महासिद्धिदेव्यष्टोत्तरशतनामस्तोत्रम् Mahasiddhidevi Ashtottarashata Nama Stotram

सूर्य उवाचस्वानन्दभवनान्तस्थहर्म्यस्था गणपप्रिया ।संयोगस्वानन्दब्रह्मशक्तिः संयोगरूपिणी ॥ १॥

sūrya uvācasvānandabhavanāntasthaharmyasthā gaṇapapriyā |saṃyogasvānandabrahmaśaktiḥ saṃyogarūpiṇī || 1||

अतिसौन्दर्यलावण्या महासिद्धिर्गणेश्वरी ।वज्रमाणिक्यमकुटकटकादिविभूषिता ॥ २॥

atisaundaryalāvaṇyā mahāsiddhirgaṇeśvarī |vajramāṇikyamakuṭakaṭakādivibhūṣitā || 2||

कस्तूरीतिलकोद्भासिनिटिला पद्मलोचना ।शरच्चाम्पेयपुष्पाभनासिका मृदुभाषिणी ॥ ३॥

kastūrītilakodbhāsiniṭilā padmalocanā |śaraccāmpeyapuṣpābhanāsikā mṛdubhāṣiṇī || 3||

लसत्काञ्चनताटङ्कयुगला योगिवन्दिता ।मणिदर्पणसङ्काशकपोला काङ्क्षितार्थदा ॥ ४॥

lasatkāñcanatāṭaṅkayugalā yogivanditā |maṇidarpaṇasaṅkāśakapolā kāṅkṣitārthadā || 4||

ताम्बूलपूरितस्मेरवदना विघ्ननाशिनी ।सुपक्वदाडिमीबीजरदना रत्नदायिनी ॥ ५॥

tāmbūlapūritasmeravadanā vighnanāśinī |supakvadāḍimībījaradanā ratnadāyinī || 5||

कम्बुवृत्तसमच्छायकन्धरा करुणायुता ।मुक्ताभा दिव्यवसना रत्नकल्हारमालिका ॥ ६॥

kambuvṛttasamacchāyakandharā karuṇāyutā |muktābhā divyavasanā ratnakalhāramālikā || 6||

गणेशबद्धमाङ्गल्या मङ्गला मङ्गलप्रदा ।वरदाभयहस्ताब्जा भवबन्धविमोचिनी ॥ ७॥

gaṇeśabaddhamāṅgalyā maṅgalā maṅgalapradā |varadābhayahastābjā bhavabandhavimocinī || 7||

सुवर्णकुम्भयुग्माभसुकुचा सिद्धिसेविता ।बृहन्नितम्बा विलसज्जघना जगदीश्वरी ॥ ८॥

suvarṇakumbhayugmābhasukucā siddhisevitā |bṛhannitambā vilasajjaghanā jagadīśvarī || 8||

सौभाग्यजातशृङ्गारमध्यमा मधुरस्वना ।दिव्यभूषणसन्दोहरञ्जिता ऋणमोचिनी ॥ ९॥

saubhāgyajātaśṛṅgāramadhyamā madhurasvanā |divyabhūṣaṇasandoharañjitā ṛṇamocinī || 9||

पारिजातगुणाधिक्यपदाब्जा परमात्मिका ।सुपद्मरागसङ्काशचरणा चिन्तितार्थदा ॥ १०॥

pārijātaguṇādhikyapadābjā paramātmikā |supadmarāgasaṅkāśacaraṇā cintitārthadā || 10||

ब्रह्मभावमहासिद्धिपीठस्था पङ्कजासना ।हेरम्बनेत्रकुमुदचन्द्रिका चन्द्रभूषणा ॥ ११॥

brahmabhāvamahāsiddhipīṭhasthā paṅkajāsanā |herambanetrakumudacandrikā candrabhūṣaṇā || 11||

सचामरशिवावाणीसव्यदक्षिणवीजिता ।भक्तरक्षणदाक्षिण्यकटाक्षा कमलासना ॥ १२॥

sacāmaraśivāvāṇīsavyadakṣiṇavījitā |bhaktarakṣaṇadākṣiṇyakaṭākṣā kamalāsanā || 12||

गणेशालिङ्गनोद्भूतपुलकाङ्गी परात्परा ।लीलाकल्पितब्रह्माण्डकोटिकोटिसमन्विता ॥ १३॥

gaṇeśāliṅganodbhūtapulakāṅgī parātparā |līlākalpitabrahmāṇḍakoṭikoṭisamanvitā || 13||

वाणीकोटिसमायुक्तकोटिब्रह्मनिषेविता ।लक्ष्मीकोटिसमायुक्तविष्णुकोटिप्रपूजिता ॥ १४॥

vāṇīkoṭisamāyuktakoṭibrahmaniṣevitā |lakṣmīkoṭisamāyuktaviṣṇukoṭiprapūjitā || 14||

