गणेशस्तुतिः शेषकृता Shri Ganesha Stuti Sheshakrita

॥ श्रीगणेशाय नमः ॥शेष उवाच ।गणेशाय नमस्तुभ्यं सिद्धिबुद्धिपते नमः ।चिन्तामणे महाविघ्ननाशनाय नमो नमः ॥ ७॥

|| śrīgaṇeśāya namaḥ ||śeṣa uvāca |gaṇeśāya namastubhyaṃ siddhibuddhipate namaḥ |cintāmaṇe mahāvighnanāśanāya namo namaḥ || 7||

सर्वादिपूज्यरूपाय सर्वपूज्याय ते नमः ।ज्येष्ठराजाय ज्येष्ठानां मात्रे पित्रे नमो नमः ॥ ८॥

sarvādipūjyarūpāya sarvapūjyāya te namaḥ |jyeṣṭharājāya jyeṣṭhānāṃ mātre pitre namo namaḥ || 8||

विनायकाय सर्वेषां नायकाय नमो नमः ।नायकानां प्रचालाय नायकैः सेविताय ते ॥ ९॥

vināyakāya sarveṣāṃ nāyakāya namo namaḥ |nāyakānāṃ pracālāya nāyakaiḥ sevitāya te || 9||

विघ्नेशाय च सर्वेषां पदभ्रंशकराय ते ।अभक्तानां सुभक्तानां विघ्नहन्त्रे नमो नमः ॥ १०॥

vighneśāya ca sarveṣāṃ padabhraṃśakarāya te |abhaktānāṃ subhaktānāṃ vighnahantre namo namaḥ || 10||

ढुण्ढिराजाय सर्वैश्च ढुण्ढिताय सुसिद्धिद ।ढुण्ढितानां महाराज परेशाय नमो नमः ॥ ११॥

ḍhuṇḍhirājāya sarvaiśca ḍhuṇḍhitāya susiddhida |ḍhuṇḍhitānāṃ mahārāja pareśāya namo namaḥ || 11||

ब्रह्मणां पतये तुभ्यं ब्रह्मेभ्यो ब्रह्मदायिने ।ब्रह्मभ्यः सुखदायाऽथ शान्तिरूपाय ते नमः ॥ १२॥

brahmaṇāṃ pataye tubhyaṃ brahmebhyo brahmadāyine |brahmabhyaḥ sukhadāyā'tha śāntirūpāya te namaḥ || 12||

स्वानन्दवासिने तुभ्यं सदा स्वानन्दमूर्तये ।नाना विहारकर्त्रे ते समाधये नमो नमः ॥ १३॥

svānandavāsine tubhyaṃ sadā svānandamūrtaye |nānā vihārakartre te samādhaye namo namaḥ || 13||

मूषकवाहनायैव मूषकप्रियमूर्तये ।मूषकध्वजिने तुभ्यं स्तेयरूपाय ते नमः ॥ १४॥

mūṣakavāhanāyaiva mūṣakapriyamūrtaye |mūṣakadhvajine tubhyaṃ steyarūpāya te namaḥ || 14||

अयोगाय सदा ब्रह्मन् ब्रह्मणे ब्रह्ममूर्तये ।असमाधिस्थ हेरम्ब मायाहीनाय ते नमः ॥ १५॥

ayogāya sadā brahman brahmaṇe brahmamūrtaye |asamādhistha heramba māyāhīnāya te namaḥ || 15||

योगाय योगनाथाय योगेभ्यो योगदायिने ।चित्तवृत्तिविहीनाय गणेशाय नमो नमः ॥ १६॥

yogāya yoganāthāya yogebhyo yogadāyine |cittavṛttivihīnāya gaṇeśāya namo namaḥ || 16||

किं स्तौमि त्वां गणाधीश मनोवाणीविवर्जितम् ।मनोवाणीमयं स्वामिन् द्वाभ्यां हीनतया स्थित ॥ १७॥

kiṃ staumi tvāṃ gaṇādhīśa manovāṇīvivarjitam |manovāṇīmayaṃ svāmin dvābhyāṃ hīnatayā sthita || 17||

अतो वेदादयः सर्वे कुण्ठिता नात्र संशयः ।योगिनः शुकमुख्याश्चातस्त्वां पश्यामि भाग्यतः ॥ १८॥

ato vedādayaḥ sarve kuṇṭhitā nātra saṃśayaḥ |yoginaḥ śukamukhyāścātastvāṃ paśyāmi bhāgyataḥ || 18||

एवं संस्तुवतस्तस्य भक्तिरससमुद्भवः ।ननर्त तेन शेषश्च हृष्टरोमाऽश्रुलोचनः ॥ १९॥

evaṃ saṃstuvatastasya bhaktirasasamudbhavaḥ |nanarta tena śeṣaśca hṛṣṭaromā'śrulocanaḥ || 19||

