एकदन्तगणेशस्तोत्रम् Ekadamtaganeshastotram

श्रीगणेशाय नमः ।मदासुरं सुशान्तं वै दृष्ट्वा विष्णुमुखाः सुराः ।भृग्वादयश्च मुनय एकदन्तं समाययुः ॥ १॥

śrīgaṇeśāya namaḥ |madāsuraṃ suśāntaṃ vai dṛṣṭvā viṣṇumukhāḥ surāḥ |bhṛgvādayaśca munaya ekadantaṃ samāyayuḥ || 1||

प्रणम्य तं प्रपूज्यादौ पुनस्तं नेमुरादरात् ।तुष्टुवुर्हर्षसंयुक्ता एकदन्तं गणेश्वरम् ॥ २॥

praṇamya taṃ prapūjyādau punastaṃ nemurādarāt |tuṣṭuvurharṣasaṃyuktā ekadantaṃ gaṇeśvaram || 2||

देवर्षय ऊचुःसदात्मरूपं सकलादिभूतममायिनं सोऽहमचिन्त्यबोधम् ।अनादिमध्यान्तविहीनमेकं तमेकदन्तं शरणं व्रजामः ॥ ३॥

devarṣaya ūcuḥsadātmarūpaṃ sakalādibhūtamamāyinaṃ so'hamacintyabodham |anādimadhyāntavihīnamekaṃ tamekadantaṃ śaraṇaṃ vrajāmaḥ || 3||

अनन्तचिद्रूपमयं गणेशं ह्यभेदभेदादिविहीनमाद्यम् ।हृदि प्रकाशस्य धरं स्वधीस्थं तमेकदन्तं शरणं व्रजामः ॥ ४॥

anantacidrūpamayaṃ gaṇeśaṃ hyabhedabhedādivihīnamādyam |hṛdi prakāśasya dharaṃ svadhīsthaṃ tamekadantaṃ śaraṇaṃ vrajāmaḥ || 4||

विश्वादिभूतं हृदि योगिनां वै प्रत्यक्षरूपेण विभान्तमेकम् ।सदा निरालम्बसमाधिगम्यं तमेकदन्तं शरणं व्रजामः ॥ ५॥

viśvādibhūtaṃ hṛdi yogināṃ vai pratyakṣarūpeṇa vibhāntamekam |sadā nirālambasamādhigamyaṃ tamekadantaṃ śaraṇaṃ vrajāmaḥ || 5||

स्वबिम्बभावेन विलासयुक्तं बिन्दुस्वरूपा रचिता स्वमाया ।तस्यां स्ववीर्यं प्रददाति यो वै तमेकदन्तं शरणं व्रजामः ॥ ६॥

svabimbabhāvena vilāsayuktaṃ bindusvarūpā racitā svamāyā |tasyāṃ svavīryaṃ pradadāti yo vai tamekadantaṃ śaraṇaṃ vrajāmaḥ || 6||

त्वदीयवीर्येण समर्थभूता माया तया संरचितं च विश्वम् ।नादात्मकं ह्यात्मतया प्रतीतं तमेकदन्तं शरणं व्रजामः ॥ ७॥

tvadīyavīryeṇa samarthabhūtā māyā tayā saṃracitaṃ ca viśvam |nādātmakaṃ hyātmatayā pratītaṃ tamekadantaṃ śaraṇaṃ vrajāmaḥ || 7||

त्वदीयसत्ताधरमेकदन्तं गणेशमेकं त्रयबोधितारम् ।सेवन्त आपुस्तमजं त्रिसंस्थास्तमेकदन्तं शरणं व्रजामः ॥ ८॥

tvadīyasattādharamekadantaṃ gaṇeśamekaṃ trayabodhitāram |sevanta āpustamajaṃ trisaṃsthāstamekadantaṃ śaraṇaṃ vrajāmaḥ || 8||

