतं न नमामि निर्मायिकमप्रमेयम् ॥ २३॥

na bhūsvarūpaṃ na jalaṃ prakāśaṃ na vāyurūpaṃ na khameva ḍhuṇḍhim |na rājasaṃ sattvatamoyutaṃ na namāmi nirmāyikamaprameyam || 23||

न जागृतं स्वप्नगतं न देवं सौषुप्तकं नैव तुरीयसंस्थम् ।न बिन्दुमात्रं न च सोऽहमेव नमामि निर्मायिकमप्रमेयम् ॥ २४॥

na jāgṛtaṃ svapnagataṃ na devaṃ sauṣuptakaṃ naiva turīyasaṃstham |na bindumātraṃ na ca so'hameva namāmi nirmāyikamaprameyam || 24||

न बोधगं नैव विबोधरूपं न मोहयुक्तं न च मोहहीनम् ।न निर्गुणं नो सगुणं तथा तं नमामि निर्मायिकमप्रमेयम् ॥ २५॥

na bodhagaṃ naiva vibodharūpaṃ na mohayuktaṃ na ca mohahīnam |na nirguṇaṃ no saguṇaṃ tathā taṃ namāmi nirmāyikamaprameyam || 25||

न कर्मरूपं न च ज्ञानरूपं समं न चाधीनतमं सदा न ।न स्वात्मगं सर्वविकारहीनं नमामि निर्मायिकमप्रमेयम् ॥ २६॥

na karmarūpaṃ na ca jñānarūpaṃ samaṃ na cādhīnatamaṃ sadā na |na svātmagaṃ sarvavikārahīnaṃ namāmi nirmāyikamaprameyam || 26||

असत्स्वरूपं न च सत्स्वरूपं समानरूपं न च नेतिगं तम् ।निजात्मरूपं विविधेषु नैव नमामि निर्मायिकमप्रमेयम् ॥ २७॥

asatsvarūpaṃ na ca satsvarūpaṃ samānarūpaṃ na ca netigaṃ tam |nijātmarūpaṃ vividheṣu naiva namāmi nirmāyikamaprameyam || 27||

अनन्तरूपं न तथैकरूपं समं न तुर्यं न च पञ्चमं तम् ।सदा गणेशाकृतिरूपधारं नमामि निर्मायिकमप्रमेयम् ॥ २८॥

anantarūpaṃ na tathaikarūpaṃ samaṃ na turyaṃ na ca pañcamaṃ tam |sadā gaṇeśākṛtirūpadhāraṃ namāmi nirmāyikamaprameyam || 28||

न चागतं नैव गतं गणेशमयोगरूपं प्रवदन्ति वेदाः ।सदा निवृत्तिमयमासमन्तान्नमामि निर्मायिकमप्रमेयम् ॥ २९॥

na cāgataṃ naiva gataṃ gaṇeśamayogarūpaṃ pravadanti vedāḥ |sadā nivṛttimayamāsamantānnamāmi nirmāyikamaprameyam || 29||

वचोभिरारात् कथितुं कदाचिदयोगभावान् मनसो न शक्यम् ।कदा तमप्राप्य वदामि देवं नमामि निर्मायिकमप्रमेयम् ॥ ३०॥

vacobhirārāt kathituṃ kadācidayogabhāvān manaso na śakyam |kadā tamaprāpya vadāmi devaṃ namāmi nirmāyikamaprameyam || 30||

न सिद्धियुक्तं न च बुद्धियुक्तं न मायिकं ब्रह्ममयं परेशम् ।अनन्तपारं गजवक्त्रधारं नमामि निर्मायिकमप्रमेयम् ॥ ३१॥

na siddhiyuktaṃ na ca buddhiyuktaṃ na māyikaṃ brahmamayaṃ pareśam |anantapāraṃ gajavaktradhāraṃ namāmi nirmāyikamaprameyam || 31||

त्रिनेत्रधारं गजवक्त्रयुक्तं चतुर्भुजं चैकरदं महान्तम् ।महोदरं वाहनहीनगं तं नमामि निर्मायिकमप्रमेयम् ॥ ३२॥

trinetradhāraṃ gajavaktrayuktaṃ caturbhujaṃ caikaradaṃ mahāntam |mahodaraṃ vāhanahīnagaṃ taṃ namāmi nirmāyikamaprameyam || 32||

न योगनिष्ठं न विहारयुक्तं निजात्मनाम्नि नगरे न संस्थम् ।निजे समुद्रे न विहारकारं नमामि निर्मायिकमप्रमेयम् ॥ ३३॥

na yoganiṣṭhaṃ na vihārayuktaṃ nijātmanāmni nagare na saṃstham |nije samudre na vihārakāraṃ namāmi nirmāyikamaprameyam || 33||