गौरीकोटिसमायुक्तशम्भुकोटिसुसेविता ।प्रभाकोटिसमायुक्तकोटिभास्करवन्दिता ॥ १५॥

gaurīkoṭisamāyuktaśambhukoṭisusevitā |prabhākoṭisamāyuktakoṭibhāskaravanditā || 15||

भानुकोटिप्रतीकाशा चन्द्रकोटिसुशीतला ।चतुष्षष्टिकोटिसिद्धिनिषेवितपदाम्बुजा ॥ १६॥

bhānukoṭipratīkāśā candrakoṭisuśītalā |catuṣṣaṣṭikoṭisiddhiniṣevitapadāmbujā || 16||

मूलाधारसमुत्पन्ना मूलबन्धविमोचिनी ।मूलाधारैकनिलया योगकुण्डलिभेदिनी ॥ १७॥

mūlādhārasamutpannā mūlabandhavimocinī |mūlādhāraikanilayā yogakuṇḍalibhedinī || 17||

मूलाधारा मूलभूता मूलप्रकृतिरूपिणी ।मूलाधारगणेशानवामभागनिवासिनी ॥ १८॥

mūlādhārā mūlabhūtā mūlaprakṛtirūpiṇī |mūlādhāragaṇeśānavāmabhāganivāsinī || 18||

मूलविद्या मूलरूपा मूलग्रन्थिविभेदिनी ।स्वाधिष्ठानैकनिलया ब्रह्मग्रन्थिविभेदिनी ॥ १९॥

mūlavidyā mūlarūpā mūlagranthivibhedinī |svādhiṣṭhānaikanilayā brahmagranthivibhedinī || 19||

मणिपूरान्तरुदिता विष्णुग्रन्थिविभेदिनी ।अनाहतैकनिलया रुद्रग्रन्थिविभेदिनी ॥ २०॥

maṇipūrāntaruditā viṣṇugranthivibhedinī |anāhataikanilayā rudragranthivibhedinī || 20||

विशुद्धिस्थाननिलया जीवभावप्रणाशिनी ।आज्ञाचक्रान्तरालस्था ज्ञानसिद्धिप्रदायिनी ॥ २१॥

viśuddhisthānanilayā jīvabhāvapraṇāśinī |ājñācakrāntarālasthā jñānasiddhipradāyinī || 21||

ब्रह्मरन्ध्रैकनिलया ब्रह्मभावप्रदायिनी ।षट्कोणाष्टदलयुतश्रीसिद्धियन्त्रमध्यगा ॥ २२॥

brahmarandhraikanilayā brahmabhāvapradāyinī |ṣaṭkoṇāṣṭadalayutaśrīsiddhiyantramadhyagā || 22||

अन्तर्मुखजनानन्तफलदा शोकनाशिनी ।अव्याजकरुणापूरपूरिता वसुधारिणी ॥ २३॥

antarmukhajanānantaphaladā śokanāśinī |avyājakaruṇāpūrapūritā vasudhāriṇī || 23||

दारिद्र्यनाशिनी लक्ष्मीस्सर्वपापप्रणाशिनी ।भुक्तिसिद्धिर्मुक्तिसिद्धिस्सुधामण्डलमध्यगा ॥ २४॥

dāridryanāśinī lakṣmīssarvapāpapraṇāśinī |bhuktisiddhirmuktisiddhissudhāmaṇḍalamadhyagā || 24||

चिन्तामणिस्सर्वसिद्धिः कमलावल्लभा शिवा ।सिद्धलक्ष्मीर्मोक्षलक्ष्मीर्जयलक्ष्मीर्वरप्रदा ॥ २५॥

cintāmaṇissarvasiddhiḥ kamalāvallabhā śivā |siddhalakṣmīrmokṣalakṣmīrjayalakṣmīrvarapradā || 25||

रमानन्दा महालक्ष्मीर्विभूतिर्भक्तिवर्धिनी ।अष्टोत्तरशतं नाम्नां महासिद्धेरिदं वरम् ॥ २६॥

ramānandā mahālakṣmīrvibhūtirbhaktivardhinī |aṣṭottaraśataṃ nāmnāṃ mahāsiddheridaṃ varam || 26||

आज्ञया गणनाथस्य गणकेन प्रकीर्तितम् ।यः पठेद् गाणपो भक्त्या पूजयेद्वा सुनामभिः ।धर्ममर्थं च कामं च लब्ध्वा मोक्षमवाप्नुयात् ॥ २७॥

ājñayā gaṇanāthasya gaṇakena prakīrtitam |yaḥ paṭhed gāṇapo bhaktyā pūjayedvā sunāmabhiḥ |dharmamarthaṃ ca kāmaṃ ca labdhvā mokṣamavāpnuyāt || 27||

इति महासिद्धिदेव्यष्टोत्तरशतनामस्तोत्रं सम्पूर्णम् ।

iti mahāsiddhidevyaṣṭottaraśatanāmastotraṃ sampūrṇam |