जगाद गणराजस्तु ततस्तं भक्तमुत्तमम् ।वरान् वरय शेष त्वं दास्यामि भक्तिभावितः ॥ २०॥

jagāda gaṇarājastu tatastaṃ bhaktamuttamam |varān varaya śeṣa tvaṃ dāsyāmi bhaktibhāvitaḥ || 20||

त्वया कृतमिदं स्तोत्रं शान्तियोगप्रदं भवेत् ।धर्मार्थकाममोक्षाणां दायकं सर्वसिद्धिदम् ॥ २१॥

tvayā kṛtamidaṃ stotraṃ śāntiyogapradaṃ bhavet |dharmārthakāmamokṣāṇāṃ dāyakaṃ sarvasiddhidam || 21||

यद्यदिच्छति तत्तद्वै दास्यामि स्तोत्रपाठतः ।श्रवणान्नाऽत्र सन्देहो भवेन् मद्भक्तिवर्धनम् ॥ २२॥

yadyadicchati tattadvai dāsyāmi stotrapāṭhataḥ |śravaṇānnā'tra sandeho bhaven madbhaktivardhanam || 22||

ततस्तं नागराजश्च जगाद वचनं हितम् ।प्रणम्य भावसंयुक्तो विघ्नेशं भक्तिलालसः ॥ २३॥

tatastaṃ nāgarājaśca jagāda vacanaṃ hitam |praṇamya bhāvasaṃyukto vighneśaṃ bhaktilālasaḥ || 23||

शेष उवाच ।भक्तिं देहि गणाधीश तव पादाम्बुजे पराम् ।सदा शान्तिस्थमत्यन्तं कुरुष्व गणनायक ॥ २४॥

śeṣa uvāca |bhaktiṃ dehi gaṇādhīśa tava pādāmbuje parām |sadā śāntisthamatyantaṃ kuruṣva gaṇanāyaka || 24||

चित्तं पञ्चविधं प्रोक्तं तत्र त्वं सततं प्रभो ।तिष्ठस्व स्फूर्तिरूपेण मदीयभ्रमनाशकः ॥ २५॥

cittaṃ pañcavidhaṃ proktaṃ tatra tvaṃ satataṃ prabho |tiṣṭhasva sphūrtirūpeṇa madīyabhramanāśakaḥ || 25||

मनश्चञ्चलभावेन संसारविषये रतम् ।भविष्यति न सन्देहोऽतस्त्वं मे तनयो भव ॥ २६॥

manaścañcalabhāvena saṃsāraviṣaye ratam |bhaviṣyati na sandeho'tastvaṃ me tanayo bhava || 26||

संसारे पुत्रभावेन भजिष्यामि निरन्तरम् ।हृदि शान्त्या तथा देव कुलदैवतरूपिणम् ॥ २७॥

saṃsāre putrabhāvena bhajiṣyāmi nirantaram |hṛdi śāntyā tathā deva kuladaivatarūpiṇam || 27||

गणेशक्षेत्रमत्रैव भवतु त्वत्प्रसादतः ।सर्वसिद्धिप्रदं नाथ भक्तेभ्यः शान्तिदायकम् ॥ २८॥

gaṇeśakṣetramatraiva bhavatu tvatprasādataḥ |sarvasiddhipradaṃ nātha bhaktebhyaḥ śāntidāyakam || 28||

चित्तभूमिधरं वीक्ष्याऽहं शान्तोऽत्र गजानन ।धरणीधरसंज्ञं त्वां वदिष्यन्ति जनाः प्रभो ॥ २९॥

cittabhūmidharaṃ vīkṣyā'haṃ śānto'tra gajānana |dharaṇīdharasaṃjñaṃ tvāṃ vadiṣyanti janāḥ prabho || 29||

येनाऽहं वै गणाध्यक्ष त्वद्रूपो नाऽत्र संशयः ।अतो मदीयनाम्ना त्वं धरणीधरको भव ॥ ३०॥

yenā'haṃ vai gaṇādhyakṣa tvadrūpo nā'tra saṃśayaḥ |ato madīyanāmnā tvaṃ dharaṇīdharako bhava || 30||

अहं धराधरः प्रोक्तः स्थूलशब्दप्रधारकः ।त्वं चित्तभूमिगः स्वामिन् योगेन धरणीधरः ॥ ३१॥

ahaṃ dharādharaḥ proktaḥ sthūlaśabdapradhārakaḥ |tvaṃ cittabhūmigaḥ svāmin yogena dharaṇīdharaḥ || 31||