न भक्तभक्तिप्रियमेव देवं तथापि योगेन निवृत्तिदं तम् ।अपारमायामयपाशहारं नमामि निर्मायिकमप्रमेयम् ॥ ३४॥

na bhaktabhaktipriyameva devaṃ tathāpi yogena nivṛttidaṃ tam |apāramāyāmayapāśahāraṃ namāmi nirmāyikamaprameyam || 34||

अहं विकारेण विमोहितोऽतो भ्रमन् गणेशाधिपते महात्मन् ।जगत्सु नानाविधब्रह्मसु प्रभो नमामि निर्मायिकमप्रमेयम् ॥ ३५॥

ahaṃ vikāreṇa vimohito'to bhraman gaṇeśādhipate mahātman |jagatsu nānāvidhabrahmasu prabho namāmi nirmāyikamaprameyam || 35||

समाधिरूपोऽहमचिन्त्यभावः सर्वात्मकः सर्वविवर्जितोऽहम् ।भ्रमामि मां रक्ष निवृत्तिदातर्नमामि निर्मायिकमप्रमेयम् ॥ ३६॥

samādhirūpo'hamacintyabhāvaḥ sarvātmakaḥ sarvavivarjito'ham |bhramāmi māṃ rakṣa nivṛttidātarnamāmi nirmāyikamaprameyam || 36||

सुसिद्धिबुद्धिप्रद मोहयुक्तो विभज्य नानाविधमात्मरूपम् ।चतुः पदार्थेषु चरामि भ्रान्त्या नमामि निर्मायिकमप्रमेयम् ॥ ३७॥

susiddhibuddhiprada mohayukto vibhajya nānāvidhamātmarūpam |catuḥ padārtheṣu carāmi bhrāntyā namāmi nirmāyikamaprameyam || 37||

सुखेलयुक्तोऽहमथो सुखेनेतरेण योगेन तदात्मना वै ।न शान्तिजं सौख्यमणु ह्यविन्दं नमामि निर्मायिकमप्रमेयम् ॥ ३८॥

sukhelayukto'hamatho sukhenetareṇa yogena tadātmanā vai |na śāntijaṃ saukhyamaṇu hyavindaṃ namāmi nirmāyikamaprameyam || 38||

अनन्तभावेन विमोहितं मां रक्षस्व ते पादप्रियं गणेश ।निवृत्तिकां देहि परार्थभूतां नमामि निर्मायिकमप्रमेयम् ॥ ३९॥

anantabhāvena vimohitaṃ māṃ rakṣasva te pādapriyaṃ gaṇeśa |nivṛttikāṃ dehi parārthabhūtāṃ namāmi nirmāyikamaprameyam || 39||

नमो गणेशाय निवृत्तिधारिणे नमः परेशाय सुखाब्धिवासिने ।नमश्च हेरम्ब महोदराय ते नमो नमो ब्रह्मपते सुशान्तये ॥ ४०॥

namo gaṇeśāya nivṛttidhāriṇe namaḥ pareśāya sukhābdhivāsine |namaśca heramba mahodarāya te namo namo brahmapate suśāntaye || 40||

अयोगरूपं गणनायकं तं प्रवेशहीनात् कथमेव ढुण्ढे ।दयापरं स्तौम्यधुना च तारय नमो नमो विघ्नपते नमस्ते ॥ ४१॥

ayogarūpaṃ gaṇanāyakaṃ taṃ praveśahīnāt kathameva ḍhuṇḍhe |dayāparaṃ staumyadhunā ca tāraya namo namo vighnapate namaste || 41||

मुद्गल उवाच ।एवं स्तुत्वा गणेशानं स्वानन्दः प्रणनाम तम् ।भक्त्या हर्षेण संयुक्तस्तमुवाच गजाननः ॥ ४२॥

mudgala uvāca |evaṃ stutvā gaṇeśānaṃ svānandaḥ praṇanāma tam |bhaktyā harṣeṇa saṃyuktastamuvāca gajānanaḥ || 42||

(फलशृतिः ।)श्रीगणेश उवाच ।वरं वृणु महाभाग सर्वं दास्यामि चेप्सितम् ।मायामायिकभेदैस्त्वं दुःखितोऽसि न संशयः ॥ ४३॥

(phalaśṛtiḥ |)śrīgaṇeśa uvāca |varaṃ vṛṇu mahābhāga sarvaṃ dāsyāmi cepsitam |māyāmāyikabhedaistvaṃ duḥkhito'si na saṃśayaḥ || 43||

त्वया कृतमिदं स्तोत्रं सर्वशान्तिप्रदं भवेत् ।न मायासम्भवं दुःखं प्रलभेत् पाठतो नरः ॥ ४४॥

tvayā kṛtamidaṃ stotraṃ sarvaśāntipradaṃ bhavet |na māyāsambhavaṃ duḥkhaṃ pralabhet pāṭhato naraḥ || 44||