ततस्त्वया प्रेरित एव नादस्तेनेदमेवं रचितं जगद्वै ।आनन्दरूपं समभावसंस्थं तमेकदन्तं शरणं व्रजामः ॥ ९॥

tatastvayā prerita eva nādastenedamevaṃ racitaṃ jagadvai |ānandarūpaṃ samabhāvasaṃsthaṃ tamekadantaṃ śaraṇaṃ vrajāmaḥ || 9||

तदेव विश्वं कृपया तवैव सम्भूतमाद्यं तमसा विभातम् ।अनेकरूपं ह्यजमेकभूतं तमेकदन्तं शरणं व्रजामः ॥ १०॥

tadeva viśvaṃ kṛpayā tavaiva sambhūtamādyaṃ tamasā vibhātam |anekarūpaṃ hyajamekabhūtaṃ tamekadantaṃ śaraṇaṃ vrajāmaḥ || 10||

ततस्त्वया प्रेरितमेव तेन सृष्टं सुसूक्ष्मं जगदेकसंस्थम् ।सत्त्वात्मकं श्वेतमनन्तमाद्यं तमेकदन्तं शरणं व्रजामः ॥ ११॥

tatastvayā preritameva tena sṛṣṭaṃ susūkṣmaṃ jagadekasaṃstham |sattvātmakaṃ śvetamanantamādyaṃ tamekadantaṃ śaraṇaṃ vrajāmaḥ || 11||

तदेव स्वप्नं तपसा गणेशं संसिद्धिरूपं विविधं वभूव ।सदेकरूपं कृपया तवाऽपि तमेकदन्तं शरणं व्रजामः ॥ १२॥

tadeva svapnaṃ tapasā gaṇeśaṃ saṃsiddhirūpaṃ vividhaṃ vabhūva |sadekarūpaṃ kṛpayā tavā'pi tamekadantaṃ śaraṇaṃ vrajāmaḥ || 12||

सम्प्रेरितं तच्च त्वया हृदिस्थं तथा सुसृष्टं जगदंशरूपम् ।तेनैव जाग्रन्मयमप्रमेयं तमेकदन्तं शरणं व्रजामः ॥ १३॥

sampreritaṃ tacca tvayā hṛdisthaṃ tathā susṛṣṭaṃ jagadaṃśarūpam |tenaiva jāgranmayamaprameyaṃ tamekadantaṃ śaraṇaṃ vrajāmaḥ || 13||

जाग्रत्स्वरूपं रजसा विभातं विलोकितं तत्कृपया यदैव ।तदा विभिन्नं भवदेकरूपं तमेकदन्तं शरणं व्रजामः ॥ १४॥

jāgratsvarūpaṃ rajasā vibhātaṃ vilokitaṃ tatkṛpayā yadaiva |tadā vibhinnaṃ bhavadekarūpaṃ tamekadantaṃ śaraṇaṃ vrajāmaḥ || 14||

एवं च सृष्ट्वा प्रकृतिस्वभावात्तदन्तरे त्वं च विभासि नित्यम् ।बुद्धिप्रदाता गणनाथ एकस्तमेकदन्तं शरणं व्रजामः ॥ १५॥

evaṃ ca sṛṣṭvā prakṛtisvabhāvāttadantare tvaṃ ca vibhāsi nityam |buddhipradātā gaṇanātha ekastamekadantaṃ śaraṇaṃ vrajāmaḥ || 15||

त्वदाज्ञया भान्ति ग्रहाश्च सर्वे नक्षत्ररूपाणि विभान्ति खे वै ।आधारहीनानि त्वया धृतानि तमेकदन्तं शरणं व्रजामः ॥ १६॥

tvadājñayā bhānti grahāśca sarve nakṣatrarūpāṇi vibhānti khe vai |ādhārahīnāni tvayā dhṛtāni tamekadantaṃ śaraṇaṃ vrajāmaḥ || 16||