एवमुक्त्वा गणेशानं विरराम च काश्यपः ।तमुवाच गणाधीशः सन्तुष्टो भक्तवत्सलः ॥ ३२॥

evamuktvā gaṇeśānaṃ virarāma ca kāśyapaḥ |tamuvāca gaṇādhīśaḥ santuṣṭo bhaktavatsalaḥ || 32||

(फलश्रुतिः)श्रीगणेश उवाच ।त्वयोक्तं सकलं शेष सफलं ते भविष्यति ।सदा शान्तिस्वरूपस्थो मां भजिष्यसि निश्चितम् ॥ ३३॥

(phalaśrutiḥ)śrīgaṇeśa uvāca |tvayoktaṃ sakalaṃ śeṣa saphalaṃ te bhaviṣyati |sadā śāntisvarūpastho māṃ bhajiṣyasi niścitam || 33||

योगशास्त्रस्य कर्ता वै त्वं भविष्यसि मानद ।न योगे त्वत्समः क्वापि भविष्यति महामते ॥ ३४॥

yogaśāstrasya kartā vai tvaṃ bhaviṣyasi mānada |na yoge tvatsamaḥ kvāpi bhaviṣyati mahāmate || 34||

सदा भक्तिकरस्त्वं मे नाभौ तिष्ठ धराधर ।भ्रमहीनः स्वभावेन मां भजस्व विशेषतः ॥ ३५॥

sadā bhaktikarastvaṃ me nābhau tiṣṭha dharādhara |bhramahīnaḥ svabhāvena māṃ bhajasva viśeṣataḥ || 35||

धराधरणदुःखश्रमादिकं वै कदाचन ।न भविष्यति ते शेष सर्षपेण समा भवेत् ॥ ३६॥

dharādharaṇaduḥkhaśramādikaṃ vai kadācana |na bhaviṣyati te śeṣa sarṣapeṇa samā bhavet || 36||

तव विष्णुः शरीरस्थः शयिता नित्यमादरात् ।पुष्पतुल्यो भवेद्देवः सोऽपि ब्रह्माण्डनायकः ॥ ३७॥

tava viṣṇuḥ śarīrasthaḥ śayitā nityamādarāt |puṣpatulyo bhaveddevaḥ so'pi brahmāṇḍanāyakaḥ || 37||

सदा यज्ञेषु भागस्थो भविष्यसि न संशयः ।दिक्पालस्त्वं महाभाग सर्वमान्यो न संशयः ॥ ३८॥

sadā yajñeṣu bhāgastho bhaviṣyasi na saṃśayaḥ |dikpālastvaṃ mahābhāga sarvamānyo na saṃśayaḥ || 38||

एवमुक्त्वा गणाधीशो रूपं नानाविधं स्वकम् ।दर्शयामास शेषाय नाना योगधरं परम् ॥ ३९॥

evamuktvā gaṇādhīśo rūpaṃ nānāvidhaṃ svakam |darśayāmāsa śeṣāya nānā yogadharaṃ param || 39||

समष्टिव्यष्टिरूपं च ददर्श नादरूपकम् ।बिन्दुं सोऽहं तथा बोधं विदेहं नागराट् प्रभो ॥ ४०॥

samaṣṭivyaṣṭirūpaṃ ca dadarśa nādarūpakam |binduṃ so'haṃ tathā bodhaṃ videhaṃ nāgarāṭ prabho || 40||

स्वस्वरूपमयोगस्थं योगशान्तिमयं तथा ।ददर्श विस्मितः शेषोऽभवत् संशयवर्जितः ॥ ४१॥

svasvarūpamayogasthaṃ yogaśāntimayaṃ tathā |dadarśa vismitaḥ śeṣo'bhavat saṃśayavarjitaḥ || 41||

अन्तर्धानं ययौ सद्यो गणेशो ब्रह्मनायकः ।शेषस्तत्र गणेशानं स्थापयामास विप्रपैः ॥ ४२॥

antardhānaṃ yayau sadyo gaṇeśo brahmanāyakaḥ |śeṣastatra gaṇeśānaṃ sthāpayāmāsa viprapaiḥ || 42||

इति शेषकृता श्रीगणेशस्तुतिः सम्पूर्णा ॥॥ मुद्गलपुराणं पञ्चमः खण्डः । अध्यायः १८ । ५\।१८। ७४२॥– ॥ मुद्गलपुराणं पञ्चमः खण्डः । अध्यायः १८ । ५।१८। ७-४२॥

iti śeṣakṛtā śrīgaṇeśastutiḥ sampūrṇā |||| mudgalapurāṇaṃ pañcamaḥ khaṇḍaḥ | adhyāyaḥ 18 | 5\|18| 742||– || mudgalapurāṇaṃ pañcamaḥ khaṇḍaḥ | adhyāyaḥ 18 | 5|18| 7-42||