यं यमिच्छति तं तं वै दास्यामि स्तोत्रपाठतः ।असाध्यं साधयेन् मर्त्यः श्रवणेन निजप्रदम् ॥ ४५॥

yaṃ yamicchati taṃ taṃ vai dāsyāmi stotrapāṭhataḥ |asādhyaṃ sādhayen martyaḥ śravaṇena nijapradam || 45||

एवं श्रुत्वा गणेशस्य वचनं स्वस्वरूपकम् ।जगाद तं प्रणम्यादौ कृत्वा करपुटं विधे ॥ ४६॥

evaṃ śrutvā gaṇeśasya vacanaṃ svasvarūpakam |jagāda taṃ praṇamyādau kṛtvā karapuṭaṃ vidhe || 46||

ससर्वस्वानन्द उवाच ।यदि तुष्टोऽसि विघ्नेश तदा देहि निवृत्तिजम् ।सुखं नान्यं वरं भ्रान्तिं मायामेतां निवारय ॥ ४७॥

sasarvasvānanda uvāca |yadi tuṣṭo'si vighneśa tadā dehi nivṛttijam |sukhaṃ nānyaṃ varaṃ bhrāntiṃ māyāmetāṃ nivāraya || 47||

तथेति तमुवाचैव गणेशोंऽतर्दधे ततः ।स्वानन्दः खिन्नभावेन स्वस्थाने संस्थितोऽभवत् ॥ ४८॥

tatheti tamuvācaiva gaṇeśoṃ'tardadhe tataḥ |svānandaḥ khinnabhāvena svasthāne saṃsthito'bhavat || 48||

सस्मारायोगनाथं तं ततश्चित्रं बभूव ह ।विश्वानि ब्रह्ममुख्यानि स्वानन्दे लयमाययुः ॥ ४९॥

sasmārāyoganāthaṃ taṃ tataścitraṃ babhūva ha |viśvāni brahmamukhyāni svānande layamāyayuḥ || 49||

ततः स्वयं निजानन्दो नष्टस्तत्र बभूव ह ।मायाहीनप्रभावेणायोगस्थः शुशुभे मुदा ॥ ५०॥

tataḥ svayaṃ nijānando naṣṭastatra babhūva ha |māyāhīnaprabhāveṇāyogasthaḥ śuśubhe mudā || 50||

संयोगमायया हीनो न ददर्श स किञ्चन ।स्वात्मानं वाऽपरं मुख्यं अयोगं गणनायकम् ॥ ५१॥

saṃyogamāyayā hīno na dadarśa sa kiñcana |svātmānaṃ vā'paraṃ mukhyaṃ ayogaṃ gaṇanāyakam || 51||

सर्वबन्धविनिर्मुक्तं बभूव स्वस्वरूपकम् ।एतत् सर्वं समाख्यातमयोगस्य चरित्रकम् ॥ ५२॥

sarvabandhavinirmuktaṃ babhūva svasvarūpakam |etat sarvaṃ samākhyātamayogasya caritrakam || 52||

अयोगे दक्ष नैवास्ति त्वमहं ब्रह्म शाश्वतम् ।न गणेशः स्वसंवेद्यं तेन निर्वृत्तिमाप्नुयात् ॥ ५३॥

ayoge dakṣa naivāsti tvamahaṃ brahma śāśvatam |na gaṇeśaḥ svasaṃvedyaṃ tena nirvṛttimāpnuyāt || 53||

यः पठेच्छ्रुणुयाद्वा यो ह्ययोगस्य चरित्रकम् ।स भुक्त्वा सकलान् भोगानन्ते निर्वृत्तिमाप्नुयात् ॥ ५४॥

yaḥ paṭhecchruṇuyādvā yo hyayogasya caritrakam |sa bhuktvā sakalān bhogānante nirvṛttimāpnuyāt || 54||

इति ससर्वस्वानन्दकृता श्रीगणेशस्तुतिः सम्पूर्णा ॥एकविंशतिस्तोत्रं॥ मुद्गलपुराणं नवमः खण्डः । अध्यायः २ । ९\।२ २१५४॥– ॥ मुद्गलपुराणं नवमः खण्डः । अध्यायः २ । ९।२ २१-५४॥

iti sasarvasvānandakṛtā śrīgaṇeśastutiḥ sampūrṇā ||ekaviṃśatistotraṃ|| mudgalapurāṇaṃ navamaḥ khaṇḍaḥ | adhyāyaḥ 2 | 9\|2 2154||– || mudgalapurāṇaṃ navamaḥ khaṇḍaḥ | adhyāyaḥ 2 | 9|2 21-54||