त्वदाज्ञया सृष्टिकरो विधाता त्वदाज्ञया पालक एव विष्णुः ।त्वदाज्ञया संहरको हरोऽपि तमेकदन्तं शरणं व्रजामः ॥ १७॥

tvadājñayā sṛṣṭikaro vidhātā tvadājñayā pālaka eva viṣṇuḥ |tvadājñayā saṃharako haro'pi tamekadantaṃ śaraṇaṃ vrajāmaḥ || 17||

यदाज्ञया भूर्जलमध्यसंस्था यदाज्ञयाऽपः प्रवहन्ति नद्यः ।सीमां सदा रक्षति वै समुद्रस्तमेकदन्तं शरणं व्रजामः ॥ १८॥

yadājñayā bhūrjalamadhyasaṃsthā yadājñayā'paḥ pravahanti nadyaḥ |sīmāṃ sadā rakṣati vai samudrastamekadantaṃ śaraṇaṃ vrajāmaḥ || 18||

यदाज्ञया देवगणो दिविस्थो ददाति वै कर्मफलानि नित्यम् ।यदाज्ञया शैलगणोऽचलो वै तमेकदन्तं शरणं व्रजामः ॥ १९॥

yadājñayā devagaṇo divistho dadāti vai karmaphalāni nityam |yadājñayā śailagaṇo'calo vai tamekadantaṃ śaraṇaṃ vrajāmaḥ || 19||

यदाज्ञया शेष इलाधरो वै यदाज्ञया मोहप्रदश्च कामः ।यदाज्ञया कालधरोऽर्यमा च तमेकदन्तं शरणं व्रजामः ॥ २०॥

yadājñayā śeṣa ilādharo vai yadājñayā mohapradaśca kāmaḥ |yadājñayā kāladharo'ryamā ca tamekadantaṃ śaraṇaṃ vrajāmaḥ || 20||

यदाज्ञया वाति विभाति वायुर्यदाज्ञयाऽग्निर्जठरादिसंस्थः ।यदाज्ञया वै सचराऽचरं च तमेकदन्तं शरणं व्रजामः ॥ २१॥

yadājñayā vāti vibhāti vāyuryadājñayā'gnirjaṭharādisaṃsthaḥ |yadājñayā vai sacarā'caraṃ ca tamekadantaṃ śaraṇaṃ vrajāmaḥ || 21||

सर्वान्तरे संस्थितमेकगूढं यदाज्ञया सर्वमिदं विभाति ।अनन्तरूपं हृदि बोधकं वै तमेकदन्तं शरणं व्रजामः ॥ २२॥

sarvāntare saṃsthitamekagūḍhaṃ yadājñayā sarvamidaṃ vibhāti |anantarūpaṃ hṛdi bodhakaṃ vai tamekadantaṃ śaraṇaṃ vrajāmaḥ || 22||

यं योगिनो योगबलेन साध्यं कुर्वन्ति तं कः स्तवनेन स्तौति ।अतः प्रणामेन सुसिद्धिदोऽस्तु तमेकदन्तं शरणं व्रजामः ॥ २३॥

yaṃ yogino yogabalena sādhyaṃ kurvanti taṃ kaḥ stavanena stauti |ataḥ praṇāmena susiddhido'stu tamekadantaṃ śaraṇaṃ vrajāmaḥ || 23||

गृत्समद उवाचएवं स्तुत्वा च प्रह्लाद देवाः समुनयश्च वै ।तूष्णीं भावं प्रपद्यैव ननृतुर्हर्षसंयुताः ॥ २४॥

gṛtsamada uvācaevaṃ stutvā ca prahlāda devāḥ samunayaśca vai |tūṣṇīṃ bhāvaṃ prapadyaiva nanṛturharṣasaṃyutāḥ || 24||

स तानुवाच प्रीतात्मा ह्येकदन्तः स्तवेन वै ।जगाद तान् महाभागान् देवर्षीन् भक्तवत्सलः ॥ २५॥

sa tānuvāca prītātmā hyekadantaḥ stavena vai |jagāda tān mahābhāgān devarṣīn bhaktavatsalaḥ || 25||

एकदन्त उवाचप्रसन्नोऽस्मि च स्तोत्रेण सुराः सर्षिगणाः किल ।वृणुध्वं वरदोऽहं वो दास्यामि मनसीप्सितम् ॥ २६॥

ekadanta uvācaprasanno'smi ca stotreṇa surāḥ sarṣigaṇāḥ kila |vṛṇudhvaṃ varado'haṃ vo dāsyāmi manasīpsitam || 26||

भवत्कृतं मदीयं वै स्तोत्रं प्रीतिप्रदं मम ।भविष्यति न सन्देहः सर्वसिद्धिप्रदायकम् ॥ २७॥

bhavatkṛtaṃ madīyaṃ vai stotraṃ prītipradaṃ mama |bhaviṣyati na sandehaḥ sarvasiddhipradāyakam || 27||

यं यमिच्छति तं तं वै दास्यामि स्तोत्रपाठतः ।पुत्रपौत्रादिकं सर्वं लभते धनधान्यकम् ॥ २८॥

yaṃ yamicchati taṃ taṃ vai dāsyāmi stotrapāṭhataḥ |putrapautrādikaṃ sarvaṃ labhate dhanadhānyakam || 28||

गजाश्वादिकमत्यन्तं राज्यभोगं लभेद् ध्रुवम् ।भुक्तिं मुक्तिं च योगं वै लभते शान्तिदायकम् ॥ २९॥

gajāśvādikamatyantaṃ rājyabhogaṃ labhed dhruvam |bhuktiṃ muktiṃ ca yogaṃ vai labhate śāntidāyakam || 29||

मारणोच्चाटनादीनि राज्यबन्धादिकं च यत् ।पठतां शृण्वतां नृणां भवेच्च बन्धहीनता ॥ ३०॥

māraṇoccāṭanādīni rājyabandhādikaṃ ca yat |paṭhatāṃ śṛṇvatāṃ nṛṇāṃ bhavecca bandhahīnatā || 30||

एकविंशतिवारं च श्लोकांश्चैवैकविंशतिम् ।पठते नित्यमेवं च दिनानि त्वेकविंशतिम् ॥ ३१॥

ekaviṃśativāraṃ ca ślokāṃścaivaikaviṃśatim |paṭhate nityamevaṃ ca dināni tvekaviṃśatim || 31||

न तस्य दुर्लभं किंचित् त्रिषु लोकेषु वै भवेत् ।असाध्यं साधयेन् मर्त्यः सर्वत्र विजयी भवेत् ॥ ३२॥

na tasya durlabhaṃ kiṃcit triṣu lokeṣu vai bhavet |asādhyaṃ sādhayen martyaḥ sarvatra vijayī bhavet || 32||

नित्यं यः पठते स्तोत्रं ब्रह्मभूतः स वै नरः ।तस्य दर्शनतः सर्वे देवाः पूता भवन्ति वै ॥ ३३॥

nityaṃ yaḥ paṭhate stotraṃ brahmabhūtaḥ sa vai naraḥ |tasya darśanataḥ sarve devāḥ pūtā bhavanti vai || 33||

एवं तस्य वचः श्रुत्वा प्रहृष्टा देवतर्षयः ।ऊचुः करपुटाः सर्वे भक्तियुक्ता गजाननम् ॥ ३४॥

evaṃ tasya vacaḥ śrutvā prahṛṣṭā devatarṣayaḥ |ūcuḥ karapuṭāḥ sarve bhaktiyuktā gajānanam || 34||

॥ इति श्री एकदन्तस्तोत्रं सम्पूर्णम् ॥

|| iti śrī ekadantastotraṃ sampūrṇam ||